Mark 15

Jesu Pilate maikung anheiroi

(Mat 27:1,2,11-14; Lk 23:1-5; Jn 18:28-38)

1Jingteng ma a thiempu kolok ngaining upa ngai, Dan Oja ngai, khan upa rupngai ankholo a kinrangtak a ankintup a khan chong anleimintuk. Anmani ning Jesu kha thirrui a ankhit a anleiroi, khan Pilate kutchunga anleipe. 2Pilate ning chong aleirakal, <<Nang Jehudi ngai Reng mo ni-e?>>

Jesu ning aleimasang, <<Nangning niti kha e je.>>

3Thiempu kolok ngaining Jesu kha akikhella anleirilset, 4khawa jarra Pilate ning Jesu deng aleirakal nok, <<Nang namasanglei sik mo ni-e? Rangairo anmani rikip ning nuchunga anirilset hi!>>

5Jesu ning chongbai khat num leimasang nokmak, khawa jarra Pilate ning aleingak.

Jesu thatnasik chongtan

(Mat 27:15-26; Lk 23:13-25; Jn 18:39--19:16)

6Rakan Reikahoi anthoracham ansurra anda ngai karra mipui anmanomna miring inkhat kha Pilate ning aleimoso pe chak. 7Khawa lai khan Barabbas anti raalruk ngaile mikathat miring inkhat mikhumna a anlei om. 8Mipui ngai kha anhong kintup a aleitho ang a athonoknasik Pilate deng anhongti, 9Pilate ning anmanideng aleirakal, <<Jehudi ngai Rengpa kha kunumoso pe sik nin monom mi?>> 10Thiempu kolok ngaining Jesu chunga thangse annei jarra akut chunga anhei pesuok e ti kha Pilate ning aleijet.

11Takkha thiempu kolok ngaining mipui ngai kha anleimathok a, Barabbas pot kha moso nasik a anlei minti. 12Pilate ning mipui deng aleirilnok, <<khachu nangni ning Jehudi ngai Reng tia ninkoi padeng kei angmo ninimintho nom?>>

13Anmani ning anhei ong malet a, <<Cross a makhai ro!>> anti.

14Takkha Pilate ning aleirakal, <<Angsik jarra, amaning ang thothel namo anei e?>>

Anmani ning akikhella an-onga anleiti, <<Cross a makhai ro!>>

15Pilate ning mipui mulungkha aleimintai nom jarra Barabbas kha anmani sik a aleimoso pe jei. Khan Jesu kha anrachak a cross a makhai sik a aleipe jei.

Raalmi ngaining Jesu anmunuiso

(Mat 27:27-31; Jn 19:2,3)

16Raalmi ngaining Jesu kha Ramkoron pa inn tollai sunga ankei minlut a khan raalmi rikip anlei kinkoichun. 17Anmani ning pon sendup akinchuol kha Jesu anleiminsil, liling ria anbol lukhu, kha alu chunga anleiminkhu. 18Khan anmani ngaining <<Jehudi Rengpa niringsei sot rase!>> tia chibei anleitho. 19Anmani ngaining Jesu lukha luchei ning anleirachak, anleimichilthon, khan ankemorkhup anthep a ankinkun a anleikumuk. 20Anmani ning anmunuipui soli, pon sendup akinchuol kha anlik pe a, khan ama pon kha anminsil malet je. Khan cross a makhai thatsik a ankei so je.

Jesu cross a anmakhai

(Mat 27:32-44; Lk 23:26-43; Jn 19:17-27)

21 # Rom 16:13 Lampui-a anmani ning mi inkhat ariming Simon anti aram ria khopui a akahong anlei kintonga, khan raalmi ngaining amakha namrop a Jesu cross kha anlei mindom. Simon kha Cyrene mi e khana Alexander le Rufus ngai pa e. 22Anmani ning Jesu kha Golgotha, hiwa tina chu <<Lusai mun>> antina khan anroi je. 23Khana khan theiburju le lei anminchun kha myrrh anti kha min innasik anleitho, tak Jesu khawa kha lei in mak. 24#Laa 22:18 Khan Jesu kha cross a anmakhai a ama ponder kha anmani ning anleikinsem, atu ningmo pon kinlek kha anpha sik tia machal anlei-en. 25Cross a anmakhai kha jingteng pung ko a-e. 26Ama cross chung a engset chonga hi-anghin anleitar: <<JEHUDI NGAI RENGPA.>> 27Ama le kinroi-a muruk inni, inkhat achangteng, inkhat awoiteng cross a anmakhai del.#15:27 Manuscripts alak achu alam 28 akinchal: Raal rup ngai khale aleikinchun bunga Pathien chong akintheng kha pui amintung (Lk 22:37 enro) #Is 53:12

29 # Laa 22:7; 109:25; Mk 14:58; Jn 2:19 Mi akase akahong ngaining anlu ankalek a chong ero a Jesu deng anleiril: <<O-a! Bek-inn nithet li nithum sunga kasak sik niti khale! 30Atun cross chung ria hong chum inlang, nibinga kinhuk rang ro!>>

31Khawa angkhan thiempu kolok ngai le Dan oja ngai ning Jesu anmunui so-a, inkhat le inkhat ankinbek a, <<Amaning milak chu ahuk a, abinga chu kinhuk tor mak! 32Messiah Israel ngai Rengpa, cross chung ria atun hongchum ro, khan nahongchum kha kinmuli keini ning nataksen kinte!>>

Khan cross a ama le anmakhai bung inni ngai khaning num ama anlei ril set.

Jesu thina

(Mat 27:45-56; Lk 23:44-49; Jn 19:28-30)

33Sunchimma ram pumpui akijing ning aleimukhu, khawakha pung inthum kutung kha-angkhan aleiti je. 34#Laa 22:1 Pung inthum a Jesu rasa kinlaktak a-onga, <<Eloi, Eloi, lema sabachthani?>> ati, hiwa tina chu, <<Ka Pathien, ka Pathien angsikmo kei nana dadoi e?>>

35Khana akaom mi alek ngaining anjet a anti, <<Rangai ru, amaning Elijah akoi hi!>> 36#Laa 69:21 Ankarra mi inkhat ataanna ponlom kha theiburju kuthur kha amiche-a luchei inkhat mor a akithil a, khana ria Jesu ner katung amajop nasik apeli aleiti, <<Ngaakdiri! Elijah ahonga ama cross ria akadom mata sik mi, enri!>>

37Khana rasa kinringa a-onga Jesu kha athi jei.

38 # Hon 26:31-33 Bek-inna andong pon kha achung ria athoi kutung aher inni a akin ther je. 39Khawa mun a cross mudon akingir raalmi lamkakei inkhat ning Jesu thidan kha aleimu.#15:39 thidan; alak manuscript a-om, rasa kinlaktak a a-onga khan athi je. Amaning aleiti, <<Akidiktak a hiwa mipa hi Pathien Sapa e!>>

40 # Lk 8:2,3 Akalakdet ria alei ka-en numei alek anlei om. Ankarra khan Mary Magdalene, anaipa James le Joseph annu Mary, khana Salome ngai an e. 41Anmani ning Jesu kha Galilee a aomlai anleijui khan anleisen. Khawa munna khan Jerusalem a ama le anhei kinroi numei katamtak num anlei om.

Jesu thaanna anre

(Mat 27:57-61; Lk 23:50-56; Jn 19:38-42)

42-43Arimathea a Joseph ahong tung kha kholei teng a-e je. Amakha Pathien Rengram ahongtung sik alei kangaak, kaja ka-om upa rup karra inkhat e. Khawa kini kha kinrinni e (ti chu, Jehudi ngai Serni kini makma) khana Joseph ning kin-ngam tak a Pilate maikunga awase-a amadeng Jesu kulong kha aleini. 44Pilate ning Jesu athi jei ti aleijet phakhan aleingak. Raalmi lamkakeipa kha akoi-a Jesu thina asot mije tia alei rakal. 45Raalmi lamkakeipa chong ajet so-a, Pilate ning Joseph deng Jesu kulong kha naleithei sik aleitipe. 46Joseph ning ruipon kinnem neng arocho-a, akulong kha akadamthak a pon khaning akusun a lunga ankiwit thaan sunga aware jei. Khana lung kolok inkhat aminlet a thaan inkhar suokna kha aleikhar. 47Mary Magdalene le Joseph nu Mary ning Jesu kulong anrena kha anleimu je.

Currently Selected:

Mark 15: MRK

Highlight

Copy