Luke 7
7
1'Boipaw Yesyuq' na nhi kheukhaw nge tiq heq j a'soqsai hai mji khrawng tala tawmthong heq a'soqsai nghxt cawng na ce 'Kaperanong' luq j a'vawng. 2Jn luq j 'Rawmaq' 'Tepmhuc' pjinghawt na a'lhji yj a'xm me laq khrawng a'mapaw pjinghawt bjt tai thuiq hawn nj kang yaq j a'thon. 3Jn 'Tepmhu' na 'Boipaw Yesyuq' sitawng a'yawk khaw hxvj nhi mapaw kang ba hawn nj poqcai pet hai yj 'Boipaw Yesyuq' a'lo hai tok 'Kyu' khrawng yx canglen pjinhiq-thum tjq theqna 'Boipaw Yesyuq' ceng ngj a'khawqhyawq-e sawk. 4Jn heq khrawng 'Boipaw Yesyuq' ceng tjq khrai lo na nhi tiq kon yun ne na jn 'Tepmhu' phui pet hai yj a'lhji yj an'lung pui na an'khawqhyawq-e. Nhi tiq na "ni 'Tepmhu' khrawng 'Boipaw' na na'phui hai yj a'mhawnmx tawn ne tiq j thonne. 5Ibahai yj nawk hxce nhi na kyu khrawng yx heq j mitta taw theqna ke'hi tok damarung kha a'sawk pet" tiyj hawu na 'Boipaw Yesyuq' j an'khawqhyawq-e. 6Jnkhennj 'Boipaw Yesyuq' na jn heq kon a'yun ne. Sinakha 'Boipaw Yesyuq' khrawng im ka vj a'khrai lo hxvj 'Tepmhu' na nhi khepui heq tjq batx theqna "'Boipaw' vj ngalai khawm theqna ibahai yj na'lo ke imkrung kvaw vj na'vawng lo hai kung ngj kha tawn ne hx. 7Ke khrawng nang ceng tjq lo hai kung kha tawn ne hx tiyj ka'khin ne. Nang na kheukhaw khaw-nghawt na'hawu khaw kung ngj kha ke mapaw khrawng a'kang ba vai. 8Ke kung kha ka'thawk kj cang tiq dawng ngj mji laq baw vj ke dawng ngj kha seksaw caw heq batnghawt an'mji. Ke na kha seksaw pjinghawt khrawng "cet tiyj ka'hawu na ce nhi khrawng a'cet laq baw tjng ngj lo tiyj ka'hawu na ce nhi khrawng a'lo laq. Ke mapaw heq j kha ni poqcai yjn tiyj ka'hawu na ce nhi tiq na an'poqcai laq" tiyj a'hyawk ke sawk. 9Jn kheukhaw 'Boipaw Yesyuq' na a'yawk laq khaw vj mhawnkau theqna nhi nhu yun lo tiq he tjuq ve na "nang'hi yj ke ka'hawu vai 'Icare' khrawng yx heq duk kung ngj nhi baw vj a'lhji yj yum tiq khom nghxt phu hx" tiyj a'hawu. 10'Tepmhu' khepui heq im an'khrai ba hxvj jn a'mapaw a'kang ba khrawng an'khom me. 11Jnpjnnj ce 'Boipaw Yesyuq' khrawng 'Naiqnaq' tiyj an'hawu khrawng luq pawt a'cet khaw hxvj a'tabeq heq na khrawng batnghawt heq kha nhi kon nj an'yun ne. 12'Boipaw Yesyuq' khrawng luq kjt ka a'khrai lo hxvj khrawng heq na yok hyawng nghawt mhyaq hai yj luq krawng pawt an'ba lo. Jn yok khrawng mhe'nu na a'caw pjinghawt pjt mji tiq j a'thon. Luqsaw batnghawt na kha mhe'nu kon an'yun lo. 13'Boipaw Yesyuq' na jn mhe'nu a'mhuq khaw hxvj a'lhji yj manne theqna "kap kawq va" tiyj a'hawu. 14Pjnnj ce 'Boipaw Yesyuq' khrawng nhi tiq ka vj hawp pe theqna khong a'lhem me hxvj khrawng heq kha kap theqna an'tung nge. 'Boipaw Yesyuq' na "jn dikcaw vj thju nghxq yawng nga" tiyj a'hawu. 15Jnkhaw vjyawng bjt tiq dikcaw khrawng ngvaw lo theqna a'krju lo. 'Boipaw Yesyuq' na kha nhi nu vj a'awp ba. 16Khrawng heq batnghawt na kha kiqken ne theqna ke'hi duk kj lhxng dj tiq 'Parawphek' pjinghawt a'pju lo pjn. "'Pxtpaw Phawlaw' khrawng a'khrawng yx tjuqtawq-e hai yj a'khrai lo pjn" tiyj 'Pxtpaw Phawlaw' phun khrawng an'tjuqkauq ve nawk. 17Jn sitawng heq khrawng 'Yuqdaq' kre na jn kvawqkra vj mji tiq dxn tomti yj a'khrai yok. 18'Betticen' sarapaw 'Yawhen' tabeq heq na 'Boipaw Yesyuq' na a'poqcai khrawng heq tomti 'Yawhen' yj an'sai ba. Jnkhaw vjyawng 'Yawhen' na a'tabeq pjinhiq hawu ve theqna 19"Nang khrawng ke'hi ceng ngj lo tiq 'Boipaw Yesyuq' vaw. Siyaqna ke'hi na a'tha pjinghawt kan'cong nge laq hawm mai yaw" tiyj nghi hai yj 'Boipaw Yesyuq' ceng pawt a'tjq. 20Jn khrawng hji khrawng 'Boipaw Yesyuq' ceng tjq a'hiq khrai lo khaw vj "'Betticen' sarapaw 'Yawhen' na ke'hiq tjq lo theqna nang khrawng ke'hi cong nge laq khrawng 'Boipaw Yesyuq' vaw. Siyaqna ke'hi na a'tha pjinghawt kan'cong nge laq hawm mai yaw tina a'nghiq lo sawk" tiyj a'hiq sai ye. 21Jnkhaw hxvj 'Boipaw Yesyuq' na kang yaq tiq heq kha kang ba sawk theqna nawtsi na a'poq-e khrawng heq kha nawtsi heq khrawng a'sjt pet nawn naw yju an'mikmhu yaq tiq heq kha a'mhuq ba sawk. 22'Boipaw Yesyuq' na 'Yawhen' tabeq heq j " nang'hi na nan'mhuq laq nghxt khrawng heq 'Yawhen' yj hawu ve ba vjn. Mikmhu yaq tiq heq na kha an'mik an'mhuq ba pjn. Kutkho pawi yaq ti heq kha an'cet yok khoq ba pjn. An'niq len ti heq kha an'niq khrxk ba pjn. Nhaw yaw yaq tiq heq na kha an'yawk ba pjn. Bjt tiq heq kha an'heng lo ba pjn. Cek ke tiq heq na kha sitawng pawi an'yawk laq pjn. 23"Ke khennj nan'lung krak yaq tiq heq khrawng nan'bjikhji" tiyj a'hawu ba. 24'Yawhen' tabeq heq an'cet ba pjnnj 'Boipaw Yesyuq' na 'Yawhen' dj soisen ne tiq khrawng heq j ni baw a'sai. 'Boipaw Yesyuq' na "nang'hi khrawng i-bawng khrawng sui hai yj tjunu khocxn nj nan'cet. Khri na a'hoq nawk pawt kru yok tiq pakhrum baw mji tiq khrawng nan'sui ye yaw. 25Siyaqna i-baw mji tiq khrawng sui hai yj nan'cet. A'phu kong tiq suisawk khoqbawq-e tiq khrawng nan'sui ye yaw. Suisawk pawi khoqbawq-e tiq, e-pawi ok-pawi e-o tiq na boima tiq heq khrawng nawn duk kj yawng an'mji. 26Siyaq ce i-baw mji tiq khrawng nan'sui ye yok. 'Parawphek' khrawng pjinghawt nan'sui ye yaw. A'mhawnmx 'Parawphek' thawk kj lhxng tiq khrawng ke na ka'sai yai. 27Kyengcaw vj "ke 'Pxtpaw Phawlaw' na 'Ceqcaw' mhawimaw vj ceqcon nawk hai lawm khrawng mjipaq hawn nj a'yawng ngj ke cipaw ka'tjq ai" tiyj yo ve tiq khrawng 'Yawhen' vj a'hawu ljk yawng. 28Nang'hi yj ke ka'hawu vai. Ni somdek kj 'Yawhen' baw vj lhxng tiq u-na kha caw naw hawm yju uq. Sinakha 'Pxtpaw Phawlaw' neng-ngeng yj dik ke dj tiq khrawng 'Yawhen' thawk kj a'lhxng tiyj a'hawu. " 29A'phukok tiq heq j thoq cat na, khrawng heq tomti na 'Boipaw Yesyuq' tala an'yawk laq khaw vj 'Pxtpaw Phawlaw' kheukhaw khrawng a'mhawn tiyj an'hawu kyaq. Ibahai yj nawk hxce jn khrawng heq khrawng 'Yawhen' ceng ngj 'Betticen' khawm pjn ti heq j an'thonne. 30Jn baw na kha 'Phariqsye' heq uqpade yawcu tiq sarapaw heq na khrawng an'punghaw tok hong yawng so ve theqna 'Pxtpaw Phawlaw' khinko khrawng caqtit theq u-na 'Yawhen' ceng ngj 'Betticen' khawm yju uq. 31'Boipaw Yesyuq' na sawp theqna "tuq kawlawq caw heq khrawng hi-i heq j ka'cut nawk laq ai. U-bawng khrawng heq dj an'lju ve. 32Nhi tiq khrawng ci duk kj ngvaw ve tiq dikcaw heq dj an'lju ve. Jn dikcaw heq na "ke'hi na nang'hi tok kj nhe xt pet na kha nang'hi lawm yju cuq. Ke'hi na oi-kap jiq yj ji na kha nang'hi kap yju cuq" tiyj an'hawu ve tong. 33Ibahai yj nawk hxce 'Betticen' sarapaw 'Yawhen' khrawng pongmung kha e-yju moiq nawk 'Capyek' voi kha o-yaq kaw vj a'lo hxvj nang'hi na nawtsi poq-e khrawng tiyj nan'hawu. 34Jn tawn yju 'Ceqcaw' a'e-o khrawng kha nhi khrawng a'e ko, 'Capyek' voi kha a'o ko. A'phukok tiq heq na a'kret a'sisaw mawq heq kha a'khepui nawk tiyj nan'hawu batx. 35Sinakha nyenpengnya na a'poqcai khrawng ngj a'mhawn nawk khrawng a'dawn tiyj a'hawu. 36Jnpjnnj ce 'Phariqsye' pjinghawt na 'Boipaw Yesyuq' khrawng nhi im mj a'mx buq e-hai yj a'hawu ve. Jnkhennj 'Boipaw Yesyuq' khrawng jn im mj cet na buq e-o hai yj buq-e khrung ngj a'ngvaw. 37Jn luq j a'kret kong tiq mhutaw pjinghawt a'mji. Jn mhutaw na 'Phariqsye' im mj 'Boipaw Yesyuq' khrawng a'e-o ve tiyj a'yawk na ce a'lhji yj a'phulen tiq o-tiq situi pelawng nghawt lu ve na jn dxn nj a'lo. 38Jn mhutaw khrawng 'Boipaw Yesyuq' nhulawm a'khocju vj tung theqna kap pheng 'Boipaw Yesyuq' kho a'mikkhri yj bot theqna vhaw hawn nj a'lusawm mj a'hot. Pjnnj ce 'Boipaw Yesyuq' kho khrawng nhawm theqna a'lu ve khrawng o-tiq situi a'yun pet. 39Jn baw a'poqcai khrawng 'Boipaw Yesyuq' khin naw tiq 'Phariqsye' na a'mhuq na ce "'Boipaw Yesyuq' khrawng 'Parawphek' pjinghawt tj a'thon hxce nhi lhem tiq mhutaw khrawng hu-u, i-bawng mhutaw nawk khrawng a'cok laq ai. Ibahai yj nawk hxce ni mhutaw khrawng "a'kret kong tiq mhutaw vj a'thon' tiyj a'lung duk kj a'khin. 40'Boipaw Yesyuq' na kha nhi yj "'Syiqmung', nang ngj ka'hawu hai u-nghawt a'mji" tiyj hawu theqna 'Syiqmung' na "hawu va 'Boipaw' vj" tiyj a'hawu na ce 41"'Boipaw Yesyuq' na "phjisa pu tiq ceng ngj le mji tiq pjinhiq a'hiq mji. Pjinghawt na ce 'Denarid' phjisa khra-panghaw a'tha pjinghawt na ce 'Denari' phjisa nghawkip a'hiq le mji. 42Jn hji na a'hiq le khiq ba khoq yju hji khennj le mawqpaw na khiq ba sawk tiyju. Jn hxvj jn pjinhiq duk kj kxq u-bawng na le mawqpaw a'lhji yj a'khet tai" tiyj a'nghiq. 43'Syiqmung' na kha "le kong tiq na yawng a'lhji yj a'khet tai" tiyj a'hawu ba hxvj 'Boipaw Yesyuq' na kha nang khin khrawng a'mhawn" tiyj a'hawu ba. 44'Boipaw Yesyuq' khrawng jn mhutaw lawm pawt mawng theqna 'Syiqmung' ngj "ni mhutaw na'mhuq aw. Nang im mj ke ka'khrai khaw hxvj nang na ke kho bot nawk hai tui pe yaq tina kha ni mhutaw na ke kho hji khrawng a'mikkhri yj hyvaw theqna nhi lusawm mj vhaw hawn nj a'hot pet. 45Nang na ke nhawm na beksot te yju tiq. Sinakha ni mhutaw na a'vawng lo hxvj ka'thoq ke kho khrawng bet yaq hawn nj nhawm na a'beksot te. 46Nang na ke lu khrawng 'Tenglvawng' situi yj yun pet yaq tina kha ni mhutaw na ce a'lhji yj a'phulen tiq o-tiq situi yj ke kho khrawng a'yun pet. 47Jnkhennj nang ngj ke na hawu dang ka'ti khrawng ce ni mhutaw khrawng a'kret batnghawt mji na kha tuq j a'kret heq lhjq khrawng a'khawm laq pjn. Jnkhennj nhi na ke yj a'lhji yj mitta a'tawk. A'kret a'neu caw lhjq khrawng khawm laq tiq na ce meqcaw yawng mitta a'tawk kai" tiyj a'hawu. 48Jnpjnnj ce 'Boipaw Yesyuq' na jn mhutaw vj "nang a'kret heq tomti ka'lhjq pjn tiyj a'hawu. 49Jn e-ok pji yj 'Boipaw Yesyuq' dj ngvaw nghaq tiq khin heq na a'kret lhjq njn tiq ni khrawng ce hu-u tiyj an'nghiq ye tong. 50Sinakha 'Boipaw Yesyuq' na jn mhutaw vj "nang na'yum khrawng na nang a'ljulawk ke. Na'lungko khrawng khrawkrok na yadik dawmdak kj cet nghxq yawng nga" tiyj a'hawu.
Currently Selected:
Luke 7: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
