Markus 1

Bápṭismadoya Yaháyar tobolik

(Mot 3:1-12; Luk 3:1-9,15-17; Yoh 1:19-28)

1Yián óilde Allar Fua Isá Mosihr#1:1 Mosih óilde eggwá Girík lofzó aar Hibrú zuban ot ‘Mesáiya’ hoó, duníyan or maáni óilde ‘Basíloiya wa’ baabute kúchóbor, 2zendilla nobi Yesáyahr kitab ot leikká asé:

“Soó, Añí Añr hóborgwa re Tuáñr age difeṛáir,

zibá ye Tuáñr foñt toiyar goríbo.”#1:2 Malakí 3:1

3“Moidan zagat ezzone guzori-guzori eén hoór,

‘Mabud or foñt toiyar goró;

Íbar rasta uzu goró.’ ”#1:3 Yesáyah 40:3

4Bápṭismadoya Yaháya aái moidan zagat tobolik goittó de, gunár maf fai bolla touwá gorí bápṭisma loito. 5Fura Yohúdiya elakar manúc beggún edde Jerúsalem or tamám bácinda ókkol neeli yóggwar hañse giiyé, aar nizor-nizor guná ókkol cíkar gorí Jordán hál ot yóggwa ttu bápṭisma loiyé. 6Yaháya ye uñṭ or keñc loi banaiya hoor fiñdíto, aar yóggwar keeñil ot samarar duali baindá tákito. Yóggwa ye háito de óilde fíring edde zooñl or modú. 7Yóggwa ye endilla tobolik goittó, “Añí baade eén Ekzon aiyér, zibár tokka añr túaro ḍoóñr. Añí niyúri Íbar cenṭár or fíta kúli bolla úddwa laayek no. 8Añí de tuáñra re fanít éna bápṭisma dír, montor Íba ye tuáñra re Pak-Ruh lói bápṭisma díbo.”

Isár bápṭisma

(Mot 3:13-17; Luk 3:21-22)

9Hé din ókkol ot eén óiye, Isá Galil or fara Nasárat ottu aái yore Jordán hál ot Yaháya ttu bápṭisma loiyé. 10Isá faní ttu kul ot uiṭṭégai mottor, Íba ye dekér de, asman kúlizargoi aar Pak-Ruh hoitor or ḍóilla ói Íbar uore lamer. 11Aar héñtte asman ottu eggwá abas aiccé de, “Tuñí Añr adorja Fua, Tuáñre lói Añí bicí kúci.”

Isá re entán goijjé

(Mot 4:1-11; Luk 4:1-13)

12Éhon or bútore Pak-Ruh ye Íba re moidan zagat difeṛáidiye. 13Aar héṛe moidan zagat Íba re Cóitane salic din foijjonto entán gorát accíl. Íba jonggoli januwar ókkol or fúañti tákito, aar fírista ókkole Íba re hédmot goittó.

Galil ot Isár ham or cúru

(Mot 4:12-17; Luk 4:14-15)

14Yaháya re ziyól ot dí baade, Isá Galil ot aái Allar kúchóbor tobolik gorát doijje, 15endilla hoói, “Októ óiye, Allar raijjo ḍáke aáigiyoi. Touwá goró edde kúchóbor ore ekin goró.”

Cúrur cárit ókkol ore ḍaikké

(Mot 4:18-22; Luk 5:1-11)

16Isá Galil Ḍiír hañsa báy zaar de októt, Íba ye Sáimon ore edde íbar bái Enderiyas ore deikké. Héñtte ítara ḍiít zal marer, kiyólla-hoilé ítara zailla accíl. 17Isá ye ítara re hoór de, “Añr fisáli doro, Añí tuáñra re manúc dóre de zailla banaiyúm.” 18Ítara éhon or bútore ítarar zal lun eri, Íbar fisáli doijje.

19Híyan ttu ekkágori giiyé rár, Íba ye Zebedair fua Yakub ore edde yóggwar bái Yohánna re deikké, zetará noowr uore zal ṭuner. 20Íba ye ítara re éhon mataiyé, tói hétunot ítara nizor baf Zebedaire noow ot muzur ókkol or fúañti eri, Íbar fisáli doijje.

Ezzon hóraf jine-faiya manúc

(Luk 4:31-37)

21Tarfore ítara Kaparnahúm ot giiyé, aar ebaadot-or-din aiccé rár Isá toratori mujilíc-hánat zai taalim diyat doijje. 22Manúc ókkol Íbar taalime ammúk óizaytoi, kiyólla-hoilé Íba ye ítara re taalim dito de ezzon adíkar olar ḍóilla góri, alem ókkol or ḍóilla góri no. 23Héṛe ítarar mujilíc-hánat ezzon hóraf jine-faiya manúc accíl. Yóggwa ye guzori hoór de, 24“Ó Isá Nasári, añára llói Tuáñr kii ham asé? Tuñí añára re dónco goittó aiccó de né? Añí zani Tuñí hon, Tuñí óilade Allar Pakzon nwá.”

25Montor Isá ye jin nwá re jéjjeṛai hoór de, “Nizám ó, yoggwár bútottu neelizagói.” 26Tói hé hóraf jine yóggwa re musori eggwá ḍoóñr guzoran mari yóggwar bútottu neeligiyói.

27Híyane manúc beggún eén taajup óigiyoi, ítara ezzon ore ezzone hoór de, “Yián kii? Yián toh ekkán noya taalim! Íba ye adíkare hóraf jin ókkol ore úddwa hókum déh aar híine Íbar hotá mane!” 28Éhon or bútore Íbar hóbor Galil or sairó ḍák or elaka beggún ot fóligiyoi.

Boóut biyaraimma re gom goijjé

(Mot 8:14-17; Luk 4:38-41)

29Yárbaade ítara mujilíc-hána ttu neeli mottor, Yakub edde Yohánnar fúañti Sáimon edde Enderiyas or gór ot giiyé. 30Héñtte Sáimon or hóuri gaatzore bisánat fori accíl. Ítara éhon Isá re yóggwar baabute zanaiyé. 31Íba yóggwar ḍáke aái yóggwa re át ot dóri tuillíl, tói yóggwa ttu gaatzor giiyégoi, baade yóggwa ye ítara re meémandari gorát doijje.

32Háñzinna beil góli baade, maincé Íbar hañse biyaraimma beggún ore edde búte-faiya manúc ókkol ore ainníl. 33Aar guñṛa cóor or manúc duwar or gurat zoma óoil. 34Isá ye boóut biyaraimma ókkol gom goijjé zetará ḍoilla-boḍoilla biyarame duk faat accíl, edde boóut bút ókkol dáfaiye; montor Íba ye bút ókkol ore matitó no dito, kiyólla-hoilé híine Íba hon de siníto.

Galil ot Isár tobolik

(Luk 4:42-44)

35Baade biínna kúb sóore andár tákite, Isá uṛí gór ottu neeli ekkán bocóti-sára zagat giiyé, aar héṛe dua goijjé. 36Sáimon edde yóggwar sáañti ókkole Íba re tuwaitó neeillé. 37Ítara Íba re tuwai fai hoór de, “Beggúne Tuáñr talac gorér.”

38Íba ye ítara re hoór de, “Aiyó, añára atehañsór honó ekkán farat zai, zeéne héṛe yó Añí tobolik gorí fari, kiyólla-hoilé Añí hétolla beh neeillí.” 39Tói Íba Galil or agagura zai-zai ítarar mujilíc-hána ókkol ot tobolik gorát accíl edde bút ókkol dáfat accíl.

Ezzon kurus biyaraimma pak-sáf óiye

(Mot 8:1-4; Luk 5:12-16)

40Ezzon kurus biyaraimma Isár hañse aái sóida gorí Íba re fóriyat gorér de, “Tuñí sailé añré pak-sáf gorí faribá.”

41Isá ttu feṭfuri Nizor át barái yóggwa re dóijje, aar hoór de, “Añí saái; pak-sáf óizogoi.” 42Tói éhon or bútore yóggwa ttu kurus biyaram giiyégoi, aar yóggwa pak-sáf óigiyoi.

43Baade Isá ye yóggwa re dorógori nicót gorí éhon-éhon duñraidiyé, 44yóggwa re hoiyé de, “Saiyó, honókiyo re kessú no zanaiyó; bólke zoo, nizoré imam or hañse dahógoi, aar tuñí pak-sáf óiyo de híyan maincór hañse gobá ó fan, Muúsa ye hókum díye de hé kurbani dogói.” 45Lekin yóggwa baáre zaigói kúlamela góri zanai-zanai agagura hé hóbor fólat doijje, eddúr zeén níki Isá honó cóor or bútore ar kúlamela góri góli nó fare, bólke ekkán bocóti-sára zagat zai táka foijjé. Toóu agagura ttu manúc ókkol Íbar héṛe aitó.

Currently Selected:

Markus 1: RST

Highlight

Copy