Luke 3
3
1ရောမဧကရာဇ်တိဗေရိ၏နန်းသက် တစ်ဆယ့်ငါးနှစ်ရှိချိန်၌ ပုန္တိပိလတ်သည် ယုဒပြည်၏ဘုရင်ခံဖြစ်ပြီး၊ ဟေရုဒ်အန္တိပlသည် ဂါလိလဲပြည်ကို အုပ်ချုပ်သူဖြစ်၏။ ဟေရုဒ်အန္တိပ၏ညီ ဖိလိပ္ပုသည် ဣတုရဲပြည်နှင့် တရာခေါနိတ်ပြည်တို့ကိုလည်းကောင်း၊ လုသာနိသည် အဘိလင်ပြည်ကိုလည်းကောင်း အုပ်ချုပ်သူများဖြစ်ကြပြီး 2အန္နနှင့် ကယာဖတို့သည် အကြီးဆုံးပုရောဟိတ်ဖြစ်ကြ၏။ ထိုအချိန်၌ တောကန္တာရထဲတွင် နေထိုင်လျက်ရှိသော ဇာခရိ၏သား ယောဟန်ထံသို့ ဘုရားရှင်ထံမှ သတင်းစကားများ ရောက်လာလေ၏။ 3ထို့ကြောင့် ယောဟန်သည် ဂျော်ဒန်မြစ်ဝှမ်းတလျှောက်လုံးသို့ လှည့်လည်သွားလာ၍ လူတို့အား သူတို့၏အပြစ်ဒုစရိုက်များကို ခွင့်လွှတ်ခြင်းရကြရန်အတွက် နောင်တသံဝေဂရကာ ရေနှစ်မင်္ဂလာခံယူကြရန်အကြောင်းကို လိုက်လံ၍ ဟောပြောနေခဲ့လေ၏။ 4အရိယာသူတော်စင်ဟေရှာယက သူ၏ကျမ်းတွင် ယောဟန်အကြောင်းကို ကြိုတင်နိမိတ်ဖတ်ရေးသားထားခဲ့သည်မှာ
“တောကန္တာရထဲတွင် တစ်စုံတစ်ဦးက
ကျယ်လောင်စွာအော်ဟစ်ကြွေးကြော်မည်ကား၊
‘အရှင်သခင် ကြွလာမည့်လမ်းကို ပြင်ဆင်ကြလော့။
သူ၏လမ်းကို ဖြောင့်ဖြူးစေကြလော့။ 5တောင်ကြားချိုင့်ဝှမ်းတိုင်းကို မြေဖို့၍
တောင်ကုန်း၊ တောင်တန်းများကို ညီညာစေကြလော့။
ကွေးကောက်သောလမ်းများကို ဖြောင့်တန်းစေပြီး
ကြမ်းတမ်းသောလမ်းများကို ချောမွေ့ပြေပြစ်စေကြလော့။ 6ထိုနောက်တွင် ဘုရားရှင်စေလွှတ်တော်မူသော
ကယ်တင်ရှင်ကို လူတိုင်းတွေ့မြင်ရကြလိမ့်မည်’”
ဟူ၍ဖြစ်၏။ 7ယောဟန်သည် သူ့ထံ၌ ရေနှစ်မင်္ဂလာခံယူရန် ရောက်လာကြသောလူအပေါင်းတို့အား “မြွေဆိုးတို့၏မျိုးနွယ်တို့ကဲ့သို့ လိမ်ညာလှည့်ဖျားတတ်သောအသင်တို့၊ ရေနှစ်မင်္ဂလာခံယူလိုက်ရုံနှင့် သင်တို့၏အပြစ်ဒုစရိုက်များကို ဘုရားရှင်၏အပြစ်ဒဏ်ပေးမှုမှ လွတ်မြောက်နိုင်ကြမည်ဟု သင်တို့တွေးထင်နေကြသည်မှာ မှားယွင်း၏။ 8ထို့ကြောင့် သင်တို့၏အပြစ်ဒုစရိုက်များမှ နောင်တသံဝေဂရပြီဆိုသည်ကို အလုပ်အားဖြင့် သက်သေပြကြလော့။ သင်တို့ကိုယ်သင်တို့ အာဗြဟံ၏မျိုးဆက်ဖြစ်သည်ဟူ၍ မဆိုကြနှင့်။ အကြောင်းမူကား၊ ဘုရားရှင်သည် သင်တို့နေရာ၌ အစားထိုးရန် ဤကျောက်ခဲများကိုပင် အာဗြဟံ၏မျိုးဆက်များအဖြစ် ဖန်ဆင်းလိုက်နိုင်သည်ဟု သင်တို့အား ငါဆိုမည်။ 9ယခုအချိန်မှာပင် ဘုရားရှင်သည် နောင်တသံဝေဂမရသောသူများကို ပြစ်တင်ရှုံ့ချပြီး ပြင်းထန်စွာအပြစ်ဒဏ်ပေးဖို့ အသင့်ရှိနေ၏။ ထို့ကြောင့် နောင်တသံဝေဂမရကြဘဲ ကောင်းသောအမှုအရာများကို မပြုလုပ်သူတို့သည် ဘုရားရှင်၏ပြစ်တင်ရှုံ့ချမှုကို ခံရပြီး မီးထဲကို ပစ်ချခံရလိမ့်မည်” ဟုဆိုလေ၏။ 10ထိုအခါ လူထုပရိသတ်တို့က ယောဟန်အား “ဤသို့ဆိုလျှင် ကျွန်ုပ်တို့ မည်သို့ပြုရပါမည်နည်း” ဟုမေးကြလေ၏။ 11ယောဟန်ကလည်း “သင်တို့၌ အင်္ကျီနှစ်ထည်ရှိသူသည် အင်္ကျီမရှိသူကို တစ်ထည်ပေးရမည်။ သင်တို့၌ စားစရာ၊ သောက်စရာရှိလျှင်လည်း မရှိသောသူတို့ကို ဤသို့ပင်မျှဝေပေးရမည်” ဟုဖြေလေ၏။ 12အချို့အခွန်ကောက်သူများသည်လည်း ယောဟန်ထံသို့ ရေနှစ်မင်္ဂလာခံယူရန် ရောက်လာခဲ့ကြပြီး သူတို့က “ဆရာ၊ ကျွန်ုပ်တို့လည်း မည်သို့ပြုရပါမည်နည်း” ဟုမေးကြလေရာ 13ယောဟန်က “သင်တို့သည် အခွန်ငွေများကို သတ်မှတ်ထားသည်ထက် ပိုမိုမကောက်ခံကြနှင့်” ဟုဆိုလေ၏။ 14အချို့သောစစ်သားများကလည်း သူ့အား “ကျွန်ုပ်တို့လည်း မည်သို့ပြုရမည်နည်း” ဟုမေးရာ
ယောဟန်က “သင်တို့လည်း လူတို့ထံမှ ငွေကို အတင်းအကြပ်မတောင်းခံကြနှင့်။ အဘယ်သူ့ကိုမျှ မမှန်မကန် မစွပ်စွဲကြနှင့်။ သင်တို့ရရှိသည့်လခဖြင့် ရောင့်ရဲတင်းတိမ်ကြပါ” ဟုပြန်ဖြေလေ၏။ 15လူအပေါင်းတို့သည် မကြာမီ ကယ်တင်ရှင်မေရှိယ လာတော့မည်ကို မျှော်လင့်ခြင်းကြီးစွာဖြင့် စောင့်ဆိုင်းနေကြသည်ဖြစ်သောကြောင့် သူတို့က ယောဟန်သည် ကယ်တင်ရှင်မေရှိယဖြစ်လေမလားဟု တွေးထင်လာကြ၏။ 16ထို့ကြောင့် ယောဟန်က သူတို့အား “ငါသည် လူတို့ကို ရေဖြင့် နှစ်ခြင်းမင်္ဂလာပေးသည်မှာမှန်၏။ သို့သော် ငါ့ထက် မြင့်မြတ်သောသူသည် လာနေပြီဖြစ်၏။ ငါသည် သူ၏ဖိနပ်ကြိုးကိုပင် ဖြေပေးရန် မထိုက်တန်ပေ။ သူသည် သင်တို့အား ဉာဏ်အလင်းတော်အားဖြင့်လည်းကောင်း၊ မီးအားဖြင့်လည်းကောင်း နှစ်ခြင်းမင်္ဂလာပြုပေးလိမ့်မည်။ 17လယ်သမားသည် ကောက်တလင်းနယ်သောကောက်ဆွကို သုံး၍ စပါးစေ့နှင့် အဖျင်းကို ခွဲခြားသကဲ့သို့ မေရှိယသည်လည်း နောင်တသံဝေဂရသူများနှင့် အခြားသူများကို ခွဲခြားတော်မူပြီးလျှင် စပါးစေ့ကဲ့သို့သူများကို ကျီထဲ၌ သိမ်းဆည်း၍ အဖျင်းကဲ့သို့သောသူများကို မငြိမ်းနိုင်သောမီးထဲတွင် ထည့်လိမ့်မည်” ဟုဆိုလေ၏။ 18ဤကဲ့သို့သောနည်းလမ်းအမျိုးမျိုးဖြင့် ယောဟန်သည် မင်္ဂလာသတင်းကောင်းကို ဟောပြော၍ လူအပေါင်းတို့အား နောင်တသံဝေဂရကြရန် တိုက်တွန်းနှိုးဆော်လေ၏။ 19သို့သော် ဘုရင်ဟေရုဒ်သည် မိမိ၏ညီဖြစ်သူ၏ဇနီး ဟေရောဒိအား သိမ်းပိုက်ခဲ့ခြင်းအကြောင်းနှင့် အခြားသောမကောင်းမှုများစွာတို့ ပြုလုပ်သည်ကို ယောဟန်က ပြစ်တင်ရှုံ့ချခြင်းကြောင့် 20ဟေရုဒ်သည် သူ၏စစ်သားများအား ယောဟန်ကို ဖမ်းဆီးထောင်ချစေခြင်းဖြင့် ပိုမိုဆိုးရွားသောအပြစ်တစ်ခုကို ထပ်မံကျူးလွန်လေ၏။ 21ထိုသို့ ထောင်သွင်းအကျဉ်းချမခံရမီတွင် ယောဟန်သည် လူများစွာတို့ကို ရေနှစ်မင်္ဂလာပြုပေးခဲ့၏။ ကိုယ်တော်ယေရှုသည်လည်း ရေနှစ်မင်္ဂလာခံယူ၍ ဆုတောင်းနေစဉ်တွင် ကောင်းကင်သည် ဟင်းလင်းပွင့်၍ 22ဉာဏ်အလင်းတော်သည် ချိုးငှက်အသွင်ဖြင့် ကိုယ်တော်အပေါ်သို့ ဆင်းသက်လာလေသည်။ ကောင်းကင်မှအသံတော်သည်လည်း “သင်သည် ငါချစ်မြတ်နိုးတော်မူသော ငါ၏သားဖြစ်သည်။ ငါသည် သင့်အား လွန်စွာနှစ်သက်အားရတော်မူ၏” ဟူ၍ထွက်ပေါ်လေ၏။ 23ကိုယ်တော်ယေရှုသည် အမှုတော်ကို စတင်ဆောင်ရွက်ချိန်၌ သက်တော်သုံးဆယ်ခန့် ရှိတော်မူ၏။ သူသည် လူတို့၏ထင်မြင်ချက်အရ ယောသပ်၏သားဖြစ်ပြီး
ယောသပ်သည် ဧလိ၏သားဖြစ်၏။ 24ဧလိသည် မဿတ်၏သား၊
မဿတ်သည် လေဝိ၏သား၊ လေဝိသည် မေလခိ၏သား၊
မေလခိသည် ယန္န၏သား၊ ယန္နသည် ယောသပ်၏သား၊ 25ယောသပ်သည် မတ္တသိ၏သား၊ မတ္တသိသည် အာမုတ်၏သား၊
အာမုတ်သည် နာဟုံ၏သား၊ နာဟုံသည် ဧသလိ၏သား၊
ဧသလိသည် နဂ္ဂဲ၏သား၊ 26နဂ္ဂဲသည် မာအတ်၏သား၊
မာအတ်သည် မတ္တသိ၏သား၊ မတ္တသိသည် ရှေမိ၏သား၊
ရှေမိသည် ယောသပ်၏သား၊ ယောသပ်သည် ယုဒ၏သား၊ 27ယုဒသည် ယောဟန္န၏သား၊ ယောဟန္နသည် ရေသ၏သား၊
ရေသသည် ဇေရုဗဗေလ၏သား၊ ဇေရုဗဗေလသည် ရှာလသေလ၏သား၊
ရှာလသေလသည် နေရိ၏သား၊ 28နေရိသည် မေလခိ၏သား၊
မေလခိသည် အဒ္ဒိ၏သား၊ အဒ္ဒိသည် ကောသံ၏သား၊
ကောသံသည် ဧလမောဒံ၏သား၊ ဧလမောဒံသည် ဧရ၏သား၊ 29ဧရသည် ယောရှု၏သား၊ ယောရှုသည် ဧလျေဇာ၏သား၊
ဧလျေဇာသည် ယောရိမ်၏သား၊ ယောရိမ်သည် မဿတ်၏သား၊
မဿတ်သည် လေဝိ၏သား၊ 30လေဝိသည် ရှိမောင်၏သား၊
ရှိမောင်သည် ယုဒ၏သား၊ ယုဒသည် ယောသပ်၏သား၊
ယောသပ်သည် ယောနန်၏သား၊ ယောနန်သည် ဧလျာကိမ်၏သား၊ 31ဧလျာကိမ်သည် မေလေ၏သား၊ မေလေသည် မဲနန်၏သား၊
မဲနန်သည် မတ္တသ၏သား၊ မတ္တသသည် နာသန်၏သား၊
နာသန်သည် ဒါဝိဒ်၏သား၊ 32ဒါဝိဒ်သည် ယေရှဲ၏သား၊
ယေရှဲသည် ဩဗက်၏သား၊ ဩဗက်သည် ဗောဇ၏သား၊
ဗောဇသည် စာလမုန်၏သား၊ စာလမုန်သည် နာရှုန်၏သား၊ 33နာရှုန်သည် အမိနဒပ်၏သား၊ အမိနဒပ်သည် အဒ်မိန်၏သား၊
အဒ်မိန်သည် အာရံနိ၏သား၊ အာရံနိသည် ဟေဇရုံ၏သား၊
ဟေဇရုံသည် ဖာရက်၏သား၊ ဖာရက်သည် ယုဒ၏သား၊ 34ယုဒသည် ယာကုပ်၏သား၊ ယာကုပ်သည် ဣဇာက်၏သား၊
ဣဇက်သည် အာဗြဟံ၏သား၊ အာဗြဟံသည် တေရ၏သား၊
တေရသည် နာခေါ်၏သား၊ 35နာခေါ်သည် စေရောက်၏သား၊
စေရောက်သည် ရာဂေါ၏သား၊ ရာဂေါသည် ဖာလက်၏သား၊
ဖာလက်သည် ဟေဗာ၏သား၊ ဟေဗာသည် ရှာလ၏သား၊ 36ရှာလသည် ကာဣနန်၏သား၊ ကာဣနန်သည် အာဖာဇဒ်၏သား၊
အာဖာဇဒ်သည် ရှေမ၏သား၊ ရှေမသည် နောဧ၏သား၊
နောဧသည် လာမက်၏သား၊ 37လာမက်သည် မသုရှလ၏သား၊
မသုရှလသည် ဧနောက်၏သား၊ ဧနောက်သည် ယာရက်၏သား၊
ယာရက်သည် မဟာလေလ၏သား၊ မဟာလေလသည် ကာဣနန်၏သား၊ 38ကာဣနန်သည် ဧနုတ်၏သား၊ ဧနုတ်သည် ရှေသ၏သား၊
ရှေသသည် အာဒံ၏သားဖြစ်ပြီး၊
အာဒံသည် ဘုရားရှင်ဖန်ဆင်းတော်မူသောသူဖြစ်လေ၏။
Currently Selected:
Luke 3: TPV-RV
Highlight
Share
Copy
Want to have your highlights saved across all your devices? Sign up or sign in
This translation of the TPV-RV is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
