Luke 23
23
1နွို့ခေါင်း အဖွဲဘာ့စီရင်တရား မေ့မေ့နွို့နောင်း အောက်အိုတွို့ဘို့ထာ ကိုယ်တော်ယေရှုနွို့ တာ့မန်းပိလတ်နွို့ ဟက်ကု့ကြဘို့နွို့နဲ့။ 2ခွို့နွို့နား “လို့နီးနောင်း တိုင်သူပြညိသားဘို့ဘက်နောင်း ဘအ့်ထုန်လွဲတွို့ထာ ရောမဧကရာဇ်နွို့ အခွန်ဘို့ဘက်နွို့ ဆက်သကောနွို့အောင် ဘာ့တားပွို့နွို့ဖုန် သိုလ်အမ်သိုလ်အမ် ကယ်တင်ရှင် မေရှိယနွို့ ကလုဲင်လို့မျိုးဂျူးဖရင်အာ့်ပါးနွို့ ဘာ့ဖြိုကြဘို့နွို့ဖုန် ထွိဟောက်ကိုး” နွို့ငွမ်းဖရင်ပိလတ်နွို့ စယွဇ်ဖြိုကြဘို့နွို့နဲ့။ 3စနွို့နား မန်းပိလတ်နောင်း ကိုယ်တော်ယေရှုနွို့ “မို့နောင်း ဖရင်လို့မျိုးဂျူးနွို့ပဒေနား မှန်မနဟား” နွို့မားမနနဲ့။ ကိုယ်တော်ယေရှုနောင်းလဲဉ်း “နာ့မို့ဖြိုနွို့ အတွိုန်း ကိုး” နွို့ဖြေပလောက်အခွပ်နွို့နဲ့။ 4နွို့ခေါင်း မန်းပိလတ်နား ပုရောဟိတ်အကုန်းအပေ့ဘို့ဘက်န လို့ဖုန်ကုန်းဘို့ဘက်နွို့နား “တာလို့နီးနွို့ အပြစ်အာ့်မာ့မာ့နွို့စယ်မှ အိုထွိကော” နွို့ဖြိုမနနဲ့။ 5စနွို့လဲ ခွို့နွို့နား “ကိုယ်တော်ယေရှုနား ဆက်တွို့ထာ ယွဇ်မဲ့ကြဘို့နွို့နဲ့။ ခွို့နွို့နား လို့နီးနောင်း စတွို့ဖြိုင်ဂါလိလဲနွို့ထာ တာ့လွက်အနှံနွို့ အစိုးရရောမနား မောင်းပုန်ကန်ကြဘို့နွို့ လို့နွို့နား အမ်ဘာ့ကရီဘို့ဘက်နွို့န ဗွို့ယို့မနကိုး” နွို့ အာကြမဲ့ဖိအားနွို့နဲ့။ 6ပနောင်နွို့နု့ ပိလတ်ဆောင့်အွမ်နောင်း “လို့နီးနောင်း ကလုဲင်လို့ဖြိုင်ဂါလိလဲဟား” နွို့မားမနနဲ့။ 7နွို့ခေါင်း ပိလက်နွို့ ကိုယ်တော်ယေရှုနောင်း ကလုဲင်ဟေရုဒ် အန္တိပ ဘာ့အုပ်ချုပ်မဲ့နွို့နု့ခေါင်း ဆောင်ငန်နွို့နား ကိုယ်တော်ယေရှုနွို့ မြိုဂျေရုဆလင်နွို့ ဘာလောက်ပိုမဲ့ လို့အုပ်ချုပ် တာဟေရုဒ်နွို့ ဖုအာကုဟောက်နွို့နဲ့။ 8အုပ်ချုပ်လို့ ဟေရုဒ်နောင်း ကိုယ်တော်ယေရှုနွို့ မင်ရင်ဟောက်နွို့လဲဉ်း နွက်တူးလေမနနွို့နဲ့။ ရွားနွို့ပဒေကား အမ်နောင်း ခံမ့်ကိုယ်တော်ယေရှုနွို့ဆောင်ပအွမ်နွို့ ကိုယ်တော်န ကျန်တွို့ထာ ဆောင်ခင်မင်ရင်းနီးဟောက်နွို့ခေါင်း အချန်ကနိုနှမ်းယော့တွို့ကိုးနဲ့။ အမ်နောင်း ကိုယ်တော်ဘာ့ယို့မဲ့ အံ့ဖွယ်အမှုအာ့်မာ့မာ့နွို့ ဆောင်မင်နွို့လဲဉ်း ဆုပ်မနနဲ့။ 9စနွို့နား မန်းယေရုဒ်နောင်း ကိုယ်တော်ယေရှုနွို့ မားမဲ့မေးခွန်းဘို့ဘက်နွို့နဲ့။ စနွို့လဲ ကိုယ်တော်ယေရှုနောင်း ဆောင်ကမွှာ့မားမှ ဖြေပလောက်နွို့နု့ လာဟိုကောနွို့နဲ့။ 10နွို့ခေါင်း ပုရောဟိတ်အကုန်းအပေ့ဘို့ဘက်န လို့ပုဲင်ဆာယာပါလိတ်ကျမ်းဘို့ဘက်နောင်း မုဲင်တွို့ တဇာ့ကိုယ်တော်ယေရှုနွို့ထာ ယွဇ်မဲ့ဖြန်းဖြန်းထန်ထန်နွို့နဲ့။ 11ဟေရုဒ်န စစ်သားအမ်နောင်းလဲဉ်း ကိုယ်တော်နွို့ ယိုတွို့မရိုမသေထာ ကရမဲ့ကြဘို့နွို့နဲ့။ နွို့ခေါင်း ဟေရုဒ်နောင်း ကိုယ်တော်နွို့ အ့်ကလုဲင်ဖရင်နွို့ မောင်းစန်းဟန်ဆောင်ခိနွို့ ခရိုန်းဖရင်နွို့ အာပါ့တွို့ထာ တာ့မန်းပိလတ်နွို့ ဖုဘက်မနနွို့နဲ့။ 12အခွပ်နား မာန်းပိလတ်န ဟေရုဒ်နွို့ အဲဉ်ကွက်နောင်း ရန်သူဘို့ဘက် ကလုဲင်မနနွို့လဲဉ်း ရှိနွို့နု့ အပေါင်းအသင်းဘို့ပေ့ ဘို့ဘက်နွို့ ကလုဲင်ကု့ကြဘို့နွို့နဲ့။ 13စစ်သားဟေရုဒ်ဘိုဘက်နောင်း ကိုယ်တော်ယေရှုနွို့ တာပိလက်နွို့ ဟက်ကု့ယော့နွို့နောင်း ဘာ့အုပ်ချုပ်လို့ပိလတ်နောင်း ပုရောဟိတ်အကုန်းအပေ့ဘို့ဘက်၊ လို့မျိုးဂျူးအကုန်းအပေ့ဘို့ဘက်န လို့ဘာ့လွန်မဲ့ဘို့ဘက်နွို့ အာစုတွို့ထာ 14“ပွို့နွို့နောင်း လို့နီးနောင်း လို့ဘို့ဘက်နွို့ အထုန်အရင်လွဲမှားနွို့အောင် ဘာ့ယို့ဗွို့နွို့ပဒေနား တအို့နီး ပွိုဟက်ပွိုတွို့ထာ ယွဇ်မနနွို့နဲ့။ စနွို့လဲ အို့နောင်း ငွမ်းပွို့နွို့စယ် အမ်နား စစ်ဆေးဗွို့နွို့လဲဉ်း တအမ်နွို့ ပွို့ဘာ့ယွဇ်မဲ့ အပြစ်အာ့်မာ့မာ့စယ်မှ အို့လာထွိကော။ 15ဟေရုဒ်နောင်းလဲဉ်း တအမ်နွို့နု့ ထွိကောအပြစ်နွို့နား အာပြစ်ဒဏ်နွို့ဟိုကောနွို့နား တာအို့နီး ဖုဘက်လောက်ဝဲ့။ အမ်နောင်း ဘာ့ထိုက်ခံဒေဒဏ်နွို့ အပြစ်အာ့်မာ့မာ့စယ်မှ လာ့ယို့ကောနွို့နဲ့။ 16စနွို့နား အမ်နား အာတွို့ကြိမ်ဒဏ်ထာ ပနတ်အာပလောက်” နွို့ဖြိုမနနဲ့။ 17ပိလက်နောင်း ဘာ့ဖြိုအကြောင်းအရာဇာ့နွို့နား ရှိပွီးပသခါနွို့ တာလို့နောင်း လို့မျိုးဂျူးလို့ထောင် အာ့်ကွက်နောင်း ဘာ့လွတ်ငြိမ်းချမ်းထာခွင် ဘာ့အာမဲ့အမြဲ ထုံးစံနားကိုးနွို့နဲ့။ 18စနွို့လဲ လို့ဇာ့နွို့မေ့မေ့နား “အမ်နွို့ အာတွို့ ဒဏ်အဗီးနေ။ တာအေ့နွို့ ဗာရဗ္ဗနွို့စယ် ပလွတ်အာစေး” နွို့အပြိုင်တွိုန်း ကလေစ်ကြဘို့နွို့နဲ့။ 19ဗာရဗ္ဗနောင်း ကောင်မြိုနွို့ ဘာ့ကလုဲင်ဗွို့မဲ့ အစိုးရရောမနွို့ တော်လှန်ပုန်ကန်နွို့န ဘာ့ကွက်တန်အမှုနွို့န တာဘာ့ဗီလို့နွို့န ကောင်ထောင်နွို့ လို့မင်ထို့စ်ခံနွို့ကိုးနဲ့။ 20မန်းပိလတ်နောင်း ကိုယ်တော်ယေရှုနွို့ ဆောင်ပလွတ်အာနွို့နား လို့စုလို့ဝေးနွို့ ဖြိုပလောက်မနနွို့နဲ့။ 21စနွို့လဲ ခွို့နွို့နား “အမ်နွို့ ကွေလက်ဝါးကပ်တိုင်နွို့ဒံတွို့ထာ ဗီဝဲ့နွို့ ၊ အမ်နွို့ ကွေလက်ကပ်တိုင်နွို့ဒံတွို့ထာ ဗီဝဲ့နွို့” နု့ကလေစ်ဖြိုမနနဲ့။ 22မန်းပိလတ်နောင်းလဲဉ်း “လို့နီးနောင်း ပြစ်မှုကမွှာ့မား ကျဓူးလွန်ပွို့နွို့နောင်း။ အမ်နား ဘာ့အာတိုက်ဒဏ်အဗီးနွို့နား အာ့်မာ့မာ့မှ ကျူးလွန်ပွို့နွို့နား အို့ထွိကော။ အမ်နွို့ အာအပြစ်ဆုံးမတွို့ထာ ပလွှတ်အာဝဲ့” နွို့ အွီခေါက်မြောက် ဖြိုမနနဲ့။ 23စနွို့လဲ ခွို့နွို့နောင်း ကိုယ်တော်ယေရှုနွို့ ဒံတွို့ကွေလက်ဝါးကပ်တိုင်နွို့ထာ အာဗီနွို့စယ် ကရက်ဘို့ဘက်အ့်ထန်ထောတွိုန်းန ဆက်ညွှန်းဖြိုကြဘို့နွို့ခေါင်း ဘက်ထက်ဘေ့နွို့ ကရက်ခွို့ဘို့ဘက်နွို့နား အောင်မြင်တွို့ထာ နိုင်းကု့ဟောက်နွို့နဲ့။ 24နွို့ခေါင်း ဘက်ထက်ဘေ့နွို့ မန်းပိလတ်နောင်း နာခွို့နွို့ကလေစ်ဖြိုနွို့အတွိုန်း မောင်းသဘောတူနွို့ ဆုံးဖြတ်ယော့ 25တော်လှန်ပုန်ကန်မှုန ဘာ့ဗီလို့အမှုနွို့န ကောင်ထောင်နွို့ ဘာ့ကလို့ခံမဲ့ထောငင် ဗာရဗ္ဗနွို့လဲဉ်း အာတွို့ငြိမ်းချမ်းထာခွင်နွို့ထာ ကိုယ်တော်ယေရှုနွို့ကား ဆန္ဒခွို့နွို့အတွိုန်း မောင်းယို့နွို့ အပ်နှံဝဲ့နွို့နဲ့။ 26စနွို့နား စစ်သားနောင်း ကိုယ်တော်ယေရှုနွို့ တန်းဘာ့ဟက်ကု့နွို့ တောတဘိုနွို့မှ မြိုဂျေရုဆလင်နွို့ ဘာ့ပို့ပိုမဲ့ လို့မြိုကုရေနေ ခွို့နွို့နား ရှိမုန်နွို့ အကွတ်တွို့ လက်ဝါးကပ်တိုင် အထမထာ ဘက်ကိုယ်တော်ယေရှုနွို့ အာကု့လွမ်းကြမဲ့ဘို့နဲ့။ 27လို့ဘာ့ဘို့ဘက်နွို့နောင်းလဲဉ်း ဘက်ကိုယ်တော်ယေရှုနွို့ တန်လွမ်ကြဘို့နွို့နဲ့။ ကောင်ခွို့နွို့နား ကိုယ်တော်ယေရှုမောင်းဗီဟောက်နွို့ခေါင်း နွက်ပေ့ကြဘို့နား ပေါ်တွို့တောင်သူးထာ ကရက်အ့်ထန်ထောတွိုန်း ကလေ့ညှင်းမဲ့ ကမြနွို့နောင်းလဲဉ်း ဘက်ကိုယ်တော်နွို့ တန်လွမ်းကြဘို့နွို့နဲ့။ 28စနွို့နား ကိုယ်တော်ယေရှုနောင်း ဖက်ကမြဘို့ဘက်နွို့ လှည့်တွို့ထာ “မြိုဂျေရုဆလင်နွို့မှ ကမြဇာ့နွို့ တာအို့နွို့ လာ့ညှင်းကြနဘို့။ အပန်နွို့ ပွို့နွို့န တကွေကွန်မြကွန်ဖြောက်ပွို့နွို့နား ဘာ့ကလုဲင်ပွိုအဖြစ်အပျက်ဘို့ဘက်နွို့ စယ် ညှင်းကြဘို့နွို့နဲ့။ 29ရွားနွို့ပဒေကား ကမြဘာ့မွီးနိုင်းကောကွန်ဘို့ဘက်၊ ကမြ ခါစောင်ဖူးကောကွန်ဘို့ဘက်န လို့ပေ့ဘို့ဘက်နွို့ ဘာ့ဒု့ဖူးကောဗု့ ကမြဘိုဘက်နောင်း ကံကလို့ဟောက်” နွို့ လို့နောင်း ဘာ့ဖြိုအချန်နွို့နောင်း ကနိုကောမာ့လောက်ပွိုတွိုနွို့ကိုးနဲ့။ 30တလောက်အချန်ကာလနို့နွို့နု့“လို့နောင်း ဗွေနွို့ ‘တကွေအေ့နီးနွို့ ဖြိုဟ်ဖြိုစေး’ နွို့ဖုန် ဗွေဖွီးနွို့နား ‘အေ့နွို့နု့ ဒုတ်စွမ်းကြဘို့နေ’ နွို့ဖုန် ဖြိုလောက်ဟောက်ကြဘို့။ 31ဘာ့လားလောမဲ့ ဘာ့ကလုဲင်မဲ့ နာဆုပ်ထေ့နွို့ ဘာ့ဖြောင့်မက်မဲ့အို့နွို့ ခွို့နွို့နောင်း တာယို့ကြဘို့ဇာ့နီးပဒေကား နာ့ဘာ့ကလုဲင်ဘာ့ကြောင်ကြောမဲ့ဆုပ် ပွို့ဘာ့ခံထိုက်အပြစ်ဒဏ်နွို့နား ဘာ့ဆို့လွန်းလန်းနွို့နား အမှန်ကိုး” နွို့ဟောဖြိုအမနနဲ့။ 32ရစစ်သားဘို့ဘက်နောင်း တောင်မြအ့်ခြား အဲဉ်ကွက်နောင်းလဲဉ်း မောင်းအာသေဒဏ်နွို့ခေါင်း ကိုယ်တော်ယေရှုနအနုဲင်နုဲင် ဟက်ကု့ကူးဟောက်နွို့နဲ့။ 33မာတ်ဘာ့ဟို ကွေဗွေကဒွက်ကတောင်နွို့ ဆောင့်လောက်နား ခွို့နွို့နောင်း ကိုယ်တော်ယေရှုနွို့ ကွေလက်ကပ်တိုင်နွို့ တွိုတ်မဲ့မနာ့နကိုးနဲ့။ တောင်မြအ့ဉ်ကွက်နွို့လဲဉ်း ဖက်တိဒိကိုယ်တော်နွို့ဖုန် အခြားအာ့်ကွက်နွို့ ဖက်တိဒနွို့ဖုန် ကွေလက်ဝါးကပ်တိုင်နွို့ တွိုတ်မဲ့မနာ့နကိုးနဲ့။ 34ချန်နွို့ ကိုယ်တော်ယေရှုနား “အဖဖြား၊ အိုနွို့ ဇာ့နီးဘာ့တင်ကွေလက်ဝါးကပ်တိုင်နွို့ ဘာ့ဗီမဲ့ ခွို့နီးနွို့ အာကောယော့အပြစ်။ ခွိုနွို့နောင်း ယို့မဲ့ခမ်းရလွန်းအပြစ်ရီးမွှားအောင်ဟားနွို့ သိုလ်ခွို့သိုလ်ခွို့ လာ့ငန်းကြကောဘို့ ခွင့်လွှတ်အာစေး” နွို့ဆုတောင်းမနနဲ့။ နွို့ခေါင်း စစ်သားဘို့ဘက်နောင်း ခရိုန်းကိုယ်တော်ယေရှုနွို့ နှိပ်တွို့မဲထာ ခွီအွေကြဘို့နွို့နဲ့။ 35လို့နောင်းလဲဉ်း တာ့လွက်နွို့ အောက်အိုတွို့ထာ ဆုပ်ရေစ်ကြဘို့နွို့ကိုးနဲ့။ နွို့ခေါင်း လို့မျိုးဂျူးခေါင်းဆောင်ဘိုဘက်နောင်း ကိုယ်တော်ယေရှုနွို့ ကရယော့ဗွို့ “လို့နီးနောင်း လို့အခြားနွို့နား ကယ်တင်ဗွို့ဟောက်။ အမ်နောင်း ဖြား ဘာ့ရွီးတော်မူမဲ့ တာ့ကလုဲင်မေရှိယအမှန်နွို့နု့ သိုလ်အမ်သိုလ်အမ် လိုလ့်ကယ်တင်ဟောက်” နွို့ ဖြိုဗွို့ကြဘို့နွို့နဲ့။ 36ဗဟိုကွေကတောင် ကိုယ်တော်ယေရှုနွို့ ကရယော့ကြဘို့နောင်း တဇာ့ကိုယ်တော်နွို့ တာ့ဗောက်တွို့ထာ ဘာဖျောင်းထက်ဘေ့ဝိုင် နွို့ ဒုတွို့ထာ 37“မို့နောင်း ဘာ့ကလုဲင်ဖရင်လို့မျိုးဂျူးနွို့ပဒေနား တာမှန်ကန်နွို့နု့ သိုလ်မို့သိုလ်မို့ ကယ်တင်စေး” နွို့ ဖြိုမဲ့ကြဘို့နွို့နဲ့။ 38ဘာဟိုကွေကတောင်ကိုယ်တော်ယေရှုနွို့ တာစောက်လက်ဝါးကပ်တိုင်နွို့လဲဉ်း “လို့နီးနောင်း ကလုဲင်ဖရင်လို့မျိုးဂျူးကိုး” နွို့ ဘာ့တဲင်းပွို့မဲ့ ဆိုင်ဘုတ်နွို့ ဆွီဗွို့မနနဲ့။ 39နွို့ခေါင်း ကွေလက်ဝါးကပ်တိုင်နွို့ ဘာ့တွိုတ်ဗောက်ဗွို့မဲ့ တောင်မြအဲဉ်ကွက်နွို့မှ အာ့်ကွက်နောင်း ကိုယ်တော်နွို့ “မို့နောင်း မေရှိယ တာ့မှန်နွို့နု့ သိုလ်မို့သိုလ်မို့ ကယ်တင်စေး။ အေ့နီးနောင်းလဲဉ်း ကယ်တင်စေး” နွို့စော်ကားဖြိုမနနဲ့။ 40စနွို့လဲဉ်း အခြားတောင်မြအာ့်ကွက်နား လို့နွို့နွို့ “မို့နောင်း အပြစ်ဘာ့ဟိုမဲ့ ဇာ့နွို့နား ရွားဖြိုလေမနနား။ မို့နောင်း ဖြားနွို့ လိုလ်ရိုသေလိလ့်လေးစားဟောက်။ ရွားနွို့ပဒေကား မို့နောင်းလဲဉ်း နာလို့နီးအတွိုန်း ကွေလက်ဝါးကပ်တိုင်နွို့ မောင်းမင်ဗီးတွို့ကိုး။ 41အေ့အဲဉ်ကွက်နောင်း ဘာ့ကျူးလွန်အပြစ်စရိုက်ဘို့ဘက်န ဘာ့ထိုက်တန်မဲ့ ပြစ်ဒဏ်နွို့နား မင်ခံဟောက်နွို့ခေါင်း နည်းလမ်းဇာ့နီးန မင်ခံအာအပြစ်နောင်း မှန်မန။ စနွို့လဲ လို့နီးကား ဆောင်အပြစ်ထန်မှ ကျူးလွန်ဗွို့နွို့ဟိုကောမှ” နွို့ဆုံးမဖြိုမနနဲ့။ 42နွို့ခေါင်း အမ်နား ကိုယ်တော်ယေရှုနွို့ “ကိုယ်တော်၊ ကိုယ်တော်နောင်း ကလုဲင်ဖရင်နွို့ မောင်အုပ်ချုပ်နွို့ ဆောင်ကြွပိုနွို့နောင်း အိုနွို့ နောင်ထွိကြဘို့နေ” နွို့ ဖြိုမနနဲ့။ 43ချန်နွို့နု့ ကိုယ်တော်နား “မို့နား အိုတာဟောဖြိုအ့်မှန်နွို့နု့ မို့နောင်း လို့ရှိနီးနွို့ ပရဒိသုဘုံ နွို့ အို့နအနုဲင်နုဲင် ဟိုလောက်ဟောက်” နွို့ဟောဖြိုမနနဲ့။ 44အချန်နွို့ကား ကလုဲင်ချန်ရှိမှန်းတည့်နွို့ကိုးနဲ့။ စတွို့အချန်နွို့ထာ လောင်းဂို့အွီနာရီလောက်အောင် ဘာ့ဟိုကမ္ဘာကသေ့ကုန်းမင်ခွင်ခွင်နွို့ မှန်ဟ်မောမနကိုးနဲ့။ 45ရွားနွို့ပဒေကား အရောင်ရှိနောင်း ဗာ့ပွန်ကု့ဟောက်နွို့ခေါင်းကိုးနဲ့။ ချန်နွို့နု့ ဗဟိုဗိမာန်တော်နွို့ ရန်းနွို့နောင်း ကခှန့်ကူးအံခှန်ကိုးနဲ့။ 46နွို့ခေါင်း ကိုယ်တော်ယေရှုနောင်းလဲဉ်း “အို အဖဖြား ဝိညာဉ်အို့နွို့ ကောင်တိအဖဖြားနွို့ အပ်နှံလောက်ဟောက်” နွို့ ဆောင်ဖြိုယော့အထန်ထောတွိုန်းနောင်း စွန်တောဝ်းကု့အထက်နွို့နဲ့။ 47ဘာ့ကလုဲင်ဘာ့ထွီဘာ့ရင်မဲ့ ရောမတပ်မှုးနောင်း ကျေးဇူးဖြားနွို့ ချီးမွမ်းတွို့ထာ “လို့နီးနောင်း အလွဲအမှားနွို့ အမာ့စယ်မှ ဘာ့ယို့နွို့နောင်း ဟိုကောနွို့နား အမှန်ကိုး” နွို့ဖြိုမနနဲ့။ 48အဖြစ်အပျက်ဘို့ဘက်နွို့ မောင်းရေ့နွို့ ဘာ့စုဝေးကြဘို့မဲ့ လို့ဖုန်ကုန်းမေ့မေ့နောင်းလဲဉ်း အဖြစ်ပျက်ကိုယ်တော်နွို့ ဆောင့်ရင်နွို့နောင်း ပေါ်တွို့တောင်သူးခွို့ထာ လွက်ပေ့လလှူးလန်းဟောက်နွို့ ပလေတွို့ထာ ကောင်မြိုနွို့ ရန်ကု့ကြဘို့နွို့နဲ့။ ရန်းကု့ကြဘို့ ညာ့ခွို့နွို့ကိုးနဲ့။ 49စတွို့ အငမ်းဘို့ပေ့ကိုယ်တော်ယေရှုနွို့ထာ ဖြိုင်ဂါလိလဲနွို့မှ ဘက်ကိုယ်တော်နွို့ ဘာ့တန်းလွမ်းပိုမဲ့ ကမြမေ့မေ့နောင်းလဲဉ်း အဖြစ်အပျက်မေ့မေ့နွို့ မောင်းရေစ်နွို့ မငှာတငှာနွို့ မုဲင်မဲ့ကြဘို့နွို့နဲ့။ 50တလွက်နွို့နု့ ဖြိုင်ယုဒ၊ မြိုအရိမသဲနွို့မှ မာဘာ့ဟိုယောသပ်နောင်း လောက်ပိုနွို့နဲ့။ အမ်နောင်း ရိုးသား လို့ဖြောင့်မက်တွို့ထာ ကလုဲင်လို့အဖွဲစီရင်တရားအာ့်ကွက်ကိုးနဲ့။ 51အမ်နောင်း ကိုယ်တော်ယေရှုန ဘာ့ပတ်နွို့နား အဖွဲစီရင်တရားဘာ့ဆုံးဖြတ်နွို့န လုပ်ဆောင်ချက်နွို့နု့ လို့သဘောတူဗွို့ကောနွို့ခေါင်း ထာထနာတော်ဖြား ဘာ့ပေါ်လေးမဲ့အချန်နွို့နု့ ကလုဲင်လို့ဘာ့ဆုန့်နွို့ကိုးနဲ့။ 52အမ်နောင်း ဘာ့အုပ်ချုပ်လို့ တာပိလတ်မန်းနွို့ ကု့နွို့ထာ အလောင်းသိုလ်ကိုယ်တော်ယေရှုနောင်း အွေကု့တွို့ထာ မောင်းသင်္ဂြိုဟ်နွို့ ဖြိုမနနွို့ခါင်း ပိလက်နောင်းလဲဉ်း သဘောတူမနနဲ့။ 53နွို့ခေါင်း ယောသပ်နောင်း အကူအညီလို့အခြားဘို့ဘက်န သိုလ်ကိုယ်တော်နွို့နား ကွေလက်ဝါးကပ်တိုင်နွို့ချတွို့ထာ လှိုန်တွို့ထာ ပတ်တီးဇာ့ကလို့နွို့န အလောင်းနွို့ ပတ်တွို့ထာ ဘာ့တောင့်အုံန်လွန်းမဲ့ ဗွေတန်းမှုနွို့ ဘာ့ဖောက်ပွို့မဲ့ ကောင်းဂူနွို့ ထို့စ်ဗွို့မဲ့ကလို့လို့နွို့နဲ့။ ဂူနွို့နောင်း လွက်တောင်ခြိုင်းနနွို့ ဆောင့်ကွေမှ ခါထုံးဖူးကော ကလုဲင်မဲ့တောင်ခြိုင်းဂူအ့်ကမေ့ကိုးနဲ့။ 54ရှိကိုယ်တော်ဘာ့ဗီးနွို့နား ကလုဲင်ရှိသိုလ်ဖိနွို့ ရှိသောကြာနား ရှိဥပုသ်နောင်း မောင်းလောက်ပိုတွို့နွို့ခေါင်း ထုံးစံလို့မျိုးဂျူးနွို့လဲဉ်း ယိုဗင်ကောအ့်ယို့နွို့ တားဗွို့ကြဘို့ကိုးနဲ့။ 55ကိုယ်တော်နအနုဲင်နုဲင် ကောင်မြိုနွို့ဘာ့တန်လွမ်းကြမဲ့ ဖြိုင်ဂါလိလဲနွို့မှ ကမြအာ့်ကွက်နောင်း ယောသပ်နအနုဲင်နုဲင် ကု့လွမ်းကြဘို့နွို့နဲ့။ ခွို့နွို့နောင်း တောင်ခြိုင်းနွို့ ရင်ယော့ကြဘို့ အလောင်းသိုလ်ကိုယ်တော်နွို့ ကောင်တောင်းခြိုင်းနွို့ ဗွို့ဇာ့မွှားနွို့န သု့ပေါက်တောင်းခြိုင်းနွို့လဲဉ်း လို့နောင်း တာလှိမ့်တွို့သန်းမှု့ကုန်းထာ ဘတ်မဲ့ကြဘို့နွို့ ရင်မာန့်ကြဘို့နွို့နဲ့။ 56နွို့ခေါင်း ကမြနွို့ဘို့ဘက်နောင်း တာညာခွို့ဘာ့ဟို ကောင်မြိုနွို့ ရန်းကု့ကြဘို့နွို့နဲ့။ ဆောင့်လောက်လောင်းဂို့နွို့နု့ ခွို့နွို့နောင်း အလောင်းကိုယ်တော်ယေရှုနွို့ မောင်လက်အာနွို့ တကံမှု့ဟိန်းမဲ့ဘို့ဘက်နွို့ ဆောင့်ဖြောင်ယော့ကြဘို့နောင်း ဖြားဘာ့ဟောဖြိုနွို့နား ယို့လွမ်းတွို့ထာ ရှိဥပုသ်နွို့နားကြဘို့နွို့နဲ့။
Currently Selected:
Luke 23: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
