Luke 13
13
1ခိင်ဒီန် တိုအီးမံင်ခ္လကဲဒိူန် ဒေဲႈပစဝ်ဖြားယေရှု က္လာင်းဘာည်း ဟောခံမ်းပိလတ် ပ္လေႈကောန်ဆီုက်ကအ်ုန်ကဲ ဟာဝ်းပျံမ်းယံမ်း ကောန်ကပီုန်ဂါလိလဲ ကဲအီရေဲန်လှူတစဝ်ဖြား။ 2ခိင်ဒီန် စဝ်ဖြားစီဒါႈ “တိုအီးကဲဒီန် ပဲထာင်လာ့်မိုႈ ဂေါႇအီုင်ဂ္လံတ်ပ်ုန်လူည်ႇကဲ ဒါင်းမှယ်ဒိုရ် ကောန်ကပီုန်ဂါလိလဲအီဟံရ် စီပဲန်ကဲကတူႈရေဲန်ဘည်နီန်။ 3မိုႈပွံတ်အာဝ်မိုႈ။ အောနံင်က္လာင်းတပဲ။ ပဲပည်ဒိုႇဒိုည်ႇမာ် ဆာ်ပဲအာဝ်လှေဲႇနောႈ အာဝ်ဘိူန်းဆံင်ဝေဂ ဒါႇအီုင်ဂ္လံတ်ပ်ုန်ရေဲန်ဒီန် ပဲနံင်လူလေဲဝ်ဟာဝ်းလိူည် ဘည်နီန်။ 4ခိင်တက္လာႈဇောႈရှိလောင်မျှော်ဆီန်a တိုအီးအူကိူရ်လေႈတာရ်အီးကဲနီန် ကတူႈအ်ုန်ဇောႈတက်ုတ်ယံမ်းဒိုည်ႇကဲ။ တိုအီးကဲဒီန် ပဲထာင်လာ့်မိုႈ အီုင်ဂ္လံတ်ပ်ုန်လူည်ႇကဲ ဒါင်းမှယ်ဒိုရ် ကောန်ကီုင်းဂျေရုဆလင်ကဲအီဟံရ်။ 5မိုႈပွံတ်အာဝ်မိုႈ။ အောနံင်က္လာင်းပဲနံပ်။ ပဲပည်ဒိုႇဒိုည်ႇမာ် ဆာ်ပဲအာဝ်လှေဲႇနောႈ အာဝ်ဘိူန်းဆံင်ဝေဂ ဒါႇအီုင်ဂ္လံတ်ပ်ုန်ရေဲန်ဒီန် ပဲနံင်ယံမ်းလူလေဲဝ်ဟာဝ်းလိူည် ဘည်နီန်။” 6ဟောည်ႇဒီန် စဝ်ဖြားက္လာင်း ပုင်တဲႇတတပဲ့အ်ုန်ကဲ “မိူဝ်ႈတိုအီးအူအီး အ်ုန်တီႇဆ်ုမ် တံင်ပ္လေကဒိုတ်အူကတံင်။ အူဆငည်း အ်ုန်ဆိင်ဘိူန်း ပ္လေကဒိုတ် ဟာဝ်းတိူရ်ႈမာ် အာဝ်ယိူဝ်းမပ္လေးအ်ုန်။ 7ဂေါႇဘည်ဒီန် အ်ုန်စီတောႇကညာလိုင်းဒီန် ‘အောထာင်နံင်ပ္လေႈတံင်ပ္လေကဒိုတ် နှံက်လာ်တိူရ်ႈ ဟောည်ႇဘိူန်းအိုည်ဆန်ုမ်။ အ်ုန်စီဒါႈ တံင်ဟေနီန် ဂေါႇမိုႈအ်ုန်တိူဝ်ႈလာည်းဒီ အာဝ်မိူဝ်ႈအကျိုး က္လႎီုန်ပဲတ်အ်ုန်။’ 8မိုႈလိူည် ကညာလိုင်းဒီန်စီဒါႈ ‘ရဲ့ဘိုးအယ်တိူရ်ႈ တံင်ပ္လေကဒိုတ်နီန် အူဆန်ုမ်။ အောနံင်ကိူဝ်ႈကပါ်ႇကပံန်အ်ုန် ဟံပ်ဆဲ့တိူရ်ႈ ထာတ်ကတာည်းတအ်ုန်။ 9ဆာ်ဘာည်းဒီန် ဆန်ုမ်ဘံန်း အ်ုန်နံင်ဘယ်အေဒေ ပ္လေးချဲမ်ချဲမ်။ ဆာ်အ်ုန်အာဝ်ပ္လေး အောလက္လႎီုန်အ်ုန်။’” 10မိူဝ်ႈဆငည်းဆဒါင်းအူဆငည်း စဝ်ဖြားဟောက္လာင်း ခေဲင်ကျောင်အူလှေ။ 11ဒီဒီန် မိူဝ်ႈကောန်အီပ်ုန်အူအီး ညောည်ကောႇ အာဝ်ဘယ်ဇံင်းဆီုဝ် ဂေါႇမိုႈတိုအာဝ်ကျအာဝ်နလီပ်ဒေဲႈခေဲင်တိုအ်ုန် ဟည်ဘိူန်းအူကိူရ်လေႈတာရ်ဆန်ုမ်။ 12ဘိူဝ်စဝ်ဖြားဟည်ယိူဝ်းကောန်အီပ်ုန်ဒီန် အ်ုန်စီတောႇ “ကောန်အီပ်ုန်၊ ဇူႈကဇေန်နီန်ဟာဝ်း မည်းနံင်ဂဲန်ဟာဝ်း ဘာည်းဘိုးအီပြီမ်ယာ့်၊” 13ခိင်ဟောည်ႇပ္လေႈတည်းအ်ုန် တေဲင်ကောန်အီပ်ုန်ဒီန် အ်ုန်မာ်ပ်ုန်ဆီုဝ်ပွံတ်ညောည်အ်ုန် ယိူဝ်ႇဇံင်းပွံတ်ဒေ ဟောည်ႇဒီန်အ်ုန်မာ်တိူဝ်ႈကနေဲႈပွံတ် ဂုင်တော်စဝ်ဖြား။ 14လိူည် စဝ်ဖြားပ်ုန်ကမာ်ႈဟြာည် ရောဂါအီး ဆငည်းဆဒါင်းဒီန် အီအွံရ်ကျောင်ဖြားဟည်ဒေါဆ ဒါႈတကူန်ရဝ်မာဂါင်ဂဲ “ဆငည်းရေဲန်တဇီုင်း မိူဝ်ႈအူန်း တောရ်ဆငည်း။ ကနာည်နံင်ဟြာည်ကမာ်ႈ ရောဂါပဲဒီန် ဒေဲႈရောတ်ဆငည်းကဲဒီန်။ မည်ဒေဲႈရောတ် ဆငည်းဆဒါင်။” 15ခိင်ဒီန် စဝ်ဖြားစီဒါႈ “ကဲအီဒံင်ဒေရေဲန်ပဲန်တိုအီးမှိူမ်ကဲဒီန်။ အာဝ်မိုႈဆငည်းဆဒါင်း ပဲပ္လိုတ်စာဘြံင်ပဲ၊ မံက်ပဲ တောႇဒေဲႈကဲ ကနာည်နံင်ဒဲႈကဲတျံင်အိုမ်? 16ဆာ်ဘာည်းဒီန် ကောန်အာဗြဟံ ကောန်အီပ်ုန်ကဝ်နီန်လာ့် ကတူႈတိုအာဝ်ကျအာဝ်နကဲနီန် လီပ်ခေဲင်တို ဘြည် အူကိူရ်လေႈတာရ်ဆန်ုမ် အာဝ်မိုႈလိုပ္လေႈဒဲႈအ်ုန် ဆငည်းဆဒါင်းအဒိူဝ်နီန်။” 17ဘည်က္လာင်းစဝ်ဖြား အ်ုန်ပဲန်ခည်း မှိူမ်ဆာည်း ကနာည်ကဲအီ ဆိင်ရံန်စဝ်ဖြား၊ ကူန်ရဝ်မာဂါင်ကဲအီဟံရ်ကဲဒိူန် စီခိုည်းရျံန် တအမှုပ်ုန်ရေဲန်စဝ်ဖြားယေရှု။ 18ဟောည်ႇဒီန် စဝ်ဖြားဒါႈ “ဆာဆနာတော်စဝ်ဖြားနီန် အဆေအ်ုန်နှေရ်။ နံင်ကကည်းပဲတိူရ်ႈတောပ်အဆေ? 19အ်ုန်ကနှေရ်တ ကအာင်တဝ်အေဲႈႎံ င်း။ တိုအီးအူအီး တိူဝ်ႈကအာင်ဒီန် ဟာဝ်းတီႇဆ်ုမ်ခေဲင်လိုင်းအူဒီ။ ကအာင်ဒီန် အ်ုန်ဟည်မိူဝ်ႈရား ပဲန်တံင်ဟေဒါင်း ဆီမ်းကဲမာ် ရေဲန်ရဟူန်ကဲ ဘယ်ဒေဂေါည်ဟာဝ်းတေဲင်တံင်ဟေဒီန်။” 20စဝ်ဖြားဒါႈထဲင်အူလိူဝ်ႈ “ဆေနံင်ဒါကကည်းဘိုးပဲတိူရ်ႈ ဆာဆနာတော်စဝ်ဖြားနီန် 21အီဒီန် အ်ုန်နှေရ် တဆေး (ပ်ုန်ဟံပ်အယ် ကနာည်နံင်ပ်ုန်ဒါင်း ခိင်ရေဲန်တကဘ)။ ကောန်အီပ်ုန်အူအီး ခိင်အ်ုန်တိူဝ်ႈဟံပ် တဆေးဒီန် ခေဲင်စုင်အိုည်ပူန်း အူပူန်း အ်ုန်ပ်ုန်ပြာႈဟာဝ်း ကဘကဲဒီန်။” 22ဟောည်ႇဒီန် စဝ်ဖြားဟည်ဟောည်ႇဟော တကူန်ရဝ်မာဂါင် ကီုင်းရဝ်အီဂေါည်တောပ်ဒေင်ကဲဒီန် အ်ုန်စီစွႎီရ်ပွံတ် ပကီုင်းဂျေရုဆလင်။ 23မိူဝ်ႈအူအီးဒီန် စီက္လာင်းတစဝ်ဖြား “အဆျှီန်ယေရှု၊ မိုႈလိူည်တိုအီးဘြေ့ နံင်ဘိူန်းပ်ုန်ကဇောည်စဝ်ဖြား?” 24စဝ်ဖြားစီႎီရ်ဒါႈ “ဟံပ်ရဲင် ဟံပ်နောႈရီန်းရဲတ်ပဲလီပ် ခေဲင်ပလိုႈချံက်ဒီန်။ အောနံင်က္လာင်းတပဲ။ တိုအီးဂဲ ဘိူည်ရီန်းဒေလီပ်ခေဲင် ပလိုႈဒီန်မာ် ကဲနံင်အာဝ်ဘိူန်းမဒေလီပ်။ 25ဆာ်ကညာဂါင် ယိူဝ်ႇဘိပလိုႈ ပဲနံင်ဘ်ုပ်ဇံင်း ဒါနှာရိူဝ်ႇ ဒါႈ ‘အဆျှီန်၊ ႎိူဝ်ႈဒေဲႈဆဲ့ပလိုႈ။’ မိုႈလိူည် ကညာဂါင် နံင်ႎီရ်ဒါႈ ‘အောအာဝ်နံပ်မ ဒီမှောပဲယိူဝ်ႇဒေဲႈ။’ 26ပဲမာ် ‘ဆာ်ပဲဒါႈ ယဲတိူမ်ဟောမ်ရူမ်တောပ် စဝ်ဖြား။ စဝ်ဖြားမာ် တိူမ်ဟောပနံဝ်းအူန်းယဲ တောပ်ရဒေင် ကီုင်းရဝ်။’ 27အ်ုန်နံင်ဒါႈ ‘အောနံင်က္လာင်းတပဲ။ အရာပ်အရာမှော ပဲယိူဝ်ႇဒေဲႈမာ် အောအာဝ်နံပ်အခည်း။ မိုႈလိူည် တိုအီးဟာည်ဇေဝ်ကဲဒိူန်း လည်လေႈဟာဝ်းဒိုႇဒါႇအော။’ 28ခိင်ဒီန် အာဗြဟံb၊ ဣဇာတ် ကာည်း ယာကုက် အာရိယာတိုအီးမှိူမ်အီဟံရ်ကဲနီန် ဆံမ်ဟောည်ႇယိူဝ်းပဲခေဲင်ဆာဆနာတော်စဝ်ဖြားမာ် ဂေါႇမိုႈပဲနံင်ယိူဝ်းအီးခြောႈလေႈပဲနှာရိူဝ်ႇ ပဲနံင်ဘ်ုပ်ကတူႈ ခါမ်စာနောႈဒဲႇလာ်ယာမ်းယာ့်။ 29တောန်အီဂေါည် ခေဲင်ဆာဆနာတော် စဝ်ဖြား အရာပ်လံပ်လီပ်ဆငည်း၊ လံပ်လေႈဆငည်း၊ လံပ်ပိူည်၊ လံပ်ကြုမ် တိုအီးကဲနီန် နံင်ကတူႈအံက်ရူမ်လာ်ဒါ ဟောမ်ဆငဲႈ တျံင်ဆငဲႈယာ့်။ 30ကဲအီရောတ်နှာဘံန်း ကဇေန်နီန် နံင်ရောတ်နှာအာည်ႇ ကဲအီရောတ်နှာအာည်ႇကဇေန်နီန်ဒိူန် နံင်ရောတ်ဒိုႇနှာဘံန်းယာ့်။” 31ခိင်ဒီန် ဖာရိရှဲကဲမံင်ခ္လရောတ်ဒေဲႈ က္လာင်းတစဝ်ဖြား “ဂေါႇမိုႈ ဟောခံမ်းဟေရုဒ် မိူဝ်ႈအလို ကနာည်နံင်ပျံမ်းယံမ်းမည်း စီပဲန်လည်လည်ဟာဝ်ပွံတ်မည်း ဒါႇအရာပ်နီန်။” 32ခိင်ဒီန် စဝ်ဖြားစီဒါႈ “ဟာဝ်းက္လာင်းတဟေရုဒ် အ်ုန်အီနှေရ် ဆဝ်းဘြည်ဒီန်။ အညှာ အောနံင်ခြောႈလေႈဘိုး တိုအာဝ်ကျအာဝ်န ဆဲႈဒီန် အောနံင်ပ်ုန်ပဲန်ဘိုး ခေါခါႇကဲအီဆဝ်ဖိူဝ်ကဲဒိူန်။ အမှုအောနံင်ဟောည်ႇ ဆငည်းအိုည်ဒီန်။ 33မိုႈလိူည် ဂေါႇမိုႈအာရိယာတိုအီးမှိူမ်ထာတ်တိုအီးမြျံ တ်ကဲနီန် အာဝ်ဘိူန်းယံမ်းအရာပ်အီဟံရ် ဆဲႈဒါႇကီုင်းဂျေရုဆလင် စီပဲန်အောနံင်ဘ်ုပ်ဆီုပ်ဟာဝ်းဘိုး ခီညှာနီန်၊ အညှာ ကာည်း ဆငည်းဘံန်း။” 34ဟောည်ႇဒီန် စဝ်ဖြားယေရှုစီဒါႈဘိုး “အို ကောန်ကီုင်းမည်းပဲ ဟောည်ႇပျံမ်းယံမ်း အာရိယာတိုအီးမှိူမ်ထာတ်တိုအီးမျြံ တ် တိုအီပ်ုန်ပ္လေႈစဝ်ဖြားမာ် ပဲဟည်ဒါမာဝ်း ဒေါတ်။ အောဘိူည်ရီန်းရဲတ် ကနာည်နံင်ဒံန်ခြဲ ကောန်ကီုင်းမည်း မောကံပ်အာဝ်ကဒိုင်းဒါႇ ပ္လေနောႈအော ဟောည်ႇအူလိူဝ်ႈမိုႈအူလိူဝ်ႈ ဘာည်းမာအျံရ်ကနံမ်းဒါဒံန်ခြဲကောန်အ်ုန်ကဲမာ် ပဲအာဝ်ရံပ်ခါမ်။ 35ဗိမာန်တော်ပဲမာ် နံင်နှေရ်လိူည် ကန္တာရ ခေါႈယေန် အာဝ်မိူဝ်ႈတိုအီး။ ဂါပဲအာဝ်ဒါႈ ‘အီစွရောတ်တောပ်အခွါင်းအာဝ်ဏာ စဝ်ဖြား မိူဝ်ႈအေ့မံင်ဂလာ’ နီန် ဇူႈကဇေန်နီန် ပဲနံင်အာဝ်ယိူဝ်းယာ့်ဒေတိူဝ်ႈအော လိူဝ်ႈဘံန်း။”
Currently Selected:
Luke 13: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
