Luke 13
13
1အင်(မ်)ချိန်ငေါလ် တချို့ခေါင်လှီ့နား ကိုယ်တော်ယေရှုစငေါလ် လူးထေ့နား ဂျေရုဆလင်လုအောလ်ကိ စစ်သက်လှီ့နား ဓုတ်ခံလောဒ့်တိ ဂါလိလဲဘီရိုကိ ခေါင်တချို့လှီ့အကြောင်း အာမ်လျှောက်တင်။ "အင်(မ်)လှီ့နား ဗိန်မာန်တော်ဝေါလ် ပူဇော်ပသခေါမ်လှီ့ အာမ်စိုင်းဟိုဝေါလ် ဘုရင်ခံပိလက်နား စစ်ဆော်လှီ့အောလ် အမိန့်ပက်ထေ့နား အင်(မ်)လှီ့ အဓုတ်ဆောက်" တိရို အာမ်လျှောက်။ 2အင်(မ်)ဟိုဝေါလ် ကိုယ်တော်ယေရှုနား "အင်(မ်)ခေါင်လှီ့ ဂါလိလဲအောလ် မယ်တိ အစွာခေါင်လှီ့ ထက်ကာလ် ပိုဝေါလ်ထေ့နား အပြစ်လန်ခန်းနောလ် နီဘော်ထောလ်လောဒ့် တိရို နာမ်ခိလ်နာ။ 3အင်(မ်)ဘော်ဆီးယော်။ နာ(င်)မီးရိုး ကေးနား ဟောင်ဟိုင်ကေလီခေါမ်စေ့ နာ(င်)မီးကိမ်ကိမ်လှီ့ အပြစ်တောလ်ကိ နောင်တသံဝေဂ နာ(င်)လောဒ်ဘွာလ်ယဟိုဝေါလ်စေ့ အင်(မ်)ဘော်ဝေါလ် နာ(င်)ပျက်စီးလောဒ့်အိုက်။ 4ရှိလောင်မျော်စင် အပြိုကျဟိုဝေါလ် ခေါင်ကုလာဆာတ့် ကပ်နောက် ခါမ်လောဒ့်ခန်းနောလ် အာမ်ဘာလ်ဟိလ့်လောဒ့်။ အင်(မ်)ခေါင်လှီ့ အစွာဂျေရုရှလင် လုဆော်လှီ့ ထက်ကာလ် ပိုထေ့နား အပြစ်ကျူးလွန်တိလှီ့ တိရို နာ(င်)မီးနား နာမ်ခိလ်နာ။ 5အင်(မ်)ဘော်လုံးဝ ဆီးယော်။ အင်(မ်)ဘော်နားခါ နာ(င်)မီးရိုး ကေဟောင်ဝိုက်။ နာ(င်)မီး နောင်တနာမ်လောဒ့်ဘွာလ်ယဟိုဝေါလ်စေ့ အင်(မ်)လှီ့ဘော် နာမ်ဘလ်လောဒ့်အိုက်"တိရို အမိန့်။ 6အင်(မ်)ပါလ်နောလ် ကိုယ်တော်နား အတပည့်လှီ့အောလ် နီပုံပမာ(ခွီး) အဟောင်။ "ခေါင်ပွလ်ဟှတ် စပျစ်ခြံငေါလ် ဆပိထိင်ထိင်ဟှတ် အမယ်။ နိပ်ဟှတ်တောလ်စေ့ အင်(မ်)ခေါင်နား ဆပိဌေ့ဆိတ်ဟိုင်ရိုး အဈာတ်။ အင်(မ်)ဘော်နားခါ အီဌေ့ခါ မုယော်။ 7အင်(မ်)ဘော်ခန်းနောလ် အင်(မ်)နား ဥယျဉ်မှူးအောလ် "နီးထိင်ငေါလ် ဆပိဌေ့ မုလောဒ့်အိုက်တိရို ခိလ်ကော ကေစောင်ခေါမ် ဂုမ်ထုမ်မယ်ပါလ်၊ အီဌေ့ခါ မုဟိလ့်ဟီ။ နီအထိင်ခေါမ် ခုတ်ကာ။ ဟိဘော်ဟိုင်ရိုး နီထိင့်တွက်ကာလ် ဆုမ်သပ့်အကျိုးမဲ့နေရာယူဆောက်ကိုက်" တိရို အဟောင်။ 8အင်(မ်)ဘော်နားခါ ဥယျာဉ်မှူးနားခါ "နီအထိင် ဂုမ်ဟှတ်ဘောင် တောမိုဝြား။ ကေးနား နီအထိင့်ကီးကာဝေါလ်ကိ သပ်တူဆွထေ့နား မြေဩဇာ ကေထှလ်မိုဝိုက်။ 9အထာဂုမ်းဟှတောလ် အဌေ့ဌေးဘွာလ်ခွတ်။ တကယ်လို့ အဌေ့ဌေးတိယဟိုစေ့ ခုတ်ကာလ်လောဒ့် "တိရို အလျှောက်" တိရို အမိန့်။ 10ဥပုသ်နှိပ်နှိပ်ဟှတ်တောလ် ဓမ္မာရုံရုံဟှတ်တောလ် ကိုယ်တော်ယေရှုနား တရားအဟောဝေနား အမယ်။ 11နတ်ဆီး ပြုစားခံလောဒ့်တိ ဂုမ်ကုလာဆာတ်ဘောင် ရုန်ကုပ်တိ မုတောဟွလ်ဟှတ်အမယ်။ 12ကိုယ်တော်ယေရှုနား အင်(မ်)မုတော အမုဟိုဝေါလ် အင်(မ်)မုတော ပိုင်(င်)နယ်ထေ့နား "နာ(င်)တုအောလ်ကထု စအင်(မ်)နား နာခိမ်ဘွာလ်ပါလ်" တိရို အမိန့်ထေ့နား၊ 13အကွတ်တောလ် အင်(မ်)မုတော အလှမ်းဟိုဝေါလ် ချက်ချင်းကုံး အင်(မ်)မုတော အရုန်ဆန့်ဘွာလ်ထေ့နား အတုလ်ထေ့နား ဖုလော်ရှင်ဂုဏ်တော် အချီးမွမ်းဘွာလ်လှလ်။ 14အင်(မ်)ဘော်နားခါ ဓမ္မာရုံတာဝန်ခံ ပုတောနား ဥပုသ်နှိုပ်ပါလ် ယေရှုနား အင်(မ်)မုတော အဓူပက်ခန်းနောလ် အလုန်ဆွတ်။ အင်(မ်)ဘော်ခန်းနောလ် အင်(မ်)နား ခေါင်လှီ့အောလ် "ပတ်ဟှတ်တောလ် နိပ်ဆောပ့် အလုပ်လုပ်ပါလ်လောဒ့်။ အင်(မ်)နိပ်လှီ့အောလ်ယောင် အဓူနာမ်ခံလူးထေ့နား ဥပုသ်နိမ်ပါလ် ဓူဝေါလ်ကော့စူး" တိရို အဟာင်။ 15ကိုယ်တော်က "ခေါင်ပွန်ဟန်ဆောင်တိလှီ့။ ဥပုသ်နှိုပ်ပါလ် နာ(င်)မီးစငေါလ်မယ်တိ ဆာလှီ့လား ဆာ့လှီ့ ရွေးဆွီထေ့နား သွီတိုက်ယော်စူးဝြာ"။ 16အင်(မ်)ဘော်နောက်ဟိုဝေါလ်စေ့ ကုမ်ကလာဆာတ်လုံး ချယ်နှောင်ခံဟိလ့်လောဒ့်တိ အာဗြဟံနားအစိုးဝေါလ်ထောလ်တိ နီမုတော ဥပုသ်နှိုပ်ပါလ် အင်(မ်)ချဉ်နှောင်ခေါမ်ငေါလ်ကိ အလွတ်ဆီးယော်ဝြာ" တိရို အမိန့်ဘွာလ်။ 17ကိုယ်တော် ခေလှီ့ ရန်မူတိလှီ့တွက် အရှက်အာမ်လောဒ့်အယ်ဟိလ့်။ အင်(မ်)ပါလ်နောလ် ခေါင်လှီ့ကိမ်ကိမ်နား အင်(မ်) စါစ်နောက်ဟိုင်ခိလ်တိ လုပ်ရပ်ကြောင့်ငေါလ် အာမ်ပျော်လောဒ့်။ 18ကိုယ်တော်နား "ဖုလော်သာသနာတော်ခေါမ် ဟအီတောလ် အတူဝေ။ ဟိဘောင်အရာတောလ် နှိုင်းယှဉ်လောဒ့်အိုက်။ 19အယ်နီနောက်ခေါမ် ရီးစေ့တောလ်အတူဝေ။ ခေါင်ပွလ်ဟှတ်နား ယီးစိလူးဝေထေ့နား ဥယျာဉ်ဒုလ်ကာလ် အလိမ့်။ အင်(မ်)ယီစိအောလ်ကထု အကိုင်းအခတ်လှီ့ဓေါလ်ပြည့်စုံတိ ယီးထိင်ငေါလ်ထောလ်လူးထေ့နား ဟိုးလှီ့ အဘူးဆောက်ထေ့နား မယ်ရိုးလောဒ့်။ 20အင်(မ်)ပါလ်နောလ် ကိုယ်တော်နား "ဖုလော်ရှင် သာသနာတော် ဟအီဓေါလ် နှိုင်းယှဉ်ဓေါင်လောဒ့်ဟာမ်မိုက်။ 21အင်(မ်)အရာခေါမ် ဟန်းဓောလ်တူဝေ။ မုတောပွလ်ဟှတ်နား အင်(မ်)ဟန်းမက်စောလိုမ်ထေ့နား ဂျုံမှုန် ပုံထုန်စာဘောင်ထည့်ထေ့နား အရောဟိုဝေါလ် မုန့်လှီ့ ပွလူးခေါမ်ဓောလ် အတူဝေ" တိရို အမိန့်။ 22အင်(မ်)ပါလ်နောလ် ကိုယ်တော်ယေရှု ဂျေရုဆလင် ဈာတ်နောက်လာမ်းမယ် မယ်တိ လုလှီ့၊ နာမ်(မ်)လှီ့အောလ်မယ်ကိ ခေါင်ထုပရိတ်သတ်လှီ့အောလ် ဟောပြောအသွန်သင်။ 23ခေါင်ပွလ်ဟှတ်နား "အရှင်၊ ကယ်တင်ခြင်းခါမ်လောဒ့်ဟိုင်ခေါင်လှီ့စေ့မက်စောယောင် အမယ်ယာ" တိရို အဟိ။ 24ကိုယ်တော်နား "နာ(င်)မီး ကျဉ်းမြောင်းတိ ဆောတ်ပေါက်ကာလ် ဝင်ငေါလ်လောဒ့်ဟနောလ် အစွမ်းကုန်ကြိုးစားဘွတ်စူး။ နာ(င်)မီးရိုး ဟောင်ဟိုင်ကေလီခေါမ်စေ့ ခေါင်လှီ့ အင်(မ်)ဓိလ်နောလ် ဝင်ခွတ်ဟိုင်အာမ်ကြိုးစား။ အင်(မ်)ဘော်နားခါ အင်(မ်)လှီ့နား အင်(မ်)ဆောတ်ပေါက် ဝင်ခွတ်ဟိုင်ဆီးယော်ဟ။ 25အိမ်မို့ထုလ်လူးထေ့နား ဆောတ့်အပိတ်ဟိုဝေါလ်စေ့ နာ(င်)မီး အပြင်ငေါလ်တုလ်ထေ့နား "အရှင် ဆောတ့်ဖွင့်ပက်မိုဝြား" တိရို ဟောင်လောဒ့်အိုက်၊ အင်(မ်)ဘော်နားခါ အိမ်မို့နား "နာ(င်)မီးဟိဘောင်အရပ်အောလ်ကိ နာမ်လူးနောက်ခေါမ်ကေးစူးဟီ" တိရို အဟာင်ဘွာလ်ဝိုက်။ 26"ကေးမီး အရှင်ဓေါလ်ဟှတောလ် အေဟိလ့်ဟဖူ။ အရှင်နား ကေးမီးလုလှီ့နာမ်(မ်)လှီ့အောလ်ခါ နာဟောပြောဟိလ့်ဖူ" တိရို နာ(င်)မီးနား ဟောင်နားခါ 27အင်(မ်)နား "နာ(င်)မီးကေးနား စူးမီးဟီ။ ကေးစငေါလ်ကိ ဈာတ်ဘွာလ်ဝေါလ်။ နာ(င်)မီး ဆိုးသွမ်းတိလှီ့ယောင်" တိရို အဟောင်ဝိုက်။ 28ဖုလော်ရှင်သာသနာတော်ဝေါလ် အာဗြဟံ၊ ဣဇက်နား ပရောဖက်လှီ့ နာမ်မုလောဒ့်နားခါ နာ(င်)မီး အပြင်ငေါလ် မောင်းထုတ်နာမ်ခါမ်လောဒ့်ခန်းနောလ် နာ(င်)မီး အံကြိတ်ဗာန် နာမ်ဝမ်းနည်းပူဆွေးထေ့နား နာမ်ကာပ်လောဒ့်အိုက်။ 29ဓိလ်တိုင်းငေါလ်ကိ ခေါင်လှီ့ ဖုလော်သာသနာတော် ဒုလ်ကာလ် အတူတကွမယ်ဟထေ့နား အကောင်းဆုံး အာမ်အေအူးလောလ့်အိုက်။ 30အင်(မ်)ဟိုဝေါလ် တုအောလ် ရေးပါယတိခေါင်လှီ့ အရေးကြီးတိခေါင်ငေါလ်ထောလ်လူးထေ့နား၊ တုအင်(မ်) အရေးကြီးတိခေါင်လှီ့စေ့ အရေးပါယတိခေါင်လှီ့အောလ် အာမ်ထောလ်လူးဝိုက်နောက်ခေါမ် စူးဝေဘွတ်စူး" တိရို အမိန့်။ 31အင်(မ်)ချိန်ငေါလ် ကိုယ်တော်ယေရှုစငေါလ် အချို့ဖာရိရှဲလှီ့ ခိုက်လူးထေ့နား "ဟေရုဒ်နား အရှင် ဓုတ်ဟိုင်အလီခန်းနောလ် နီအရပ်အောလ်ကိ အစွာဓိလ်နောလ် ဈာတ်တား" တိရို အာမ်လျှောက်။ 32ကိုယ်တော်နား အင်(မ်)ခေါင်လှီ့အောလ် "ဈာတ်ထေ့နား အင်(မ်)ခီဝါလှီ့အောလ် ဟောင်ဝေရို့။ ကေးနား တုနိပ်ငူတိအင်(မ်) နတ်ဆီးလှီ့နှင်ထုတ်ထေ့နား အနာရောဂါလှီ့ ကေဓူပက်မိုဝိုက်။ အထုမ်နှိုပ်ပါလ်စေ့ ကေးအမှုလှီ့ပြီးမြောက်ကိုက်။ 33အင်(မ်)ဘော်နားခါ ကေးခေါမ် တုနိပ်ငှတိ အထာနှိုပ်လှီ့အောလ်စေ့ ခရီးကေးဈာတ်ရို့လောဒ့်ဟမ်းမိုက်။ အကြောင်းစေ့ ပရောဖက်ခေါမ် ဂျေရုဆလင်လုအင်(မ်)ကိလွဲယေထေ့နား အစွာအရပ်အောလ် ဘလ်လောဒ့်နောက်ခေါမ် မယ်ယော်။" 34ဂျေရုဆလင် ဂျေရုဆလင်၊ နာ(င်)လုဆော်လှီ့နား ပညာရှိသူတော်ကောင်းလှီ့ အာမ်ဓုတ်ထေ့လား ဖုလော်ရှင် အတပည်လှီ့ ခါ လုံးငေါလ် အာမ်ခေါင်ဟိလ့်။ အာနူးနား အာစောလှီ့ အဖာကွားဝေါလ် အုပ်ကာလ်ဘော် ကေးနားခါ နာ(င်)စောနောင်(င်)လှီ့ စောင့်လျှောက်ကေလီခန်းနောလ် အကြိမ်ကြိမ် ကေကြိုးစာဟိလ့်လားခါ နာ(င်)နား ကေးခွင့်ပြုဟိလ့်ရိုတိ။ 35အင်(မ်)ခန်းနောလ် နာ(င်)ဗိမာန်တော် ကန္တာရဘော် အတိတ်ဆိတ်ကိုက်။ နာ(င်)နား ကေးရိုး "ဖုလော်ရှင် နာမတော်ဓောလ် ကြွလူတိ အရှင် မင်္ဂလာအမယ်" တိရို ဟောင်ယဝှေ့ ကေး နာ(င်)နား အထာကွလ်ဟှတ် မုလောဒ့်ဟိုင်ဆီးယော်တိ" တိရို အမိန့်ဟိလ့်။
Currently Selected:
Luke 13: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
