Luke 14
14
1မိူဝ်ႈဆငည်းဆဒါင်းအူဆငည်း စဝ်ဖြားယေရှုနီန် ခိင်စွဟာဝ်းအ်ုန် ကနာည်နံင်ဟောမ်ပ်ုန်ဟောမ် ပဂါင်တိုအီးဒါင်း ခေဲင်ဖာရိရှဲအူအီးဒီန် တိုအီးဂဲ နှံက်လာ်တိူရ်ႈ ကဒံတ်စဝ်ဖြား။ 2ခိင်ဒီန် မိူဝ်ႈတိုအီး ကတူႈဒါရောဂါ ခ္လီုင်းအူအီး ဂေါည်ရအာည်ႇစဝ်ဖြား။ 3စဝ်ဖြားဆမွံတ် ဖာရိရှဲ ကာည်း ဆြာဆမားကျာမ်းကဲ “အယ်ပ်ုန်ဟြာည်ကမာ်ႈ ရောဂါတိုအီးဆဝ်းကဲ ဆငည်းဆဒါင်းနီန် အ်ုန်ကဒိူဝ်ႈတတြားတော်? အာဝ်ကဒိူဝ်ႈ?” 4မိုႈလိူည် ကဲယေန်အာဝ်ဒါႈမဆေ ႎါည်းစဝ်ဖြား ဒါတည်းအ်ုန်ဘားတိုအီးဆဝ်း ပ်ုန်ဟြာည်ကမာ်ႈရောဂါ စီပ္လေႈႎီရ်လာ့်အ်ုန်။ 5ဟောည်ႇဒီန် စဝ်ဖြားစီဒါႈ တကူန်ရဝ်မာဂါင်ကဲ “မိုႈကောန်ပဲမာ်လ၊ မိုႈမံက်ပဲမာ်လ၊ ဆာ်ဇောႈလေႈခေဲင်အိုမ်ခြံင် ဆံမ်မိုႈစံမ် ဆငည်းဆဒါင်းမာ် ပဲနံင်တီုတ်ဟိုက်လိူည်အာဝ်မိုႈ?” 6မိုႈလိူည် တိုအီးဂဲ အာဝ်ႎီရ်ပ္လါန်ဒါႈမဆေ။ 7ဟောည်ႇဒီန် အ်ုန်ယိူဝ်း တိုအီးပ်ုန်ဖိက်မှာန်းကဲနီန် ရံရ်ႈဒီမှိူမ် ကနာည်နံင်အံက်ဟောမ်ပ်ုန်ဟောမ် စဝ်ဖြားစီက္လာင်းပုင်တဲႇအူလှေတကဲ 8“ခိင်အူအီးအူကဝ် ဖိက်မှာန်းမည်းဒေဲႈပပ္လေါည်ဟောမ်ခံတ် မည်အံက်ဒီမှိူမ်ဒီကျ။ ဂေါႇမိုႈခေဲင်ပ္လေါည်ဒီန် နံင်ဆမားဖိက်မှာန်း တိုအီးအရေးဒါင်းမှယ်ဒိုရ်မည်း။ 9ဆာ်တိုအီးဒီန်ရောတ် ကဝ်အီဖိက်မှာန်းမည်းဒီန်နံင်ဒါႈ ‘ဒဲႈဒီအံက်မည်း ကနာည်အီငေးရောတ်ဒေဲႈ’ ဘံန်ဒီန် မည်းနံင်ဘ်ုပ်ဆာည်း ကတူႈလိူည်အံက်ရဘံန်း ဒီအာဝ်မှိူမ်အာဝ်ကျ။ 10မိုႈလိူည် ခိင်ဟာဝ်းမည်းပပ္လေါည်ခံတ်မံင်ဂလာ ဆာ်မည်းရောတ်အံက်ရဘံန်း ဒီအာဝ်မှိူမ်အာဝ်ကျ ကဝ်အီဖိက်မှာန်းမည်းဒီန် နံင်ဒါႈ ‘ဂေါ၊ ဒေဲႈအံက်ရအာည်ႇ ဒီမှိူမ်ဒီကျမှယ်ဒိုရ်ဒီနီန်’ ဘံန်ဒီန် မည်းနံင်ပဲန်ပ်ုန်တိူဝ်ႈကနေဲႈ ရအာည်ႇအီငေး ကဲအီဟံရ်။ 11ကဲအီယိူဝ်ႈတိုကဲဒိူန် နံင်ကတူႈပဇောႈ ကဲအီပ်ုန်ဇောႈတိုကဲဒိူန် နံင်ကတူႈအီယိူဝ်ႈယာ့်။” 12စဝ်ဖြားဒါႈတကဲအီဖိက်ပါင်းအ်ုန် “ခိင်ရေဲန်မည်းတပ္လေါည်၊ မည်းမည်ဖိက်လိူည် ဘဝ်ဂေါမည်းဂဲ၊ တိုမာခေဲင်ရမာမည်းဂဲ၊ ခြိူဝ်းမျိုးမည်းဂဲ ကာည်း တိုအီးခြုမ်အီဂေါည်ရီမ်းပြောဂါင်မည်း။ ဆာ်မည်းရေဲန်ဘည်နီန် ကဲနံင်ႎီရ်ဖိက်မှာန်း ဟျံင်ဘိုးမည်း။ 13ကနာည်းလှေဒီန် မည်းလိုဖိက်မှာန်း တိုအီးဖ္လါန်းဂဲ၊ တိုအီးအာဝ်ခေါခါႇဂဲ၊ တိုအီးကတူႈရောဂါ ယံမ်းအူကဒါႇ၊ တိုအီးငါည်အံပ်ဂ ခိင်ရေဲန်မည်းတပ္လေါည်။ 14အာဝ်မိုႈမကဲနံင်ႎီရ် တောပ်ကေးစူးမည်း။ မိုႈလိူည် ခိင်တိုအီးကျနကဲနီန် ယိူဝ်ႇယံမ်းႎီရ်အီမ်း စဝ်ဖြားနံင်ဒဲႈအကျိုးခြုမ်တောန်နဲ တမည်း။” 15ခေဲင်အီငေးကဲအီအံက်ပပဒဲန်တောပ် စဝ်ဖြား အူအီး “အံက်လာ်ဒါခေဲင်ကုင်စဝ်ဖြား ကဲအီဘိူန်းဟောမ်ပ်ုန်ဟောမ် ပပ္လေါည်တော်နီန် မိုႈအီဘိူန်းခါမ်စာ မံင်ဂလာအကျိုးအီမှိူမ်” 16စဝ်ဖြားစီဒါႈ “တတိုအီးအူအီးဒီန် တိုအီးအူအီး အ်ုန်ဖိက်မှာန်း အီငေး ကနာည်နံင်ရေဲန်ပ္လေါည်ဟျံင်ပ်ုန်ဟောမ် ပစိူဝ်း။ 17ဟည်ရောတ်ဒေဲႈခိင်ရေဲန်ပ္လေါည်ဒီန် အ်ုန်ဟည်ပ္လေႈတိုအီးရေဲန်ဇီုင်းပဂါင်အ်ုန်အူအီး ဟာဝ်းက္လာင်းတအီငေးပ်ုန်ဖိက်မှာန်းဂဲဒီန် ‘ဟောည်ႇတံန်းယာ့်၊ စွရောတ်ကနာည်နံင်ဇူႈပ္လေါည်အယ်။’ 18အီငေးကဲ ဟောည်ႇအူအီးမိုႈအူအီး က္လာင်းဘည်မိုႈ ဆံင်ခံတ်ကနာည်နံင်ဒေဲႈရောတ်စာ်မ်း။ တိုအီးကဝ်နံမ်ဘာတ်အူ အ်ုန်ဒါႈ ‘မှာန်းပဲပ္လိုတ်ခွါင်း ဂေါႇမိုႈအောဇိူရ်ႈအူန်း ဂီုင် အောလိုဟာဝ်းတိူရ်ႈဆဲ့အူကဇီန်။ ဂေါႇအောအာဝ်ပဲန်ဒေဲႈ မှာန်းပဲပ္လိုတ်ခွါင်းဒဲႈတအောအေ့။’ 19အူအီးစီဒါႈ ‘ဂေါႇမိုႈအောဇိူရ်ႈအူန်း မံက်ဖံန်ကိုပ် အောနံင်လိုဟာဝ်းစာမ်းဆဲ့တိူရ်။ မှာန်းပဲပ္လိုတ်ခွါင်းဒဲႈတအော။’ 20မိုႈထဲင်အူအီး အ်ုန်ဒါႈ ‘ဂေါႇမိုႈအောဇူႈလိူည်ခံတ် အောအာဝ်ပဲန်မဟာဝ်း။’ 21ခိင်ဒီန် တပဲ့ဒီန်မာ် ႎီရ်က္လာင်းဘည်မိုႈ တကဝ်အီမိုႈဆထေး ကညာဂါင်မာ် ဟည်ဒေါဆ ဆူည်ႇဘိုးတပဲ့အ်ုန်ဒီန် ဟာဝ်းတောႇချာ်န်းချာ်န်း ‘တိုအီးဖ္လါန်း၊ တိုအီးအာဝ်ခေါအာဝ်ခါႇ၊ တိုအီးယံမ်းအူဒါႇ ကာည်း တိုအီးငါည်အံပ်ကဲအီဂေါည် ခနားဒေင်၊ ကဲအီဂေါည် ပတောပ်ဒေင်ဒါင်းကဲနီန်။’ 22တပဲ့အ်ုန်ဒီန်မာ် ဟည်ႎီရ်ရောတ် ‘အောဟောည်ႇရေဲန်ဒိုည်ႇယာ့် ပ်ုန်ဆူည်ႇတာဆထေး။ မိုႈလိူည် ဒီလာပ်ဆီုင်ဂီုည်ဂီုန်းအူန်း’ 23တားဆထေးအ်ုန် ‘ဆာ်ဘာည်းဒီန် ဟာဝ်းတောႇဘိုး တိုအီးကဲဒီန်အီဂေါည်တောပ်ဒေင် နှာရိူဝ်ႇကုင် ကဲအီဂေါည်တောပ်ခနားဒေင်ကဲဒီန်။ ဆာ်ဘာည်းဒီန် တိုအီးစီနံင်နိုက်ခေဲင်ဂါင်အော။ 24ပ်ုန်ဖိက်မှာန်းအောအာည်ႇနီန်ကဲဒိူန် ကဲဆံမ်ဒေဲႈမာ် ပ်ုန်ဟောမ်ပ်ုန်ဟျံင်ကဲနီန် စရီတ်မာ် ကဲနံင်အာဝ်အခွါင်းဇီမ်း။ ဟောည်ႇဒီန် ဂေါႇမိုႈကူန်ရဝ်မာဂါင်ကဲ တောပ်ဒေဲႈစဝ်ဖြားယေရှု၊ စဝ်ဖြားစီကပံတ်တိူရ်ႈကဲ။’” 25ဟောည်ႇဒီန် ဂေါႇမိုႈကူန်ရဝ်မာဂါင်ဂဲ တောပ်ဒေဲႈရဘံန်းစဝ်ဖြားယေရှု စဝ်ဖြားယေရှုစီကပံတ်တိူရ်ႈ ဒါႈတကဲ 26“ဆာ်ပဲအာဝ်ဘယ်ဒေ ရံက်အော မှယ်ကူန်မာပဲ၊ ကောန်ပဲ၊ ပီးပဲ၊ ႎါးႎည်းပဲအာဝ်ႎံ န်း တိုပြီမ်ပဲကဲဒီန် ပဲနံင်အာဝ်ဆမာဘယ်ပဲန် တပဲ့တော်အော။ 27ဆာ်ပဲအာဝ်ဘယ်ဒေ ကွံတ်ရံင်က္လံပ်တည်းပဲမာ် အာဝ်ဆမာပဲန်ဘိူန်း တပဲ့တော်အော။ 28ခေဲင်တပဲ့အာဝ်အူအီး ဆာ်ဒါႈနံင်ရေဲန် ကချှံင်ဇာရ် အူလှေ ရိူန်းကနာည်နံင်ရေဲန်ဟောည်ႇ ကချှံင်ဇာရ် ဒီန် ဂိူပ်အာဝ်ဂိူပ် အ်ုန်အာဝ်ဆမား အာဝ်ႎီရ်ကဆွံန် စရိက်ပ်ုန်ဒိုည်ႇဆီုင်ယာမ်ဇူႈ။ 29ဆာ်မိုႈအာဝ်ဆွံန်လာ်ဒါရအာည်ႇ စီရေဲန် နံင်အာဝ်ဆမားမ ရေဲန်နှာင်းဟောည်ႇ ကဲအီယိူဝ်းအီနီန်မာ် ဒါႈတအ်ုန် 30‘တိုအီးအူအီးနီန် အ်ုန်ဘိူည်ဇူႈဒေရေဲန် ကချှံင်ဇာရ်နီန်မာ် နံင်ကတူႈလိူည်အီးဆဲ့အ်ုန်ဒါႈ ကံပ်အာဝ်ဘယ်လိူည်ရေဲန် နှာင်းဟောည်ႇ။’ 31ဘာည်းလိူည်ဒီန် ဆာ်ဟောခံမ်းအ်ုန်အီမိူဝ်ႈရဲင်ဘ္လောမ်အာရ်မှီုန်ဒီန် အာန်းလာ်ဟိုက်တီုက်လာည်း ဟောခံမ်းအ်ုန်အီမိူဝ်ႈရဲင်ဘ္လောမ် အူမှီုန်နီန် ဟောခံမ်းအ်ုန်အီမိူဝ်ႈရဲင်ဘ္လောမ် အူမှီုန်နီန် နံင်ဘ်ုပ်အံက်ကမိုန်တဂေန်း ဘ္လံက်ဆဲ့တောပ် ကဲအီမိုႈတိုအီးဒဲႈခံင်ကျခံင်လတအ်ုန် ဘာည်းမှောနံင်ဘာည်း ဒါရဲင်ဘ္လောမ်အူမှီုန်နီန် တီုက်ဂါအာဝ်ဘယ်။ 32ဆာ်ကဲငျားဒေတဂေန်းဒါႈ ဘာည်းမှောမာ် ကဲနံင်အာဝ်ဘယ်လာ်တီုက်၊ ဟောခံမ်းအီမိူဝ်ႈရဲင်ဘ္လောမ်ဘြေ့နီန် နံင်ဘ်ုပ်ပ္လေႈဟာဝ်းတိုအီးအ်ုန် တိုန်းက္လာင်းဆဒါင် ကနာည်နံင်လာည်း လံပ်ယေန်ငံင် ခိင်ဂေါည်ကဒိုင်းဟောခံမ်းအ်ုန်အီမိူဝ်ႈ ရဲင်ဘ္လောမ်ဂီုန်းဒီန်။ 33ဘာည်းလိူည်ဒီန် ပဲပါ်ဒိုႇဒိုည်ႇ ဆာ်ပဲအာဝ်ဘယ်ဒေ ဝီုန်ဒိုည်ႇပစေအုက်စာ ပ်ုန်မိူဝ်ႈအူန်းပဲ ပဲနံင်အာဝ်ပဲန်ဘိူန်းစိ တပဲ့တော်အော။” 34စဝ်ဖြားယေရှု စီဒါႈဘိုး “ဆောႇနီန် အ်ုန်ချဲမ်ခည်း။ မိုႈလိူည် ဆာ်ဆောႇဒီန် အာဝ်မိူဝ်ႈထာတ်စဲမ် ဘည်မှောနံင်ဘာည်း ႎီရ်ရေဲန်ဘိုးအ်ုန်မိူဝ်ႈ ထာတ်စဲမ်ဒီန်။ 35ဆောႇဒီန် ဂေါႇမိုႈအ်ုန်အာဝ်ပဲန်ဒါ ကနာည်အိုမ်ပျြံင်အိုမ်ငါမ်း ကတာည်းကာည်း ထာတ်ကတာည်း နံင်ကတူႈလိူည် ဒေါတ်ႎီုန်ယာ့်။ ကဲအီမိူဝ်ႈလှာဟျာ့် ယိူဝ်းဒေတငါဝ်းဒီန် လိုဟံပ်ရဲင်ဟံပ်ဘ္လောမ်ပဲ တငါဝ်းကတီးကရီး။”
Currently Selected:
Luke 14: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
