Moti 4

Isá re entán goijjé

(Mak 1:12-13; Luk 4:1-13)

1Yárbaade Pak-Ruh ye Isá re moidan zagat loigiyé, zeéne Íba re Ibilíce entán goré. 2Salic din salic rait ruza rakí baade Íba ttu búk laiggé. 3Hé októt entán-goróya aái Íba re hoór de, “Zodi Tuñí Allar Fua de óile, e fattór gún ore ruṭi óizaytoi hókum dóh.”

4Montor Íba ye zuwabe hoór de, “Pak-kalam ot endilla asé, ‘Manúc siríf ruṭi loi base de no, bólke Allar muk ottu neele de hárr hotá lói beh base.’ ”#4:4 Córiyot-nama 8:3

5Tói hé Ibilíce Íba re pak cóor gán ot loizai, baitul-mukaddos or tullit tíyagaraiye, 6baade Íba re hoór de, “Zodi Tuñí Allar Fua de óile, nise záp maro; kiyólla-hoilé pak-kalam ot toh endilla asé,

‘Íba ye Tuáñr baabute Nizor fírista ókkol ore hókum díbo;

tói ítara nizor áte Tuáñre dórifelaibo,

zeéne Tuáñr ṭénge honó fattór ot duk no faa.’ ”#4:6 Zobur 91:11,12

7Isá ye ítare hoór de, “Pak-kalam ot toh yián óu asé, ‘Tuñí tuáñr Mabud Alla re entán no goríba.’ ”#4:7 Córiyot-nama 6:16

8Tarfore Ibilíce Íba re eggwá uñsol faár ot loizai, duniyair tamám raijjo ókkol edde híin or fura cáandari daháiye. 9Tói íte hoór de, “Zodi Tuñí meṛit fori añré sóida goró, añí iín beggún Tuáñre diifélaiyum.”

10Isá ye ítare hoór de, “Cóitan, dur ó! Pak-kalam ot endilla asé, ‘Tuñí tuáñr Mabud Alla re beh sóida goríba, aar siríf Íbar beh ebaadot goríba.’ ”#4:10 Córiyot-nama 6:13

11Hétunot Ibilíce Íba re eri giiyégoi, aar fírista ókkol aái Íba re hédmot gorát doijje.

Galil ot Isár ham or cúru

(Mak 1:14-15; Luk 4:14-15)

12Zeñtté Isá ye Yaháya re ziyól ot díye de fúinne, Íba Galil ot giiyói; 13aar Nasárat cóor félai, Zebulun edde Nafṭalir zagat ḍiír hañsa loi asé de Kaparnahúm cóor ot zai táikkegoi. 14Híyan etollá óiye, zeéne nobi Yesáyahr duara hoóil de yián fura ó,

15“Zebulun or elakat edde Nafṭalir elakat,

doijjar rastat, Jordán hál or okule,

Beyohúdi ókkol or Galil ot,

16ze manúc ókkol andár ot accíl,

ítara ekkán ḍoóñr foór deikké,

zetará moot or andárja mulluk ot accíl,

ítarar hañse foór óiye.”#4:16 Yesáyah 9:1,2

17Hé októt lóti Isá ye eén hoói tobolik gorát doijje, “Touwá goró, kiyólla-hoilé asmani raijjo ḍáke aáigiyoi.”

Cúrur cárit ókkol ore ḍaikké

(Mak 1:16-20; Luk 5:1-11)

18Isá Galil Ḍiír hañsa báy áñṛi zaar de októt, Íba ye duwá bái deikké, yáni Sáimon, zibá re Fitor ḍaikké edde íbar bái Enderiyas ore. Héñtte ítara ḍiít zal marer, kiyólla-hoilé ítara zailla accíl. 19Íba ye ítara re hoór de, “Añr fisáli doro, Añí tuáñra re manúc dóre de zailla banaiyúm.” 20Ítara éhon or bútore ítarar zal lun eri, Íbar fisáli doijje.

21Híyan ttu aró hoddúr giiyé rár, Íba ye aró dui bái deikké, yáni Zebedair fua Yakub ore edde yóggwar bái Yohánna re. Héñtte ítara noowr uore ítarar baf Zebedair fúañti zal ṭuner. Íba ye ítara re mataiyé, 22hétunot ítara éhon or bútore noow gán edde baf ore eri, Íbar fisáli doijje.

Isár taalim edde biyaram gom gorá

(Luk 6:17-19)

23Isá ye Galil or agagura zai-zai Yohúdir mujilíc-hána ókkol ot taalim dito edde raijjor kúchóbor tobolik goittó, aar maincór fottí kisím or biyaram edde fottí kisím or ocúk ókkol gom goittó. 24Íbar hóbor Siíriyar agagura fóligilgoi; aar maincé biyaraimma zetará ttu ḍoilla-boḍoilla biyaram asé edde duk faar, zetará búte-faiya, zetará ttu súañfíra asé, zetará añtur, ítara beggún ore Íbar hañse ainné, aar Íba ye ítara re gom goijjé. 25Galil ottu, Dekapólis#4:25 Dekapólis óilde éggwa Girík lofzó, zibár maáni doc cán cóor or elaka ottu, Jerúsalem ottu, Yohúdiya ttu, edde Jordán hál or farkul ottu dol-dol manúc Íbar fisá doijjil.

Currently Selected:

Moti 4: RST

Highlight

Copy