SAWLTAK 4
4
Upate Mai ah Peter le Johan Kipaipih
1Peter le Johan om khawmin, tua bangin Peter in mite kiangah thu a gen laitakin siampite, biakinn upate le Saddusi mite hong pai uh hi. 2Hih sawltak nihte in misite thokik ding hi, cih a lahtel nadingun sihna panin Jesu thokik hi, ci-in mite kiangah thu hilh uh ahih manin nawngkai a sa uh hi. 3Tua ahih manin amau tegel man uh a, ni tum kuan ta ahih manin a zing ciang dong thong sungah a khum uh hi. 4Ahi zongin amauteʼ thugen a za mi tampi in um uh a, thu um mi tul nga bang a pha ta uh hi.
5A zing ciangin Jew mi makaite, upate le Thukham hilh siate, Jerusalem ah hong kikhawm uh hi. 6Siampi lianpen a sem ngei Annas, siampi lianpen a sem Kaiafas, Johan, Alexander le siampi lian pente beh mi khempeuh tawh kikhopna khat a bawl uh hi. 7Amauteʼ mai ah sawltak tegel dingsak uh a, “Kuaʼ vangliatna le kuaʼ min tawh hih bangin na sem na hi uh hiam?” ci-in a dong uh hi. 8Tua ciangin Kha Siangtho tawh kidimin Peter in dawng a, “Makaite le upate aw, 9hih khebai mipa tungah thuhoih a kibawlna le ama damna thu tawh kisai-in kote thu hong sit na hih uh leh, 10note in singlamteh tungah na thah uh, Pasian in sihna panin a thawhkiksak Nazareth khuami Jesu Khris min vangliatna tawh hih mipa a ci damin hih lai ah ding ahihna thu, note le Israel mi khempeuh in na theih dingun a kilawm thu khat ahi hi. 11Lai Siangtho in,
‘No innlamte in
na nilkhiat uh suangtum pen
innkiu suang bulpi a suak hi,’
ci-in a gen pen hih Jesu ahi hi.#La 118:22 12Ama hang bek tawh hotkhiatna kingah thei ding hi. Bang hang hiam cih leh eite in hotkhiatna i ngah theih nadingin leitung khempeuh ah Pasian in hong piak min dang khat zong om lo hi,” ci-in a gen hi.
13Uliante in Peter le Johan a han mahmahna thu le amaute pilna sang a nei lo mi mawkmawk ahihna thu a theih uh ciangin lamdang a sa mahmah uh hi. Tua ciangin Jesu tawh a kikhawl khin ngeite ahihna uh a phawk uh hi. 14Ahi zongin a kidamsak mipa pen Peter le Johan-te gei ah om gige ahih manin a nial nading uh thu mu zo lo uh hi. 15Tua ahih manin tua inn sung panin amaute pusuaksak phot uh a, tua khit ciangin amaute thu kikumin, 16“Hih mite bang cih ding ihi hiam? Jerusalem khua sunga om mi khempeuh in hih miteʼ bawl a lamdang mahmah nate thei ciat uh a, i nial theih nading bangmah om lo hi. 17Ahi zongin mite lakah hih thute a kitheihthang thuah loh nadingin, Jesuʼ min tawh kuama kiangah thu a gen ngei nawn loh nadingun taii ni,” a kici uh hi.
18Tua ciangin sawltakte samkik uh a, Jesuʼ min tawh thugen ahi a, thuhilh ahi zongin a hih nawn het loh nadingun thu a pia uh hi. 19Ahi zongin Peter le Johan in, “Noteʼ thu man zawk ding le Pasianʼ thu man zawk ding, Pasianʼ muhna panin koi pen man zaw ding cih thu nomau mah in zong ngaihsun ciat un. 20Tua ahih manin kote in ka muh sa uh le ka zak sa uh thute gen loin ka om thei kei ding uh hi,” ci-in a dawng uh hi. 21Ahi zongin uliante in a khauh zaw-in thu a gen khit uh ciangin a khah uh hi. Hih thupiang hangin mi khempeuh in Pasian phat uh ahih manin hih mite gim a piak nading uh a thu mu thei lo uh hi. 22Bang hang hiam cih leh hih nalamdang a kibawlna mipa pen a khan kum sawm li val a pha khin sa mi khat ahi hi.
Thu Umte in Han nading Thu Ngen
23Peter le Johan a kikhahkhiat khit phetin a lawmte uh kiangah pai-in siampi liante le upate in amaute tungah a thugente khempeuh a zasak uh hi. 24A lawmte un hih thu a zak uh ciangin a vekpi-un lungsim kikhatin Pasianʼ kiangah thu ngen uh a, “Vanlelei, tuipi tuineu le a sunga om khempeuh a piangsak Topa aw,#Pai 20:11; Neh 9:6; La 146:6 25koteʼ pupi, na nasem pa David tungah na Kha Siangtho tawh thu na gen a, amah in,
‘Bang hangin
Gentail mite heh mahmah a,
a tangtung lo dingpi
vaihawm uh ahi hiam?
26Topa le ama Khris
a do dingin
leitung kumpite kithawi uh a,
gam ukte kikaikhawm uh hi,’
ci hi.#La 2:1-2 27A cih mah bangin Herod le Pontias Pilat in hih khuapi sung teek mahah Gentail mite le Israel mite tawh kikupna nei uh a, nangmah in Khris dingin na bawl, a siangtho na Nasem pa Jesu thah dingin a vaihawm uh hi.#Luk 23:1,7-11; Mat 27:1-2; Mrk 15:1; Joh 18:28-29 28Nangmah in na deihna bangin a piang dingin na vangliatna tawh na khensat sa thu khempeuh a sem dingin amaute kikhawm uh hi. 29Tua ahih ciangin Topa aw, amaute in kote hong tawnnate thei inla, nangma nasem kote in lungsim han mahmahna tawh nangma thu ka gen theih nadingun hong huh in. 30Cinate damsak theih nading vangliatna hong pia inla, a siangtho na Nasem pa Jesuʼ min tawh nalamdang kibawl tahen,” a ci uh hi. 31Tua bangin thu a nget khit uh ciangin amauteʼ kikhopna mun hong kiliing gawp hi. Amaute khempeuh Kha Siangtho tawh kidim uh a, hang takin Pasianʼ thu gen ding a kipan uh hi.
Na Khempeuh Neikhawm
32Thu um mi khempeuh a lungsim uh le a ngaihsutna uh kikhat uh a, kuamah in ama neihsa kei-aʼ tuam ci loin, a neih khempeuh uh a neikhawm ciat uh hi.#Sawl 2:44-45 33Topa Jesuʼ thawhkikna thu, sawltakte in vangliatna tawh teci pang uh a, Pasian in amaute khempeuh tungah thupha tampi a pia hi. 34-35Inn ahi a, lo ahi zongin a neite in zuak uh a, a sum ngahte uh sawltakte kiangah a ap uh hi. Mi khempeuh tungah a kisapna bang ciat un a sumte hawm uh ahih manin amaute lakah sum kitangsam kuamah om lo uh hi. 36Tua hi a, Saipras tuikulh a suak, Levi mi Josef, sawltakte in Barnabas (Hanthawn Siampa a cihnopna) min a phuah pa in, 37ama neih a lo zuak a, a sum hong paipihin sawltakte khut sungah a ap hi.
Currently Selected:
SAWLTAK 4: TBR17
Highlight
Share
Copy
Want to have your highlights saved across all your devices? Sign up or sign in
Tedim Bible © Bible Society of Myanmar, 2017.
Free Reading Plans and Devotionals related to SAWLTAK 4
Reading the Bible in Historical Sequence Part 11
Fueled by Faith
Through the Bible: Acts
