Tobiti 14
14
Ta switsundzuxo swo hetelela swa Tobiti
1-2Tobiti a a ri ni malembe ya 62 loko a fa mahlo, kambe endzhaku ka loko a tlherile a vona, ú yile emahlweni a hanya kahle. A tlhela a nyika swisiwana hi mbilu yo hanana, kutani a tshama a dzunisa Xikwembu ni ku twarisa vukulu bya xona. Tobiti a lova hi ku rhula loko a ri ni malembe ya 112, kutani a lahliwa hi ku fundzheka eNinivha.
3Kuteloko Tobiti a ri kusuhi ni ku fa, a vitana Tobiya n'wana wa yena, a ku ka yena: 4#Neh. 1:2 – 3:19“N'wananga, teka vana va wena, u hatlisa u ya eMediya. Ndzi tshemba leswaku ku avanyisa ka Xikwembu loku muprofeta Nahume a ku vuleke ehenhla ka Ninivha ku le kusuhi. Hinkwaswo leswi vaprofeta va Xikwembu va swi vuleke ehenhla ka Ninivha ni tiko ra Asiriya swi ta humelela. Loko nkarhi wa kona wu ta fika, hinkwaswo swi ta humelela hilaha swi vuriweke hakona. Ndzi tshemba handle ka ku kanakana leswaku hinkwaswo leswi Xikwembu xi swi vuleke, swi ta humelela hakunene. Xikwembu a xi tshovi switshembiso swa xona. Etikweni ra Mediya u ta hlayiseka ku tlula etikweni ra Asiriya kumbe emutini wa Babilona.
“Vayuda varikwerhu lava akeke etikweni ra Israele va ta humesiwa etikweni lerinene leri, va ta hangalasiwa ni ku yisiwa evukhumbini. Tiko hinkwaro ra Israele ri ta hundzuka mananga. Emitini ya Samariya na Yerusalema ku ta hava vanhu. Tempele ya Xikwembu yi ta hisiwa ni ku herisiwa, yi ta va marhumbi nkarhinyana. 5Kambe Xikwembu xi ta tlhela xi twela vanhu va xona vusiwana, kutani xi ta va vuyisa etikweni ra Israele. Vona va ta aka Tempele hi vuntshwa, kambe yi ta va ehansi ka leyo sungula hi ku saseka ku ko ku fika nkarhi lowu fanelaka. Endzhaku ka sweswo, Vaisraele hinkwavo va ta vuya evukhumbini, va ta pfuxa Yerusalema, va ta tlhela va wu aka wu fana ni lowo sungula hi ku saseka. Va ta aka ni Tempele hi vuntshwa hilaha vaprofeta va bvumbeke hakona.
6“Kutani matiko hinkwawo ma ta tlhelela eka Xikwembu, ma ta gandzela xona ntsena tanihi Xikwembu xa xiviri. Ma ta fularhela swikwembu swa hava leswi swi ma hambukiseke endleleni ya xona, 7kutani ma ta dzunisa Xikwembu xa minkarhi hinkwayo hi ku endla ku rhandza ka xona.
“Enkarhini wolowo Xikwembu xi ta ponisa Vaisraele hinkwavo lava va xi tshembeke. Xi ta va hlengeleta eYerusalema, xi va nyika tiko ra Abrahama ku va tiko ra vona, va ta tshama kona va hlayisekile minkarhi hinkwayo. Hinkwavo lava rhandzaka Xikwembu hi timbilu ta vona hinkwato ni mimoya ya vona hinkwayo va ta tsaka, kambe vadyohi ni vahomboloki va ta herisiwa makumu.
8“Vana vanga, sweswi yingisani switsundzuxo swa mina. Gandzelani Xikwembu, mi endla leswi swi xi tsakisaka. 9Kurisani vana va n'wina hi ku endla leswo lulama. Mi va dyondzisa leswaku va fanele ku nyika swisiwana ni ku dzunisa Xikwembu hi timbilu ta vona hinkwato minkarhi hinkwayo.
10“Tobiya n'wananga, suka eNinivha sweswi. U nga tshami laha. Loko u ta va u lahlile mana wa wena kusuhi na mina, famba hi ku hatlisa. U nga ha tshami hambi ri ri siku ni rin'we emutini lowu. I muti lowo homboloka, lowu taleriweke hi vuoswi. Ku hava leswi khomisaka vanhu va wona tingana. Tsundzuka leswi Nadabu a swi endleke eka makwavo wa tata wa yena Ayikara loyi a n'wi wundleke. Nadabu ú ringetile ku dlaya Ayikara, a n'wi sindzisa ku ya tumbela esirheni. Kambe Ayikara ú tlhele a humela eku vonakaleni, kutani Xikwembu xi nghenisile Nadabu emunyameni lowu nga heriki hikwalaho ka leswi a swi endleke. Ayikara ú phonyokile eka xirimbana lexi Nadabu a a n'wi rhiye ha xona, hikuva Ayikara a a#Kumbe: hikuva ndzi tala ku nyika swisiwana hi mbilu yo hanana. Kambe Nadabu yena ú phasiwile hi xirimbana xelexo, a dlayiwa. 11Kutani ke, vana vanga, vonani leswi humelelaka eka lava hlayisaka vanhu van'wana ni hilaha lava endlelaka vanhu van'wana leswo homboloka va faka hakona. Kambe sweswi matimba ya mina ma hela.”
Kutani va etlerisa Tobiti ebyetlelweni bya yena. Tobiti a fa, kutani a lahliwa hi ku fundzheka. 12Endzhaku ka nkarhi Ana na yena a fa, kutani a lahliwa kusuhi na Tobiti nuna wa yena. Endzhaku ka sweswo Tobiya ni nsati wa yena va rhurhela emutini wa Ekibatana etikweni ra Mediya laha va nga fika va tshama na Raguwele mukon'wana wa yena. 13Tobiya a hlayisa ni ku xixima Raguwele na Edina eku dyuhaleni ka vona. Loko va file, a va lahla emutini wa Ekibatana. Tobiya a dya ndzhaka ya Raguwele tanihi leswi a dyeke ndzhaka ya tata wa yena Tobiti.
14Tobiya a ri ni malembe ya 117 loko a fa. 15Loko a nga si fa, ú twile ta ku herisiwa ka Ninivha, ú vonile na Kiyasarese#Van'wana va ri: Nebukadnetsara na Ahasuwerusi hosi ya Mediya loko a khoma vanhu va Ninivha ni ku va yisa evukhumbini. Tobiya a tshama a nkhensa Xikwembu vutomi bya yena hinkwabyo, hikwalaho ka leswi xi swi endleke Ninivha.
Currently Selected:
Tobiti 14: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.