Luke 17
17
1ဟောည်ႇဒီန် စဝ်ဖြားယေရှု ဒါႈတတပဲ့တော်အ်ုန် “ခံင်ပ်ုန်ဆမာဒဲႈ တိုအီးကဲ လူည်ႇရေဲန်အီုင်ဂ္လံတ်နီန် မိူဝ်ႈဂီုန်းခည်း။ မိုႈလိူည် ကဲအီတီုတ်နောႈ ကနာည်နံင်ရေဲန် တိုအီးကဲ တအီုင်ဂ္လံတ်နီန် မိူဝ်ႈခည်း အမံင်ဂလာ။ 2လဒိုရ်အယ်ရေဲန်ဒဲႈအီး လူည်ႇအီုင်ဂ္လံတ် တိူဝ်ႈႎံ ရ်ႎှတရမောင်တိုပြီမ် တီုတ်မာဝ်း ႎဲရ်ဇောႈခေဲင်အိုမ်ပါင်လာည်နီန် ချဲမ်မှယ်ဒိုရ်။ 3ဂေါႇဘည်ဒီန် အူန်းပဲဒါဆဒိဒါင်းဒါင်း ရေဲန်။ ဆာ်ႎည်းႎါးမည်း ကချှာဒေရေဲန်အီုင်ဂ္လံတ် ပဲလိုပနံဝ်းပနောဒဲႈတအ်ုန်။ ဆာ်အ်ုန်လှေဲႇနောႈ ပဲစီပ္လိုတ်ႎါင်းခွါင်းဒဲႈတအ်ုန်။ 4အ်ုန်ဆံမ်လူည်ႇမည်း ခေဲင်အူဆငည်းနီန် ပူရ်လိူဝ်ႈမာ် ဆာ်အ်ုန်ဒေဲႈရောတ် မှာန်းမည်းနောႈယေတ်တောန်လူည်ႇအ်ုန်ဒီန် မည်းနံင်လို ပ္လိုတ်ႎါင်းခွါင်းဒဲႈ တအ်ုန်ယာ့်။” 5ခိင်ဒီန် သာဝကကဲနီန်ဟြာင်း “ဒဲႈနောႈဖိူမ် ပုန်ညှူမ်ယဲနီန် ကဟိုက်ကဟာဝ်း” 6စဝ်ဖြားမာ် “ပဲဆံမ်မိူဝ်ႈလိူည် ဘည်ညှူမ်ဒဲႇဂေါည်ထာန် ကအာင်တဝ်အေဲႈႎံ င်းမာ် ဆာ်ပဲဒဲႈအမိင် တတံင်ပိုးစာပင်နီန် ရိူဝ်ႈတောပ်ရျံရ်ႈ ဟာဝ်းလဲ့ခေဲင်အိုမ်ပါင်လာည်မာ် တံင်ဒီန် နံင်တောပ်တငါဝ်း ပ်ုန်ဒါႈပဲယာ့်။ 7ခိင်ကဝ်အီရေဲန်ဇီုင်းမည်း ယိူဝ်ႇထည်ဂီုင်၊ ဟျံင်ဆိုဘြည်ကဲနီန် ႎီရ်ရောတ် မည်းနံင်ဒါႈလာ့် ‘ရံပ်ရိုႈအူန်းမည်း၊ လီပ်ဟောမ်ပ်ုန်ဟောမ် ခေဲင်ဂါင်။’ 8လဒိုရ်မည်းဒါႈဘည်နီန် အာဝ်မိုႈမည်းနံင်ဒါႈ ‘ရဲန်ဒဲႈအောဟောမ်အူမျိုးအူလှေ၊ ဟောည်ႇဒီန် ဇံင်းရဲ့ ဂါအောအာဝ်ဟောည်ႇဟောမ်။ ဆာ်ဟောည်ႇ မည်းစီဟောမ်။’ 9တိုအီးအီရေဲန်ဇီုင်းပဂါင်အယ် ရေဲန်တောပ်ဘည်ဇီုင်းကပ္လိူင် ပ်ုန်လိုကဲတရေဲန်နီန် အ်ုန်မှိူမ်လာ် တာင်ကေးစူး။ အာဝ်မှိူမ်တာင်မ။ 10ပဲမာ်လိုက္လာင်းလိူည် ခိင်ပဲဟောည်ႇရေဲန်ဇီုင်းပ်ုန်ဆူည်ႇအီး ‘ဂေါႇမိုႈယဲမိုႈလိူည် တိုအီးရေဲန်ဇီုင်းရိုရို။ ယဲရေဲန်လိူည်ဇီုင်း ပ်ုန်လိုယဲတရေဲန်။’” 11ဟောည်ႇဒီန် စဝ်ဖြားဟည်ခ္လေါႈဟာဝ်း ခနားဒီကစာပ် အရာပ်ရှမာရိ ကာည်း ဂါလိလဲ အီဂေါည်ပတောပ်ဒေင်ဟာဝ်း ကီုင်းဂျေရုဆလင်။ 12ခိင်ရောတ်အ်ုန်ပရဝ်အူရဝ်ဒီန် မိူဝ်ႈကဲအီကတူႈရောဂါတူတ် အူကိူရ်အီး ဇံင်းအာဝ်ကဒံတ်အာဝ်ကဒိုင်း ရဲ့ရံပ်ရိုႈစဝ်ဖြား 13ကဲရျံင်ဟြာင်းတစဝ်ဖြား “စဝ်ဖြားယေရှု၊ မှာန်းမည်း ကေႎဒဲႈ ဘိူဝ်တယဲ။” 14ဘိူဝ်ဟောည်ႇယိူဝ်း၊ စဝ်ဖြားစီဒါႈတကဲ “ဟာဝ်းနှဲတိုပိုင်းပဲ တပုရောဟေက်။” ခိင်ဟာဝ်းကဲလိူည် ရောဂါတူတ်ကဲ ဟည်ကမာ်ႈဟာဝ်းပွံတ်။ 15ခေဲင်ကဲ အူအီး ဘံန်မိုႈအ်ုန်ဟောည်ႇယိူဝ်း ဘည်ဟြာည်ကမာ်ႈရောဂါတူတ်ကဲဒီန် အ်ုန်တိူဝ်ႈကနေဲႈပွံတ်ဂုင်တော်စဝ်ဖြား ကပံတ်ႎီရ်ဇူးပွံတ် စဝ်ဖြား။ 16ဟောည်ႇဒီန် အ်ုန်ဆကူပ်ပွံတ်ပဇိူင်စဝ်ဖြား ဂြူပ်ပွံတ်ဂုင်တော်စဝ်ဖြား။ အူကဝ်ဒီန် မိုႈကာန်ကပီုန်ရှမာရိ။ 17ခိင်ဒီန် စဝ်ဖြားစီဆမွံတ် “အာဝ်မိုႈရောဂါတူတ်ကဲအီ ကမာ်ႈဟြာည်ကဲဒိူန် ဂေါည်အူကိူရ်အီး။ မှောဘိုးကဲ တီမ်အီး။ 18ကဲအီႎီရ်ရောတ် ကနာည်နံင်တိူဝ်ႈကနေဲႈ ဂုင်တော်စဝ်ဖြားနီန် ဆဲႈဒါႇကောန်ကပီုန်အူအီးနီန် အာဝ်မိူဝ်ႈယာ့် အီဟံရ်” 19အ်ုန်စီဒါႈတကောန်ကပီုန်ရှမာရိဒီန် “ယိူဝ်ႇဟာဝ်းပွံတ်မည်း မိုႈလိူည်ပ်ုန်ညှူမ်မည်း ဟည်ႎီရ်ပ်ုန်ပဲန်ခေါခါႇမည်း။” 20ဖာရိရှဲမံင်ခ္လမာ် ဆမွံတ်စဝ်ဖြား “ဘံန်မှောဆာဆနာတော် စဝ်ဖြား နံင်ရောတ်ဒေဲႈ?” စဝ်ဖြားစီဒါႈ “ဆာဆနာတော်စဝ်ဖြားနီန် အာဝ်မိုႈမအ်ုန်နံင်ရောတ်စာ်မ်း တောပ်ပုင်ရံင်ပ်ုန်နံင်ဘယ်ပဲတယိူဝ်း။ 21အာဝ်ဘယ်မဒါႈ တိူရ်ႈဒီနီန်၊ တိူရ်ႈဒီတွည်း။ ဂေါႇမိုႈဆာဆနာတော်စဝ်ဖြား အ်ုန်ဂေါည်ခေဲင်နောႈဖိူမ်ပဲ။” 22စဝ်ဖြားစီႎီရ်ဒါႈ တတပဲ့တော်အ်ုန်ကဲ “နံင်ရောတ်ဒေဲႈဆငည်း ပဲဘိူည်ဆိင်ယိူဝ်းလာ်တိူရ်ႈ ကောန်စဝ်ဖြားခေဲင်ဆငည်းဂေါည်အ်ုန် အူဆငည်းလိူည်မာ် ပဲနံင်အာဝ်ယိူဝ်းယာ့်တိူရ်ႈ။ 23ဆာ်တိုအီးကဲဒါႈတပဲ ‘ဂေါည်အရာပ်နီန် ဆာဝ်အာဝ်မိုႈ ဂေါည်အရာပ်တွည်း’ ပဲမည်တောပ်ဒေရေဲန်။ 24ဆငည်းနံင်ရောတ်ဒေဲႈ ကောန်စဝ်ဖြားနီန် နံင်ဘာည်းႎံ ရ်ကဆံရ်ႈ ပ္လါင်ဟိူဝ်တေဲင်ကာင်ဟာဝ်။ 25မိုႈလိူည် အ်ုန်ဟောည်ႇကတူႈကီန်းဒည်းရအာည်ႇ ဆီုင်အာည်ႇရောတ်စာ်မ်းအီဒီန် နံင်ကတူႈဘိုး ပ်ုန်ဆံင်ခံတ် တိုအီးခေတ်ကာပ်ကဇေန်နီန်။ 26တောပ်ဘည်ပဲန်ဒေဲႈ ခေတ်ကာပ်နောဧa ခေတ်ကာပ်ကောန်စဝ်ဖြားမာ် နံင်ပဲန်ဒေဲႈ။ 27ဂေါႇမိုႈအိုမ်နံင်လှူပ် ကံပ်ရောတ်ပွံတ် ဆငည်းလီပ်နောဧခေဲင်ရိူဝ် ဂေါႇမိုႈတိုအီးကဲ ဂေါည်ဟာဝ်းဘည်မိုႈ ရေဲန်ပ္လေါည်ခံတ်၊ ဟောမ်ဟောမ်၊ တျံင်တျံင် အိုမ်ဟည်လှူပ် ကဲဟည်လူလေဲဝ်ယံမ်းဒိုည်ႇ။ 28ဘာည်းလိူည်ဒီန် ခိင်မိုႈခေတ်ကာပ် လောတမာ် တိုအီးကီုင်းသောဒုံကဲ ဟောမ်ဟောမ်၊ ဇိူရ်ႈဇိူရ်ႈ၊ ယံင်းယံင်း၊ တီႇဆ်ုမ်၊ ရေဲန်ရေဲန် ဂေါႇကဲဂေါည်ဟာဝ်းဘည်မိုႈ 29ဆငည်းလည်လေႈဟာဝ်းလောတဒီန်လိူည်b ဘြည်က္လာင်းငံရ် ယိူဝ်ႇတကာင်ဟာဝ်က္လာင်းလေႈ ပ်ုန်လူလေဲဝ်ယံမ်းဒိုည်ႇ တိုအီးကီုင်းကဲ ပါ်ဒိုႇဒိုည်ႇ။ 30ဆငည်းနံင်ရောတ်စာ်မ်း ကောန်စဝ်ဖြားမာ် နံင်ပဲန်ဒေဲႈလိူည်ဘာည်းနီန်။ 31ဆငည်းဒီန် ကဲအီဂေါည်တေဲင်ကဒုဂါင် မည်လေႈခေဲင်ဂါင် ကနာည်နံင်တိူဝ်ႈ အူမျိုးအူလှေ။ ကဲအီဂေါည်ခေဲင်ဂီုင်မာ် မည်ႎီရ်ကနာည်နံင်တိူဝ်ႈ အူမျိုးအူလှေ ပဂါင်။ 32နောႈလှောႈc ဘည်မှော ပီးလောတဘာည်းဒေဲႈ ပဲန်ဒေဲႈ။ 33အဆေရီန်းဒေဇောည်အဆာက်တိုပြီမ်နီန် နံင်ဘ်ုပ်ချှူမ်ယာ့်။ အဆေခါမ်ဒေချှူမ်အဆာက်နီန် စီနံင်အီမ်းလောတ်ဒါႇဖေး။ 34အောနံင်က္လာင်းတပဲ။ အူမှိူဝ်ဒီန် ဂါရ်အီအီတ်ရူမ်အူဒီ အူအီးနံင်ကတူႈတောႇဟာဝ်း အူအီးနံင်ဒါ့်ကီုတ်အူန်း။ 35ကောန်အီပ်ုန်ဂါရ်အီ တူႈရူမ်ငှေါဒီန် နံင်တောႇဟာဝ်းအူအီး နံင်ႎါင်းအူန်းအူအီး။ 36ဆာ်မိူဝ်ႈတိုအီး ဂေါည်ခေဲင်ဂီုင်အာရ်အီးမာ် နံင်တောႇအူအီး နံင်ႎါင်းအူန်းအူအီး။ ခေါ်ဆောင်ခြင်းခံရပြီး အခြားတစ်ဦးသည် ချန်ထားခံရလိမ့်မည်” 37တပဲကဲ ဟည်ဆမွံတ် “စဝ်ဖြား၊ ဒီမှောနံင်ပဲန်ဒေဲႈဘည်နီန်။” စဝ်ဖြားမာ်ဒါႈ “ဘာည်းလိူည်တိုအီးကဲနံပ် မိုႈတဒီကစုလာင်တာကဲ မိူဝ်ႈတိုယံမ်း ဒီနံင်ပဲန်ဒေဲႈဂဲကဲဒီန်မာ် နံင်နံပ်ဒိုည်ႇယာ့်။”
Currently Selected:
Luke 17: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
