Luke 8
8
1အချိန်နည်းနည်းဟာ မာပ်အာမ်စန်းနော ကိုယ်တော်ယေရှုကော ဟီမ်ငါတပည့်သာဝက ဆယ့်နှစ်ယောက်နောက်တူတူ မြို့ဖူမ် ထိန်ဖူမ် အနှံ့လာမ်ကဲ့အယ် ဘုရားရှင်ငါ သာသနာတော်အကြောင်းနယ် မင်္ဂလာသတင်းကလန်နယ် ဟောလောမာ့။ 2အင်းမာပြာန်နယ် အနာရောဂါ မီမ်ဟာမ်းကွန်းနယ် ကုလောကား ခံနီမာန်ငါးကာ့ ဟီမ်နာပ်နောက် စိတ်ဆလား ဆာမ်ငါးကာလည် မီမ်ဟာမ်းကွန်နယ် ကုလောကား ခံနီမာန်ငါးကာ့ ယာပ်ရှီကြအာကော ကိုယ်တော်နောက်တူတူ ရာပ်ချီးမာ့။ အင်းမာဟီမ်နာပ်ပါအာ စိတ်ဆလား ခုနှစ်ကောင်ဆာမ်ငါး ခံနောထော်ကယ်အယ် အင်းမာစိတ်ဆလားလည် ငါပ်ပူကဲ့အီကား ခံနီမာန်ငါးကာ့ မာဂဒလမြို့ဝါးမာ့ မာရိ၊ 3အုပ်ချုပ်သောကားဟီမ် ဟေရုဒ်ကာ့ စီမံခန့်ခွဲလောကားဟီမ် ထာကာကာ့ ခုဇ ကာအိက် ယောဟန္နနောက် ရှုရှန္နလာပ်ရီ ပါလောမာ့။ ဟီမ်နာပ်ကော ဟီမ်နာပ်ကာ ပစ္စည်းဥစ္စာဖူမ်နောက် ကိုယ်တော်ယေရှုနောက် ဟီမ်ငါတပည့်လာပ်ခနန်း ကူညီလောကဲ့အီဟီးမာ့။ 4မြို့ဖူမ်၊ ထိန်ဖူမ် အနှံ့ပါအာမာ့ တီတ်ဆာဖူမ်ငေါ ကိုယ်တော်ယေရှုပါအာ စုလောကဲ့အယ် ထုတ်ချီးရီကယ်မာ့ ကိုယ်တော်ကော ဟီမ်နာပ်သယ် ပုံဥပမာ ကြအာလည် မိန့်နောကားကော 5“လယ်သမားဟော်ဝါကော ဟီမ်ငါလက်ပါး မျိုးစေ့ဆာဒ်တီမ် ပူပေးရာမ်မာ့။ အင်းမာလယ်သမား မျိုးစေ့ဆာဒ်လာမ်စန်နော် ကြအာမျိုးစေ့ဖူမ်ငေါ် တီတ်ဆာလာပ် ဟာကားကာ လမ်းတုန်းငါး ထုတ်အာမ်ကယ်မာ့ တီတ်ဆာလာပ် ကောင်ကလယ်ကာ ခံနောထော်ကယ်အယ် နူစ်နူလာပ် ရောက်ချီးကားရီး ခံနောထော်မာ့။ 6ကြအာမျိုးစေ့ကော မြေဆီလွှာနည်းလောကားကာ သလောင်ဆီကာစုတ်အား ထုတ်အာမ်ကဲ့အယ် တွန်ပေါက်တီရီ ဝေးလူဝိုသယ်မာ့ တအောင်းဟာနောက် ရှီးလော့ပ်ကဲ့အယ် ဂေါဟူမ်မာန်မာ့။ 7ကြအာမျိုးစေ့ဖူမ်ငေါ် စူပ်ခါးတွန်ဖူမ်ငါတောမ်နား ထုတ်အာမ်ကဲ့အယ် တွန်ဖူမ်ပေါက်တီရီ စူပ်ခါးတွန်ဖူမ် ကာလောကဲ့အယ် ပိတ်ဆို့လောကား ခံနောထော်မာ့။ 8ကြအာမျိုးစေ့ဖူမ်ငေါ် မြေဆီလွှာကလန်ငါကာ့နေရား ထုတ်အာကယ်မာ့ တွန်ဖူမ်ပေါက်သောကဲ့အယ် အဆတစ်ရာ ငေါကားကာ့ ရှီစ်ရှီပရှီဖူမ် ပေါ်လီမာ့” ငေါကဲ့အယ် မိန့်နောမာ့။ အင်းမာညယ် မိန့်နောစီးရာမ်စန်နော် ဟီမ်ငေါ “ငါငေါကားလည် သာပ်မူရင်ငါးဟီမ်နာပ်ကော နားလည်လော်ကွန်နယ် ကြိုးစားလောထော်ပ်ကား” ငေါကဲ့အယ် ရမ်းကဲ့သပေါက်အာမ်မာ့။ 9စီးရာပ်သော် ကိုယ်တော်ကာ တပည့်တော်လာပ်ကော ကိုယ်တော်ပါအာ ပုံဥပမာကာ့ အဓိပ္ပာယ်လည် စီမ်ညူဟီးမာ့။ 10အင်းသယ် ကိုယ်တော်ကော “နီမ်ဟနန်း ဘုရားရှင်ငေါ် ဟီမ်ငါသာသနာတော်ကာ့ လျှို့ဝှက်နက်နဲလောကားကာ့ အကြောင်းရာဖူမ်နယ် မီမ်းဟော်ရင်ငါးကာ အခွင့်ရေးလည် အီစီးရာပ်ထာမာ့။ ငါကော အခြားတီတ်ဆာလာပ်သယ် ပုံဥပမာနောက် ရှင်းပြလောကယ်မာ့ ကျမ်းစာပါအာ ရေးလောပေးကားကာ ယူဝမ်စာမ်းရီ အယူပ်မူ၊ သပ်မူမာ့ ငေါဝမ်ရီ နားအလည်လော်ဟီရင်” ငေါကားကာ ကျမ်းချက်ကော ပြည့်စုံနီမာ့။ 11ကိုယ်တော်ကော “ပုံဥပမာကာ့ အဓိပ္ပာယ်ကော် မျိုးစေ့ဖူမ်ငေါ် ဘုရားရှင်ငါ နှုတ်ကပါတ်တော်ဖူမ် ထာမာ့။ 12လမ်းတုန်းငါး ထုတ်အာကားကာ မျိုးစေ့ဖူမ်ငေါ် ဘုရားရှင်ငါ့ နှုတ်ကပါတ်တော်ဖူမ်နယ် သပ်လာပ်မူရီ ယုံကြည်လောကား ပျက်သောကဲ့အယ် ကယ်တင်ခြင်း အလူကွန်နယ် မာရ်နတ်ကော ထုတ်အီကဲ့အယ် အင်းမာဟီမ်နာပ်ကာ့ နှလုံးသားပါအာမာ့ ဘုရားရှင်ငါ နှုတ်ကပါတ်တော်ဖူမ်နယ် လာပူဝါမ်ငါး ခံနောထော်ကာဟီမ်နာပ် ထာမာ့။ 13သလောင်ဆီ ကာစုတ်အား လက်လာမ်ငါကာ့ မျိုးစေ့ ငေါကားကော ဘုရားရှင်ငါ နှုတ်ကပါတ်တော်ဖူမ်နယ် သပ်လာပ်မူကာ့ အချိန်နယ်ကော ဆကောက်ကယ်အယ် လက်ခံနောဟီးရီး ဟီမ်နာပ်ကာ စိတ်နှလုံးနား ဘုရားရှင်ငါ နှုတ်ကပါတော်ကော် အတည်မြဲလောရယ် အချိန်တအောင်းဟာ ယုံကြည်လက်ခံနောဟီးကဲ့အယ် ဘဝပါအာ အခက်ခဲနောက် ကြုံနောကားကာ အချိန်နယ် ဟီမ်နာပ်ကာ ယုံကြည်မှုကော ရပ်တန့်နောဟီးဟာကာ့ တီတ်ဆာဖူမ် ထာမာ့။ 14စူပ်ခါးတွန်ကြာပ်ကြား လက်လာမ်ငါကာ့ မျိုးစေ့ဖူမ်ငေါ် ဘုရားရှင်ငါ နှုတ်ကပါတ်တော်လည် သပ်လာပ်ချီးမူမာ့ငေါရီး စိုးရိမ်ပူပန်နောကား၊ ချမ်းသာလော်ကာနောက် ကာမဂုဏ်စည်းစိမ်ခံစားလောကားဖူမ်ငေါ ဖုံးလွှမ်းနောကဲ့အယ် ပိတ်ဆို့လာမ်ကယ်မာ့ ဘုရားရှင်ငါ နှုတ်ကပါတ်တော်နောက် အညီလော်ရယ် လင်းဟီးရာကာ တီတ်ဆာဖူမ်ထာမာ့။ 15မြေဆီလွှာ ကလန်ငါနေရား ထုတ်အာကား မျိုးစေ့ ငေါကားကော ဘုရားရှင်ငါ နှုတ်ကပါတ်တော်ဖူမ်နယ် သပ်လာပ်စီးရာပ်သော် ရိုးသားလောကဲ့အယ် ကလန်ငါကာ ဟီမ်နာပ်ကာ စိတ်နှလုံးနောက် စီမ်းနောပေးစီးကဲ့အယ် ဘုရားရှင်ငါ နှုတ်ကပါတ်တော်နောက် ညီလောကွန်းနယ် လင်းဟီးကားကာ တီတ်ဆာဖူမ်ထာမာ့” ငေါကဲ့အယ် မိန့်နောမာ့။ 16အင်းမာနောက်သယ် ကိုယ်တော်ကော ဆက်သောကဲ့အယ် “မီးအိမ်နယ် သာပ်ကဲ့အယ် ကောမ်ဟာမ်း နောက် အော်ပ်ပေးကားဟီမ် အင်းညယ်အဟီပ်ရီ ခုတင်တောမ်နား သိမ်းနောပေးကားဟီမ်ရယ်ကော အပို။ အင်းမာအစား မီးအိမ်နယ် မီးတိုင်စုတ်အား ချိတ်သောပေးမားလည် ကျဉ်းနားဆာမ်ညီကားကာ တီတ်ဆာလာပ် အလင်းရောင်လူဟိကာ။ 17မဟာအောမ်ကယ်လိုးငေါနော အယူပ်မူရင်ကွန်းနယ် ပီးကူစ်ပေရင်ငါကာ အရာငေါကဲ့အယ် အပို။ အမီမ်းဟော်ရင်ကွန်နယ် ပေးကားကာ့လျှို့ဝှက်ချက် ငေါကဲအယ် အပို။ 18အင်းသယ် အာရုံစိုက်သောကဲ့အယ် သပ်လာပ်ချီးလိတ်။ မဟာအောမ်ကယ်လိုးငေါနော နားလည်လော်ကာ တီတ်ဆာလာပ်သယ် ဘုရားရှင်ငေါ် ပိုလောကဲ့အယ် နားလည်လော်စီမ်ကာ။ အင်းညယ်ငေါဝမ်ရီ နားလည်လော်ကာပ်ကာ စိတ်အပေါ်ကာ တီတ်ဆာလာပ်သယ်ကော ဟီမ်နာပ်နားလည်လော်မာ့ မသပ်ပေးကားဖူမ်နယ်ဟာမ်း ဘုရားရှင်ငေါ် ဆုံးရှုံးနောစီမ်းကာ” ငေါကဲ့အယ် မိန့်နောမာ့။ 19ရာပ်အာလည် ကိုယ်တော်ကာ အမေနောက် နရှီလာပ်ကော ကိုယ်တော်နောက် ဟော့ပ်တောတီမ် ထုတ်ချီးရီစာန်ရီ တီတ်ဆာပရိသတ် နံတင်းကယ်မာ့ ကိုယ်တော်ပါအာ အထုတ်ချီဟာရယ် လင်းဟီးမာ့။ 20အင်းသယ် တီတ်ဆာဟော်ဝါကော ကိုယ်တော်လည် “ကိုယ်တော်ကာ အမေနောက် နရှီဖူမ်ငေါ ကိုယ်တော်လည် ဟော့ပ်တောကာပ်ကယ်မာ့ ပြာန်ငါ စာပ်ကဲ့အယ် လေးဟီးမာ့” ငေါကဲ့အယ် လျှောက်တင်နာန်မာ့။ 21အင်းမာချိန်နယ် ကိုယ်တော်ကော “ဘုရားရှင်ငါ နှုတ်ကပါတ်တော်ဖူမ်နယ် သပ်ကဲ့အယ် လိုက်နာလာပ်ကာကာ့ တီတ်ဆာဖူမ်အားလုံးငေါ ငါကာအမေနောက် အန်းချန်နရှီဖူမ်ထာမာ့” ငေါကဲ့အယ် မိန့်နောမာ့။ 22ရာပ်အာလည် ကိုယ်တော်ကော ဟီမ်ငါတပည့်လာပ်နောက် လှေဟူပ်အာပါအာ ဟေကဲ့အယ် “အင်းကာ့အိုင်ငါ တစ်ဖက်ကမ်းနာ ပလာပ်ချီရာမ်မယ်” ငေါကဲ့အယ် မိန့်နောကယ်မာ့ ဟီမ်နာပ်ကော ရွက်လွှင့်နောကဲ့အယ် လာမ်ဟီးမာ့။ 23ဟီမ်နာပ်ကော အင်းမာအိုင်နယ် ပလာပ်ကယ်အယ် လာမ်ငါးကာ့ အချိန်နယ် ကိုယ်တော်ကော အက်လီးကဲ့လင်းမာ့။ စီးရာပ်သော် ရုတ်တရာပ်ရယ် ရေအိုင်ပါအာ ဟလာမ်းမူန်တုန်းဆော်လီကယ်မာ့ ဟီမ်နာပ်ကာ လှေနား ဝေးဖူမ် ဆာမ်ဟူမ်မာန်ကဲ့အယ် လှေလူမ်ဟပ်လီကား အန္တရာယ်နောက် ကြုံနောဟီးထော်မာ့။ 24အင်းသယ် ဟီမ်နာပ်ကော ကိုယ်တော်ပါအာ လာမ်ကဲ့အယ် ဆော်ကယ်အယ် “ဆရာ၊ ဆရာ အလေဆူလာပ်ကော ရှီးထော်ကိုက်ပန်” ငေါကဲ့အယ် လျှောက်တင်နော်ကယ်မာ့ ကိုယ်တော်ကော ယုတ်ကဲ့အယ် ဟလာမ်းမူန်တုန်းဆော်လောကားနောက် ဝေးလှိုင်းတုန်းဖူမ်နယ် ရပ်သောတီမ် အမိန့်အီရာမ်စန်းနော ချက်ချင်းရယ် ဟလာမ်းမူန်တုန်းဆော်လောကားနောက် ဝေးလှိုင်းဖူမ်ငေါ် ငြီမ်နောဟာမ်းမာ့။ 25စီးရာပ်သော် ကိုယ်တော်ကော ဟီမ်ငါတပည့်လာပ်သယ် “နီမ်ငါယုံကြည်ချက်ကော တပါသယ်” ငေါကဲ့အယ် စီမ်ညူဝမ်စန်းနော
တပည့်တော်အားလုံးငေါ အန်းနောတင်းကဲ့အယ် ကစာပ်စာပ်ရယ် “အင်းကာတီတ်ဆာကော ဟင်သယ်။ လှိုင်းတုန်းဖူမ်နောက် လေဖူမ်ဟာမ်း ဟီမ်ငါအမိန့်နယ် နာခံနောဟီးထော်ကာတော်ဟေး” ငေါကဲ့အယ် အချန်းချန်း သပေါက်ချီးမာ့။ 26စီးရာပ်သော် ကိုယ်တော်နောက် ဟီမ်ငါတပည့်လာပ်ကော် ဂါလိလဲအိုင်နယ် ပလာပ်ကယ်အယ် ဂါရစမြို့နောက် ထံပါအာမာ့ ကမ်းခြေကြအာပါအာ ရွက်လွှင့်နောဟီးရီမာ့။ 27အင်းမာနေရား ထုတ်အာမ်ကဲ့အယ် ကိုယ်တော် ကမ်းစုတ်အားဟေရာမ်စန်းနော အင်းမာမြို့ဝါးမာ့ စိတ်ဆလားဆာမ်ငါးကဲ့လင်းငါးကာ့ တီတ်ဆာဟော်ဝါကော ကိုယ်တော်လည် ဟော့ပ်တီမာ့။ ဟီမ်ပါအာ စိတ်ဆလား ဆာမ်ကဲ့လင်းငါးသယ်မာ့ ဟီမ်ငေါ ကျဥ်းမားရီး အလင်း၊ ဆာမ်ဆူန်ရီး အဖူမ်ရယ် ဆိုင်းကြဥ်းသာ ဂူဖူမ်ကြာပ်ကြားပါအာဟာ အချိန်မာပ်အာမ်ကွန်းနယ် ဟာညာပ်ကယ်အယ် လင်းမီမာ့။ 28အင်းမာဟီမ်ငေါ ကိုယ်တော်လည် ယူပ်မူဝမ်စန်းနော ရမ်းကဲ့အယ် ကိုယ်တော်ကာ မန်းနား ဝပ်သောကဲ့အယ် ကလူပ်ကား အသံနောက် “ တန်ခိုးကြီးလောဟန်ဆုံး ဘုရားရှင်ငါ ဆာ ယေရှု၊ ငါဆူပါအာ မဟာ အလိုငါကားသယ်၊ ငါဆူလည် နှိပ်စာပ်သောဝါပ်ဆွမ်၊ တောင်းပန်နော်မာ့ဆွမ်” ငေါကဲ့အယ် ရမ်းကဲ့လျှောက်တင်နော်မာ့။ 29အင်းမာညယ် လျှောက်သောထော်ကာကော် ကိုယ်တော်ကော အင်းမာ့စိတ်ဆလားလည် အင်းမာတီတ်ဆာပါအာအယ် ပူဟာမ်းတီမ် အမိန့်အီရာမ်ကယ် ထာမာ့။ အရင်နာငေါက်သော် အင်းမာ တီတ်ဆာလည် စိတ်ဆလားကော အကြိမ်ကြိမ် ဒုက္ခအီမာ့။ အင်းသယ် တီတ်ဆာလာပ်ကော အင်းမာဟီမ်ငါ ထော်သာလည် သံကြိုးဖူမ်နောက် ဟော်ပ်ကဲ့အယ် လင်ပေးရီး ဟီမ်ငေါ သံကြိုးဖူမ်နယ် တက်တူစ်ကယ်အယ် တီတ်ဆာအပေါ်ရယ် လင်းငါးကာ့ နေရာပါအာ စိတ်ဆလားကော်ကားခံနောထော်မာ့။ 30ကိုယ်တော်ယေရှုကော ဟီမ်နယ် “နာန်ငါ နံမယ်ကော မညယ်ကော်ကားသယ်” ငေါကဲ့အယ် စီမ်ညူဝမ်စန်းနော အင်းမာဟီမ်ပါအာ စိတ်ဆလားဖူမ် နဲကြီစ်ယိုတုန် ဆာမ်ကဲ့လင်းငါးသယ်မာ့ အင်းမာဟီမ်ငေါ “လေဂေါင်a ထာမာ့” ငေါကဲ့အယ် ပြန်နောကဲလျှောက်တင်နော်ဟာမ်မာ့။ 31အင်းမာ့ စိတ်ဆလားဖူမ်ငေါ် ဟီမ်နာပ်သယ် စိတ်ဆလားလာပ်ခနန်း အပြစ်အီကားကာ့ ဆူပ်တင်းငါးကာ့ ထွာမ်တုန်းငါး အဆာပ်ရယ် လင်းကွန်းနယ် ကိုယ်တော်လည် တောင်းပန်နော်ဟီမာ့။ 32အင်းမာချိန်ငါ ဝါပ်သာမ်းကြအာကော တောင်ကုန်းစုတ်အား သမ်ရောက်ညာပ်ကယ်အယ် လင်းဟီးကယ်မာ့ အင်းမာစိတ်ဆလားလာပ်ကော် အင်းမာ့ ဝါပ်သာမ်းပါအာ ဆာမ်ခွင့်ပြုလောတီမ် ကိုယ်တော်လည် တောင်းပန်နော်ဟီကယ်မာ့ ကိုယ်တော်ရီး ခွင့်ပြုလာမ်မာ့။ 33အင်းသယ် စိတ်ဆလားလာပ်ကော် အင်းမာတီတ်ဆာပါအာအယ် ပူဝမ်ကဲ့အယ် ဝါပ်သာမ်းပါအာ ဆာမ်ဟီးစီးရာနောက် အင်းမာဝါပ်သာမ်းငေါ စုတ်တင်းငါးကာ့ ကမ်းပါးတောင်စုတ်အားအယ် ဝေးအိုင်ပါအာ ကာပ်ဆာပ်လီကယ်မာ့ ဝေးလူမ်ဟီးဟူမ်မာန်မာ့။ 34အင်းမာချိန်ငါ ဝါပ်ထိန်းနောကားကာ့ တီတ်ဆာလာပ်ကော အင်းမာအဖြစ်ပျက်သယ် ယူပ်မူဝမ်စန်းနော ကာပ်ပူဟီးရာမ်ကယ်အယ် အင်းမာသတင်းနယ် မြို့ရော ထိန်ရောအနှံ့ပါအာမာ့ တီတ်ဆာဖူမ်နယ် ဆောမ်းညာပ်ချီဟူမ်မာန်မာ့။ 35တီတ်ဆာလာပ်ကော အင်းမာအဖြစ်ပျက်သယ် ယူပ်မူကာပ်ကယ် မြို့နားအယ် ပူဟီးရီမာ့။ ဟီမ်နာပ် ကိုယ်တော်ယေရှုပါအာ ထုတ်ချီးရီစန်နော် စိတ်ဆလားဆာမ်ပါအာအယ် လော်ပ်တာကာ့ ဟီမ်ငေါ အဝတ်ကလန်ဖူမ်ကဲ့အယ် ကိုယ်တော်ကာ့ သာပဲရား အကောင်းပကတိအတိုင်းညယ် ထောင်းကဲ့အယ် လင်းငါးကာလည် ယူပ်မူဟီးရာမ်စန်နော် ကိုယ်တော်လည် ကစာပ်ကယ်အယ် လင်းဟီးရာမ်မာ့။ 36အင်းမာအဖြစ်ပျက်သယ် ကိုယ်တိုင်ယူပ်မူကားကာ့ တီတ်ဆာဖူမ်ငေါ စိတ်ဆလားဆာမ်ပါအာအယ် အင်းမာတီတ်ဆာ မညယ်လော်ပ်သော်ဟာမ်မာ့ ငေါကားအကြောင်းနယ် ထုတ်အာပ်ချီးရီကာ တီတ်ဆာဖူမ်နယ် ဆောမ်းညာပ်ချီမာ့။ 37အင်းမာချိန်နယ် ဂါရစမြို့ ပါအာမာ့ တီတ်ဆာအားလုံးငေါ တအားကစာပ်တင်ကယ် ကိုယ်တော်ယေရှုလည် အင်းမာအရပ်လားအယ် ပူဟာမ်းတီမ် တောင်းပန်နော်ဟီကယ်မာ့ ကိုယ်တော်ယေရှုရီး တပည့်တော်လာပ်နောက်တူတူ လှေစုတ်အား ဟေကဲ့အယ် အင်းမာအရပ်လားအယ် ပူပေးရာမ်မာ့။ 38ကိုယ်တော် အင်းမာအရပ်လားအယ် အပူကြီစ်သယ် စိတ်ဆလားဆာမ်ငါး ခံနောထော်ပါအာအယ် လော်ပ်တာကာဟီမ်ငေါ ကိုယ်တော်နောက်တူတူ ရာပ်ခွင့်ပြုလောတီမ် စိမ်ရီး ကိုယ်တော်ကော အင်းမာဟီမ်နယ် အရာပ်စီမ်ရယ်၊ 39“နာန်ငါကျဥ်းမာ လာမ်ဟာမ်းကဲ့အယ် နာန်ငါအပေါ်ဝါ ဘုရားရှင် အောမ်ကဲ့အီရီကားကာ့ ကလန်ငါအရာလည် တီတ်ဆာတိုင်းနယ် ဆောမ်းနာန်နိတ်” ငေါကဲ့အယ် မိန့်နောမာ့။ အင်းသယ် ဟီမ်ရီး မြို့ရော ထိန်ရောအနှံ့လာမ်ညာပ်ကယ်အယ် ကိုယ်တော်ယေရှု ဟီမ်နယ် အောမ်ကဲ့အီရီကားဖူမ်နယ် တီတ်ဆာတိုင်းနယ် ဆောမ်းဟူမ်မာန်မာ့။ 40ရာကာပ်ဝါ ကိုယ်တော်ယေရှုကော အိုင်ငါ တစ်ဖက်လာ ကြွဟာမ်းစန်နော် တီတ်ဆာပရိသတ်အားလုံးငေါ ပျော်လောကဲ့အယ် ကြိုဆိုလောကဲ့လင်းဟီးမာ့။ မဟာအောမ်ကယ်လိုးငေါနော ဟီမ်နာပ်ကော ကိုယ်တော်လည် လေးကဲ့အယ် လင်းဟီးကားသယ်မာ့။ 41အင်းမာနောက်သယ် ယာဣရုရယ် ကော်ကားကာ ဓမ္မာရုံတာဝန်ခံဟော်ဝါကော ကိုယ်တော်ပါအာ လီကဲ့အယ် ကိုယ်တော်ယေရှုကာ မန်းနား ဒူးထောက်သောကဲ့အယ် ထောင်းစီးရာမ်စန်နော် ကိုယ်တော်လည် ဟီမ်ငါကျဉ်းမာကြွလီတီမ် တောင်းလျှောက်သောမာ့။ 42မဟာအောမ်ကယ်လိုးငေါနော ဟီမ်ငါ့ ဆယ့်နှစ်နှစ်အရွယ် ရှိတ်ဟော်ဝါကော ရှီးဟပ်ကယ်အယ် လင်းကယ်သယ်မာ့ ထာမာ့။
ကိုယ်တော်အင်းမာကျဥ်းမာ လာမ်ငါးကာချိန်နယ် နံတင်းငါးကာ့ တီတ်ဆာဖူမ်ငေါ ကိုယ်တော်လည် ဝန်းရံနော်ကယ်အယ် တိုးကြိတ်သောကဲ့လင်းဟီးမာ့။ 43အင်းမာ တီတ်ဆာဖူမ်ပါအာမာ့ တစ်ဆယ့် နှစ်နှစ်လုံးလုံးရယ် ရှေကစောလက်ကားကာ့ ရောဂါလည် ခံစားလောကဲ့ လင်းထော်ကာ ယာပ်ရှီဟော်ဝါ့ ငါမာ့။ အင်းညယ်ငေါဝမ်ရီ ဟင်ဟာမ်း ဟီမ်ငါရောဂါမီမ်ဟာမ်းကွန်းနယ် ကုလောရင်နို။ 44ဟီမ်ငေါ ကိုယ်တော်ကာနောက်အား ထံပါအာ လီရာပ်ကဲ့အယ် ကိုယ်တော်ကာ အဝတ်ပဲပင်းနယ် ထော်နောက် ထာဝမ်စန်းနော ချက်ချင်း ဟီမ်ငါ ရှေကစောလက်ကားကာ့ ရောဂါကော် မီမ်ဟာမ်းငါမ်မာ့။ 45အင်းမာချိန်နယ် ကိုယ်တော်ယေရှုကော “ငါလည် ဟင်ထာရီကားသယ်” ငေါကဲ့အယ် စီမ်ညူဝမ်ကယ်မာ့
တီတ်ဆာလာပ်ရီး ဟီမ်နာပ် ထာဝိုငေါကားအကြောင်းနယ် ညာမ်းနောဟီးကဲ့အယ် ပေတရုကောc “ဆရာကာ့ ဘေးပတ်လည်ပါအာ တီတ်ဆာသာမ်းဖူမ် တိုးကြိတ်တောကဲ့လင်းဟီးမာ့” ငေါကဲ့အယ် လျှောက်တင်နာန်မာ့။ 46အင်းညယ်ငေါဝမ်ရီ ကိုယ်တော်ယေရှုကော “ဟော်ဝါဟော်ဝါကော ငါလည်ထာရီကယ် တန်ခိုးဖူမ် ပူဝမ်မာ့ ငေါကားလည် ငါမီမ်းဟော်မာ့” ငေါကဲ့အယ် ပြန်နောကဲ့ မိန့်နောဟာမ်းမာ့။ 47အင်းမာယာပ်ရှီရီး အဖုံးနောပေးရင်ညယ်လင်းကယ် ကစာပ်စာပ်ရယ်ဆန်နောကဲ့အယ် ကိုယ်တော်ကာ မန်းနား ဒူးထောက်သောကဲ့အယ် ကိုယ်တော်ကာ့ အဝတ်သယ် ထာစာမ်ဟာဟာမ် ဟီမ်ငါရောဂါ ချက်ချင်း မီမ်ဟာမ်းငါကာလည် တီတ်ဆာဖူမ်နယ် ဆောမ်းကဲ့ပြလောမာ့။ 48ကိုယ်တော်ကော အင်းမာ ယာပ်ရှီလည် “ မီးဟား နာန်ငါ ယုံကြည်မှုကော နာန်ငါရောဂါလည် မီမ်ဟာမ်းစီမ်းငါး ထာမာ့။ ငြီမ်းငြီမ်းချမ်းချမ်းရယ် လာမ်နိတ်” ငေါကဲ့အယ် မိန့်နာန်မာ့။ 49ကိုယ်တော်ယေရှု အင်းမာညယ် မိန့်နောကဲ့ လင်းငါးကာ့ အချိန်နယ် ယာဣရုကာ့ ကျဥ်းမားကာ့ တီတ်ဆာဟော်ဝါကော ထုတ်အီကဲ့အယ် ယာဣရုလည် “နာန်ငါ ရှိတ်ကော ရှီးရာပ်၊ ဆရာလည် နောက်ယှက်သောစောမ်းသာပ်” ငေါကဲ့အယ် ငေါရီမာ့။ 50အင်းမာလည် ကိုယ်တော်ယေရှု သပ်မူဝမ်စန်းနော “ကစာပ်အာ့။ ယုံကြည်မှုဟာ ငါစီမ်းနိတ်။ နာန်ငါရှိတ် အသက်ဆိုင်းဟေပ်ကား” ငေါကဲ့အယ် ယာဣရုလည် မိန့်နောမာ့။ 51ကိုယ်တော်ကော ယာဣရုကာကျဥ်းမား ထုတ်အာစန်းနော ပေတရု၊ ယောဟန်၊ ယာကုပ်နောက် အင်းမာယာပ်ရှီဆဟာကာ့ အော်ပ်ဝါ လာပ်ကာ့ပန်းနယ် ကျန်နောကားကာ့ တီတ်ဆာဖူမ်နယ် အခန်းနား ဆာမ်ငါပ်စီမ်ငို။ 52တီတ်ဆာတိုင်းငေါ အင်းမာယာပ်ရှီဆဟာ ရှီးရာမ်ကယ် ဟပ်ကဲ့လင်းဟီးမာ့။ အင်းညယ်ငေါဝမ်ရီ ကိုယ်တော်ကော “ဟပ်ချီရာပ်။ အင်းကာ့ ဆဟာကော ရှီးကဲ့အယ် လင်းငါးဟီပ်ယို။ အက်လီးကဲ့လင်းငါးထာမာ့” ငေါကဲ့အယ် မိန့်နာန်စန်နော် 53တီတ်ဆာဖူမ်ငေါ အင်းမာ့ယာပ်ရှီဆဟာ ရှီးရာပ်ငေါကားကာလည် မီမ်းဟော်ဟီကယ်မာ့ ကိုယ်တော်လည် လှောင်ပြောင်နောကဲ့ နီးကာပ်ချီမာ့။ 54အင်းညယ်ငေါဝမ်ရီ ကိုယ်တော်ယေရှုကော အင်းမာ ရှီးရာကာ့ ဆဟာကာ့ထော်လည် အောမ်းကြီစ်ကဲ့အယ် “ဆဟာ၊ ယုတ်စာပ်” ငေါကဲ့အယ် မိန့်နာန်မာ့။ 55အင်းမာချိန်နယ် ယာပ်ရှီဆဟာကော ချက်ချင်း အသက်ဆိုင်းဟေကယ်အယ် ယုတ်ကဲ့ထောင်းကဲ့ လင်းမာန်မာ့။ ကိုယ်တော်ယေရှုကော ဆဟာကာ့ အော်ပ်ဝါလာပ်သယ် ဆဟာနန်း မဟာမဟာအီနောပ်တီမ် ငေါဝမ်မာ့။ 56အင်းမာယာပ်ရှီကာ အော်ပ်ဝါလာပ်ကော တအားတုန်းရယ် အန်းနောဟီးရာမ်မာ့။ အင်းညယ်ငေါရီး ကိုယ်တော်ကော အင်းကာ့အဖြစ်ပျက်ဖူမ်နယ် ဟင်နယ်ဟာမ်း အငေါရယ်လင်းတီမ် မှာလောပေးရာမ်မာ့။
Currently Selected:
Luke 8: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
