PIANCILNA 25

Keturah tawh Abrahamʼ Suanlekhakte

(1Khang 1:32-33)

1Abraham in Keturah min nei zi dang khat la hi. 2Amah in tua nu tawh ta Zimran, Jokshan, Medan, Midian, Ishbak le Shuah nei hi. 3Jokshan pen Sheba le Dedanʼ pa ahi hi. Dedanʼ tate: Asshurim, Lethusim le Leummim ahi hi. 4Midianʼ tate: Efah, Efer, Hanok, Abida le Eldaah ahi hi. Hihte khempeuh, Keturahʼ suanlekhakte ahi hi.

5Abraham in a neih khempeuh Isaac a pia hi. 6Ahih hangin Abraham in a zi dang tawh a tate tungah zong letsong pia a, ama nuntak lai mahin ama tapa Isaac kiang panin nisuahna lam gamah amaute a sawl khia hi.

Abrahamʼ Sihna le Kivuina

7Abraham, kum za le kum sawm sagih le kum nga a phak ciangin, 8a hu tawpna sang a, a teek, kum tampi a pha, a khanghamin si a, ama mite tawh kivui khawm hi. 9-10Ama tapa Isaac le Ishmael in, Abraham in Hit miteʼ tung panin a lei, Mamre nisuahna lamah a om, Hit mi Zoharʼ tapa Efronʼ lo sung, Makpelah leihawm sungah amah a vui uh hi. Tua lai munah a zi Sarah kiangah Abraham kivui hi.#Pian 23:3-16 11Abrahamʼ sih khit ciangin Pasian in a tapa Isaac thupha pia hi. Isaac, Beer-lahairoi ah a teeng hi.

Ishmaelʼ Suanlekhakte

(1Khang 1:28-31)

12Hihte pen, Abraham in Sarahʼ sila numei ahi Egypt mi Hagar tawh a neih, Abrahamʼ tapa Ishmaelʼ suanlekhakte ahi hi. 13Hihte pen a suahna tawh kizui-in Ishmaelʼ tateʼ min ahi hi: Ishmaelʼ ta upa pen Nebaioth hi a, tua ciangin Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Nafish le Kedemah ahi hi. 16Hihte pen a khua, a phual, a behin ulian sawm le nihte ahi Ishmaelʼ tate le amauteʼ min ahi hi. 17(Ishmael kum za le kum sawm thum le kum sagih a phak ciangin a hu tawpna sang-in si a, a behte tawh kivui khawm hi.) 18Amaute, Egypt nisuahna, Assiria lam Havilah panin Shur dongah teeng uh a, amauʼ sanggamte khempeuh panin amau tuam teen uh hi.

Esau le Jakobʼ Suahna

19Hihte pen Abrahamʼ tapa Isaacʼ suanlekhakte ahi hi. Abraham pen Isaacʼ pa hi a, 20Aram mi Labanʼ sanggamnu, Paddanaram gam a Aram mi Bethuelʼ tanu Rebekah zi-in a lak lai-in Isaac kum sawm li pha hi. 21Isaac in Topaʼ tungah a zi adingin thu ngen hi. Bang hang hiam cih leh amah ciing hi. Topa in ama thungetna pia a, a zi Rebekah gai hi. 22Ama sungah a naute kilaii gawp hi. Amah in, “Hih bang ahihleh bang hangin nungta se ka hi hiam?” a ci hi. Tua ahih ciangin Topa kiangah thukan dingin amah pai hi. 23Topa in ama kiangah,

“Na gil sungah minam nih om a,

nangʼ sung pan a suak mihing nihte

kikhen ding hi.

Khat pen a khat sangin hat zaw dinga,

a u zaw in a nau zawʼ na sem ding hi,”

a ci hi.#Rom 9:12

24Amah a suah hun a tun ciangin, a gil sungah tapeeng om hi. 25A masa pen a sanin hong suak a, a pumpi khempeuh mul a nei puan tawh kibang hi. Tua ahih ciangin ama min dingin Esau phuak uh hi. 26Tua khit ciangin a sanggampa hong suak khia a, ama khut in Esauʼ khetul len hi. Tua ahih ciangin ama min dingin Jakob kiphuak hi. Amauʼ suah ciangin Isaac kum sawm guk a pha hi.

Esau in Ama Innluah za Zuak

27Tua naupangte a khan ciangin, Esau pen gam sung mi sabet siam khat hi a, Jakob ahihleh inn ah om hithiatin a cingkam khat ahi hi. 28Isaac in Esauʼ sa mat sa nene ahih manin Esau mah it zaw a, ahi zongin Rebekah in Jakob it zaw hi.

29Khat vei Jakob in meh huanin a om laitakin gamlak a sa betna panin phukhong vei-in Esau hong ciah hi. 30Esau in Jakob kiangah, “Gil kialin phukhong vei ka hih manin tua na meh san tawm khat hong nesak in,” a ci hi. (Tua ahih manin ama min Edom kici hi.)

31Jakob in, “Na innluah za hong pia lecin ka meh kong pia ding hi,” a ci hi.

32Esau in, “A si ding ka hi ta hi; kei adingin innluah za bangin kimang ding ahi hiam?” a ci hi.

33Jakob in, “Keiʼ tungah hong kiciam masa in,” a ci hi. Tua ahih ciangin ama tungah Esau kiciam a, Jakobʼ tungah a innluah za a zuak hi.#Heb 12:16 34Tua ciangin Jakob in an le bemeh Esau a pia hi. Esau in zong an ne-in tui a dawn khit ciangin a pai nading a zuan hi. Tua ahih manin Esau in a innluah za tua ciang bang bekin a ngaihsun ahi hi.

Currently Selected:

PIANCILNA 25: TBR17

Highlight

Copy