PIANCILNA 21

Isaacʼ Suahna

1A gen sa bangin Topa in Sarahʼ tungah thupha pia a, a gen sa bangin Sarahʼ tungah Topa in hih hi. 2Sarah gai a, ama tunga Pasian in a gen sa hunin a teek zawhin Abraham tawh tapa khat nei hi.#Heb 11:11 3Abraham in Sarah tawh a neih ama tapaʼ min dingin Isaac a phuak hi. 4Pasian in ama tunga a thupiak sa bangin amah in ni giat a phak ciangin a tapa Isaac a vun a at hi.#Pian 17:12; Sawl 7:8 5A tapa Isaac a suah ciangin Abraham kum za pha hi. 6Sarah in, “Pasian in kei adingin nuamin nuihzak nading hong bawlsak khin hi. A za peuhmah in nuamin hong nuih pih ding uh hi,” a ci hi. 7Amah in, “Sarah in nau nawi pia ding ci-in kua in Abrahamʼ tungah gen ngei ding ahi hiam? Ahi zongin a teek khitin amah tawh tapa khat ka nei hi,” a ci hi.

Hagar le Ishmael Kisawl khia

8Naupang khang a, nawi tawh hong kikhen ta hi. Isaac nawi tawh a kikhen ni ciangin Abraham in pawi lianpi khat bawl hi.

9Ahih hangin, Abraham tawh a neih Egypt mi Hagarʼ tapa in ama tapa Isaac a ciamnuih bawlna Sarah in a mu hi. 10Tua ahih ciangin amah in Abrahamʼ kiangah, “Hih sila numei a tapa tawh lawn khia in; bang hang hiam cih leh sila numeiʼ tapa in ka tapa Isaac tawh gamhluah khawm thei lo ding uh hi,” a ci hi.#Gal 4:29-30 11Ama tapaʼ hangin Abrahamʼ tungah thu nuam het lo hi. 12Ahih hangin Pasian in Abrahamʼ tungah, “Tangvalpa le na sila numeiʼ hangin lungkim loin om kei in. Sarah in nangʼ tunga hong gen peuhmah ama hong gen bangin gamta in. Bang hang hiam cih leh Isaac tawh na suanlekhakteʼ min kilo ding hi.#Rom 9:7; Heb 11:18 13Sila numeiʼ tapa zong nangma ta mah ahih manin, minam khatin ka bawl ding hi,” a ci hi.

14Tua ahih ciangin zingsangin Abraham tho baihin, an le tuithawl la-in Hagar pia a, ama liangko tungah naupang tawh suanin a sawl khia hi. Amah paikhia a, Beer-sheba gam sungah a vak kawikawi hi. 15Thawl sunga tui a bei ciangin amah in sawlbawk nuai khat ah naupang lawn hi. 16Tua ciangin amah pai-in a hoih khop khat a gamla, thal lot khat tan bangah a ta nungngatin a tu suk hi. Bang hang hiam cih leh amah in, “Naupangʼ sih hong musak kei in,” a ci hi. Amah nungngatin a tut laitakin naupang nakpi-in a kap hi.

17Pasian in naupangʼ kahna aw a za hi. Pasianʼ vantungmi in vantung panin Hagar sam a, ama kiangah, “Hagar aw, bang in hong lungkhamsak ahi hiam? Lau kei in. Bang hang hiam cih leh naupang a omna munah a kahna awging Pasian in za hi. 18Dingin naupang la inla, na khut tawh kip takin len in. Bang hang hiam cih leh minam lian khatin amah ka bawl ding hi,” a ci hi. 19Tua ciangin Pasian in ama mit haksak a, amah in tuikhuk khat a mu hi. Amah pai-in tui tawh tuithawl dimin naupang a dawnsak hi. 20Pasian in tua naupang ompih a, amah khangto hi. Amah gamlak ah teeng a, thal lot siampa khat hong suak hi. 21Paran gam sungah amah teeng hi. A nu in Egypt gam panin ama ading zi khat a la hi.

Abraham le Abimelek Thuciamna

22Tua hun laitakin Abimelek le a galkap mangpa Fikol in Abrahamʼ kiangah, “Na sepna khempeuh ah Pasian in nang hong ompih hi.#Pian 26:26 23Tua ahih ciangin tu-in kei hitaleh ka tate hitaleh ka suanlekhakte hitaleh tungah a man lopi-in hong bawl loin, nang tungah thuman tak tawh kong gamtat bangin keima tung le tawl khat na omna leitang tungah nong gamtat nadingin Pasian tawh kei tungah hong kiciam in,” a ci hi.

24Abraham in, “Ka kiciam ding hi,” a ci hi.

25Abimelekʼ nasemte in a suh sa tuikhuk tawh kisai thu Abraham in a lungkim lohna Abimelekʼ kiangah a gen ciangin, 26Abimelek in, “Kua in hih hiam ka thei kei hi. Nang nong gen kei a, keimah in tu ni dong ka za nai kei hi,” a ci hi. 27Tua ahih ciangin Abraham in tuu le bawngtalte la-in Abimelek pia a, tua mi nihte in thuciamna khat a bawl uh hi. 28Abraham in a tuu hon sung panin tuunu no sagih tuam koih hi. 29Abimelek in Abrahamʼ kiangah, “Hih na koihtuam tuunu no sagihte bang a cihnopna ahi hiam?” a ci hi.

30Amah in, “Keimah in hih tuikhuk ka tawhna thu ah nang in keima adingin teci na hih theih nadingin nangmah in ka khut sung panin hih tuunu no sagihte na la ding hi,” a ci hi. 31Tua ahih ciangin tua mun Beer-sheba kici hi. Bang hang hiam cih leh amau tegel tua munah thu kiciam uh hi.

32Tua ahih ciangin amaute in Beer-sheba ah thuciamna khat a bawl uh hi. Tua khit ciangin Abimelek le a galkap mangpa Fikol, Filistia miteʼ leitang ah ciahkik uh hi. 33Abraham in Beer-sheba ah makeng kung khat suan a, tua lai munah Tawntung Pasian, Topa a bia hi. 34Filistia miteʼ leitang ah Abraham, sau veipi sung peemta-in a om hi.

Currently Selected:

PIANCILNA 21: TBR17

Highlight

Copy