Luke 11
11
1Nhxp-nghawt khaw vj 'Boipaw Yesyuq' khrawng dxn nghawt tj suq a'tong nge. Suq a'tong cawng pjnnj a'tabeq pjinghawt na 'Boipaw Yesyuq' j 'Yawhen' na a'tabeq heq j suqtong hai a'sawng pet baw vj ke'hi yj kha suqtong hai sawng pet maw tu va" tiyj a'khawq-e. 2'Boipaw Yesyuq' na nang hi suq nan tong hxvj - 'j hawn nj mji tiq 'Paw Phawlaw' vj nang ming khrawng khrawng heq ceng ngj kiqken ne khrawng khawm laq bjiq seq. Nang neng-ngeng saw khok bjiq seq tiq. 3Nhxp mhji lx tiq e-ok heq ke'hi yj pe pet maw va. 4Ke'hi yj a'kret poqcai tiq khrawng heq j ke'hi na nhi tiq kret kan lhjq pet baw vj ke'hi a'kret heq kha lhjq pet maw va. A'kret heq na an'sawu nawk pawt cet yaq hawn nj ljulawk ke pet maw va' tina suqtong bjiq cuq tiyj a'hawu. 5Pjnnj ce 'Boipaw Yesyuq' na "nang'hi duk kj kxq khrawng pjinghawt na a'khepui pjinghawt a'tawk ke naw maw va. A'yawn cingleng ngj jn khrawng ceng tjq cet theqna "j khepui yj 6ke khepui pjinghawt khrawng khari a'cet yok nawk kj kxq ke ceng tjq a'khrai lo. Nhi ka'duqcawq nawk hai i-kha taw ye hx khennj ke yj mung lung-thum pu maw va" tiyj a'hawu. 7Jnkhaw vj jn khrawng na "ke phulhet lo kawq. Im sot kha ka'khaq pjn. Ke caw-nawu tiq kha an'ip pjn. Jnkhennj thju na nang ngj pe khok yju" tiyj imduk kj thoq a'hawu ba vai. 8Nang'hi yj ke na hawu hai ka'lx khrawng ce jn immawq paw na ke khepui tiyj khin ne theqna a'ip nawk kj kxq thju theqna mung pe hai siyju. Sinakha nhi na tawprang yaq kaw vj sawp na a'tong nge na ce immawq paw khrawng thju lo theqna nhi na a'lx khrawng heq a'pet lo vai. 9Jnkhennj nang'hi yj ke na hawu hai ka'lx khrawng ce tong ngjn. Nan'tong na ce nan'laq ai. Sui yjn. Nan'sui na ce nan'khom mai. Khok kjn. Nan'khok na ce a'hon pet tai. 10Tong tiq tjng na an'laq ai. Sui tiq na kha an'khom mai. Kjt khok tiq kha a'hon pet tai. 11Nang'hi duk kj a'paw vj thon tiq na khrawng a'caw-nawu heq na ngaw an'tong khaw vj ngaw pe yaq kaw phvaw a'pet tai yaw. 12Siyaqna A-toi tong tiq j awi-kha a'pet tai yaw. 13Jnkhennj nang'hi khrawng bji yaq tiq j thonne na kha nang'hi caw-nawu heq j pawi tiq heq yawng nan'pet do khaw hxce hawn luq j mji tiq 'Pxtpaw Phawlaw' na kha nhi ceng ngj tong nge tiq u-vj kha siyj seq cimkya tiq muikhraw a'pet hai tok a'cjn a'mji pjn" tiyj a'hawu. 14Nhxp-nghawt khaw vj 'Boipaw Yesyuq' na khrawng pjinghawt ceng ngj kxq mong tiq nawtsi a'sjt na ce jn nawtsi a'thok hxvj jn khrawng, khrawng a'kheu ba khok. Jn mhu tiq khrawng heq na kha an'mhawnkau kyaq. 15Sinakha a'kyaw khrawng heq na ce "ni khrawng na nawtsi heq mawnglen 'Belaqcebuqlaq'q phun nj ni nawtsi heq a'sjt yawng" tiyj an'hawu ve tong. 16A'kyaw khrawng heq na kha 'Boipaw Yesyuq' khrawng cawm hai an'lx khennj hawn luq j kxq nimik u-nghawt bawng dawn hai an'tong. 17'Boipaw Yesyuq' na jn heq lungkhin heq a'cok kyaq khen cuvj "neng-ngeng duk kj kxq khrawng heq khrawng an'lung kau ve na an'punghaw ko an'kvawqleng nge na ce jn neng-ngeng diu hai siyju a'krak kai. Ni baw vj imlong long-nghawt tj kha lung kau ve na an'punghaw ko an'coq na ce jn imlong khrawng a'cimkrak laq ai. 18Nawtsi caten kha a'punghaw duk kj a'kvawqleng nge nawk hxvj ce nhi neng-ngeng khrawng i-baw diu hawn nj a'khawm khok kai. Ke na nawtsi caten mawng 'Belaqcebuqlaq' phun nj nawtsi heq ka'sjt tiyj nan'hawu khennj ni baw ka'hawu laq j thonne. 19A'mhawnmx ke na 'Belaqcebuqlaq' phun nj nawtsi heq ka'sjt hxvj ce nang'hi yum khrawng sarapaw heq na ce hu-u phun nj an'sjt. Jn sarapaw heq na kha nang'hi na'mhaw nawk khrawng sawksi an'dawn nai. 20Sinakha ke na 'Pxtpaw Phawlaw' phun nj jn nawtsi heq ka'sjt khrawng a'mhawn nawk hxvj ce 'Pxtpaw Phawlaw' neng-ngeng khrawng nang'hi ceng tjq a'khrai lo pjn. 21A'tha len tiq khrawng na cimcoi heq, kha heq, mepok heq batnghawt dj a'im nghaw a'cong na ce u-na kha lhem lo vawp hai siyju uq. 22Sinakha nhi thawk kj a'tha len tiq na nhi tjk theqna a'njn khaw vj jn khrawng na nhi na a'xm me khrawng cimcoi heq, kha heq, mepok heq kxq-e kyaq theqna a'boiq heq kha a'pheq-e sawk kai. 23Ke ceng pawt pui ye yaq tiq u-kha siyj seq ke kvawqleng naw tiq j thonne. 'Pxtpaw Phawlaw' tok ke dj cuq-e na mji yaq tiq heq khrawng, khrawng heq khau tiq j an'thon. 24Nawtsi khrawng a'koppe nawk khrawng ngj kxq thok na tju vj cet yok na a'mji nawk hai dxn a'sui. Sinakha a'dxm nawk hai dxn khom yju khennj "ke hjmmj ka'mji nawk dxn nj yawng ka'mji ye ba vai" tiyj hawu. 25Nhi khrawng jn khrawng ceng ngj a'cet ba hxvj hjmmj nhi koppe nghxt nawk pumyo khrawng kyalhek hawn nj an'syaq khrawng im songnghawt baw a'mji khrawng a'mhu ve. 26Jnkhaw hxyawng nawtsi na nhi thawk kj si tiq thawp na nawtsi pjiseq lo pui naw na jn khrawng duk kj vawng theqna an'mji ye. Jnkhennj koppe khawm laq tiq kha hjmmj kxq thawk a'mjicoq laq khrawng a'lhji yj a'si lo" tiyj a'hawu. 27'Boipaw Yesyuq' na khrawng heq j a'soqsai tun nj mhutaw pjinghawt na"Nang hjn naw tiq hjndung na nang ngj cuitui pe ye tiq cui khrawng a'bjikhji" tiyj pang na a'hawu. 28 Jnkhaw vjyawng 'Boipaw Yesyuq' na "a'mhawn. Sinakha 'Pxtpaw Phawlaw' mongthem valung heq yaw laq theqna nge na sum me tiq khrawng jn tawn yaq bjikhji tiq j a'thonne" tiyj a'hawu ba. 29Khrawng heq batnghawt an'cuq-e lo khaw hxvj 'Boipaw yesyuq' na "ni khrawng yx heq khrawng a'lhji yj an'ljng. Jn khrawng heq na mhawnkau nawk nimik dawn hai tong u-na kha 'Yawnaqr' nimik dawn khrawng ngj kxq loi na a'kyaw i-nimik kha dawn hai sihx. 30'Yawnaq' khrawng 'Niqneve' luqsaw heq tok 'Nimik' kj a'thon baw vj 'Ceqcaw' kha tuq j kxq khrawng heq tok 'Nimik' u-nghawt tj a'thonne yai. 31Tala sa nhxp nhxp-nghawt tj a'cum lawm mj kxq 'Syebaq' kre mawngnus na ni khrawng yx heq j thju na a'bju ve nawk kai ibahai yj nawk hxvj ce jn mawngnu na 'Syawlamung' mawnglen pawi tiq kheukhaw a'hawu khrawng yaw laq hai tok a'lhawmlhaw vj kxq a'khrai lo khennj so maw vjn 'Syawlamung' mawnglen thawk kj lhxng dj tiq ni dxn nj a'mji. 32Tala an'sa khaw hxvj 'Niqneve' luqsaw heq na thju na ni yx heq j a'kret an'bju ve nawk kai. Ibahai yj nawk hxvj ceq jn luqsaw heq khrawng 'Yawnaq' na a' hawu nghxt khrawng kheukhaw vj an'lung suisaw ve nghxt khennj thonne. 33Ni dxn nj 'Yawnaq thawk kj lhxng dj tiq a'mji. Simipung daw na a'koi nawk kj taw yju uq. Tong kvaw vj kha taw yju uq vawng lo tiq heq a'ang laq hai tok kj simipung khrawng khrung ngj daw na yawng a'tawk. 34Nang'hi mikui heq khrawng nang'hi pumyo tok kj simipung ngj thonne. Nan'mik pawi na ce na'pumyo cu a'ang ngj Nan'mik pawi yaq na ce na'pumyo cu a'hyungtu vai. 35Jnkhennj nang ceng ngj mji tiq a'ang khrawng hyung yaq hawn nj a'pawi caw vj tunpan ne hai lx. 36Nang'hi ceng ngj a'ang mji na ce i-u nghawt kha hyung tiyaq kaw vj ang theqna simipung a'ang ngj ang kyaq baw tjng ngj i-khjk tomti a'ang ngai tiyj a'hawu. 37Jn baw vj a'hawu cawng na ce 'Phariqsye' pjinghawt na 'Boipaw Yesyuq' khrawng e-ok kj khin naw hai yj nhi im mj a'ceq pui nawk khennj 'Boipaw Yesyuq' kha cet theqna e-nawk dxn nj a'ngvaw. 38Sinakha a'e-o lhawn nj 'Kyu' heq kut bot te khrawng thum baw vj 'Boipaw Yesyuq' na a'poqcai yaq khrawng jn 'Phariqsye' na a'mhuq hxvj a'mhawnkau lhji. 39'Boipaw Yesyuq' na " nang'hi 'Phariqsye' heq khrawng buqpji, khok, am krawng lawm heq ce bot cu na kha a'duk kj ce nan'lxto heq, taqsi tiq heq j a'lui ye. 40Khrawng si heq j, 'Pxtpaw Phawlaw' na duk kxt krawng kxt vawngnhiq djn a'comdai khrawng yawng siyju vaw. 41Jnkhennj ni thawk kj bji tiq ce nan'tawk ke cawbaw vj cek ke tiq heq j pe yjn. Jn baw khaw hxyawng i-bawng heq tomti nang'hi tok a'cimkyalek kai. 42'Phariqsye' heq j, nang'hi heq khrawng bjikhji yju cuq. Ibahai yj nawk hxce nang'hi na nan'dyaw duk kj kxq thok tiq a'theq heq j kxq pxm nghaq duk kj kxq pxm-nghawt 'Pxtpaw Phawlaw' ceng ngj pe cu na kha tala tawmthong heq na 'Pxtpaw Phawlaw' nan'khet laq hai khrawng nan'nyhaq txm khennj. Pxm-nghaq duk kj kxq pxm-nghawt nan'lhu khrawng mhawn tx na kha jn thawk kj bjikhji tiq nang'hi na nyhaq laq tyaw yju. 43'Phariqsye' heq j, nang'hi bjikhji yju cuq. Ibahai yj nawk hxce nang'hi khrawng damarung heq j kha a'maw dj vj ngvaw hai nan'lx. Ci duk kj kha khrawng heq na an'lole nawk khrawng khawm hai nan'lx ve. 44Nang'hi khrawng bjikhji yju cuq. Ibahai yj nawk hxce nang'hi khrawng mhawt te na mji yaq tiq co-vawm dj nan'lju ve. Jn dxn khrawng, khrawng heq na co-vawm khrung tiyj an'cok yaq khennj khrawng heq an'cet yok" tiyj a'hawu. 45Jnkhaw vjyawng uqpade yawcu tiq sarapaw pjinghawt na " sara vj, ni baw na'hawu khrawng khrawng ke'hi heq j kha kret sui tiq na'lju ve" tiyj a'hawu. 46Jnkhaw vjyawng 'Boipaw Yesyuq' na kha uqpade yawcu tiq sarapaw heq j nang'hi kha bjikhji yju cuq. Ibahai yj nawk hxce nang'hi na nan'vawn heq khrawng heq j ba sawk theqna nang'hi na ce jn vawn heq nan kut yung caw vj kha lhem yju cuq. 47Nang'hi khrawng bjikhji yju cuq. Ibahai yj nawk hxce nang'hi na nang'hi poksyaw heq tuk nghxt khrawng 'Parawphek' heq tok co-gu heq nan'sawk pet khennj. 48Jnkhennj nang'hi na nang'hi poksyaw heq poqcai nghxt khrawng heq a'mhawn tiyj yum na nan'poqcai khrawng heq khrawng sawksi yj a'thonne. Ibahai yj nawk hxce jn poksyaw heq na 'Parawphek' heq tu theqna nang'hi na co-gu nan'sawk pet khennj. 49Jnkhennj i-tomti co tiq 'Pxtpaw Phawlaw' na a'hawu khrawng ce " ke na 'Parawphek' heq na 'Tavawkaq' heq khrawng nhi tiq ceng tjq ka'tjq ai. Sinakha nhi tiq na a'kyaw heq ce tu theq u-na a'kyaw heq ce an'kulu nawk kai" tiyj a'thon. 50Jnkhennj somdek a'mji cxk hxvj ka'thoq mji nghxt tiq nhi tiq poksyaw heq na an'tuk nghxt khrawng 'Parawphek' heq na an'pet nghxt laq khrawng thithawng phu heq tuq j kxq kawlawq khrawng heq na an'pet ba laq ai. 51Jn khrawng Pawucoq an'pawq khrawng khek na Phawlaw kyong ngj suq an'tong khrawng khek kra vj a'tuk khawm nghxt laq tiq 'Parawphek' 'Abelaq't thithawng phu vj thoq cat na 'Cakhariq' thithawng phu tjq a'thon. A'mhawnmx ni kawlawq khrawng heq na ni thithawng phu heq an'pet ba laq ai tiyj ke na ka'hawu. 52"Uqpade yawcu tiq sarapaw heq j, nang'hi khrawng bjikhji yju cuq. Ibahai yj nawk hxce nang'hi na 'Pxtpaw Phawlaw' dj soisen ne tiq coknyen benteku tawq cxm me na na nan'punghaw kha vawng yaq kaw vawng hai lx tiq khrawng heq kha nan'nga ye" tiyj a'hawu. 53'Boipaw Yesyuq' khrawng krawng pawt a'thok ba tun nj uqpade yawcu tiq sarapaw heq 'Phariqsye' heq na 'Boipaw Yesyuq' a'lhji yj an'mhuqdawm khennj a'poqcai laq hai heq dj soisen ne na batnghawt an'nghiq. 54'Boipaw Yesyuq' hawu khrawng heq duk kj a'mhaw u-nghawt e-nghawt pui hai tok an'sui.
Currently Selected:
Luke 11: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
