Yuditi 7
7
Ta ku siveleriwa ka Betuli
1Hi siku leri tlhandlamaka Holofani a lerisa mavuthu ya yena hinkwawo ni vaseketeri hinkwavo va yena ku rhurhisa mixaxa ya vona va famba ku ya lwa na Betuli, va teka swiphandze etikweni ra swintshabyana, va hlasela Vaisraele. 2Kavaloko tinhenha hinkwato ta Vaasiriya ti rhurhisa mixaxa ya tona siku rero. Mavuthu ya tona a ya ri masocha ya 170 000 yo famba hi milenge ni vagadi va tihanci va 12 000. Kun'we na vona a ku famba masocha yo famba hi milenge lama rhwalaka nhundzu ya vona, wu ri ntshungu lowukulu. 3Va gova exihlobyeni lexi nga nkoveni, kusuhi na Betuli. Mixaxa ya vona yi hangalaka ku hundza Dotani ku ya fika eBalibayimi, ku suka eBetuli ku ya fika eKiyamoni, wu nga muti lowu langutaneke na Esdreloni.
4Loko Vaisraele va vona vunyingi bya Vaasiriya, va chava ngopfu, kutani va byelana va ku: “Vanhu lava va ta mita tiko hinkwaro. Swakudya leswi nga tintshaveni ni le minkoveni, hambi leswi nga swintshabyaneni swi nga ka swi nga va ringani.” 5#I Mak. 12:28-29Kutani Muisraele un'wana ni un'wana a hloma matlhari ya yena; kuteloko va tshiverile mindzilo eswihondzweni swa vona, va rindza vusiku hinkwabyo. 6Hi siku ra vumbirhi Holofani a humesa vagadi hinkwavo va yena va tihanci, va famba emahlweni ka Vaisraele lava nga kona eBetuli. 7A xiyaxiya manghenelo ya muti, a endzela ni swihlovo leswi Vaisraele a va ka mati eka swona, a swi teka, a veka masocha ya yena ku swi rindza, kutani a tlhelela eka mavuthu ya yena.
8Tihosana hinkwato ta vatukulu va Esawu, ni varhangeri hinkwavo va Vamowabu, ni tindhuna hinkwato ta mavuthu lama humaka ematikweni ya ribuwu ra lwandle, va ta ka Holofani, va ku ka yena: 9“We hosi ya hina, yingisa xitsundzuxo xa hina, leswaku mavuthu ya wena ma nga hluriwi. 10Vanhu lava va Israele a va tshembi matlhari ya vona, kambe va tshemba ku leha ka tintshava leti va akeke eka tona, hikuva swa nonoha ku fika etinhlohlorini ta tona. 11Hikokwalaho, we hosi ya hina, u nga va hlaseri hi ku xaxameta mavuthu ya wena, kutani a ku na rin'we ra masocha ya wena leri nga ta dlayiwa. 12Tshama emixaxeni ya wena, u hlayisa ni masocha hinkwawo ya wena kona. Hi pfumelele ntsena, hina malandza ya wena, ku teka xihlovo lexi nga hansi ka ntshava, 13hikuva vanhu hinkwavo va Betuli va kuma mati kona. Torha ri ta va herisa, kutani va ta ku nyiketa muti wa vona. Hina ni vanhu va hina hi ta tlhandlukela etinhlohlorini ta tinshava leti nga kusuhi, hi ta gova kona ku rindza leswaku ni un'we wa vona a nga humi emutini. 14Vona ni vasati va vona ni vana va ta mbumburheka hi ndlala, kutani va nga si dlawa hi banga, mintsumbu ya vona yi ta hangalasiwa ni rivala ra muti wa vona. 15Hi ndlela leyi u ta va tlherisela hi vubihi, hikuva a va ku yingisanga, va arile ku ku amukela hi ku rhula.”
16Marito lawa ma tsakisa Holofani ni malandza ya yena hinkwawo, kutani a lerisa leswaku va endla hilaha va nga vulavula hakona. 17Kavaloko mavuthu ya Vaamoni swin'we na Vaasiriya va 5 000 va rhanga emahlweni, va ya gova enkoveni, va teka swihlovo leswi Vaisraele a va ka mati eka swona. 18Vaedomu na Vaamoni va tlhandluka va ya gova eswintshabyaneni leswi langutaneke na Dotani; va rhumela van'wana va vona ku ya edzongeni ni le vuxeni, ku fika eka Akraba kusuhi na Kuxi hi tlhelo ra xinambyana xa Mukumuri. Mavuthu laman'wana ya Vaasiriya ma ya gova erivaleni, ma ri tata hinkwaro. Mixaxa ya vona ni nhundzu ya vona a swi tele ngopfu swi endla ntshungu lowukulu swinene.
19Vaisraele va hela matimba, kutani va tlakusa rito eka HOSI Xikwembu xa vona, hikuva valala va vona a va va rhendzele matlhelo hinkwawo, ku ri hava ndlela yo pona eka vona. 20Mavuthu hinkwawo ya Vaasiriya, ni masocha yo famba hi milenge, ni makalichi ni vagadi va tihanci, ma rhendzela Vaisraele masiku ya 34, ku kondza mati hinkwawo ma hela emutini wa Betuli. 21Swihlovo swa vona swi sungula ku phya, kutani va pfumala mati yo nwa va kolwa, hikuva a vo pimeriwa kunene. 22Vana va vona va tsana, vavasati ni majaha va titivala hikwalaho ka torha, va wela emagondzweni ni le tinyangweni ta muti; hinkwavo va hela matimba.
23Vavanuna, ni vavasati, ni vana hinkwavo, va hlengeletana emahlweni ka Uziya ni varhangeri van'wana va Betuli, va tlakusa rito emahlweni ka vakulukumba hinkwavo, va ku: 24“Xikwembu xi ta mi ba eka leswi mi hi endleke swona! Mi ni nandzu ehenhla ka leswi humelelaka, hikuva mi arile ku kombela ku rhula eka Vaasiriya. 25Sweswi hi hava mupfuni. Xikwembu xi hi nyiketile emavokweni ya vona leswaku hi hangalasiwa erivaleni, hi herisiwa emahlweni ka vona hi mhaka ya torha. 26Sweswi va tshikeni va nghena, nyiketani muti hinkwawo eka mavuthu ya Holofani, leswaku wu phanghiwa. 27Swi nga antswa loko hi khomiwa hi vona hi va mahlonga ku tlula loko hi fa hi torha, kutani vutomi bya hina byi ta hlayiseka, naswona a hi nga voni rifu ra vasati va hina ni ra vana va hina. 28Tilo ni misava ni Xikwembu xa hina, HOSI ya vatata wa hina, lexi xi hi baka hikwalaho ka swidyoho swa hina ni swa vatata wa hina, a swi ve timbhoni ta hina leswaku mi hi dyoherile. Hi khongela leswaku a xi nga pfumeli leswo biha leswi hi swi anakanyaka swi humelela namuntlha.”#28. Van'wana va ri: Hi lava leswaku mi tinyiketa eka Vaasiriya, tanihi laha hi mi kombeleke hakona namuntlha
29Kavaloko ku va ni ku rila lokukulu enhlengeletanweni hinkwayo, hinkwavo va khongela eka HOSI Xikwembu hi rito leri tlakukeke. 30Kutani Uziya a ku ka vona: “Tiyani nhlana vamakwerhu! A hi tiyiseleni masiku man'wana ya 5; hi nkarhi wolowo HOSI Xikwembu xa hina xi ta hi twela vusiwana, hikuva xi nga ka xi nga hi fularhereli makumu. 31Kambe loko masiku lawa yo hundza hi nga si pfuniwa, ndzi ta endla hilaha mi vulaka hakona.” 32Kavaloko Uziya a pfala nhlengeletano, kutani va tlhelela erirhangwini ni le swihondzweni swa muti wa vona. Vavasati ni vana, vona a va mukisa. Kambe vaaki hinkwavo va le Betuli a va khunguvanyekile.
Currently Selected:
Yuditi 7: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.