Luke 7
7
1ᨴ᩠ᨶᩤ᩵ᨧᩮᩣᩢᩢᨿᩮ᩵ᨪᩩᨶᩦᩢ ᨯᩱᩢᨴᩮᩈᨶᩣ ᩈ᩠ᨦᩢ᩵ᩈ᩠ᩋᩁᩉᩨᩢᨤ᩠ᨶᩫᨴ᩠ᨦᩢᩉᩖᩣ᩠ᨿᩓ᩠ᩅᩢ ᨣᩢᨯᩱᩢᨧᨯᩮ᩠ᨶᩨᨴᩮ᩠ᩆᨻᩱᨴᩦ᩵ ᨾᩮ᩠ᨦᩨᨠᨷᩮᩁᨶ᩠ᩋᨦᩉ᩠ᨶᩢᩢᩓ᪩ 2ᨶᩱᨣ᩠ᨿᨦᨴᩦ᩵ᨶ᩠ᨶᩢᩢ ᨾᩦᨹᩪᩢᨷ᩠ᨬᩢᨩᩣᩈ᩠ᨠᩧᩁᩮᩣᨾjᨤ᩠ᨶᩫ ᪑ ᨹᩪᩢᨸᩮ᩠ᨶᩃᩪᨠᨶ᩠ᩋᨦᩢ ᨧᩣᩴᨧᩱᩉᩯ᩠ᨦ᩵ ᨾ᩠ᨶᩢᩀᩪ᩵ᨷᩢᨯᩦ ᨸᩮ᩠ᨶᨡᩱᩢᩉ᩠ᨶᩣ᩠ᩅ ᨧᩢᨧᩣᩴᨾᩁᨱᩀᩪ᩵ᨶ᩠ᨶᩢᩢ᪩ 3ᨹᩪᩢᨷ᩠ᨬᩢᨩᩣᩈ᩠ᨠᩧᨯᩱᩢᨿ᩠ᨶᩥᨡᩣ᩠ᩅ᩵ ᨴ᩠ᨶᩤ᩵ᨧᩮᩣᩢᩢᩈᩮᩓ᩠ᩅᩢ ᨾᩦᨧᩱᨤᩱ᩵ᩉᩨᩢᩃᩪᨠᨶ᩠ᩋᨦᩢ ᨣ᩠ᨿᩪᨹᩪᩢᩉᩱ᩠ᨿ᩵ᨤ᩠ᨶᩫᩉᩖᩅ᩠ᨦ ᨾ᩠ᨶᩢᨹᩣ᩠ᨿᨷᩕᩰ᩠ᨯᩉᩣ᩠ᨿᨤᩯ᩠ᩅᩁ᪩ 4ᨧ᩠ᨦᩥ᩵ᨯᩱᩢᨩᩱᩢ ᩉ᩠ᩅᩫᩉ᩠ᨶᩣᩢᨤ᩠ᨶᩫᨣ᩠ᨿᩪᨡᩮᩣᩢᨻᩱᩋ᩠ᨦᩢᨩᩮ᩠ᨬᩨᨴ᩠ᨶᩤ᩵ᨧᩮᩣᩢᩢᨶ᩠ᨶᩢᩢᨯᩯ᩵᪩ ᨡᩮᩣᩢᨣᩢᨯᩱᩢᨻᩱᩉᩣᨴᩦ᩵ ᨴ᩠ᨶᩤ᩵ᨧᩮᩣᩢᩢᩓ᩠ᩅᩢᩉᩱ᩠ᩅᩢᩈᩣᩅᩤ᩵ ᨹᩪᩢᨷ᩠ᨬᩢᨩᩣᩈ᩠ᨠᩧᨣᩳᩢᨶᩦᩢ ᩈ᩠ᨾᩫᨣ᩠ᩅᩁᨯᩦᨯᩱᩢ ᩁ᩠ᨷᩢᨡᩣ᩠ᨾ᩵ᩐᩣᩢᨠᩣ᩠ᩁᨩᩭ᩵ ᨳᩯ᩠ᨾᩉᩯ᩠ᨦ᩵ᨴ᩠ᨶᩤ᩵ᨧᩮᩣᩢᩢᩀᩪ᩵ᩓ᪩ 5ᨼᩰ᩠ᩋᩡᩅᩤ᩵ᨾ᩠ᨶᩢᨶ᩠ᨶᩢᩢ ᨸᩮ᩠ᨶᨤ᩠ᨶᩫᩁ᩠ᨠᩢᨩᩮ᩠ᩋᩨᩢᨩᩣ᩠ᨲ ᨡᩣᩢᨡᩮᩣᩢᨴ᩠ᨦᩢᩉᩖᩣ᩠ᨿᩓᩢ ᨾᩦᨾᩮᨲ᩠ᨲᩣᨯᩱᩢᩈᩣ᩠ᨦᩢᩁᩰ᩠ᨦᨵᨾ᩠ᨾ᩼ᩉᩖᨦᩢ ᪑ ᨴ᩠ᨶᩤ᩵ᩅᩱᩢᨸ᩠ᨶᩢᨡᩣᩢᨡᩮᩣᩢᩀᩪ᩵ ᩉᩱ᩠ᩅᩢᩈᩣᨯ᩠ᨦᩢ᩵ᨶᩦᩢᩓ᪩ 6ᨼᩰ᩠ᩋᩡᩈ᩠ᨶᩢᨶ᩠ᨶᩢᩢ ᨴ᩠ᨶᩤ᩵ᨧᩮᩣᩢᩢ ᨣᩢᨯᩱᩢᨻᩱᨩ᩠ᩋᨾᨡᩮᩣᩢᩈᩮᩓ᩠ᩅᩢ ᨧᩣᩴᩁ᩠ᩋᨯᨹᩯ᩠ᩅᨴᩦ᩵ᩁᩮ᩠ᨶᩨ ᨹᩪᩢᨷ᩠ᨬᩢᨩᩣᩈ᩠ᨠᩧᨶ᩠ᨶᩢᩢ ᨹᩪᩢᨷ᩠ᨬᩢᨩᩣᩈ᩠ᨠᩧᨧ᩠ᨦᩥ᩵ ᨯᩱᩢᨩᩱᩢᨣᩳᩢᩈ᩠ᨿᩴ᩵ᨾ᩠ᨶᩢᨻᩱᩈᩪ᩵ ᨴᩦ᩵ᨴ᩠ᨶᩤ᩵ᨧᩮᩣᩢᩢᩓᩢ᩠ᩅ ᩉᩱ᩠ᩅᩢᩈᩣᩅᩤ᩵ “ᨴ᩠ᨶᩤ᩵ᨧᩮᩣᩢᩢ᪨ ᨴ᩠ᨶᩤ᩵ᨧᩮᩣᩢᩢ ᨷᩢᩈ᩠ᨾᩫᨣ᩠ᩅᩁᨾᩣᨴᩦ᩵ᩁᩮ᩠ᨶᩨᨡᩣᩢ ᨷᩢᨠ᩠ᨦᩨ᩵ᩈ᩠ᨾᩫᨣ᩠ᩅᩁᨯᩦ ᨡᩣ᩠ᨾ᩵ᨴᩩᨠ᩠ᨡ᩼ᨡᩣ᩠ᨾ᩵ᨿᩣ᩠ᨠᩈᩮᩓ᩠ᩅᩢᨾᩣ᪩ 7ᨡᩣᩢᨶᩦᩢ ᨣᩢᨷᩢᩈ᩠ᨾᩫᨣ᩠ᩅᩁᨯᩦᨻᩱᨳ᩠ᨷᩫᨻ᩠ᨷᩫ ᨴ᩠ᨶᩤ᩵ᨧᩮᩣᩢᩢᩓ᪩ ᨳᩣᩢᩅᩤ᩵ᨴ᩠ᨶᩤ᩵ᨧᩮᩣᩢᩢ ᨸ᩠ᨶᩢᩋᩣᨩ᩠ᨬᩣᨡᩳᩢ ᪑ ᨣᩭ ᩃᩪᨠᨶ᩠ᩋᨦᩢᨡᩣᩢᨧᩢᩉᩣ᩠ᨿᨤᩯ᩠ᩅᩁᨾᩣᨣᩣᩴᨯ᩠ᨿᩴ ᩀᩪ᩵ᨷᩢᩀ᩵ᩣᨩᩣᨯᩯ᩵᪩ 8ᨯ᩠ᨦᩢ᩵ᨲ᩠ᩅᩫᨡᩣᩢᨶᩦᩢ ᨾᩦᨻᩣ᩠ᨿᨲᩱᩢᨡᩩᩁᩉᩖᩅ᩠ᨦᨡᩮᩣᩢ ᩉᩮ᩠ᨾᩨᩁᨠ᩠ᨶᩢᨯ᩠ᨦᩢ᩵ᨠᩮᩢ᩵ᩣ ᨻᩣ᩠ᨿᨲᩱᩢᨡᩣᩢᨶᩦᩢ ᨣᩢᨾᩦᩃᩪᨠᨶ᩠ᩋᨦᩢ ᩃᩪᨠᩈ᩠ᨠᩧᨸᩮ᩠ᨶᨾᩣ᩠ᨠᨸᩮ᩠ᨶᩉᩖᩣ᩠ᨿ ᨣᩢᨾᩦᩀᩪ᩵ᩓ᪩ ᨳᩣᩢᩅᩤ᩵ᨡᩣᩢᨩᩱᩢᩃᩪᨠᨶ᩠ᩋᨦᩢᨻᩱᨾ᩠ᨶᩢᨣᩢᨲ᩠ᩋᩢᨦᨻᩱ ᨾᩣᨣᩢᨧᩢᨯᩱᩢᨾᩣ ᨡᩣᩢᩓ᪩ ᨳᩣᩢᩅᩤ᩵ᨩᩱᩢ ᨤ᩠ᨶᩫᨯᩱᩢᨡᩮᩣᩢᩉᩮ᩠ᨯᨯ᩠ᨦᩢ᩵ᨶᩦᩢ ᨡᩮᩣᩢᨣᩢᨲ᩠ᩋᨦᩢᩉᩮ᩠ᨯ ᨣᩣᩴᨯ᩠ᨿᩴᩓ᪩ ᩉᩱ᩠ᩅᩢᩈᩣᩅᩤ᩵ᨯ᩠ᨦᩢ᩵ᨶᩦᩢ” ᨣᩢᨾᩦᨯᩯ᩵᪩ 9ᨴ᩠ᨶᩤ᩵ᨧᩮᩣᩢᩢᨯᩱᩢ ᨿ᩠ᨶᩥᨣᩣᩴᨯ᩠ᨦᩢ᩵ᨶᩦᩢᩓ᩠ᩅᩢ ᨣᩢᨸᩮ᩠ᨶᩋ᩠ᨶᩢᩋᩔᨧ᩠ᨶᩢᨯᩦᩓ᩠ᩅᩢ ᩉ᩠ᩅ᩵ᩣ᩠ᨿᩉ᩠ᨶᩣᩢᨲᩳ᩵ᨤ᩠ᨶᩫ ᩋ᩠ᨶᩢᨾᩣᨩ᩠ᩋᨾᨩᩮ᩠ᩋᩨᨶ᩠ᨶᩢᩢᩅᩤ᩵ “ᨣᩪᨧᩢᨷ᩠ᩋᨠᨠ᩵ᩣ᩠ᩅᩉᩯ᩠ᨶᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿ᪩ ᨶᩱᨠ᩠ᩅᨦᨤ᩠ᨶᩫᩋᩥᨨᩁᩮᨶᩦᩢ ᨹᩪᩢᨴᩦ᩵ᩋ᩠ᨶᩢᨿᩩ᩵ᨾᨿᩣᩴ ᩉᩱ᩠ᨿ᩵ᩉᩖᩅ᩠ᨦᨯ᩠ᨦᩢ᩵ ᨷᩢᨣᩮ᩠ᨿᩨᨯᩱᩢᩉ᩠ᨶᩢᨾᩣᨴᩯᩢᨯᩯ᩵” ᨸ᩠ᨦᩫᩋᩣᨩ᩠ᨬᩣᩅᩤ᩵ᩋ᩠ᨶᩢᩢᩓ᪩ 10ᩃᩪᨠᨶ᩠ᩋᨦᩢ ᨹᩪᩢᨷ᩠ᨬᩢᨩᩣᩈ᩠ᨠᩧ ᨩᩱᩢᨻᩱᨶ᩠ᨶᩢᩢ ᨻ᩠ᩋᨠᨤ᩠ᨶᩨᨾᩣᩁ᩠ᩋᨯᨹᩯ᩠ᩅ ᨴᩦ᩵ᩁᩮ᩠ᨶᩨᨣᩢᨯᩱᩢᩉ᩠ᨶᩢᨤ᩠ᨶᩫᨩᩱᩢᨶ᩠ᨶᩢᩢ ᩀᩪ᩵ᨯᩦᨾᩣᩉᩮ᩠ᨾᩨᩁᨠᩮᩢ᩵ᩣᩅᩤ᩵ ᨨ᩠ᨶᩢᨶᩦᩢᨣᩢᨾᩦᩅ᩠ᨶᩢᨶ᩠ᨶᩢᩢᨯᩯ᩵᪩
ᩃᩪᨠᨩᩣ᩠ᨿᩉᩯ᩠ᨦ᩵ᨾᩯ᩵ᩉ᩠ᨾᩣ᩠ᨿᩢᨣᩳᩢ ᪑ ᨾᩦᨩᩦᩅ᩠ᨲᩥᨤ᩠ᨶᩨᨾᩣ 11ᨳᩯ᩠ᨦᩢᩅ᩠ᨶᩢ ᪑ ᨴ᩠ᨶᩤ᩵ᨧᩮᩣᩢᩢᨼ᩠ᩋᨾᩢᨠ᩠ᨷᩢᨯ᩠ᩅ᩠ᨿᩢᩃᩪᨠᨶ᩠ᩋᨦᩢᨴ᩠ᨦᩢᩉᩖᩣ᩠ᨿᨯᩱᩢ ᨾᩣᩁ᩠ᩋᨯᨹᩯ᩠ᩅᨴᩦ᩵ᨾᩮ᩠ᨦᩨᨶᩣᨻ᩠ᨦᨶᨶ᩠ᨶᩢᩢ ᨤ᩠ᨶᩫᨾᩮ᩠ᨦᩨᨴ᩠ᨦᩢᩉᩖᩣ᩠ᨿᨣᩢᨯᩱᩢᨩ᩠ᩋᨾᨾᩣᩀᩪ᩵᪩ 12ᩅᩮᩃᩣᨾᩮ᩠ᩋᩨ᩵ᩁ᩠ᩋᨯᨹᩯ᩠ᩅ ᨴᩦ᩵ᨠᩱᩢᨸᩡᨲᩪᩅ᩠ᨿᨦᨶ᩠ᨶᩢᩢ ᨯᩱᩢᩉ᩠ᨶᩢᨤ᩠ᨶᩫᨴ᩠ᨦᩢᩉᩖᩣ᩠ᨿᨡᩮᩣᩢᩉᩣ᩠ᨾᨤ᩠ᨶᩫᩈᩮ ᩋ᩠ᩋᨠᨾᩣᨶ᩠ᩋᨠᩅ᩠ᨿᨦᩓ᩠ᩅᩢ ᨤ᩠ᨶᩫᩈᩮᨶ᩠ᨶᩢᩢᨪᩣᩴᩢᨸᩮ᩠ᨶ ᩃᩪᨠᨩᩣ᩠ᨿᨣᩳᩢᨯ᩠ᨿᩴ ᩉᩯ᩠ᨦ᩵ᨾᩯ᩵ᩉ᩠ᨾᩣ᩠ᨿᩢᨣᩳᩢ ᪑ ᨤ᩠ᨶᩫᩅ᩠ᨿᨦᨴ᩠ᨦᩢᩉᩖᩣ᩠ᨿ ᨡᩮᩣᩢᨣᩢᨯᩱᩢᨾᩣ ᨩ᩠ᩋᨾᩈ᩠ᨦᩫ᩵ᨸᩮ᩠ᨶᨾᩣ᩠ᨠᨸᩮ᩠ᨶᩉᩖᩣ᩠ᨿ᪩ 13ᨾᩮ᩠ᩋᩨ᩵ᨴ᩠ᨶᩤ᩵ᨧᩮᩣᩢᩢᨯᩱᩢᩉ᩠ᨶᩢ ᨾᩯ᩵ᩉ᩠ᨾᩣ᩠ᨿᩢᨶ᩠ᨶᩢᩢ ᨣᩢᨸᩮ᩠ᨶᩋ᩠ᨶᩢᨻ᩠ᨦᨯᩪᨴᩯᩢᩓᩢ᪨ ᨠᩣ᩠ᩅ᩵ᩅᩤ᩵ “ᩀ᩵ᩣᩁ᩠ᩋᨦᩢᩉᩱᩢ”᪩ 14ᨳ᩠ᨯᩢᨶ᩠ᨶᩢᩢ ᨴ᩠ᨶᩤ᩵ᨧᩮᩣᩢᩢ ᨣᩢᨯᩮ᩠ᨶᩨᨻᩱᩉᩣᨴᩦ᩵ᨡ᩠ᩋᩁᨤ᩠ᨶᩫᩈᩮ ᩋ᩠ᨶᩢᩉᩣ᩠ᨾᨾᩣᨶ᩠ᨶᩢᩢ ᨣᩢᨯᩱᩢᩐᩣᩢᨾᩨᨻᩱᨴᩮ᩠ᩋᩨᩢ ᨴᩦ᩵ᨡ᩠ᩋᩁᨹᩦᩓ᩠ᩅᩢᩅᩤ᩵ “ᩃᩪᨠᩋ᩠ᩋᩁ᩵ᨶᩭᩢᩉᩮ᩠ᨿᩨ ᨣᩪᨧᩢᨷ᩠ᩋᨠᨸ᩠ᨶᩢᨾ᩠ᨦᩨ ᩃᩩᨠᨾᩣᨯᩯ᩵” ᨸ᩠ᨦᩫᩋᩣᨩ᩠ᨬᩣᨸ᩠ᨶᩢᨯ᩠ᨦᩢ᩵ᨶᩦᩢᩓ᩠ᩅᩢ᪩ 15ᨿᩣ᩠ᨾᨶ᩠ᨶᩢᩢ ᨤ᩠ᨶᩫᩋ᩠ᨶᩢᩈᩮᨻᩱᨣᩢᩃᩩᨠᨡ᩠ᨶᩨᩢᨾᩣᨶ᩠ᨦᩢ᩵ᩈᩮᩓ᩠ᩅᩢ ᩅᩤ᩵ᨣᩣᩴᩀᩪ᩵ᩓ ᨴ᩠ᨶᩤ᩵ᨧᩮᩣᩢᩢᨣᩢᨯᩱᩢᨾ᩠ᩋᨷᨸ᩠ᨶᩢ ᨾᩨᨾᩯ᩵ᨾ᩠ᨶᩢᩉ᩠ᨶᩢᩢᨯᩯ᩵᪩ 16ᨤ᩠ᨶᩫᨴ᩠ᨦᩢᩉᩖᩣ᩠ᨿᨯᩱᩢᩉ᩠ᨶᩢᩓ᩠ᩅᩢᨣᩢᨲ᩠ᨠᩫᨧᩱᨠ᩠ᩅᩫᩓᩢ ᨸᩩᩁᨯᩦᩋᩔᨧ᩠ᨶᩢᩅᩤ᩵ “ᩁᩮᩣᩢᨧᩮᩣᩢᩢᨡᩣᩢᨶᩦᩢᨯᩱᩢᨳ᩠ᨷᩫᨻ᩠ᨷᩫᨹᩪᩢ ᩋᩁᩥᨿᩣᨹᩪᩢᨧᩱᨷᩩᨬ᩼ᨶᩫᨷᩕᩈᩮ᩠ᨮᩨᨲ᩠ᨶᩫ ᪑ ᩓ᩠ᩅᩢ ᨻᩕᨧᩮᩣᩢᩢᨧᩢᨷᩕᩰ᩠ᨯᩁᩮᩣᩢᨴ᩠ᨦᩢᩉᩖᩣ᩠ᨿᩓ᩠ᩅᩢᩓ” ᩅᩤ᩵ᨯ᩠ᨦᩢ᩵ᨶᩦᩢᩓ᩠ᩅᩢ᪩ ᨣᩢᩈ᩠ᨠᩫᩈᩮ᩠ᨶᩨᨿ᩠ᨠᩫᨿᩳ ᨣᩩᨱᨻᩕᨧᩮᩣᩢᩢᩅᩤ᩵ᩈ᩠ᨶᩢᨶᩦᩢᨯᩯ᩵᪩ 17ᨠ᩠ᨿᩴ᩵ᨠ᩠ᨷᩢᨯ᩠ᩅ᩠ᨿᩢᨴ᩠ᨶᩤ᩵ᨧᩮᩣᩢᩢᩈᩮᩓ᩠ᩅᩢ ᨡᩣ᩠ᩅ᩵ᨣᩢᨸᩮ᩠ᨶᩋ᩠ᨶᩢᩃᩨᩉᩖᨦᩢᨴ᩠ᩅᩫ᩵ᨹ᩠ᨷᩢᨧ᩠ᩋᨯᨻᩱᨴ᩠ᨦᩢ ᨾᩮ᩠ᨦᩨᨿᩩᨴᨴ᩠ᨦᩢᩈ᩠ᨿᨦᩢᨣᩢᨾᩦᩅ᩠ᨶᩢᨶ᩠ᨶᩢᩢᨯᩯ᩵᪩
ᨷ᩠ᩋᨠᨠᩣ᩠ᩅ᩵ᨡᩳᩢᨣᩣᩴᩁᩮ᩠ᨦᩨ᩵ ᨣᩕᩪᨿᩳᩉᩣ᩠ᨶ᩵ᨧ᩠ᨾᩫᨶᩣᩴᩢᨾᨣᩘᩃ 18ᩅᩣ᩠ᨿᨶ᩠ᨶᩢᩢ ᩃᩪᨠᨶ᩠ᩋᨦᩢᨴ᩠ᨦᩢᩉᩖᩣ᩠ᨿᩉᩯ᩠ᨦ᩵ᨣᩕᩪᨿᩳᩉᩣ᩠ᨶ᩵ᨧ᩠ᨾᩫᨶᩣᩴᩢᨾᨣᩘᩃᨯᩱᩢᩁᩪᩢᩁᩮ᩠ᨦᩨ᩵ ᨴᩩᨠᨩᩮ᩠ᩋᩨᩢᨴᩩᨠᩋ᩠ᨶᩢᩓ᩠ᩅᩢ ᨣᩢᨻᩱᨷ᩠ᩋᨠᨠᩣ᩠ᩅ᩵ᩉᩯ᩠ᨶ ᨿᩳᩉᩣ᩠ᨶ᩵ᩉ᩠ᨶᩢᩢᩓ ᨾ᩠ᨶᩢᨣᩢᨯᩱᩢᩁ᩠ᩋᨦᩢᩐᩣᩢᩃᩪᨠᨶ᩠ᩋᨦᩢ ᩈ᩠ᩋᨦᨤ᩠ᨶᩫᨩᩱᩢᨻᩱᨳᩣ᩠ᨾᩅᩤ᩵᪩ 19ᩃᩪᨠᨶ᩠ᩋᨦᩢᩉᩯ᩠ᨦ ᨴ᩠ᨶᩤ᩵ᨧᩮᩣᩢᩢᩋ᩠ᨶᩢᨧᩢᨾᩣᨶᩦᩢᩌᩣᩢ “ᨡᩣᩢᨡᩮᩣᩢᨧᩢᨯᩱᩢᨻᩱᨳᩣᩢᨳᩯ᩠ᨦᩢᨣᩳᩢ ᪑ ᩌᩣᩢ”᪩ 20ᨡᩮᩣᩢᨩᩮ᩠ᩋᩨᨶ᩠ᨶᩢᩢᨣᩢᨯᩱᩢᨻᩱᨳ᩠ᨦᩨᨴᩦ᩵ ᨴ᩠ᨶᩤ᩵ᨧᩮᩣᩢᩢᨣᩢᨳᩣ᩠ᨾᩅᩤ᩵ “ᨿᩳᩉᩣ᩠ᨶ᩵ᨧ᩠ᨾᩫᨶᩣᩴᩢᨾᨣᩘᩃᨩᩱᩢ ᨹᩪᩢᨡᩣᩢᨡᩮᩣᩢᨾᩣᩉᩣᨴ᩠ᨶᩤ᩵ᨧᩮᩣᩢᩢᩓ᩠ᩅᩢ ᨴ᩠ᨶᩤ᩵ᨧᩮᩣᩢᩢᩋ᩠ᨶᩢᨧᩢᨾᩣᨶᩦᩢᨸᩮ᩠ᨶᨴ᩠ᨶᩤ᩵ᨧᩮᩣᩢᩢᩌᩣᩢ ᨷ᩠ᨣᩢᨹᩪᩢᨡᩣᩢᨧᩢᨯᩱᩢᨻᩱᩢᨳᩯ᩠ᨦᩢᨹᩪᩢ ᪑ ᩌᩣᩢ” ᩉᩱ᩠ᩅᩢᩈᩣᨳᩣ᩠ᨾᩅᩤ᩵ᨯ᩠ᨦᩢ᩵ᨶᩦᩢᨯᩯ᩵᪩ 21ᨿᩣ᩠ᨾᨶ᩠ᨶᩢᩢᨴ᩠ᨶᩤ᩵ᨧᩮᩣᩢᩢᨣᩢᩅᩤ᩵ᨤ᩠ᨶᩫᨡᩱᨤ᩠ᨶᩫᩉ᩠ᨶᩣ᩠ᩅᨣᩢᩀᩪ᩵ᨯᩦᨾᩣᩓ᩠ᩅᩢ ᨹᩦᩁᩣ᩠ᨿᩢᩋ᩠ᨶᩢᨷᩢᨯᩦᨷᩢᨦᩣ᩠ᨾᨾᩣᨡᩮᩣᩢᩢᨩᩮ᩠ᩋᩨᨶ᩠ᨶᩢᩢ ᨣᩢᨯᩱᩢᨡ᩠ᨷᩢᩃᩱ᩵ᩋ᩠ᩋᨠᨻᩱᩀᩪ᩵ᩓ ᨤ᩠ᨶᩫᨩᩮ᩠ᩋᩨᩋ᩠ᨶᩢᨲᩣᨷᩢᩉ᩠ᨶᩢᨣᩢᨯᩱᩢ ᨠ᩠ᨴᩣᩴᩉᩨᩢᩉ᩠ᨶᩢᨤ᩠ᨶᩨᨾᩣᩓ᩠ᩅᩢ᪩ 22ᨴ᩠ᨶᩤ᩵ᨧᩮᩣᩢᩢᨣᩢᨯᩱᩢᨷ᩠ᩋᨠᨠᩣ᩠ᩅ᩵ᩉᩯ᩠ᨶᩃᩪᨠᨶ᩠ᩋᨦᩢᨿᩳᩉᩣ᩠ᨶ᩵ᩅᩤ᩵ “ᩋ᩠ᨶᩢᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿᨯᩱᩢᩉ᩠ᨶᩢᨴ᩠ᨦᩢᩈ᩠ᨿᨦᩢᨶᩦᩢ ᩉᩨᩢᨻᩱᨷ᩠ᩋᨠᨠᩣ᩠ᩅ᩵ᩉᩯ᩠ᨶᨿᩳᩉ᩵ᩣ᩠ᨶᩈᩮᨣᩣᩴᨯᩯ᩵᪩ ᨤ᩠ᨶᩫᨲᩣᨷ᩠ᩋᨯᨣᩢᩉ᩠ᨶᩢᨤ᩠ᨶᩨᨾᩣᩓ᩠ᩅᩢ᪩ ᨡᩣᨾᩨᨷᩢᨯᩦᨩᩮ᩠ᩋᩨᨶ᩠ᨶᩢᩢᨣᩢ ᨩ᩠ᨦᩣ᩵ᨴ᩠ᨿᩴᨩ᩠ᨦᩣ᩵ᨿ᩠ᨦᩣ᩵ᨤ᩠ᨶᩨᩓ᩠ᩅᩢ᪩ ᨤ᩠ᨶᩫᨸᩮ᩠ᨶᨡᩦᩢᨴᩪᨯᨣᩢᩉᩣ᩠ᨿᨤᩯ᩠ᩅᩁᨤ᩠ᨶᩨᩓ᩠ᩅᩢ᪩ ᨹᩪᩢᩉᩪᩉ᩠ᨶ᩠ᩅᨠᨣᩢᨯᩱᩢᨿ᩠ᨶᩥᨤ᩠ᨶᩨᩓ᩠ᩅᩢ᪩ ᨤ᩠ᨶᩫᩋ᩠ᨶᩢᨯᩱᩢᨲᩣ᩠ᨿᨶ᩠ᨶᩢᩢ ᨣᩢᨼ᩠ᨶᩨᩢᨤ᩠ᨶᩨᨾᩣᩓ᩠ᩅᩢ᪩ ᨤ᩠ᨶᩫᨹᩣ᩠ᨶᨴ᩠ᨦᩢᩉᩖᩣ᩠ᨿᨡᩮᩣᩢᨣᩢᨯᩱᩢᨿ᩠ᨶᩥ ᨡᩣ᩠ᩅ᩵ᩈᩣ᩠ᨶᨾᨣᩘᩃᩋ᩠ᨶᩢᨯᩦᩋ᩠ᨶᩢᨦᩣ᩠ᨾ ᩋ᩠ᨶᩢᨾᩦᨾᨣᩘᩃᩓ᩠ᩅᩢ᪩ 23ᨤ᩠ᨶᩫᩋ᩠ᨶᩢᨷᩢᩅᩮ᩠ᨶᩢᩅᩯ᩵ᨣᩪᨩᩮ᩠ᩋᩨᨶ᩠ᨶᩢᩢ ᨣᩢᨻᩕᨧᩮᩣᩢᩢᨯᩱᩢᨸ᩠ᨶᩢ ᨻ᩠ᩋᩁᨾᨣᩘᩃᩀᩪ᩵ᩓ᩠ᩅᩢᨯᩯ᩵” ᨸ᩠ᨦᩫᩋᩣᨩ᩠ᨬᩣᩅᩤ᩵ᨯ᩠ᨦᩢ᩵ᨶᩦᩢᩓ᪩ 24ᩃᩪᨠᨶ᩠ᩋᨦᩢᨿᩳᩉᩣ᩠ᨶ᩵ᨻ᩠ᩋᨠᨻᩱᨤ᩠ᨶᩨᩓ᩠ᩅᩢᨴ᩠ᨶᩤ᩵ᨧᩮᩣᩢᩢᨣᩢᨯᩱᩢ ᨴᩮᩈᨶᩣᩁᩮ᩠ᨦᩨ᩵ᨿᩳᩉᩣ᩠ᨶ᩵ᩅᩤ᩵ “ᨻᩱᨴᩦ᩵ᨶᩱᨸ᩵ᩣᨳᩮ᩠ᨶᩨ᩵ᩉᩖᩅ᩠ᨦᨶ᩠ᨶᩢᩢ ᨻᩱᨴ᩠ᩅ᩠ᨿᨻ᩠ᨦᩈ᩠ᨦᩢ᪩ ᨻᩱᨴ᩠ᩅ᩠ᨿᨲ᩠ᨶᩫᩢᨾᩱᩢᩋᩳᩢ ᩉ᩠ᩅ᩵ᩁᩢᩉᩱ᩠ᩅᨻᩱᨾᩣᨶ᩠ᨶᩢᩢᩌᩣᩢ᪩ 25ᩋ᩠ᩋᨠᨻᩱᨴ᩠ᨦᩤᨶ᩠ᩋᨠᨶ᩠ᨶᩢᩢ ᨤᩱ᩵ᨻᩱᨴ᩠ᩅ᩠ᨿᨻ᩠ᨦᩈ᩠ᨦᩢ ᨻᩱᨴ᩠ᩅ᩠ᨿᨤ᩠ᨶᩫᨶᩩᨦ᩵ᨤ᩠ᩅᩫ ᩉ᩠ᨦ᩵ᩣᨯᩦᩉ᩠ᨦ᩵ᩣᨦᩣ᩠ᨾᨶ᩠ᨶᩢᩢᩌᩣᩢ᪩ ᨤ᩠ᨶᩫᩋ᩠ᨶᩢᨾᩦᨡᩮᩣᩢᩢᨡ᩠ᩋᨦ ᩈᨾ᩠ᨷᨲ᩠ᨲᩥᩀᩪ᩵ᨯᩦᨠ᩠ᨶᩥᨯᩦᨩᩮ᩠ᩋᩨᨶ᩠ᨶᩢᩢ ᨾᩦᨴᩦ᩵ᨶᩱᩉᩳᨼ᩠ᨿᩣᨧᩮᩣᩢᩢᨾᩮ᩠ᨦᩨᨴᩮᩤᩢ᩵ᨶ᩠ᨶᩢᩢᨣᩭᨯᩯ᩵᪩ 26ᨷᩢᨣᩢᨤᩱ᩵ᩉ᩠ᨶᩢ ᨷᩩᨣ᩠ᨣᩃᩀ᩵ᩣ᩠ᨦᨯᩱᩓᩢ ᨯᩱᩢᩋ᩠ᩋᨠᨻᩱᨴᩤ᩠ᨦᨶ᩠ᩋᨠᩋ᩠ᨶᩢᩅᩤ᩵ᨶ᩠ᨶᩢᩢᩓᩢ ᨤᩱ᩵ᩉ᩠ᨶᩢᨹᩪᩢᨾᩦᩈ᩠ᩃᩦᨾᩦᨵᨾ᩠ᨾ᩼ᩌᩣᩢ᪩ ᨾᩯ᩠ᨶ᩵ᩓ᩠ᩅᩢ᪩ ᨣᩪᨤᩱ᩵ᨷ᩠ᩋᨠᨠᩣ᩠ᩅ᩵ ᩉᩯ᩠ᨶᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿᩅᩤ᩵ ᨿᩳᩉᩣ᩠ᨶ᩵ᨶᩦᩢ ᨿ᩠ᨦᩢᨷᩕᩈᩮ᩠ᨮᩨᩉᩮᩖᩨᩋ ᨲ᩠ᩋᩁᩥᨿᩣᨹᩪᩢᨧᩱᨷᩩᨬ᩼ᩈ᩠ᩃᩦᨵᨾ᩠ᨾ᩼ᨶ᩠ᨶᩢᩢ ᨠ᩠ᩋᩁ᩵ᨯᩯ᩵᪩
“ᨻᩳᩉᩨᩢᨡ᩠ᨯᩧᨴ᩠ᨶᩢᨧᩱᨶ᩠ᨶᩢᩢ ᨯᩱᩢᩈ᩠ᨦᩢ᩵ᨹᩪᩢᨲ᩠ᨯᩥᨲᩳ᩵ᩋ᩠ᩋᩁᨴ᩠ᨦᩤᨻᩮ᩠ᨶᩨ᩵ᩓ
ᩋ᩠ᨶᩢᨯᩱᩢᨡ᩠ᨿᩁᩉᩯ᩠ᨶᩅᩱᩢᨯ᩠ᨦᩢ᩵ᨶ᩠ᨶᩢᩢ ᩃᩪᨠᨶ᩠ᩋᨦᩢ ᨣᩢᨸᩮ᩠ᨶᩁᩮ᩠ᨦᩨ᩵ᨿᩳᩉᩣ᩠ᨶ᩵” 2728ᨣᩪᨧᩢᨷ᩠ᩋᨠᨠᩣ᩠ᩅ᩵ᩉᩯ᩠ᨶᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿ ᨶᩱᩃᩰ᩠ᨠᨶᩦᩢ᪩ ᨤ᩠ᨶᩫᩋ᩠ᨶᩢᨷᩕᩈᩮ᩠ᨮᩨᩉᩮᩖᩨᩋᨿᩳᩉᩣ᩠ᨶ᩵ᨶᩦᩢ ᨿ᩠ᨦᩢᨷᩢᨠᩮ᩠ᨯᩨᨴᩮ᩠ᩋᩨ᩵ᩅᩤ᩵ᩋ᩠ᨶᩢᩢᨯᩯ᩵᪩ ᨣᩭᨲᩯ᩵ᩅᩤ᩵ᨶᩱ ᩈᩣᩈᨶᩣᨻᩕᨧᩮᩣᩢᩢᨶ᩠ᨶᩢᩢ ᨤ᩠ᨶᩫᨴᩦ᩵ᩋ᩠ᨶᩢᨷᩢᨡᩮᩣᩢᩢᨠᩣ᩠ᩁᨡᩮᩣᩢᨿ᩠ᨦᩢ ᨷᩕᩈᩮ᩠ᨮᩨᩉᩮᩖᩨᩋᨿᩳᩉᩣ᩠ᨶ᩵ᨠ᩠ᩋᩁ᩵ᩓ ᨸ᩠ᨦᩫᩋᩣᨩ᩠ᨬᩣᨯ᩠ᨦᩢ᩵ᨶᩦᩢ ᨣᩢᨾᩦᩅ᩠ᨶᩢᨶ᩠ᨶᩢᩢᨯᩯ᩵᪩ 29ᨾᩮ᩠ᩋᩨ᩵ᨯᩱᩢᨿ᩠ᨶᩥᨣᩣᩴᨯ᩠ᨦᩢ᩵ᨶᩦᩢᩓ᩠ᩅᩢ ᨲ᩠ᨦᩢᩢᩐᩣᩢᨹᩪᩢᨠᩮ᩠ᨷᨡ᩠ᩋ᩵ᩁᩓᩢ ᨤ᩠ᨶᩫᨴ᩠ᨦᩢᩉᩖᩣ᩠ᨿᨡᩮᩣᩢ ᨣᩢᨯᩱᩢᩁ᩠ᨷᩢᩐᩣᩢᨠᩣ᩠ᩁ ᨧ᩠ᨾᩫᨶᩣᩴᩢᨾᨣᩘᩃᨴᩦ᩵ᨿᩳᩉᩣ᩠ᨶ᩵ᨶ᩠ᨶᩢᩢᩓᩢ ᨩ᩠ᩅᩁᨠ᩠ᨶᩢᩁ᩠ᨷᩢᩐᩣᩢᨠᩣ᩠ᩁ ᩈᩨᩈᩱᩉᩯ᩠ᨦ᩵ᨻᩕᨧᩮᩣᩢᩢᨶ᩠ᨶᩢᩢᩓ᪩ 30ᨣᩭᨲᩯ᩵ᩅᩤ᩵ ᨹᩣᩁᩥᨪᩯᩓᩢᩉ᩠ᨾᩳᨣᩕᩪᨩᩣ᩠ᨦ᩵ᨣᨾ᩠ᨻᩦᨡᩮᩣᩢᨩᩮ᩠ᩋᩨᨶ᩠ᨶᩢᩢ ᨷᩢᨩ᩠ᩋᨾᨣᩣᩴᨣ᩠ᨯᩧᩉᩯ᩠ᨦ᩵ᨻᩕᨧᩮᩣᩢᩢ ᨷᩢᨿ᩠ᩋᨾᨻᩱᨴᩦ᩵ᨿᩳᩉᩣ᩠ᨶ᩵ ᨷᩢᩁ᩠ᨷᩢᩐᩣᩢᨧ᩠ᨾᩫᨶᩣᩴᩢᨾᨣᩘᩃᩅᩤ᩵ᩋ᩠ᨶᩢᩢ ᨣᩢᨾᩦᨸᩮ᩠ᨶᨯ᩠ᨦᩢ᩵ᨶᩦᩢᨯᩯ᩵᪩ 31ᩅᩣ᩠ᨿᨶ᩠ᨶᩢᩢᨴ᩠ᨶᩤ᩵ᨧᩮᩣᩢᩢᩈ᩠ᨷᩨᨲᩳ᩵ᨻᩱᩅᩤ᩵ “ᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿᨩᩮ᩠ᩋᩨᨶᩦᩢᩉᩮ᩠ᨾᩨᩁᨩᩮ᩠ᩋᩨᩢᨯᩱᨩᩣ᪨ ᨸᩮ᩠ᨶᨤ᩠ᨶᩫᨩᩮ᩠ᩋᩨᨯᩱᩋ᩠ᨶᩢᨩᩣ”᪩ 32ᨣᩪᩉᩱ᩵ᨲ᩠ᨦᩨᩢᩉᩯ᩠ᨶᩀᩪ᩵
ᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿ ᨣᩢᨷᩢᨼ᩠ᩋᩁᩢᨷᩢᨠᩣᩢ᪩
ᨣᩪᩉᩱᩢᩉᩯ᩠ᨶᩀᩪ᩵ ᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿ
ᨣᩢᨷᩢᩉᩱᩢᨩ᩠ᩋᨾ ᩉᩮ᩠ᨾᩨᩁᩃᩪᨠᩋ᩠ᩋᩁ᩵
ᨡᩮᩣᩢᩉ᩠ᩅᩫᩁ᩠ᩋᨦᩢ ᨩ᩠ᩋᨾᨶᩱᨠᩣ᩠ᨯᨶ᩠ᨶᩢᩢ 33ᨿᩳᩉᩣ᩠ᨶ᩵ᨶᩦᩢᨷᩢᨠ᩠ᨶᩥᩋᩣᩉᩣ᩠ᩁk ᨶᩣᩴᩢᨿᩣᨾᩮᩣᩢ ᨶᩣᩴᩢᩉ᩠ᨾᩣ᩠ᨠᩋ᩠ᨯᩦᨣᩢᨷᩢᨠ᩠ᨶᩥ ᨻᩱᨾᩣᩀᩪ᩵ᨯ᩠ᨦᩢ᩵ᨶᩦᩢ ᩈᩪᨴ᩠ᨶᩤ᩵ᨴ᩠ᨦᩢᩉᩖᩣ᩠ᨿᨪᩣᩴᩢᩅᩤ᩵ ᨿᩳᩉᩣ᩠ᨶ᩵ᨶᩦᩢᨹᩦᩁᩣ᩠ᨿᩢᨡᩮᩣᩢᩢ᪩ 34ᨶ᩠ᩋᨠᨧᩣ᩠ᨠᨶ᩠ᨶᩢᩢ ᨪᩣᩴᩢᩅᩤ᩵ᩃᩪᨠᨩᩣ᩠ᨿᨧᩮᩣᩢᩢᨶᩦᩢᨸᩮ᩠ᨶ ᨲ᩠ᨶᩫᨲ᩠ᨶᩢᩉᩣᩃ᩠ᩅᨷᨾᩣ᩠ᨠᨠ᩠ᨶᩥ ᨪᩣᩴᩢᩅᩤ᩵ᨠ᩠ᨶᩥᨩ᩠ᩋᨾᨤ᩠ᨶᩫᨠᩮ᩠ᨷᨡ᩠ᨶᩫ᩵ᨡᩮᩣᩢᩓᩢ ᨤ᩠ᨶᩫᨾᩦᨴᩰ᩠ᩇᨴᩩᨧᩁ᩠ᨠᩥᨡᩮᩣᩢᩅᩤ᩵ᩋ᩠ᨶᩢᩢ ᨣᩢᨾᩦᨯ᩠ᨦᩢ᩵ᨶᩦᩢᩓ᪩ 35ᨣᩭᨲᩯ᩵ᩅᩤ᩵ ᨳᩣᩢᨸᩮ᩠ᨶᩃᩪᨠᨩᩣ᩠ᨿᩃᩪᨠᨿ᩠ᨦᩥᩉᩯ᩠ᨦ᩵ᨻᩕᨧᩮᩣᩢᩢᨾᩯ᩠ᨶ᩵ᨴᩯᩢᨶ᩠ᨶᩢᩢ ᨧᩢᨡᩮᩣᩢᩢᨧᩱᩅᩤ᩵ ᨣᩪᩓᩢᨿᩳᩉᩣ᩠ᨶ᩵ᨶᩦᩢ ᨠ᩠ᨴᩣᩴᨸᩮ᩠ᨶᩋ᩠ᨶᩢᨩᩨ᩵ᨩᩱ᩵ᩀᩪ᩵ᩋ᩠ᨶᩢᩅᩤ᩵ᨶ᩠ᨶᩢᩢᨣᩭᨯᩯ᩵ ᨸ᩠ᨦᩫᩋᩣᨩ᩠ᨬᩣᩅᩤ᩵ᨯ᩠ᨦᩢ᩵ᨶᩦᩢᨯᩯ᩵᪩ 36ᩅᩣ᩠ᨿᨶ᩠ᨶᩢᩢ ᨹᩣᩁᩥᨪᩯᨣᩳᩢ ᪑ ᨶ᩠ᨶᩢᩢ ᨯᩱᩢᨶᩥᨾᩫᨶ᩠ᨲ᩼ᨴ᩠ᨶᩤ᩵ᨧᩮᩣᩢᩢᨿᩮ᩵ᨪᩩᨻᩱᩁ᩠ᨷᩢ ᨴᩤ᩠ᨶᩋᩣᩉᩣ᩠ᩁᨴᩦ᩵ᩁᩮ᩠ᨶᩨᨾ᩠ᨶᩢ᪩ ᩈ᩠ᨶᩢᨶ᩠ᨶᩢᩢ ᨴ᩠ᨶᩤ᩵ᨧᩮᩣᩢᩢᨧ᩠ᨦᩥ᩵ᨯᩱᩢᨻᩱᨴᩦ᩵ᩁᩮ᩠ᨶᩨᨾ᩠ᨶᩢᩓ᩠ᩅᩢ ᨻᩱᨶ᩠ᨦᩢ᩵ᨴᩦ᩵ᩁ᩠ᨾᩥᨹᩮ᩠ᨶᩨᩉ᩠ᨶᩢᩢᩓ᪩ 37ᨴᩦ᩵ᩅ᩠ᨿᨦᨶ᩠ᨶᩢᩢᨾᩦᨶᩣ᩠ᨦᨿ᩠ᨦᩥᨣᩳᩢ ᪑ ᩋ᩠ᨶᩢᨾᩦᨴᩰ᩠ᩇᨴᩩᨧᩁᩮ᩠ᨠᩨᨾᩣ᩠ᨠᩉᩖᩣ᩠ᨿᨶ᩠ᨶᩢᩢ᪩ ᨯᩱᩢᨿ᩠ᨶᩥᩅᩤ᩵ᨴ᩠ᨶᩤ᩵ᨧᩮᩣᩢᩢᨾᩣᩈ᩠ᨶᩢᨡᩮᩣᩢᩢᩀᩪ᩵ ᨴᩦ᩵ᩁᩮ᩠ᨶᩨᨹᩣᩁᩥᨪᩯᩉ᩠ᨶᩢᩢ ᨾ᩠ᨶᩢᨶᩣ᩠ᨦᨧ᩠ᨦᩥ᩵ᨯᩱᩢᩐᩣᩢᨶᩣᩴᩢᨾ᩠ᨶᩢᩉ᩠ᩋᨾᨡ᩠ᩅᨯ ᪑ ᩋ᩠ᨶᩢᨾᩦᨣᩤ᩵ᨡ᩠ᨶᩢᩉᩱ᩠ᨿ᩵ᨶ᩠ᨶᩢᩢᩈᩮᩓ᩠ᩅᩢ ᨻᩱᨴᩦ᩵ᩉ᩠ᨶᩢᩢ᪩ 38ᩅᩣ᩠ᨿᨶ᩠ᨶᩢᩢ ᨶᩣ᩠ᨦᨿ᩠ᨦᩥᨧ᩠ᨦᩥ᩵ᨡᩮᩣᩢᩢᨻᩱᩀᩪ᩵ᨻᩣ᩠ᨿ ᩉᩖᨦᩢᨴ᩠ᨶᩤ᩵ᨧᩮᩣᩢᩢᩓ᩠ᩅᩢᩉᩱᩢᩀᩪ᩵ ᩈᩮᩉᩨᩢᨶᩣᩴᩢᨲᩣᨾ᩠ᨶᩢᨿᩭᩢᨲ᩠ᨠᩫᩈᩱ᩵ᨲ᩠ᨶᩥᨴ᩠ᨶᩤ᩵ᨧᩮᩣᩢᩢ ᩓᩢᨯᩱᩢᩐᩣᩢᨹ᩠ᨾᩫᩉ᩠ᩅᩫᩉᩯ᩠ᨦ᩵ᨾ᩠ᨶᩢᨶᩣ᩠ᨦᨩᩮ᩠ᨯ ᨲ᩠ᨶᩥᨴ᩠ᨶᩤ᩵ᨧᩮᩣᩢᩢᩉᩨᩢᨾ᩠ᨶᩢ ᩉᩯ᩠ᨦᩢᨻᩱᩅᩤ᩵ᩋ᩠ᨶᩢᩢᩓ᪩ ᩅᩣ᩠ᨿᨶ᩠ᨶᩢᩢ ᨪᩣᩴᩢᨯᩱᩢᨻᩱᨯ᩠ᨾᩫ ᨲ᩠ᨶᩥᨴ᩠ᨦᩢᩈ᩠ᩋᨳᨹ᩵ᩣ᩠ᨿᩓ᩠ᩅᩢ ᩐᩣᩢᨶᩣᩴᩢᨾ᩠ᨶᩢᩉ᩠ᩋᨾᨳᩩᨠᨸ᩠ᨶᩢᨳᩯ᩠ᨦᩢᨠ᩠ᩋᩁ᩵ᨯᩯ᩵᪩ 39ᨿᩣ᩠ᨾᨶ᩠ᨶᩢᩢ ᨹᩣᩁᩥᨪᩯᨯᩱᩢᩉ᩠ᨶᩢᨯ᩠ᨦᩢ᩵ᨶ᩠ᨶᩢᩢᩓ᩠ᩅᩢ “ᨳᩣᩢᩅᩤ᩵ᨸᩮ᩠ᩋᩁᩥᨿᩣᨹᩪᩢᨧᩱᨷᩩᨬ᩼ᨲ᩠ᨶᩫᨷᩕᩈᩮ᩠ᨮᩨᨩᩨ᩵ᨩᩱ᩵ᨴᩯᩢᨶ᩠ᨶᩢᩢ ᨶᩣ᩠ᨦᨿ᩠ᨦᩥᩋ᩠ᨶᩢᨯᩱᩢᨴᩮ᩠ᩋᩨᩢᨧ᩠ᨷᩢᨶ᩠ᨶᩢᩢ ᩈ᩠ᨾᩫᨣ᩠ᩅᩁᨯᩦᩁᩪᩢᩅᩤ᩵ᨸᩮ᩠ᨶᨶᩣ᩠ᨦᨿ᩠ᨦᩥᩀ᩵ᩣ᩠ᨦᨯᩱ᪩ ᨶᩣ᩠ᨦᨿ᩠ᨦᩥᨷᩢᨯᩦᩋ᩠ᨶᩢᩅᩤ᩵ᨶ᩠ᨶᩢᩢ ᨣᩢᩈ᩠ᨾᩫᨣ᩠ᩅᩁᨯᩦᩁᩪᩢᨯᩱᩢᩀᩪ᩵ᩓ” ᨣᩢᨶ᩠ᨠᩧᨶᩱᨧᩱᩀᩪ᩵᪩ 40ᨴ᩠ᨶᩤ᩵ᨧᩮᩣᩢᩢᨧ᩠ᨦᩥ᩵ᩅᩤ᩵ “ᨪᩥᨾᩩ᩵ᩁ᪨ ᨣᩪᨧᩢᨷ᩠ᩋᨠᨠᩣ᩠ᩅ᩵ᨸ᩠ᨶᩢᨾ᩠ᨦᩨᩋ᩠ᨶᩢ” ᨿᩣ᩠ᨾᨶ᩠ᨶᩢᩢᨪᩥᨾᩩ᩵ᩁᨣᩢᩅᩤ᩵
“ᨷ᩠ᩋᨠᨸ᩠ᨶᩢᨡᩣᩢᩈᩮᨣᩣᩴᩓᨴ᩠ᨶᩤ᩵ᨧᩮᩣᩢᩢ” ᩉᩱ᩠ᩅᩢᩈᩣᨯ᩠ᨦᩢ᩵ᨶᩦᩢᩓ᩠ᩅᩢ᪩ 41ᨴ᩠ᨶᩤ᩵ᨧᩮᩣᩢᩢᩅᩤ᩵ “ᨤ᩠ᨶᩫᩈ᩠ᩋᨦᨣᩳᩢᨻᩱᨿ᩠ᨾᩨᨦ᩠ᨶᩫᨴᩦ᩵ ᨹᩪᩢᩋ᩠ᨶᩢᨸ᩠ᨶᩢᨠᩪᩢᨦ᩠ᨶᩫᩓ᩠ᩅᩢ᪩ ᨣᩳᩢ ᪑ ᨿ᩠ᨾᩨᨦ᩠ᨶᩫ ᪅᪀᪀ ᨴᩮ᩠ᨦᨣᩤl ᨣᩳᩢ ᪑ ᨪᩣᩴᩢᨿ᩠ᨾᩨ ᪅᪀ ᨴᩮ᩠ᨦᨣᩤ ᨸᩮ᩠ᨶᩉ᩠ᨶᩦᩢᨸᩮ᩠ᨶᨡ᩠ᩋᨯᩅᩱᩢ᪩ 42ᨡᩮᩣᩢᩈ᩠ᩋᨦᨣᩳᩢᨶᩦᩢᨷᩢᨩᩣ᩠ᨦ᩵ᩈᩣ᩠ᨿᩢᨴᩯ᩠ᨶᨤ᩠ᨶᩨᨶ᩠ᨶᩢᩢ ᨾᩮᨲ᩠ᨲᩣᨧᩮᩣᩢᩢᨦ᩠ᨶᩫᨪᩣᩴᩢᩅᩤ᩵ ᨷᩢᨲ᩠ᩋᨦᩢᩈᩣ᩠ᨿᩢᨴᩯ᩠ᨶᨤ᩠ᨶᩨᨣᩢᨯᩱᩢᩀᩪ᩵ᩅᩤ᩵ᨯ᩠ᨦᩢ᩵ᨶ᩠ᨶᩢᩢ ᨧᩮᩣᩢᩢᩉ᩠ᨶᩦᩢᩈ᩠ᩋᨦᨣᩳᩢᨶᩦᩢ ᨹᩱᨧᩢᨿ᩠ᨶᩥᨯᩦᩉᩮᩖᩨᩋᨹᩱ” ᨳᩣ᩠ᨾᩅᩤ᩵ᨯ᩠ᨦᩢ᩵ᨶᩦᩢᨶ᩠ᨶᩢᩢ᪩ 43ᨪᩥᨾᩩ᩵ᩁᨣᩢᨲ᩠ᩋᨷᩅᩤ᩵ “ᨹᩪᩢᨴᩦ᩵ᩋ᩠ᨶᩢᨠᩪᩢᨿ᩠ᨾᩨᩉᩖᩣ᩠ᨿᨶ᩠ᨶᩢᩢ ᨧᩢᨿ᩠ᨶᩥᨯᩦᩉᩮᩖᩨᩋᨻᩮ᩠ᨶᩨ᩵ᨡᩣᩢᨯᩯ᩵” ᩉᩱ᩠ᩅᩢᩈᩣᨤ᩠ᨶᩨᨯ᩠ᨦᩢ᩵ᨶᩦᩢᩓ᪩
“ᨴ᩠ᨶᩤ᩵ᨧᩮᩣᩢᩢᨣᩢᩅᩤ᩵” ᨾᩯ᩠ᨶ᩵ᨴᩯᩢᩓ ᨸ᩠ᨦᩫᩋᩣᨩ᩠ᩅ᩠ᨿᩣᨯ᩠ᨦᩢ᩵ᨶᩦᩢᩓ᩠ᩅᩢ᪩ 44ᨤ᩠ᨶᩨᩉ᩠ᩅᩣ᩠ᨿ᩵ᨴ᩠ᩅ᩠ᨿᨹᩪᩢᨿ᩠ᨦᩥᨶ᩠ᨶᩢᩢᩈᩮ “ᨠᩣ᩠ᩅ᩵ᨴᩦ᩵ᨪᩥᨾᩩ᩵ᩁᩅᩤ᩵ ᩉ᩠ᨶᩢᨶᩣ᩠ᨦᨿ᩠ᨦᩥᨹᩪᩢᨶᩦᩢᩀᩪ᩵ᩌᩣᩢ᪩ ᨾᩮ᩠ᩋᩨ᩵ᨣᩪᨾᩣᨴᩦ᩵ᩁᩮ᩠ᨶᩨᨾ᩠ᨦᩨᨶ᩠ᨶᩢᩢ ᨻᩮ᩠ᩋᩨ᩵ᨧᩢᨪ᩠ᩅ᩠ᨿ᩵ᨡᩣᩢᨣᩪᨶ᩠ᨶᩢᩢ ᨾ᩠ᨦᩨᨷᩢᨸ᩠ᨶᩢᨶᩣᩴᩢᨣᩢᨯᩦ ᨾ᩠ᨶᩢᨶᩣ᩠ᨦᨶᩦᩢ ᩐᩣᩢᨶᩣᩴᩢᨲᩣᩉᩯ᩠ᨦ᩵ᨾ᩠ᨶᩢᩈᩮᨪ᩠ᩅ᩠ᨿ᩵ᨡᩣᨸ᩠ᨶᩢᨣᩪ ᨪᩣᩴᩢᩐᩣᩢᩈᩮ᩠ᨶᩢᨹ᩠ᨾᩫᩉ᩠ᩅᩫᨾ᩠ᨶᩢᨩᩮ᩠ᨯ ᨲ᩠ᨶᩥᨸ᩠ᨶᩢᩉᩨᩢᩉᩯ᩠ᨦᩢᨳᩯ᩠ᨦᩢᨠ᩠ᩋᩁ᩵ᩓ᪩ 45ᨣᩪᨡᩮᩣᩢᩢᨾᩣᩀᩪ᩵ᨶ᩠ᨶᩢᩢ ᨾ᩠ᨦᩨᨣᩢᨷᩢᨾᩣᨯ᩠ᨾᩫᩓᩢ ᩁ᩠ᨷᩢᨲ᩠ᩋᩁᩢᨣᩪ ᨾ᩠ᨶᩢᨶᩣ᩠ᨦᨶᩦᩢᨯᩱᩢᨾᩣᨯ᩠ᨾᨡᩣ” ᨣᩪᩀᩪ᩵ᨷᩢᨯᩣ᪩ 46“ᨾ᩠ᨦᩨᨶᩦᩢᨷᩢᩐᩣᩢᨶᩣᩴᩢᨾ᩠ᨶᩢᩉ᩠ᨾᩣ᩠ᨠᨠ᩠ᩋᨠᩃ᩠ᨷᩪᨸ᩠ᨶᩢᩉ᩠ᩅᩫᨣᩪᩈᩮᨴᩤᩢᨾ᩠ᨶᩢᨶᩣ᩠ᨦᨶᩦᩢᨯᩱᩢᩐᩣᩢ ᨶᩣᩴᩢᨾ᩠ᨶᩢᩉ᩠ᩋᨾᩋ᩠ᨶᩢᨾᩦᨣᩤ᩵ᨡ᩠ᨶᩢᨾᩣᩃ᩠ᨷᩪᨡᩣᨸ᩠ᨶᩢ ᨣᩪᩀᩪ᩵ᩋ᩠ᨶᩢᩢᩓ᪩ 47ᨼᩰ᩠ᩋᩡᩈ᩠ᨶᩢᨶ᩠ᨶᩢᩢ ᨣᩪᨤᩱ᩵ᨷ᩠ᩋᨠᨠᩣ᩠ᩅ᩵ᩉᩯ᩠ᨶᨾ᩠ᨦᩨᩅᩤ᩵ ᨾ᩠ᨶᩢᨶᩣ᩠ᨦᨶᩦᩢᨯᩱᩢᨴᩰ᩠ᩇᩁ᩠ᨷᩢᨣ᩠ᩅᩣ᩠ᨾᩋᨶᩩᨬᩣ᩠ᨲᩋ᩠ᨶᩢᩉᩱ᩠ᨿ᩵ᩉᩖᩅ᩠ᨦᨶ᩠ᨶᩢᩢ ᨼᩰ᩠ᩋᩡᩅᩤ᩵ ᨾᩦᨣ᩠ᩅᩣ᩠ᨾᩁ᩠ᨠᩢᨻᩯ᩠ᨦᨾᩮᨲ᩠ᨲᩣᨵᨾ᩠ᨾ᩼ᩋ᩠ᨶᩢᩉᩱ᩠ᨿ᩵ ᩉᩖᩅ᩠ᨦᨶ᩠ᨶᩢᩢᨴᩯᩢᨯᩯ᩵᪩ ᨹᩪᩢᩋ᩠ᨶᩢᨯᩱᩢᩁ᩠ᨷᩢᨣ᩠ᩅᩣ᩠ᨾᩋᨶᩩᨬᩣ᩠ᨲᨶᩭᩢᨠᩮ᩵ᩋᩮ᩵ᨷ᩠ᨦᩤᨶ᩠ᨶᩢᩢ ᨼᩰ᩠ᩋᩡᩅᩤ᩵ᨣ᩠ᩅᩣ᩠ᨾᩁ᩠ᨠᩢᨻᩯ᩠ᨦᨾᩮᨲ᩠ᨲᩣᨾᩦᩋ᩠ᨯᩥ ᪑ ᨶ᩠ᨶᩢᩢᨣᩭᨯᩯ᩵” ᨸ᩠ᨦᩫᩋᩣᨩ᩠ᨬᩣᩅᩤ᩵ᨯ᩠ᨦᩢ᩵ᨶᩦᩢᩓ᪩ 48ᩅᩣ᩠ᨿᨶ᩠ᨶᩢᩢ ᨴ᩠ᨶᩤ᩵ᨧᩮᩣᩢᩢᨣᩢᩅᩤ᩵ᩉᩨᩢᨶᩣ᩠ᨦᨿ᩠ᨦᩥᨶ᩠ᨶᩢᩢ “ᨯ᩠ᨦᩢ᩵ᨴᩰ᩠ᩇᨴᩩᨧᩁ᩠ᨲᩥᩉᩯ᩠ᨦ᩵ᨴ᩠ᨶᩤ᩵ᨶ᩠ᨶᩢᩢ ᨣᩪᩋᨶᩩᨬᩣ᩠ᨲᨸ᩠ᨶᩢ ᨴ᩠ᨦᩢᩈ᩠ᨿᨦᩢᩓ᩠ᩅᩢᨯᩯ᩵” ᨸ᩠ᨦᩫᩋᩣᨩ᩠ᨬᩣᩅᩤ᩵ᩋ᩠ᨶᩢᩢᩓ᪩ 49ᨿᩣ᩠ᨾᨶ᩠ᨶᩢᩢ ᨤ᩠ᨶᩫᨩᩮ᩠ᩋᩨᨹ᩠ᩋ᩵ᨦᩋ᩠ᨶᩢᨶ᩠ᨦᩢ᩵ᨩ᩠ᩋᨾᨴ᩠ᨶᩤ᩵ᨧᩮᩣᩢᩢᨩᩮ᩠ᩋᩨᨶ᩠ᨶᩢᩢᨣᩢᩅᩤ᩵ “ᩋᨶᩩᨬᩣ᩠ᨲᩉᩨᩢᨴᩰ᩠ᩇᨴᩩᨧᩁ᩠ᨲᩥᨯ᩠ᨦᩢ᩵ᨶᩦᩢᨯᩱᩢᨶ᩠ᨶᩢᩢ ᨤ᩠ᨶᩫᨣᩳᩢᨶᩦᩢᨸᩮ᩠ᨶᨹᩱᨩᩣ” ᨡᩮᩣᩢᨪ᩠ᨷᩫᨪᩮ᩠ᨷ ᨠ᩠ᨶᩢᩅᩤ᩵ᨯ᩠ᨦᩢ᩵ᨶᩦᩢᨣᩢᨾᩦᩓ᪩ 50ᨣᩭᨲᩯ᩵ᩅᩤ᩵ ᨴ᩠ᨶᩤ᩵ᨧᩮᩣᩢᩢᨿᩮᨪᩩ ᨣᩢᨯᩱᩢᨷ᩠ᩋᨠᨠᩣ᩠ᩅ᩵ᨴᩦ᩵ᨶᩣ᩠ᨦᨿ᩠ᨦᩥᩅᩤ᩵ “ᨲᩣ᩠ᨾᨯ᩠ᨦᩢ᩵ᨣ᩠ᩅᩣ᩠ᨾᨿᩩ᩵ᨾᨿᩣᩴᨴ᩠ᨶᩤ᩵ᩈᩮᩓ᩠ᩅᩢ ᨣᩢᨯᩱᩢᨹᩣ᩠ᨿᨷᩕᩰ᩠ᨯᨴ᩠ᨶᩤ᩵ᨯ᩠ᨦᩢ᩵ᨶᩦᩢᩓ᩠ᩅᩢᨯᩯ᩵ ᩅ᩠ᨦᩤᨧᩱᩈᩮᩓ᩠ᩅᩢᨻᩱᨴᩰ᩠ᩋᩡ ᩈ᩠ᨦᨯᩢᨠ᩠ᨯᩢᨿᩮ᩠ᨶ” ᨸ᩠ᨦᩫᩋᩣᨩ᩠ᨬᩣᨸ᩠ᨶᩢᨯ᩠ᨦᩢ᩵ᨶᩦᩢᨯᩯ᩵᪩
Currently Selected:
Luke 7: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Khun Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
