Luke 24
24
1Ubuk paiqyaq a'moeiq kiloeq a'mcaqnup kho a'comcai tuna yaq hna'taw haqloeq yaqhniq loeq án sai khoeq a'awt haq khaek uk loeqteq mco wa án ciq. 2Lunggu mco án pit nauk khoeq lung a'kau khoeq noeng án khom taek. 3Mco duka án won loeq Boiyesuq yok khom caq uk. 4Yaqhniq loeq nei kha a'phlaet khoeqhaq án tawiq kung. Yaq tuna a'mcimplau khoeq wotbok an hyoeqi khoeq khlaung poemhneiq ma'lawiq ta'lawiq pau hniq loeqteq yaqniq phaela an ya. 5Yaqkhowa yaq hna'taw haqkhaw pa'haiyi poeiq uk loeqteq án lu án khumi poeiq. Yaq tuna yaqhniq loeqkhaw a'du saw haq án tauk duna a'sauk a'haeng saw piya nán sui yoe? 6Boiyesuq khoeq neiya moeiqcaq a'thoq ba hni. Galilae pleiya nán om kho wa nanghniqa kha a'mhau haq hoetoe? nakkhoeq sa'diq laqoek. 7Khlaungcaw khoeq a'plaet caw haq kuta a'awp laqi loeqteq kutphaw toenga a'tuk a'laqi yai. Hnupthum dunoeng a'thoq ba lai taeng Boiyesuq loeq a'mhau haq seiyaq moe? taeng án hau. 8Yaqateq yaq hna'taw haq loeqkhaw Boiyesuq plau sa'diq án laq ba. 9Yaqkiyoeng mco wa khoeq lo ba uk loeqteq ta'paiq ha'laiwak loeq a'kyan khoeq klaung haqla án msoqi. 10Yaq klong haqkhoeq ta'paiq haqla án cauq paek saw hna'taw haqteq Magadalaq Mariq, Yawhanaq, Yakouq nu Mariq ta'koeiq mcaq loeqteq a'coe hna'taw haq án phlaet. 11Seiloeqkhaw yaqhniq plau haqkhoeq plauseiyaq khoeq án hau taeng ta'paiq haqloeq myumi yaq uk. 12Seiloeqkhaw Petaruq khoeq tho loeqteq mcoqwa cawn loeqteq a'ciq. A'phaw loeq kun loeqteq a'sota teq wawtcaq noeng a'khom taek. Yaqkiyoeng yaq a'phlaet khoeqhaq mauqnauk loeqteq yaq ima a'ciq ba toeq. 13Yaqhnupoeng pak yaqhniq tau wa khoeq poemhneiq khoeq Yeruqsalein mloeq oeng maengseiq baung a'hlaw khoeq Emauk nama an ciq. 14Yaqhniq loeq a'phlaet khoeq klong haq awlum poemak loeq pomak an soiyi nauk ba. 15Yaqkha an soiyi nauk tuna Boiyesuq khaw yaqhniq phaela cit loeqteq yaqhniq hui tu a'ciq pawq. 16Seiloeqkhaw yaqhniq mik a'hmuk an laqi klongoeng Boiyesuqa hmotaq hniq. 17Boiysuq loeqkhaw nanghniq nan ciq tuna pi khoeq nan soiyi naukoe? taeng a'hiq hoeiqla teq yaqhniq khaw an hmawi pawi yaq phlaet hniq loeqteq an mdum. 18Yaqhniqa Ka'lawphaq taeng a'ming a'moeiq khoeq poemak loeq Yeruqsalein mloeqa án lo khoeq koei haq tau wa nei hnup haqla a'phlaet khoeq hmotaq saw teq nang poemak noeng seipai tiq taeng a'hau. 19Yaqateq Boiyesuq loeq pi khoeqhaq a'phlaetoe? taeng a'hiq. Yaq khlaung loeqkhaw Nazaraeq mloeqa khoeq Boiyesuq klong a'phlaet. Yaq khlaung khoeq Boipaw hmaungkaum khlaung haq hmaukauma mauk nauk pha haq sai loeqteq a'plau a'lei a'moeiq khoeq Pa'rawphaeq poemak a'phlaet. 20Seiloeqkhaw Yahaenpaw lang haq Yudaq khlaung cang haqloeq yaqa kutphaw toenga án tuk. 21Yaq khlaung loeq Iqtayelaq khlaungmyoe haqla a'klawn haqlai khoeq khlaung nakkhoeq ka'hniq loeq kán congi toeng. Nei haq a'phlaet khoeq teq towa hnupthum a'moeiq hni. 22Tongeiya keihniq tau wa khoeq boengaq hna'taw haq mco wa án ciq kho wa, 23a'yok khom caq uk loeqteq án lo ba. Boiyesuq a'sauk a'haeng ba hni taeng a'hau khoeq mehon saw khaw yupayoengoeng kán hmuq laq taeng án hau kho wa keihniq loeqkhaw kán mauqnauk. 24Keihniq oeng án om khoeq boengak haqkhaw mco wa án ciq kho wa hna'taw haqloeq án hau khakhut án hmuq laq. Seiloeqkhaw Boiyesuqa khom caq uk taeng a'hau. 25Yaqateq Boiyesuq loeq oe maek tuk loeqteq Pa'rawphaeq haqloeq án hau khoeq plau ta'kum nán myumi mlung a'thaeng khoeq khlaung haqloe, 26Boikhreitaw khoeq nei hnga'lai haq kaumi loeqteq yaq phumthungoeng a'om laqai seiyaq moe? taeng a'hau haq. 27Yaqkiyoeng Boiyesuq loeq Mawse klam ta'koeiq mcaq loeqteq Pa'rawphaeq haq peinyat duka yaq klong án yok khoeq klamcaw haq yawcaw oeng a'cauq paek hoeiq. 28Yaqhniq an ciq khoeq Emauq nam caeng an phaw loeq Boiyesuq teq hmaungkauma a'la maw loeqteq a'ciqai a'tawni. 29Seiloeqkhaw yaqhniq loeq kho a'mu hnowaiq klongoeng keihniq hui tu lo pawqe taeng an khawqi. Yaqklongoeng Boiyesuq khaw yaqhniq hui tu a'ciq pawq. 30Yaqkiyoeng yaqhniq hui tu eipawiya a'ngung kiyoeng muq loeqteq Boipaw a a'hmlokthaq. Yaqkiyoeng muq phaet loeqteq yaqhniqa a'paek haq. 31Yaqateq yaqhniq khaw án mik pwang loeqteq Boiyesuq nakkhoeq án hmot ba. Yaq tuna Boiyesuq khaq yaqhniq mik hmuqa khoeq a'klok toeq. 32Yaqhniq khaw lauma ma'hniqa a'msoiyi pui nauk hoeiq loeqteq klamcaw plau haq yaw cu ong a'cauk paek hoeiq kho wa ma'hniq mlung duk a'o khut a'phlaet seiyaq moe? taeng an soiyi nauk ba. 33Yaqhniq khaw saksang tho hniq loeqteq Yeruqsalein mloeqa an ciq ba. Yaqkhowa ta'paiq ha'laiwak loeq yaqhniq klaung haqkhaw mcuqi uk loeqteq án om khoeq an khom. 34aqkha mcuqi uk loeq án om saw haq loeqkhaw Boi khoeq a'sikcang a'thoq ba hni. Siqmou wa a'mphlaqi thaeng án hau. 35Yaqhniq loeqkhaw lauma an khom laq khoeq klong loeq muq a'phaiq tuna noeng Boiyesuq a'phlaet nakkhoeq kan hmot taeng an cauk paek haq. 36Yaqkha án soiyi nauk tuna Boiyesuq khoeq yaqhniq laikla a pau loeqteq oeqcaq boei tuk taeng a'hmyauki haq. 37Yaqkhowa ta'paiq haqkhoeq sa'si án hmuq taeng mkhin uk loeqteq án pahaiyi poeiq. 38Yaqateq Boiyaesuq loeq piya nán pahaiyi yoe? piya myumi khoqaq tukoe? 39Kei kut kei kho haq so woek. Kei noeng. Keiya a'mkhaekoek. Sa'siya a'yoq haq a'saw haq moeiq yaq. Sei loeqkhaw keiya a'moeiq khoeq nanghniq loeq nán hmuq laqhni taeng a'hau haq. 40Yaqkha hau haqloeq teq a'kut kho haqkhoeq ta'paiq haqla a'mphlaqi haq. 41Yaqhniq loeqkhaw oeqcaq mlungoeng án mauqnauk uk loeqteq myumi khoeqaq uk tuna Boiyesuq loeq nanghniq hma má ei yai khoeq a'moeiq moe? a'hiq haq. 42Yaqhniq loeqkhaw ngawca msumak án paek. 43Boiyesuq loeqkhaw louqi loeqteq yaqhniq hmaungkauma a'ei paek haq. 44Yaqkiyoeng Boiyesuq loeq Mawse peinyat klam, Pa'rawphaeq klam loeq Salama kei klong án yok khoeq awlum a'phlaetai nakkhoeq nanghniq oeng má omhomkho ta'koeiq keiloeq ka'hau kihni taeng a'hau haq. 45Yaqkiyoeng klamcaw án ya uk cukai tawiq ya yaqhniq loeq hmot oeng a'phwang paek haq. 46Boiyesuq loeq klamcawa nei kha yok loeqteq a'moeiq. Boikhreitaw khoeq a'du kaumi loeqteq hnupthum dunoeng a'du wa khoeq a'thoq ba lai. 47Yaq khreitaw mingoeng a'plaeta khoeq án hloeq a'laqi yai khoeq klong loeq sa'diq án laqai khoeq ta'la klong haqkhoeq Yeruqsalein mloeq ta'koeiq mcaq loeqteq klaung myoe ta'kuma án hau laqai. 48Nanghniq khaw nei klong haq tawiq ya sauksi nán phlaet. 49Keiloeq kei Boipaw ka'diq khoeq nanghniq hma ka'hloeqai. Seiloeqkhaw nanghniq khoeq mehon a'tatoeng a'mlei nauk haqkhoeq khing phaw ong Yeruqsaleina noeng om boei tuk taeng a'hau haq. 50Yaqkiyoeng Boiyesuq loeq ta'paiq haqla Betaniq nam phaw ong a'ciqi pui nauk haq kiyoeng a'kuta yi loeqteq pa'si a'paek haq. 51Yaqkha pa'si a'paek haq kiyoeng yaqhniq oeng khawi yi loeqteq mehona a'kawi toeq. 52Ta'paiq haqkhaw Boiyesuqa án mkhoeqbyoeqi kiyoeng oeqcaq mlungoeng Yeruqsalein mloeqa án ciq toeq. 53Yaqhniq khoeq Yeruqsalein mloeq án phaw kiyoeng Boipawa wotpyuq dun kyonga Boipaw phumthaung khoeq daedae anhmlokthaq toeq.
Currently Selected:
Luke 24: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Cumtu (Sumtu) Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
