Luke 9
9
1စီးမှါခ့်ခါ ကိုယ်တော်ကား တပယ့်တော် ရှစ်နူဘန်းကလိန်းဟူးတေ ကော်ဘန်း အမဲဘင်းနနူတေဒေ ငှါတ်ပူရန်ကွန်းအတွာတ်ယောက် ကမာရောဂါတေဒေကယာစိမ်းရန်ဘင်း တန်ခိုးအာဏာတေဒေ အီမှာ။ 2စီးမှါခ့်ခါ ကိုယ်တော်ကား အန်တာတ်တေ ဘုရားရှာန်ဘင်း သာသနာအကြောင်းဒေ ဟောသကာဒင်ယောက် အနင်းမဲဘင်းဆိတ်တာတ်တေ နင်းမဲကွန်းအတွာတ် တာတ်နာန်မှာ။ 3ကိုယ်တော်ကား အန်တာတ်တေ "ဟနိမ်ယောက်ဟမာန်ကဆဲ အလာရာန်ဆာ။ "တောင်မွေး၊ ခရီးဟာဘင်းဒလေ့စ်၊ ယုတ်တင်အူဒင်တေ၊ ဖူး၊ ဆာန်ဆုန်အပိုတေဒေ အလာရာန်ဆာ။ 4ဟနိမ်တေကြိုဆိုသဘင်းဟာဘင်းကျေမ်းဘေစဲဒါး အန်ဘင်းမြို့ဟက်အပူမချမ်း အန်ဘင်းကျေမ်းဘေ တည်းသကြီး။ 5အာနိမ်စါန်းငှေါဒီ ဟနိမ်တေ အလာတ်ခံသဘန်းကား အန်ဘင်းမြို့ဟက် ပူရီမှါခ့်ခါ အန်တာတ်တေ ဆတီးအီဘင်းအနေယောက် ဟနိမ်တာဘင်း ဖုန်တေခါသအက်ပဲကြီး" ညယ်မိန့်သမှာ။ 6တပယ့်တာတ်ရီး အန်ဘင်းဟက် ပူဒီပဲဘန်းနာ အနယ်နယ်အရပ်ရပ်ပါလာန်ဘန်း ဘုရားရှာန်ငှေါဘင်း မာန်းဂလာဆတာန်းတေဒေ ငှေါကာဘန်းနာ ကနာနင်းဘင်းဆိတ်တာတ်တေဒေရီဒါး ကယာကွန်း ကုဒအီကြီးမှာ။ 7ရှာန်းပလာန်ဟေရုဒ်ကား ကိုယ်တော်ယေရှုအွန်ဘင်းနာတေဒေ သက်ပူမှါခ့်ခါ အဆေင်တေကားရီမှာ။ ဟမာန်တွာတ်ငှေါဘန်းသာငှေါ စယ်ယာဘင်းသမီဆာတာတ်ကား "ဝဲငွတ်ပင်း မာန်းဂလာအွန်အီဘင်း အိုးဆကြီးယောဟန်ကား အဆာတ်စားဟာန်းပိန်" ညယ်လည်းကောင်း 8အခြားဘင်း သမီဆာတာတ်ကား "ပရောဖက်ဧလိယ ပြန်သဘန်းကြွဒီဘန်း" ညယ်လည်းကောင်း၊ စယ်ယာကား မာအယ်ဟက်ငှါဘင်း ပရောဖက်ဟော်ဝါ အဆာတ်စားဟယ်မှာ" ညယ်လည်းကောင်း ငှေါနင်းကြီးဘင်းအတွာတ်ထှာမှာ။ 9စီးမှါခ့်ခါ ဟေရုဒ်ရှာန်းပလာန်ကား "ငါကား ယောဟန်ဟလာမ်းတေတွတ်စိန်းယုတ်စီးဘန်း။ အရာတ် အနိမ်သက်ပူနင်းဘင်း ဆိတ်ကားဟာဟမဲကား" ညယ်ငှေါဘန်း ကိုယ်တော်ဒေကတုံန်ကာတ်နင်းမှာ။ 10တပယ့်တော်တာတ် ဒီဟာန်းမှါခ့်ခါ ကိုယ်တော်ယေရှုတေ အန်တာတ်အွန်နီဘင်းနာတေဒေ လျှောက်တာန်သကြီးမှာ။ စီးမှါခ့်ခါ ကိုယ်တော်ကား အန်တာတ်ယောက်အတူတူ ဗက်ဇဲဒမြို့ပါလာန်ကြီးမှာ။ 11အန်ဘင်းအကြောင်းအရာတေဒေ သမီဆာကလောင်းတုံန်းတာတ်ကား မိန်းရှာတ်ခါဘင်းအတွာတ် ကိုယ်တော်ဟလိန်းဘေဒီရာတ်ကြီးမှာ။ ကိုယ်တော်ရီးဒါး အန်တာတ်တေ ကြိုဆိုသဘန်း ဘုရားရှာန်ဘင်း သာသနာတော်အကြောင်းယောက် ပတ်သက်သဘန်း ရှာန်းရှာန်းလာန်းလာန်း ဟောသကာစီးဘန်းနာ အနင်းမဲဘင်းဆိတ်တာတ်တေဒေရီဒါး နင်းမဲကွန်းအွန်အီမှာ။ 12ညနေစောင်းဒီဘင်းအတွာတ် တပယ့်တော်ရှစ်နူဘန်း ကလိန်းဟူးတာတ်ကား ကိုယ်တော်ပါထုတ်ကြီးရီဘန်း "ကိုယ်တော်၊ အဘင်းအရပ်ကား သမီဆာထုတ်လားစစ်ပင်းအရပ်ထှာဘင်းအတွာတ် အဘင်းသမီဆအုပ်တုံန်းတေ အဘင်းပိုက်ပေငှါဘင်း ထိန်တေပါ တတ်နာန်။ အန်တာတ်ကား နင်းဒင်ယောက်ယုတ်တင်တေလိုသမှာ" ညယ်လျှောက်တာန်သမှာ။ 13ကိုယ်တော်ကား "အန်တာတ်တေ ယုတ်တင်စယ်ယာအီရာန်" ညယ်မိန့်တာန်မှါခ့်ခါ အန်တာတ်ကား "အလေဘေကား ပေါင်မုန့်ရှာရှာ ဟာဟုတ်ယောက် တာန်းငှါကလိန်းနူ၌ငှါလား။ အဘင်းသမီဆာအားလုံးဒေ အီယုတ်ကူငှေါဘန်းကား ယုတ်တင်တေဒေ မီးရာထှာကူ" ညယ်လျှောက်သပဲမှာ။ 14သမီဆာအုပ်တုံန်းကား ဟလောဝါ ငါးထောင်နီးနီးငှါမှာ။ ကိုယ်တော်ကား ဟိန်တပယ့်တာတ်တေ "တစ်စုတေငါးဆယ်စီ ထုံးစိန်းဒင် သမီဆာတာတ်တေ ငှေါရာန်" ညယ်မိန့်သဘင်းအတွာတ် 15တပယ့်တော်တာတ်ရီးဒါး အန်ဘင်းနည်းအတိုင်း သမီဆတာတ်တေ ထုံးစိန်းယုတ်မှာ။ 16စီးမှါခ့်ခါ ကိုယ်တော်ကား ပေါင်မုန့်ဟာဟုပ်ယောက် တာန်းငှါကလိန်းနူတေ လာဘန်းနာ ဟမုခ်ပါ မှန်းသဘန်း ဘုရားရှာန်ဘင်း ဂုဏ်တော်ဒေ ကျယ်ဘန်းဆုစိန်ရာန်ဘန်း ဟိန်တဟူးယောက် ပေါင်မုန့်ယောက်တာန်းငှါတေ စဲဘန်း တပယ့်တာတ်ခက်တစ်ဆာန့် သမီဆာတာတ်တေမံအီမှာ။ 17သမီဆာတာတ်အားလုံးကား ကျဲကွန်းယုတ်စီးဘင်းအပြာန် အန်တာတ်ယုတ်စီးဘင်းနာတေဒေ ကွန်နာန်မှါခ့်ခါ ကုန်ဟာန်းရှစ်နူဘန်း ကလိန်းဟုတ် ပြန်သဘန်းလူဟာန်းမှာ။ 18ရအာမှါခ့်ခါ ကိုယ်တော် ဟော်ဝါဆာ ဆုစိန်နင်းမှါခ့်ခါ တပယ့်တော်တာတ်ထုတ်ကြီးရီဘန်းနာ ကိုယ်တော်ကား အန်တာတ်တေ "သမီဆာတာတ်ကား ငါတေဟာဟမဲညယ်ငှေါနင်းကြီးဒေ" ညယ်စိန်ယူရာန်မှာ။ 19အန်တာတ်ကား "စယ်ယာကား ကိုယ်တော်တေ ဝဲငွတ်ပင်းမာန်းဂလာအွန်အီဘင်း အိုးဆကြီးယောဟန်ညယ်ငှေါကြီးမှာ။ ဧလိယညယ်ရီးငှေါကြီးမှာ။ မာအယ်ဘင်းပရောဖက်ဟော်ဝါ အဆာတ်စားဟာန်းရီမှာညယ်ရီး အမျိုးမျိုးငှေါနင်းကြီးမှာ" ညယ်လျှောက်တာန်သကြီးမှာ။ 20အန်၌မှါခ့်ခါ ကိုယ်တော်ကား "ဟနိမ်ကား ငါဒေ ဟာဟမဲညယ်ထာန်သကြီးဒေ" ညယ်စိန်ယူဘင်းအတွာတ် ပေတရုကား "ကိုယ်တော်ကား ဘုရားရှာန်တာတ်နာန်ဘင်း ကယ်တာန်ရှာန်မေရှိယထှာမှာ" ညယ်ပြန်သဘန်း လျှောက်တာန်သကြီးမှာ။ 21ကိုယ်တော်ဟက် အဘင်းအကြောင်းတေဒေ ဟာဟမဲတေဆဲ အငှေါကွန်းတင်းကြပ်သဘန်း တားမြစ်တာန်မှာ။ 22ကိုယ်တော်ကား ဟိန်တပယ့်တော်တာတ်တေ "နိုင်ငံဘင်း ဟလာမ်းစါတ်တုံန်းတေ၊ ပုရောဟိတ်တာတ်ယောက် ကျမ်းပေါ့ပင်းအိုးဆကြီးတာတ်ကား သမီဆာဆားတော်တေ နှိပ်စာတ်သကြီးကူ။ အန်တာတ်ကား ဟိန်တေငြာမ်းပယ်သဘန်း သာန်းရှီးကြီးကူ။ အန်နိမ်စါန်းငှေါဒီ ဆွန်းရာတ်ထုတ်မှားခါခ့် ဟိန်ကား အဆာတ်စားဟာန်းရီကူ" ညယ်မိန့်တော်မူသမှာ။ 23စီးမှါခ့်ခါ ကိုယ်တော်ကား သမီဆတာတ်တေ "ငါနောက်လိုက်ထှာကာတ်ပင်းဆိတ်တာတ်ကား ကိုယ်ဘင်းအကျိုးတေ တက်ပန်း တာပ်ပါးကပ်ပင်းတိုင်တေ ကိုယ်တိုင် ဖဲဘန်းနာ ငါဟလိန်းဘေ မှာန်းရာတ်၌တိုင်း ဒီယာတ်ရာန်ဘင်းဆိတ် ထှာထာကူ။ 24ကိုယ်အဆာတ်တေ ကယ်သကာတ်ပင်းဆိတ်တာတ်ကား ဆုံးရှုံးသကြီးထှာကူ။ အန်နိမ်စါန်းငှေါဒီ ငါအတွာတ်ယောက် ကိုယ်အဆာတ်တေ စွန့်သဘင်းဆိတ်ကား ကယ်သလားခံသထှာကူ။ 25ဟနိမ်ကားကမ္ဘာတုံန်းတေ အုပ်စိုးသလူဒီဒါး ဟနိမ်ဘဝတုံန်းပြတ်စီးသပန်း ရှီးထှာပန်းကား ဟမာန်အကျိုးငှါကူတေ။ 26ဟနိမ်ကား ငါအတွာတ် မန်းကတန်ဘန်းကား သမီဆာဆားတော်ကား အဝါဘုရားရှာန်ဘင်း ဘုန်းတန်ခိုးတော်တေ၊ မြင့်မြတ်သဘင်း ဟမန်းတေယောက် အတူကြွဒီမှါခ့်ခါရီဒါး ဟနိမ် မန်းကတာန်ထှာကူ။ 27ဟနိမ်တေငါချီလားတေငှေါထှာဘန်းကား အဘင်းဘေစပ်နင်းဘင်း သမီဆာစယ်ယာကား ဘုရားရှာန်ဘင်းသာသနာတော်တေ အကတုံန်လူညယ် ရှီးကလားအချီရား" ညယ်မိန့်တော်မူသမှာ။ 28အန်နိမ်မိန့်သစီးဘန်း ကောင်ရာတ်ထုတ်မှါခ့်ခါ ကိုယ်တော်ကား ပေတရု၊ ယောဟန်ယောက် ယာကုပ်တာတ်တေ ကော်ဘန်း ဆုစိန်ဒင် ကယာစောက်ပေ ကြွသကြီးရာန်မှာ။ 29ကိုယ်တော်ဆုစိန်နင်းမှါခ့်ခါ ဟိန်လာန်ပုံစံကား ပြောင်းသလာန်ဘဲဘန်း ဟိန်တော်ပဲဘင်းဆာန်ဆုန်ရီဒါး အကြီးကျယ်လုံးဘန်း ရားနင်းနာန်မှာ။ 30စီးမှါခ့်ခါ မောရှေယောက် ဧလိယတာတ်ပေါ်ဒီဘန်း ကိုယ်တော်ယောက် အတူတူ တူးသပေါက်ကြီးမှာ။ 31အန်တာတ်ကား ဘုန်းတန်ခိုးတော်တေပေါ်သဘန်း ဂျေရုဆလင်မြို့ဘေ ကိုယ်တော်ရှီးခံသထှာကူဘင်းနာဒေ ငှေါနင်းကြီးမှာ။ 32အန်နိမ်စါန်းငှေါဒီ ပေတရုယောက် တခြားတပယ့်တော်ကလိန်းဟူးကား အကြီးကျယ်အေ့ပ်ပါတ်ပွတ်နင်းကြီးမှာ။ အန်တာတ်မင်နီမှါခ့်ခါ ချတ်ချန်း ဘုန်းတန်ခိုးတော်တေယောက် ဖိန်းနင်းဘင်း ကိုယ်တော်တေ ဖူးသလူကြီးမှာ။ အန်တာတ်ကား ကိုယ်တော်ယောက်အတူ တူးသပေါက်နင်းကြီးဘင်း ပရောဖက်ကလိန်းဟူးတေရီးဒါး ကတုံန်ရာန်မှာ။ 33စီးမှါခ့်ခါ မောရှေ့ယောက် ဧလိယတာတ် ပူလာန်ဘဲကြီးမှါခ့်ခါ ပေတရုကား ကိုယ်တော်တေ "ကိုယ်တော်၊ အဘင်းအရပ်ကား နင်းကာတ်ထာတ်ဆာမဲမှာ။ အမှာတွာတ် ကိုယ်တော်အတွာတ် တဲဟုတ်အာ၊ ဧလိယအတွာတ် တဲဟုတ်အာ၊ မောရှေအတွာတ် တဲဟုတ်အာ အလေစာပန်း စာအီကူ" ညယ်လျှောက်တာန်သမှာ။ အာနိမ်စါန်းငှေါဒီ ဟိန်ကား ဟိန်ကာတ်ဟိန် ဟာနိမ်ငှေါရာန်မှာငှေါဘင်းနာတေ အမိန်းရှာတ်ခါး။ 34ပေတရု အန်နိမ်လျှောက်တာန်သနင်းမှါခ့်ခါ ဟမုခ့်စောက်ပင်း ဟာမ်းချီကား အန်တာတ်စေါက်ပေ မိုးသဘန်းနာ အရိပ်အက်နင်းဘင်းအတွာတ် အန်တာတ်ကား အကြီးကျယ်စာတ်နင်းကြီးရာန်မှာ။ 35အန်၌မှါခ့်ခါ ဟာမ်းချီဟက် "အဘင်းဆိတ်ကား ငါဆာထှာမှာ။ ဟိန်တူးဒေသက်ကြီး" ညယ်ဆကလားပူရီမှာ။ 36အန်ဘင်းဆကလားပူစီးမှါခ့်ခါ ပေတရု၊ ယောဟန်ယောက် ယာကုပ်တာတ်ကား ကိုယ်တော်ယေရှုတစ်ပါးတည်းတေဆာ ကတုံန်ကြီးဘန်းလား။ အန်တာတ်ကား အန်တာတ်ကတုံန်ရီဘင်းအကြောင်းတေဒေ ဟာဟမဲတေစဲအငှေါညယ် ယူရှီရှီနင်းကြီးမှာ။ 37နောက်မာန်းရာတ်မှါခ့်ခါ ကိုယ်တော်ယေရှုယောက် တပယ့်တော်ဆွုန်ဟူးတာတ်ကား ကယာစောက်ခက် ဆပ်နီမှါခ့်ခါ သမီဆာကလောင်းတုံန်းကား အန်တာတ်တေ ကြိုဆိုသကြီးမှာ။ 38သမီဆာကလောင်းတုံန်းဟက် ဟော်ဝါကား "ကိုယ်တော်၊ ငါဆာတေ ကနာနင်းဘင်းဟက် မဲကွန်းကုသအီယုတ်။ ဟိန်ကား ငါဘေငှါဘင်းဆာဟော်ဝါရှာ ထှာဘင်းအတွာတ် ထှာမှာ။ 39ဟိန်တေ အမဲဘင်းနနူ ဆာန်ဘန်း နိတ်စါတ်သဘင်းအတွာတ် အလန့်တကြား ဟာတ်ပန်းနာ ဟိန်လာန်တစ်ကိုယ်လုံး ဆန်သပန်းနာ ဆတွန်းနောင်းဟက် ဆပေါ့တေရီးပူရီဟာမှာ။ အန်ဘင်းအမဲဘင်းနနူကား ဟိန်တေ ကနာစိန်းမှာ။ ဟိန်ဟက်တော်တော်ယောက် အပူရန်နား။ 40ငါကား ကိုယ်တော်ဘင်းတပယ့်တာတ်တေ တောင်းပါန်သဘန်း အန်ဘင်းအမဲဘင်းနနူဒေ ငါတ်ပူစိန်းယုတ်သည်ဒါး အာန်တာတ်အအွန်ရန်နား" ညယ်လျှောက်တာန်သမှာ။ 41အန်၌မှါခ့်ခါ ကိုယ်တော်ကား တပယ့်တာတ်တေ "အို ယုံကြည်သဘင်းရီးအဘိုဝါး၊ လမ်းမှားသနင်းကြီးဘင်းဟနိမ်။ ငါကား ဟနိမ်ယောက်အတူတူ ဟာနယ်မှါခ့်ကွန်းနင်းဘန်း ဟနိမ်တေ သည်းခံသထှာယုတ်ကူတေ" ညယ်မိန့်သမှာ။ စီးမှါခ့်ခါ ကိုယ်တော်ကား အန်ဘင်းဆိတ်တေ "နာန်ဘင်းဆာတေ ငါပါကော်ရီ" ညယ်မိန့်သမှာ။ 42အန်ဘင်းရှရှာဒီနင်းမှါခ့်ခါ အမဲဘင်းနနူကား ဟိန်ဘေကပ်ပန်းနာ လာန်တစ်ကိုယ်လုံးတေ အကြီးကျယ်ဆန်သစိန်းမှာ။ ကိုယ်တော်ကား အမဲဘင်းနနူတေ ဆုံးမသဘန်း ရှရှာတေကုသအီဘန်း ဟိန်အဝါပါ အီဟာန်းရာန်မှာ။ 43သမီဆတာတ်ကား ဘုရားရှာန်ဘင်း တန်ခိုးတော်တုံန်းတေဒေ ဖူးသလူပန်း အံ့ဩသလားအစီးငှါနင်းကြီးမှာ။ ကိုယ်တော်ယေရှုအွန်ဘင်းနာတေဒေ သမီဆာတေကား အံ့ဩသဘန်းနင်းကြီးမှါခ့်ခါ ကိုယ်တော်ကား ဟိန်တပယ့်တော်တာတ်တေဒေ 44"ဟနိမ် ငါငှေါဘင်းနာတေဒေ အာရုံစိုက်သဘန်းသက်ကြီး။ သမီဆာဆားတော်တေ ရန်သူတာတ်ပါ အီလားခံသထှာကဘန်း" ညယ်မိန့်တော်မူသမှာ။ 45အန်ဘင်းဆိုလိုသဘင်းတေ အန်တာတ်ဟက်ကဆွန်းပဲဘင်းအတွာတ် တပယ့်တော်တာတ်ကား အနားလည်သောညယ် နင်းကြီးမှာ။ အန်နိမ်စါန်းငှေါဒီ စိန်ယူကူဘင်းရီး စာတ်နင်းကြီးမှာ။ 46မာန်းရာတ်မှါခ်မှါခ့်ခါ ဟိန်တပယ့်တော်တာတ်ကား အန်တာတ်နောင်းဟက် ဟာဟမဲကား အကြီးမြတ်ဆုံးထှာမှာငှေါဘင်းနာတေ ငြာမ်းသပန်းနင်းကြီးမှာ။ 47အန်နိမ်စါန်းငှေါဒီ ကိုယ်တော်ကား အန်တာတ်ငြာမ်းသနင်းလားတေ မိန်းရှာတ်ခါဘင်းအတွာတ် ရှရှာဟော်ဝါတေ ဟိန်ပိုက်ပေ စပ်စိန်းယုတ်ပန်း 48တပယ့်တော်တာတ်တေ "ငါအတွာတ်ယောက် အဘင်းရှရှာတေ လက်ခံသဘင်းဆိတ်ကား ငါတေလက်ခံသဘင်းဆိတ်ထှာမှာ။ ငါတေလက်ခံသဘင်းဆိတ်ကား ငါတေတာတ်နီဘင်း အရှာန်တေရီးဒါး လက်ခံသဘင်းဆိတ်ထှာမှာ။ ဟနိမ်နောင်းဟက် ကိုယ်ကောက်ကိုယ်ကာ နိမ့်ချသဘင်းဆိတ်ကား အကြီးမြတ်ဆုံန်းသမီဆာထှာမှာ" ညယ်မိန့်တော်မူသမှာ။ 49စီးမှါခ့်ခါ ယောဟန်ကား "ကိုယ်တော်၊ ကိုယ်တော်နာမယ်တေ နပ်ပန်း သမီဆာတာတ်ဟက် အမဲဘင်းနနူတေ ငါတ်နင်းဘင်းသမီဆာ ဟော်ဝါတေ ငါကတုံန်ရီမှာ။ ဟိန်ကားအလေယောက် အတူတူ အဒီယာတ်ပင်းဆိတ် ထှာဘင်းအတွာတ် အန်နိမ်အအွန်သင့်သဝါးညယ် တားမြစ်သည်မှာ" ညယ်လျှောက်တာန်သမှါခ့်ခါ 50ကိုယ်တော်ကား "ဟိန်တေ အတားသဆာ။ ဟနိမ်တေ အဆန့်ကျင်သဘင်းဆိတ်ကား ဟနိမ်တေ ထောက်ခံသဘင်းဆိတ်တေထှာကြီးမှာ" ညယ်မိန့်တော်မူသမှာ။ 51စီးမှါခ့်ခါ ကိုယ်တော်ကား ရွှေမြို့တော်ပါလာန်ဒင် ထံနီဘင်းအတွာတ် ဟိန်ကား ဂျေရုဆလင်မြို့ပါ လာန်ဒင်အဆင်ဆုံးဖြတ်တာန်မှာ။ 52ဟိန်ကား တပယ့်စယ်ယာတေ ရှမာရိထိန်ပါ အရာန်တာတ်နာန်ဘန်း ဟိန်အတွာတ် အဆာန်တာန့် ပြာန်သစိန်းယုတ်ပဲမှာ။ 53အာနိမ်စါန်းငှေါဒီ ကိုယ်တော်ကား ဂျေရုဆလင်မြို့ပါ လာန်နင်းဒီဒါး ရှမာရိထိန်ဘင်း သမီဆာတာတ်ကား ကိုယ်တော်တေ အကြိုဆိုသကြီးရား။ 54ယာကုပ်ယောက် ယောဟန်တာတ်ကား အန်ဘင်းထှာရာန်ဘင်းနာတေ ကတုံန်မှါခ့်ခါ "ကိုယ်တော်၊ အလေကား ဘုရားရှာန်တေလျှောက်သဘန်း ဟမုခ်စေါက်ဟက် ဝါမ်တေအက်စိန်းဘန်း အန်တာတ်တေ ဖြတ်ဆီးတာန်ထှာကလဲ" ညယ်လျှောက်တာန်သဘန်း 55ကိုယ်တော်ကား အန်တာတ်ပါလှည့်သပန်း ဆုံးမသစီးမှါခ့်ခါ 56အန်တာတ်အားလုံးကား တခြားထိန်ထိန်းနူပါ လာန်ပဲကြီးမှာ။<br> 57ကိုယ်တော်ယောက် တပယ့်တော်တာတ် လာန်ဘင်းလမ်းဘေ သမီဆာဟော်ဝါကား ကိုယ်တော်ယေရှုတေ "ကိုယ်တော်လာန်ကူဘင်း နေရာတိုင်းဘေ ငါဒီယာတ်ကူ" ညယ်လျှောက်သမှါခ့်ခါ 58ကိုယ်တော်ကား "ပုတ်ခါးကြည်ဘေကား သဟွမ်ငှါမှာ၊ အူစိတ်ဆာဘေကား အအုံငှါမှာ။ အန်နိမ်စါန်းငှေါဒီ သမီဆာဆားတော်ဘေကား ဟလာန်းချသဒင်နေရာစဲအဘိုဝါး" ညယ်မိန့်သမှာ။ 59စီးမှါခ့်ခါ ကိုယ်တော်ကား တခြားဘင်းသမီဆာဟော်ဝါဒေ ဟိန်ယောက်အတူ ဒီယာတ်တင်ကော်မှါခ့်ခါ အန်ဘင်းဆိတ်ကား "ကိုယ်တော်၊ ငါအဝါအလောင်းတေအရာန် နွတ်စီးလားထုတ်ကွန်း စောင့်သအီယုတ်" ညယ်လျှောက်တာန်သမှါခ့်ခါ 60ကိုယ်တော်ကား "လာန်ရှီးနင်းဘင်းဆိတ်တေ အဆေင်ရှီးဘန်းနင်းကြီးဘင်းဆိတ်တာတ် နွတ်စိန်းရာန်။ နာန်ကား ဘုရားရှာန်ဘင်းသာသနာအကြောင်းတေ သမီဆတာတ်နင်း ဟောသကာအီ" ညယ်မိန့်သမှာ။ 61တခြားဘင်းဟော်ဝါရီးဒါး "ကိုယ်တော်၊ ငါကား ကိုယ်တော်ဟလိန်းဘေ ဒီရာတ်ကူ။ အန်နိမ်စါန်းငှေါဒီ ငါကျေမ်းပါခဏဆာ လာန်ဟာန်းပန်း ငါကျေမ်းဆိတ်တာတ်တေအရာန် နှုတ်ဆက်သဟာယုတ်ကူ" ညယ်လျှောက်တာန်သမှာ။ 62ကိုယ်တော်ကား "လပါးထွန်ဘင်း ထွန်ကိုင်းတေငါတ်ပန်း ဟလိန်းပါ ယူဟာန်းဟာဘင်းသမီဆာကား ဘုရားရှာန်ဘင်းသာသနာတော်ယောက် အထိုက်တန်သဝါး" ညယ်မိန့်တော်မူသမှာ။
Currently Selected:
Luke 9: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
