Luke 16
16
1ဟောည်ႇဒီန် စဝ်ဖြားဆီုပ်က္လာင်းတတပဲ့တော်အ်ုန်ကဲ “မိူဝ်ႈတာဆထေးအူအီး အာပ်ဒဲႈတိုအီးအူအီး ကနာည်နံင်ချှာင်ဇီုင်း ခေဲင်ဇီုင်းကာန်အ်ုန်။ ခိင်တာဆထေးဒီန် နံပ်အ်ုန်ကကဝ်းဟောမ်ရိူန်းကဲဒီန် 2အ်ုန်ဟည်တောႇ ကဝ်အီချှာင်ဇီုင်းဒီန် ‘ပ်ုန်ယိူဝ်းအောတတငါဝ်း ဘည်မိုႈမည်းနီန် ဘည်မှောအ်ုန်မိုႈ? ဟြာင်းစြာင်းပ်ုန်ရေဲန်အူန်းမည်းတအော ပည်ဒိုႇဒိုည်ႇ။ မည်းမာ် အောအာဝ်ဘယ်ယာ့် အူန်းမည်းဒီအီချှာင်ဇီုင်းကာန်နီန်။’ 3ခိင်ဒီန် အ်ုန်မာ်ဒါႈ ‘ဘည်မှောအောနံင်လိုဘာည်း။ တာဆထေးဟည် ပ်ုန်လေႈအောဒါႇဇီုင်း။ အောနီန် ကနာည်နံင်ကိူဝ်ႈကတာည်းမာ် အာဝ်မိူဝ်ႈရဲင်၊ ကနာည်နံင်မှာန်းမာ် အောဆာည်း။ 4ဆာ်အောကတူႈ လည်လေႈဒါႇဇီုင်းနီန် အောဟည်နံပ်ယာ့် ဘည်မှောနံင်လိုဘာည်း ကနာည်အီနံင်ရံပ်ရိုႈအောဂေါည်တဂါင်အီး’ 5ဟောည်ႇဒီန် အ်ုန်ဟည်တောႇကဲအီလိုဒဲႈ နှီတာဆထေး ဟောည်ႇအူအီးမိုႈအူအီး အ်ုန်ဆမွံတ် ကဝ်ရအာည်ႇ ‘ထာန်မှောမည်းလိုဒေဒဲႈ နှီတတာဆထေးအော။’ 6တိုအီးဒီန်မာ် ႎီရ်ပ္လါန် ‘အောလိုဒဲႈ အိုမ်ပျြံင်တာန်လူန် ဆီအူပယာႈa။’ ကဝ်အီချှာင်ဇီုင်းဒီန်မာ် ‘ဟာဝ်းတိူဝ်ႈ စြာင်းချာ်န်းချာ်န်း ကိက်ဟံပ်လိူည် ဖံန်ကိူရ်။’ 7ဆမွံတ်ထဲင်ဘိုးအူအီး ‘မည်းလာ့် ထာန်မှောမည်းမိူဝ်ႈနှီ။’ ဂေါႇမိုႈအ်ုန်ဒါႈ ‘စုင်ကအာင်ငှေါ အူပယာႈဟူရ်’ အီချှာင်ဇီုင်းဒီန်မာ် ဒါႈတအ်ုန် ‘ကိက်ဟံပ်လိူည် ခေဲင်စြာင်း တာရ်ကိူရ်ကပျာဝ်း။’ 8ခိင်ဒီန် တာဆထေးဟည်တိူဝ်ႈကနေဲႈ ဘည်ရေဲန်အီချှာင်ဇီုင်းဒီန် တအကျိုးတိုပြီမ်။ ဂေါႇမိုႈကောန်ကံမ်ဖာကဲနီန် ကဲဆမားရေဲန်စဲင်စဲင်ဟြဟြ အကျိုးကနာည်တိုပြီမ် မှယ်ဒိုရ်ကောန်စဝ်ဖြားကဲ။” 9စဝ်ဖြားစီႎီရ်ဒါႈဘိုအူလိူဝ်ႈ တတပဲ့တော်အ်ုန်ကဲ “အောနံင်က္လာင်းတပဲ။ ဒါဂြူခြီရ်လောကီ အီအာဝ်လောတ်ဘိုန်းဒါႇအာဝ်တြား ရေဲန်ကနာည်နံင်ဘိူန်း ဘဝ်ကီုက်ဂေါ။ ဆာ်ဂြိုခြီရ် လောကီကဲဒီန်ဒိုည်ႇ နံင်ရံပ်ရိုႈပဲပဂံင်ထာဝရနစ္စ။ 10ကဲအီမိူဝ်ႈဆေတ်စာ တေဲင်ဇီုင်းဒုႇဒုႇဒဲႇဒဲႇကဲနီန် တေဲင်ဇီုင်းဒါင်းမာ် ကဲမိူဝ်ႈဆေတ်စာ။ ဆာ်အာဝ်ဆီုဝ်ရို တေဲင်ဇီုင်းကာန်ဒုႇဒုႇဒဲႇဒဲႇကဲနီန် တေဲင်ဇီုင်းကာန်ဒါင်းမာ် ကဲအာဝ်ဆီုဝ်ရိုမ။ 11ဆာ်ပဲအာဝ်မိူဝ်ႈ ဆေတ်စာတေဲင်ဂြိုခြီရ်လောကီကဲနီန် အဆေနံင်ဒေဲႈအာပ် ဂြိုခြီရ်အီစဲတ်တပဲ။ 12ပဲကဲဒီန် ဆာ်ပဲအာဝ်မိူဝ်ႈဆေတ်စာ တေဲင်ဂြိုခြီရ်အီးဟံရ် တပဲလာ့် အဆေနံင်ဒဲႈ ကနာည်ပဲ။ 13တိုအီးရေဲန်ဇီုင်း ကဝ်မှောမာ် အာဝ်ဘယ်ခါမ်ဆေတ်စာ တေဲင်ဆထေးအာရ်အီး။ အ်ုန်နံင်ရံက်အူအီး ကအီရ်ႈအူအီး။ ဆာ်အ်ုန်အူန်းဆေတ်စာတေဲင်အူအီး အ်ုန်နံင်လီလာရေဲန် တေဲင်အူအီး။ ဘာည်းလိူည်ဒီန် ပဲမာ် နံင်အာဝ်ဘိူန်းမ ခါမ်စာပွံတ် တေဲင်စဝ်ဖြားကာည်း ဂြိုခြီရ်လောကီနီန် အူလိူဝ်ႈ။” 14ခိင်ဒီန် ဖာရိရှဲ ကဲအီမောင်ရိူန်းကဲနီန် ဆဲ့ကညာႈ ခိင်ယိူဝ်းကဲတတငါဝ်း ကြောႈလှေဒီန်။ 15မိုႈလိူည် စဝ်ဖြားစီဒါႈတကဲ “ပဲကဲဒီန် ပဲဆမာဒံင်ဒေရေဲန် ပ်ုန်ဆီုဝ်ရိုတိုပြီမ်ပဲ ရအာည်ႇတိုအီးဂီုန်း။ မိုႈလိူည် စဝ်ဖြားနံပအေ့ ဘည်မိုႈနောႈဖိူမ်ပဲ။ ဂြိုခြီရ်လောကီ ပ်ုန်အူန်းတိုအီးကဲတမိူဝ်ႈငေါႈခံန်နီန် ဆာ်မိုႈကနာည်စဝ်ဖြား မိုႈလိူည်ခံင်အာဝ်မှိူမ်အုင်ရံက်။ 16တိုအီးကဲ ဂီုည်ဘ်ုပ်တောပ်ဒေဲႈ ခေဲင်ပံပ်ကျာမ်းအာရိယာတိုအီးမှိူမ်ကဲ ကာည်း ကျာမ်းမောရှေ ဘံင်အာည်ႇရောတ်စာ်မ်း ဆြာခါမ်ဒဲႈဘည်ညှူမ်တာဆြာယောဟာန်။ ႎါည်းရောတ်ဒေဲႈ ယောဟာန် တိုအီးကဲမာ် ရီန်းရဲတ်ကနာည်နံင်လီပ်ခေဲင် ဆာဆနာတော်စဝ်ဖြား ခိင်ဟောအ်ုန်တဘည်မိုႈ ဆာဆနာတော်စဝ်ဖြား ကာည်း မံင်ဂလာဆဒါင်မှိူမ်။ 17မိုႈလိူည် ကနာည်နံင်ဟြာည်ကမာ်ႈ ကာင်ဟာဝ် ကာည်း ကတာည်းကံမ်ဖာဒါင်းနီန် အ်ုန်ငှိူည်မှယ်ဒိုရ် ကနာည်နံင်လူလေဲဝ်အက္ခရာအူလှေ ခေဲင်ပံပ်ကျာမ်းတြားစဝ်ဖြား။ 18ကဝ်အီကကာႈဒါဒါႇပီး ဟာဝ်းတိူဝ်ႈလာည်းဘိုး ကောန်အီပ်ုန်အီဟံရ်နီန် မိုႈတိုအီးလူည်ႇဆေတ်စာ တေဲင်လံပ်ဘဝ်ရမာယာ့်။ တိူဝ်ႈလာည်းတောပ်ကောန်အီပ်ုန် ကဝ်ပ်ုန်ကကာႈ မေဲန်မာ် မိုႈလိူည်ဘာည်းဒီန်ယာ့်။” 19ဟောည်ႇဒီန် စဝ်ဖြားဒါႈ “အာည်ႇနီန် မိူဝ်ႈတာဆထေးအူအီး ချှူပ်ဒါဂြူ အီမိူဝ်ႈငေါႈခံန် ဂေါည်ပျောတောန်ဆိူမ်တောန်ဆငည်း။ 20မိူဝ်ႈကောန်အီဖ္လါန်းအူအီး ဇီုဝ်လာဇရု တတိုအ်ုန်မာ်မိုႈဒိုည်ႇမရု ဆမားအီတ် ရအာည်ႇပ္လိုႈတာဆထေး 21ဂေါႇနောႈဆိင်ဟောမ် ပ်ုန်ဟောမ်တာဆထေးအီဇောႈ တေဲင်ပဒဲန်ကဲဒီန်။ ဂေါႇမိုႈမရုလေႈဒိုည်ႇ တတိုအ်ုန် အအို့ကဲမာ် လျှံတ်ဒိုည်ႇတိုအ်ုန်။ 22အူဆငည်း လာဇရုမာ်ဟည်ယံမ်း ကန်ုမ်ဒေဝါကဲမာ် ဟည်တောႇဟာဝ်းအ်ုန် တအာဗြဟံကဲ။ ခိင်ယံမ်းတာဆထေးမာ် ကတူႈအီဆံင်ကျို 23ခိင်အ်ုန်ခါမ်ကီန်း ပကုင်မရဏ ခိင်ငိူဝ်ႈတိူရ်ႈအ်ုန် ရကႎိုည် အ်ုန်ယိူဝ်းပွံတ် လာဇရုဇံင်းပြော အာဗြဟံကန်ုမ်ဒေဝါဂဲ။ 24ခိင်ဒီန် အ်ုန်ဟည်ယာမ်းရျံင် ‘ကူန်အာဗြဟံ၊ ကေႎဆဲ့အော။ အ်ုန်မှာန်း ဂေါႇမိုႈအောဘ်ုပ်ခါမ်စာ ကဆဝ်းဇာဝ်း ခေဲင်ငံရ်ဂူႈလာန်းဒါင်းလာဇရုနီန် ပ္လေႈဒဲႈဆဲ့ အ်ုန်ဒါကနူးတည်းအ်ုန် ဟံပ်ဆဲ့အိုမ်ခေဲင်မိုည်ႇအော ဒဲႈအ်ုန်ကိုက်ငံင်။’ 25မိုႈလိူည် အာဗြဟံစီဒါႈ ‘ကောန်အော၊ မည်းလိုနောႈလှောႈ ခိင်အီမ်းမည်း မည်းဟောည်ႇဘိူန်းဒေဲႈ ခံင်အီမှိူမ်၊ လာဇရုစီမို ဘိူန်းဒေဲႈလိူည်ခံင်အီအာဝ်မှိူမ်။ ကဇေန်နီန် လာဇရုဟောည်ႇဘိူန်းဒေ ဂေါည်ပျောဒါပနီန် မည်းဟည်ကတူႈဒေခါမ်ကီန်းဝေဒနာ။ 26အာဝ်ႎံ န်းလိူည်လှေနီန် ဂေါႇမိုႈခနားမည်းကာည်းယဲ မိူဝ်ႈကဒိုႈလှေဲမ်အူလှေ အဆေမာ် အာဝ်ဘယ်ဒေကခါမ်ခ္လေါႈ။’ 27တာဆထေးမာ်ဒါႈ ‘ကူန်အာဗြဟံ၊ ဆာ်ဘာည်းဒီန် ပ္လေႈလာဇရုဟာဝ်းပဂါင်ကူန်အောကဲ 28ဟာဝ်းပ္လူႈဆဒိ တႎါးႎည်းအောကဲဂေါည်ဖံန်အီး ကနာည် မည်ဒဲႈကဲ ကတူႈခါမ်ကီန်းဘာည်းအောနီန်။’ 29အာဗြဟံမာ် ‘ကျာမ်းပ်ုန်ကိက်အူန်း မောရှေကာည်း အာရိယာတိုအီးကျနကဲ မိူဝ်ႈအူန်းတႎါးႎည်းမည်းကဲဒီန်။ ကဲလိုတောပ်ဒါ ကဲနီန်’ 30‘ကူန်အာဗြဟံ၊ ညှံမ်ဂိူပ်ကျံဝ်းမထာန်နီန်။ ဆာ်ဒဲႈတိုအီးဟောည်ႇယံမ်းကဲနီန် အူအီးအူအီး ဟာဝ်းက္လာင်းတကဲ ကဲစီနံင်ဘိူန်းဆာင်ဝေဂ။’ 31အာဗြဟံမာ်ႎီရ်ဒါႈဘိုး ‘ဆာ်ကဲအာဝ်တောပ် ကျာမ်းပ်ုန်ကိက်အူန်း အာရိယာတိုအီးမှိူမ်ကဲ ကာည်း မောရှေကဲနီန် ကြောႈကဝ်အီယိူဝ်ႇဒါယံမ်းနီန်မာ် ကဲနံင်အာဝ်ညှူမ် အာဝ်ရံပ်ခါမ်မ။’”
Currently Selected:
Luke 16: stpv-rv
Highlight
Share
Copy

Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.