Luke 8
8
1နိုက်စအော် ကြာပိဇ ကိုယ်တော်ဝဟော့ နန်းနဲ့မြို့ဝဲ့ဝါ စိလောအဖိုး ဘုရားသာသနာ အကြောင်းငဲ့ ဟောလော့သဲံ အစုတ်တို့။ ယတပည့်လင် ပေန်းပေါင်း ဟာလက်ဟိ ဟော ကိုယ်တော်ဟွေးတူ အတောအွမ်။ 2အနိအပြင် အနာရောဂါ ဝဲ့ အကျုပ်လျှောက်၊ မကောင်း ဆိုးဝါးပူး အခေါင်းလဟော့ ကျုံအုံ ကုသပိတ်ဟော့ နတိုးနူးဝဲ့ ဟော အတွက်တူအာ ယနိပို။မကောင်းဆိုးဝါး ပေါ့ဟိဟော့ အပူးအခေါင်းအလဟော့ 'မာရိ' သိမ်ဟောက််ဟော့ နတိုးနူးဟော အပိုးလူး။ 3ဟေရုဒ်မင်း ဟော့အရာရှိပရောက် အဖြစ် 'ခုဇ' ဟော့ပေးဟာ 'ဟောဟန္ခ'၊ 'ရှုရှန္ခ' ကျမ်ဟော့ နတိုးအများဟော့ ယနိစလစ်ငိုးဝို ကိုယ်တော်လော့တပည့်တော်တိုးဟော့ အပြုစုအဆောင်းရှောက် ဆမော်။ 4မြို့နမ်းအနံ့ပြားအာ ချောင်အုပ်လင်းဟော့ ကိုယ်ယေရှု နှူးအို ယနိအတောင်းအမ်။ ကိုယ်တော်လော့ ချောင်အုပ်လင်းအာ ပုံပြင်ပုဒ်ဝေါ့အို အဆုံးမလောင်း အပြပိတ်။ 5"လယ်သမားပရောက် ဟော့ လယ်ကွင်းဒိက်ကာ မျိုးစေ့အစိုးဟော့ အစို့အာ သိမ်အရှုန်။ ဟောနိ လယ်သမားဟော့ဘမျိုးကြဲ အစို့ပြီစလော့ အရာမျိုးစေ့ ဟော့ လောင်းအာအကြောက်။ ဟောနိမျိုးဟော့ ချောင်းလော့ယနိစဲ့ အလော့တဲ့ ပရိုးအလော့ ယနိကော့အိုးလော့ယနိအေး။ 6အခြားမျိုးစေ့ဟော့ လုံးသောက်ဒိက်အောက်အာ ကျောက်အိုလော့တဲ့ အရုံ့စအောဝဲ့ ယနိပုတ်ဟီ။ ဆိတ်လော့ဟော အလုံလောက်ဟော့ ဒူးမရကြောင်းအို ကြာအ ယနိနွမ်းအလော့ တဲ့ယနိစာမိုတ်။ 7အချို့ဟော့မျိုးစေ့ ဟော ဘယ်ဘိမ်းချီး အာကြောက်ဟော့ ။ အရုံစအော ပုတ်အလော့တဲ့ ဘယ်ဘိမ်းချီးဒိက်အာ ကြောင့်အို လောင်းပိတ်လော့တဲ့ ယနိအုံ။ 8တစ်ချို့မျိုးစေ့များဟော ဒိက်ပေါ့အာအကြောက် ကြောင်းအို အရုံးပုတ်ဟော့ အဆ တစ်ရာအလင်း အထိုက်ပါ ဟောက်ဟော အဖြစ်ထွန်း" သိမ် လောင်းအပြ "ယောက်ဇူးဟော့ လော့ပေါ့ အာဟင်ပွှေန့် သုက်" သိမ် အမိန့်တော်အဟောက် သော့။ 9တပည့်တော် ဟော့ ကိုယ်တော်ယေရှုလော့ ပုံပြင်ဟော့ အဟောက်လှောင်း ယနစိုက်။ 10နိကြောင်းအို ကိုယ်တော် လော့ တပည့်တော်တို့ ဝါ ဘုရားသာသနာတော် ဟော့ လျှိုဝှက်ချက် ဟော့အရှင်းပြပိတ်။ ဆိတ်လော့ ဟော အခြားချောင်ငလော့ ယလော့ဟော့ ပုံပြင်များဟော့ အသုံးပြုလော့တဲ့ယနိဟော့ ပိတ်။ နိချောင်ငဲ့ လော့ တိုင်အာလော့လော့ဟော မူးအအုတ် ယောက်အလော့ဟော နားလယ်အအုတ် ယနိဖြစ်" သိမ်အမိန်တော်အဟော့။ 11ပုံဥပမာလော့ အဟောက်နူးဟော အဓပ္ပါယ်ဟော့ မျိုးစေ့ဟော့ ဘုရားရှင်ဟော့ နှုတ်ကပတော် တရားအဖြစ်။ 12လယ်ဒိက်အာကြောက်ဟော့ မျိုးစေ့ဟော့ နှုတ်ကပတ်တော်တရား တော်ဟော့ ယောက်လဟော့လော့ ယနိဟော့။ ဟောနိအာ မာရ်နတ်လော့ အနီချောင်ငဲ့နှလုံးသားဝါမွက်ဟော့ ဘုရားရှင်လော့အဟောက်ဝတ်တဟော့ တရားတော်ဝဲ့ လောင်လော့သဲ့ အစိအိ။ 13လုံးသောက်လော့အခွန်းနဟော့ ဒိတ်ပုဝါအကြောက်လူးတဟော့ မျိုးစေသိမ်အဟောက်ဝဟော့ ဘုရားလော့ အဟောက်ဝဟော့ တရားတော်ဝဲ့ အရောက်ဟနို ချက်ချင်းပ ပျော်အလို့သဲ့ ယနိလက်ခွန်း။ ဆိတ်လော့ဟော ကြာကြာ အရုန်းပါ ဆွန်းအွမ်လော့သဲ့ အွမ်းန။ ယနိလော့ အချိန် နိုက်စအောင်နော ယုံကြည်အလော့ လက်ယနိခွန်း။ ဘဝဝါ အခက်အခဲ ခွန်းကနို ချက်ချင်းပ အဲ့နိတရားတော်ဝဲ့ ယနိလှို့။ 14အလှိုင် အဘိမ်းဒိက်ကာ အကြောက်ကဟော့ မျိုးစေ့သိမ်အဟောက်ဝဟော့ တရားတော်ဝဲ့ အနှိုဝို ရောက်အလို့သဲ့ လက်ခွန်းအလို့ဟော့ ချမ်းသာကြွယ်ဝါမှု ၊သာယာလော့သဲ့ အချမ်းမြေ့ဟော့ဝဲ့ လောဘ ယနိမွက်လွတ် ကြောင်းငို ဘုရားလော့အဟောက်ဝတ်တဟော့ တရားဝဲ့ ပသာဟော့ တိုးအုံ ယနိစိုင်းယအိုနော။ 15ဒိတ်ပွယ်ယာ ကြောက်ဟော့မျိုးစေ့သိမ်ဟောက်ဝဟော့ ဘုရားလော့ အဟောက်ဝဟော့တရားဝဲ့ အရောက်ပုန်ပိ ရိုးသားဟော့ အလုန်ငါ သိမ်းအလော့ဘနိသောက်။ နောက်ဆုံးငါ ယနိယဟော့ အထိုင့်ပါဝဲ့ ရမ်းအဟော့ ယနိလာ့။ 16မီးအိမ်ထွန်းလော့ ကောက်ကိုကွက်အဟော့ သဲ့၊ ကုတင်ကိုးဝါ သိမ်းလော့သောက်ေဟာ့ချောင်မွက်ရ။ မီးအိမ်ငဟော့ မီးတိုင်ငါ ချိတ်လော့သဲ့ အသောက်ကနိုနော အင်းနာဝေါင်လူးဟော့ချောင်ငဲ့ လော့ အဝါန်းငဟော့ ယနိမှု လာဝိုင်။ 17ရွှီအဟော့သဲ့လာ့ဟားအုံ ထုသလော့သဲ့ လာအသိ၊ ချောင်လော့အမှတ်ငှားဟော့ လျို့ဝှက်ချက်သိမ်ဟော့မွက်ရ၊ 18အာရုံစိုက်သလော့သဲ့ ဟင်ဘွေ့တို့၊ အုဝေါတ်ဟိမွက်ဟော့ချောင်တိုင်းငါ ပိုလော့အပိတ်ကဟော့ အခွန်းအွမ်လာ့ဝိုင်။ ဆိတ်လော့ဟော့ ဘောင်းဟောမွက်ငှားဟော့ ချောင်ငှာဟော့ အမွက်သိမ်မခင်းလာဝဟော့ဝဲ့ပ အရှံးဆုံးလာ့ဝိုင်။ 19ကိုယ်တော် နူးအူလော့ နောင်အောင် ဝဲ့ ကိုယ်တော်ဝို အခွန်းအွမ်နိုင်သိမ် ယနိစိ။ ဆိတ်လော့ဟော့ ချောင်ပုရိသတ်သဲ့ ဘနိများလွတ်ကြောင်းငို တိုးအလော့ပေါက်က ကြောင်းငို ကိုယ်တော်ငှာ ဖိုးဝအို၊ 20ချောင်ပေန်းနောတ်လော့ ကိုယ်တော်ဝါ "ကိုယ်တော် နူအူလော့နောင်အောင်ဝဲ့ အရှင့် နို အခွန်းအွမ်ဟူးကြောင်းငို ကြောင်ငါ ယနိစုန်း" သိမ်ယနိဟောက်။ 21အနိပိ ကိုယ်တော်လော့ "ဘုရားရှင်လော့ အဟောက်ဝတ်တဟော့ တရားဝဲ့ ရောက်အောက်ဟော့ချောင်ငဲ့ အားလုံးပ ကိုယ်တော်နူအူလော့နောင်အောင် ငဲ့ နော" သိမ် အဟောက်။ 22နှုတ်တော့သို ကိုယ်တော်လော့ ယတပည့်ဝဲ့ရို လွှေညှောင်းငေတ် ပုဝါကွယ်အလော့သဲ့ "နီတွီးအောင် မကို့ဝိုင်" သိမ် အဟောက်။ 23ယနိလော့ အနီတွီးအောင်း ယန်ကို့တွန်ဟနို ကိုယ်တော်ယေရှုဟော့ အိလော့သဲ့ အအွမ်း။ ပါတ်တော့လိုက်ကို ခီမုန်တိုင်းလော့ သောက်လော့သဲ့ လွှေစလော့သဲ့ မြုပ်လူးလော့သဲ့ အန္တရာယ် ၇◌ို ယနိခွန်းအွမ်နော့။ 24အနီကြောင်းငို ကိုယ်တော် လှုန်းလော့ခါတ်လော့သဲ့ " 'အရှင်၊ အရှင်' မနိတွီးယာ မစုပ်ကိုင်ဟီ" သိမ်အဟောက်။ ကိုယ်တော်လော့ အိဒွန်းနာဟော့ ထောင်လော့သဲ့ မုန်တိုင်းလော့ လှောင်ငဲ့ဝါ ရပ်အုံ အမိန့်ပိတ်။ အနီဝဲ့ဟော အမိန့်နာခံအလို့ အငြိမ်လှိုင်း။ 25အနီပုန်ပိဇ ကိုယ်တော်လော့ ယတပည့်ရဲ့ယာ "နောင်နိယာ ယုံကြည်မှု မွက်ယမိုး" သိမ်အစက်။ ဆိတ်လော့ဟော ယနိလော့ အံ့ဩအလို့ ယနိလစ်လစ်အစ် သို့။ အနီချောင်ငဲ့လော့ "နီချောင်ငဟော့နီနိုဝိုး" "လှောင်လော့ ခီ ရဲ့လော့ပ ယအမိန့်ကဟော့ ယနိနာခံလာနီ" သိမ်အချင်းချင်း ယနိဟောက်အောက်။ 26ကိုယ်တော်လော့ ယတပည့်ဝဲ့ ဂါလိလဲ တွီးအောင်း ငါ လွှေ ညှောင်းငေတ်တို ရွက်လွင့်အလို့ လူးလော့ ဂါရစ မြို့စိမ်းငါဟော့ ကမ်းခြေ အုဝေတ်တာ ယနိဖိုး။ 27ကိုယ်တော်ဝဟော့ လွှေယာဟော့ အကွန်းလူးဟနို အနီမြို့ဝါဟော့ ချောင်ပေန်းနောတ်လော့ ကိုယ်တော်အမှု။ အနီချောင်ငဟော့ ခွက်ရိုင်းပူးအူဟော့ချောင်ပေန်းနောတ်အဖြစ်။ ယဝဟော့ အင်းနာအွမ်းတအုံ၊ အောင်းကျီရှိုအို့တအုံ စူဝဲ့ဝါ ကြောင်းအောင်ဟော့ချောင်ပေန်းနောတ် အဖြစ်။ 28အနီချောင်လော့ ကိုယ်တော် အမှု ပိဇ ပါန်အာန်လော့သဲ့ ကိုယ်တော်ရှေ့ ယာ ကျိုးနွံ ဒူးထောက်လော့သဲ့ အအွမ်း။ ယလော့ "နိဗ္ဗာန်ရွှေမြို့တော်ဝါဟော့ ဘုရားရှင်စိုး ယေရှု အရှင်နော ကေ့ငှာဟော့ ဘောင်းနလိုအိုဝိုး ကေ့ အနှိပ်စကိသိုင်းသိ အရှင့်နာ ကတောင်းပန်အန်" သိမ် အလုတ်လုတ်ကာ အဟောက်။ 29အဲ့လှောက်အဟောက်ဝဟော့ ကိုယ်တော်လော အနီခွက်ရိုင်းရာ အနီချောင်ငှာဟော့ ရှုလူးဝဲ့သိမ် အမိန့် အပိတ်ကြောင်းငိုနော။ အနီချောင်ငါ ခွက်ရိုင်းလော့ ဒုက္ခ မနဲ အပိတ် အနီချောင် ကွက်ခူဝဲ့ သံကြိုးဝို ယနိ ခွန်းအလို့ဟော ယလော့ သ့ကြိုးဝဲ့ ဘောင်လော့သဲ့ ချောင်မွက်ဟားဟော့ သိမ်းလော့ အွမ်းနောက်ဒွန်းနေရာ ဝါ အစွန်း။ 30ကိုယ်တော်လော့ ယေရှုဝါ "နောင်းနှာမိန်ခါ ဝို" သိမ်အစက်ပိလေ့၊ ယလော့ "ကေ့နှာမိန်ငဟော့ 'လေဂေါင်' အဆိတ်" သိမ်အဟောက်။ နီလှောက်ကာအဟောက်လာ့ဝဟော့ နီချောင်ငါ ခွက်ရိုင်းမနဲလော့ ပူးအူဝဟော့ အခွမ်းအွမ်လာ့ကြောင်းငို အဖြစ်။ 31အနီချောင်ငဲ့လော့ ကိုယ်တော်ယေရှုဝါ "ခွက်ရိုင်းရဲ့ အပြစ်ပိတ်ဟော့ ခုန်းခူ ဒိက်ကာ အထို့ဝိုင်သိ" သိမ်ယနိတောင်းပန်အမ်။ 32အနီချိန်ငါ ဝါက်အုပ်အုပ်တော့လော့ တုန်ကုန်းပု ဝါ ကျက်စားအလို့ယနိအွမ်း။ အနီခွက်ရိုင်းရဲ့လော့ အဲ့နီဝါက် ဒိက်ကာ ပူးအူခွင့် ပြုဝဲ့သိမ် ယနိတုန်အုံ။ ကိုယ်တော်လော့ဟော့ ခွင့်အပြုပိတ်။ 33အနီပိဇ ခွက်ရိုင်းရဲ့ ချောင်ငဲ့ဝါဟော့ ဝါက်ငှာ ယနိစိသို့။ အနိပိဇ ဝါက်အုပ် အုပ်ပြတ်လော့ အမ်ဟာလာ့ကာဟော့ တွိးအောင်းငါ ပလာက်လာက် စွန််းအလို့သဲ့ တွီးရာစုပ်အလို့ယနိဒူးမာက် သို့။ 34အနီပိဇ ဝါက်ထင်ဟော့ချောင်ငဲ့ဟော ဝါက်အဖြစ်သဟော့အမှု ပိဇ စွန်းအလို့သဲ့ အနီသတင်းနဟော့ တော ဒို မြို့ဒို ကျန်ငှားအုံ ယနိဟောက်တို။ 35ချောင်ငဲ့လော့ အနီအဖြစ်သဟော့ ကိုယ်တွေ့ယနိမှုငှုးကြောင်းငို မြို့ဒိတ်ကာဟော့ ရှုလူး အလို့သဲ့ ယေရှုစိမ်းငါ ယနိဖိုးလူး။ အနီချိန်ငါ ခွက်ရိုင်ပူးအူခွန်းအွမ်လာ့ဝါဟော့ လို့ဟော့ချောင်လော့ အောင်းကျီရဲ့ရှိုအိုလော့သဲ့ ကိုယ်တော် ခူဆောင်ငါ အပွယ် ပကတိလှောက်ကာ အငုံးငဟော့ အခွန်းလာပိဇ အံ့ဩအလို့သဲ့ ယနိလလစ်လစ်အစ်မာက်။ 36အနီပုန်ပိဇ မှူးဟော့လော့ချောင်ငဲ့ အားလုံးလော့ အနီချောင် ခွက်ရိုင်းပူးအူဟော့ဝါဟော့ အကျုပ်ပုံ ငဟော့ ဘနိဟောက်ပိတ်။ 37ချောင်တိုင်းလော့ ကီးကယ်ယနိကေ့ကြောင်းငို ကိုယ်တော်ယေရှုတာ 'ဂါရစ' မြို့စိမ်းငါဟော့ အစိရိုင်းတော့ ယန်တောင်းပန်အမ်။ ကိုယ်တော်ယေရှုလော့ လွှေပုဝါ ကွယ်လော့သဲ့ အဲ့နီယာဟော့ ယနိရှု။ 38ခွက်ရိုင်းလော ယှ ဟောတ်ဟော့ချောင်လော့ ကိုယ်တော်ဝဲ့ဝိုလအတွက်တူဝါ လူးပိဝှေ့သိမ် လျှောက်လော့ အတောင်းပန်အမ်။ ဆိတ်လော့ဟော ကိုယ်တော်လော့ အနီချောင်ငါ လူးပိရိုင်ရဟော့ခွင့်ပြုတအုံ၊ 39"ဘုရားရှင်လော့ နောင်အပေါ်ဝါ ပခေ့ ပွယ်ဟော့ အစိုင်းပိတ်သိမ် နောင်းအင်းနာ ပြန်သလော့သဲ့ ချောင်ငဲ့အားလုံးငါ ဟောက်ဘွေ့" သိမ် အဟောက်ဝတ်။ အနီပုန်ပိဇ အနီချောင်ငှော မြို့အနှံစိလော့သဲ့ ကိုယ်တော်လော့ ယအပေါ်ဝါ ခါပွယ်ဟော့ အစိုင်းပိတ် သိမ် တောန်းတောန်း လော့သဲ့ အဟောက်။ 40ချောင်တိုင်းလော့ ကိုယ်တော် ပသာပြန်လူးဘော်ဝိုင်းသိမ် ယနိစုန်းအုံ။ ကိုယ်တော်ပြန်လော့ အကြွလူးဘော်ဟနို ချောင်ပုရိသတ်သဲ့လော့ သောင်းသောင်းဖျဖျ ယနိကြိုဆို။ 41ယုဒ ဝါဟော့ ပတိုး ဓမ္မာရုံတာဝန်ခွန်းအွမ်ဟော့ ချောင်ပေန်းနောတ်တဟော့ ကိုယ်တော်ရှေ့ယာ ဒူးထောက်လော့သဲ့ အငုံးဆွတ်။ ယနှာမိန် 'ယာဣရု' သိမ်ဟောက်ဟော့ချောင်ဖြစ်လော့သဲ့ ယလော့ ကိုယ်တော်ဝါ ယအင်းနာလူးဝိုင်သိမ် ပင့်ဖိတ်လော့ အလျှောက်ထား။ 42ပိုင်ကြောင်းငိုဝေါနိုပ ယ ခုကွန်း ဟာလဲ့ဟိ မွက်ဟော့ ဆမီးမွက်နောတ် တဟော့ အဒူဝါတ်ကြောင်းငို အဖြစ်။ အနီနှတိုးနူးစအော်ဝဟော့ ယာဣရု ပေန်းနောတ်စအော်နောမွက်ဟော့ အစိုးနှူးအဖြစ်။ ကိုယ်တော် ဝဟော့အနိအင်းနာ စိပိဇ လွန်းနာ မနဲမွက်ဟော့ ချောင်ပုရိသတ်သဲ့လော့ဟော ကိုယ်တော်ဝါ ဝိုင်းအလော့သဲ့ ယနိလူးပိ။ 43အနီချောင်အုပ် ဒိက်ကာဟော့ နှတိုးနူး ပေန်းနောတ်တဟော့ အထီးလုန်ဟော့ရောဂါ အစွဲရဟော့ ဟာလက်ဟိလုံးလုံးအမွက်ဟီ။ အနီနှတိုးနူးလော့ မွက်ဟော့ဟင်းစဝဲ့ အပွက် ခွေန်းအွမ်လော့သဲ့ ဆေးဆရာဝဲ့ဝို ကူးအူလော့ဟော့ နီးလော့ဟော ကျုပ်အုံကုခုဝအို့။ 44အနီနှတိုးနူးဝဟော့ ကိုယ်တော်နှိုးဝါ စိလော့သဲ့ ကိုယ်တော် ဝတ်ရုံစအောင် အကုတ်တိုအထိ ပိဇ ချက်ချင်းပ ယအထီးလုန်ဟော့ အရပ်မာက်။ 45ကိုယ်တော်လော့ "ကေ့နီးလော့နော အထိရိုး" သိမ်အစက်သို့။ အနီအချိန်ဟနို ချောင်အညးလုံးပ တိုးအလို့ ယနိမွက်ကြောင်းငို။ ပေတရုလော့ "အရှင်နော အရှင့်ဘေးပတ်လည်ရာ ချောင်အုပ်ပြတ်လော့ ပတ်ပတ်လည် တိုးဝေ့အလို့ ယနိမွက်" သိမ်အဟောက်ဘော်။ 46ဆိတ်လော့ဟော ကိုယ်တော်လော့ "နီရွှိလော့ ကေ့အထိ ပိုင်ကြောင်းငိုဝေါနို့ပ ကေ့ငှာဟော့ တန်းခိုးအရှုသိမ် ကခံစားလာ့'' ပြန်လော့ အဖြဘော် 47နှတိုးနူးလော့ဟော ဖုန်းကွယ်အွမ်ခုတအုံ လစ်လစ်အစ်လော့သဲ့ ကိုယ်တော်ရှေယာ ဒူးထောက်လော့သဲ့ ယလော့အထိပုန်ပိလော့ ယရောဂါ ချက်ချင်းအကျုပ်သိမ် ချောင်အပေါင်းငါအဟောက်သို့။ 48ကိုယ်တော်လော့ အနီနှတိုးနူးဝါ "နောင်တိုဝါ ပြန်လော့နဘွယ်ဘော်ဝဟော့ နောင်းယုံကြည်မှု ကြောင်းငို အဆိတ်၊ဘုရားရှင်လော့ နောင်ငါအငြိမ်းချမ်းရှောက်ဟီ" သိမ် အမိန့်တို့။ 49ကိုယ်တော်လော့ နီလှောက်ကာ အမိန့်တွန်းနာ 'ယာဣရု' အင်းနာဟော့ချောင်ပေန်းနောတ်ဖိုးလူးလော့သဲ့ "အရှင့် စိုးနှုးအဒူးဟီ၊ ကိုယ်တော်ဝါ နှောက်ယှက်ပိတ်သေးရိုင်သိ" သိမ် 'ယာဣရု' ဝါလူးလော့သဲ့အဟောက်။ 50အနီပေါလ်ဝဟော့ ကိုယ်တော်လော့ အရောက်ပိလော့ 'ယာဣရု' ဝါ "အလုန်ပူဝိုင်းသိ၊ ယုံကြည်ခြင်းနော တောက်အောက်ဘွေ့၊ နောင်စိုးနှူး ပြန်လော့ အကာန်းလူးဘော် ဝိုင်" သိမ် အဟောက်ဘော်။ 51ကိုယ်တော်ဝဟော့ ယာဣရု အင်းဒိက်ကာ အကြွဟနို ပေတရု၊ ယောဟန်၊ ယာကုပ် လော့ ဆမီးစအောင်နူးပိုးဝါဟော့ လွေးလော့ ကျန်ဟော့ချောင်ငဲ့ အင်းဒိက်ကာ အဝေါင်းခွင့်ပြုဝ။ 52ချောင်တိုင်းလော ဆမီးစအောင် အဒူးကြောင်းငို ကီးကယ် ယနိက။ ဆိတ်လော့ဟော ကိုယ်တော်လော "နီဆမီး စအောင် ဒူဝ၊နီဆမီး အအိပျော်နော" သိမ်အဟောက်ပိ 53ချောင်ငဲ့လော့ ကိုယ်တော်ဝါ လှောင်ပြောင်အလို့ ယနိ နွိ။ ပိုင်ကြောင်းငိုဝေါ နိုပ ယနိလော့ အနီဆမီးစအောင် အဒူးဝဟော့ ဘနိမှတ်ကြောင်းငိုအဖြစ်။ 54ကိုယ်တော်လော့ အနီဒူဟော့ဆမီးစအောင် အကွက် ခိုက်လော့သဲ့ " ဆမီးယော ထောန်ဟီရဲ့" သိမ်အဟောက်။ 55ဆမီးစအောင်ဝဟော့ ချက်ချင်း အရှောက်ဝေါင်လူးလော့တဲ့ ထောန်လော့ အငုံးတို့။ ကိုယ်တော်လော့ ဆမီးယာ မအေးဗုန်းအုဝေတ် ပိတ် ကဲ့ သိမ် အဟောက်။ 56အနီဆမီးစအောင် အနူးပိုးဝဲ့လော့ ကီးကျဘ် ယနိအံ့ဩလှိုင်း။ ဆိတ်လော့ဟော နီအဖြစ်သဟော့ နီးယာဟော့ဟောင့်ဝိုင်သို့ သိမ် ပညတ်လော့သဲ့ အသောက်။
Currently Selected:
Luke 8: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Ekai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
