Mark 6

Jesu kha Nazareth a leidonmuk

(Mat 13:53-58; Lk 4:16-30)

1Jesu ning khawa munkha amathaanli ama khopui teng aleikir je, ama thiemroi ngai num anlei jui. 2Jehudi Serni kinining synagogue a minchuna aleiphut jei. Mikatam tak khana khan anlei om, achong kha anjet a anmani rikip ning kinlak ansak rip je. <<Hiwa ngaihi khonarimo apha e? Ang singna mi amadeng akin pehi? Kho-ong mi sinkinlak ngai athotor hi? 3Amahi thingsin kothopa, Mary sapa, James, Joseph, Judas, khan Simon ngai ulenai kha elei mi? Anainu ngai hin an-om elei mi?>> khanchu anmani ning ama leidon muk je.

4 # Jn 4:44 Jesu ning anmanideng aleiti, <<Pathien chongkachoi ngaihi, akhosung le a-insung, khan ulenai elei a, mun rikip achu kajana annei e.>>

5Khawa munnakhan amaning akadam mak alek chunga akut ada a amindam elei a, sinkinlak ite leitho tormak. 6Mipui ning taksenna anleineimak jarra, Jesu ning aleingak.

Jesu ning thiemroi somle inni amuso

(Mat 10:5-15; Lk 9:1-6)

Khawasoli Jesu ning ase a asir apanga kaom kho ngaideng aleiminchu. 7Amaning thiemroi somle-inni ngai kha akoitup a khan mi ini-ini-a aleimoso. Ratha kathamak ngai chunga thotorna ratha aleipe, 8#Lk 10:4-11khan chong aleipe, <<Ninlam nin se na khengrol elei a neinak inkhat te ron dal muru, waipol, paitu, sumsankok a sumsan, choi muru. 9Keto chuongru, tak songkol akikhel choi muru.>> 10Amaning anmanideng arilnok a, <<Mingai ning analeidonna mun nakhan, amun kha nada mak laiseng khawa inna khan omru. 11#Sin 13:51Khopui inkhat a nahong lut karkhan mi ngai ning analeidon mak a-imakli nachong an rangaimak inchu, khawa mun kha leidaru khanna ninkepha ruhut leikithing thak ru. Khawa kha anmani sik mulungkoina achang sik!>>

12Khawa soli anmani ning anleisuok a mingai kha ansetna ria mulung thulnasik chong anleiril. 13#Jam 5:14Anmani ning khori katamtak holsuokna anleinei, khan akana mi katamtak ngai chunga Olive sarek akonot a anmindam jei.

John Baptist thina

(Mat 14:1-12; Lk 9:7-9)

14 # Mat 16:14; Mk 8:28; Lk 9:19 Tunchu Reng Herod#6:14 Reng Herod: Herod Antipas, Galilee waikaronpa. ning angrikip chungchanga ajet je, ajarchu Jesu riming athana kha mun rikip a alei kinthang je. Mi alek ning anleiti, <<John Baptist thina ria ahong ringnok je! Khawa jarra hi-ang sinkinlak thonasik ranak hi anei e.>>

15Achang rawang alek ning anleiti, <<Amahi Elijah e.>>

Alek ning anleiti, <<Amahi atenlai aleikaom Pathien chongkachoi anga Pathien chongkachoi inkhat ang e.>>

16Herod ning hiwo ajet a, amaning aleiti, <<Amahi John Baptist e! Keining alu kalei tan e je, tak ahong ringnok je!>> 17#Lk 3:19,20Herod atakning John surna sik chong aleimoso, khan thir rui ning aleikhit a khan mikhumna sunga aleida. Herod ning hi-ang aleitho hi anaipa Philip numei amaning alei kusut a alei ompui hi, Herodias jarra e. 18John Baptist ning Herod deng hi-ang aril pe chak, <<Nanaipa numei na-ompui sik hi nangsik akidik imak!>>

19Khawa jarra Herodias ning John kha lei-en nommak khana that sik a aleimindon, tak Herod a-om jarra leitho tormak. 20Herod ning John kha aleichi ajarchu John kha mi katha le akintheng e ti aleijet. Herod ning John chongril arangai phakhan mulung aleipong inum ama chongril kha aleirangainom, khawa jarra amakha akathatak a aleida.

21Atorna Herodias ning apha kathatak aleimu je. Khawakha Herod aneining nikho e, khawa ning amaning ram waikaron akolok rikip, raal lamkakei, khan Galilee ram kakei ngai bak minchunna athopui na pha kha e. 22Herodias #6:22 Herodias sanu; manuscripts alek achu Ama sanu Herodias. sanu aheilut a ahong laam, khan Herod le khomol ngaiseng kha anmulung aleimintai. Khawa jarra rengpa ning numeisanu deng aleiti, <<Angmi nangning nomonom? Kei ning nang nomonom rikip kanape sik.>> 23Khan amaning kintepna katamtak le akinhakserra aleiti, <<Nangning ninini rikip kei ning kanapesik, karengram aherkhat inum!>>

24Khawa jarra numeisanu ning asuok a anudeng aleirakal, <<Angmi keining kini sik?>>

Anuning aleimasang, <<John Baptist lu.>>

25Numeisanu kha kinnot a aheikirra rengpa deng ahongni, <<Kei ning hiwa mun takhin khan atunhin John Baptist lu kha kheeng chunga nanape sik komonom!>>

26Hiwa hin Rengpa amulung apong je, tak ama khomol ngai maikunga alei kintep jarra khan numeisanu nina kha nang leititor mak je. 27Khan rengpa ning akangaak raalmi inkhat khawa laitak khan John lu heichoi sik a chong aleipe a aleitir je. Akangaak pa kha mikhumna a ahong se-a, khan John lu kha ahong tenjei; 28Khan kheeng inkhat chunga alu kha aheichoi minlut a numeisanu deng aleipe, amanu ning khawakha anudeng aleipe jei. 29John thiemroi ngaining khawa chongkha anjetli, anmani anhonga khan akulong kha anlei-a khan thaan na anwaphum jei.

Jesu ning mipui katamtak awai

(Mat 14:13-21; Lk 9:10-17; Jn 6:1-14)

30Tirle ngai kha anhong kirra khan Jesu le anlei kinmu, khan ansintho rikip le mi anlei minchu ngaikha amadeng anlei ril. 31Khawakhan mi akase le akahong mikatam tak anlei-om jarra Jesu le athiemroi ngai bu baksik apha num leimutor muk. Khawa jarra Jesu ning anmanideng aleiti, <<Eini nibinga ni-om thei nasik munna se inlang pong hongminchum rangri,>> 32Khawa jarra mun daina inkhat a anmani bei rukuong anchuong a anleise je.

33Achang rawang anmani anse kha mi katamtak ning anmu a khan anmani an e tikha anleijet; khawa jarra khopui rikip a mi anhong suok a khan antaan a Jesu le athiemroi ngai makma amun kha anleitung masa jei. 34#Tel 27:17; 1 Ren 22:17; 2 Kha 18:16; Eze 34:5; Mat 9:36Jesu ning rukuong ria aheisuok pha, mipui katamtak ngaikha aleimu, khan anmani sik a amulung kha minrengna asip je, ajarchu anmani ngaikha keelmong kakhal kinchal lei keelmong anlei ang je. Khawa jarra amaning chong katamtak aminchu aphut je. 35Khan kholei aheitung phakhan, athiemroi ngai anhonga amadeng anleiti, <<Tunchu apha hi ommak je, khan amun hi mi daina mun e. 36Mipui ngai hi minse inlang, anmani ning anaina khosung a-imakli ruhonna se inlang anbak nasik kinrocho rusu.>>

37Jesu ning aleimasang, <<Nangni ning anmanideng angmikhat baknasik peru.>>

Anmani ning anleirakal, <<Keinining kinseli sumsan#6:37 sumsan: hiwo sumsan hichu nikho inkhatta ratha man e (Mat 20:2 anri) reini ning waipol kinrachopeli anmani kinminbak sik hi nangning numunom mi?>>

38Khawa jarra Jesu ning anmanideng aleirakal, <<Waipol angjet mo ninnei e? Se inlang hong en ru.>>

Anmani ning anhong entok a, <<Waipol ranga khanchu nga inni,>> tia anlei minjet.

39Khan Jesu ning athiemroi ngaideng mipui ngai kha arup-rup a khoithen nasik le aka-em sachik chunga min-ong nasik aleiminjet. 40Khawa jarra mipui ngaikha reikhat rup khan somranga rup mintaang a ankin-ong je. 41Khan Jesu ning waipol ranga le nga inni kha alei a, marwan teng a-inna, khan Pathien aminpak. Waipol kha aher akhoi a khan mingai deng semnasik athiemroi ngaideng ape je. Amaning nga inni khanum anmani rikip deng asem pe je. 42Mi rikip ning anbak a khan anlei khoprip. 43Khawa soa athiemroi ngaining mingai bak akinlek waipol le nga kha taidon somle inni akisip mer an rut. 44Khawaning Awai minkhop pasal seng ngaikha lising ranga an e.

Jesu tui chunga alon

(Mat 14:22-33; Jn 6:15-21)

45Amaning mipui ngai minse sik atilai, kinranga Jesu ning athiemroi ngaikha rukuong a aminlut a tuitham ralkhat, Bethsaida khopui ama modondet a aleiminse. 46Jesu ning mingai akinthen pui soli, amaning chingmuolla Pathien nina aleise. 47Kholeiteng ahong tunga, Jesu tuitham panga abinga alei omlai khan rukuong khachu tuitham lai a aleiom. 48Amaning athiemroi ngai pongna kha aleimu, ajarchu phaiwo karang karat kha anlei kintongpui; kha-ang khan jingteng pung inthum le pung kuruk karra Jesu ning tui chunga anmanideng aheiwa a amaning anmanikha aheikhel deng karkhan,#6:48 anmanikha aheikhel karkhan; anmani le kinchuna. 49Amaning tui chunga ahonglon kha anmukar khan, <<Hiwa hichu raikho e!>> antia anleikheek. 50Anmani ning anleimu karkhan anmani rikip anleikinlai.

Khawa laitak khan Jesu ning anmanideng aleiti, <<Kin-ngam na nei ru! Chimuru, Kei ki e!>> 51Khan amaning anmani rukuong sunga aleilut, khan phaiwo kha aleibang jei. Khan athiemroi ngaining anleingak rangra, 52ajarchu anmani ning mipui lising ranga awaikha ajar leijet muk; anmulung ning khawa kha leisur tormuk.

Jesu ning Gennesaret a mikana amindam

(Mat 14:34-36)

53Anmani ning tuitham anleirakaan a Gennesaret ramteng anheiwa, khanna khan rukuong kha tuitham panga anleikhit. 54Anmani ning rukuong anleida solimli, mi ngaining Jesu kha anleijet kalen. 55Khan khawa ram mipui ngaining anleijet karkhan khawa munteng anheitaanna anheiwa; khan khonna a-e inum ama aom ti anjet inchu, akana ngai amadeng anheiroi a apher chunga anleiminjal. 56Jesu sena mun rikip, kho, khopui, ruhon kutung achanga, mingai ning akana ngaikha keithel munna anheiroi a apon morbei inum mintok nasik anleini. Khan khawa pon mor aleikotok rikip ngaikha anleidam.

Currently Selected:

Mark 6: MRK

Highlight

Copy