Luke 20
20
1နှုတ်တောတ်တာ ကိုယ်တော်လော့ ချောင်ငဲ့ယာ ကျုံဒိက်ကာ ဟောပြောလော့သဲ့ မင်္ဂလာတရားတော်ဝဲ့ အဖြန့်ဝေပိတ်။ ပရောဟိတ်ကဲ့ မောရှေကျမ်းဟယ်ဟော့ ဆရာဝဲ့လော့ ယုဒဗုန်းခေါင်းဆောင်ငဲ့လော့ 2ကိုယ်တော်ဝါ "ကျုံဒိက်ကာ တရားဒေသနာဝဲ့ပိုချဝိုင်လော့ မင်္ဂလာသတင်း နဖြန့်ဝေရိုင်အခွင့်အာဏာဝဟော့ နီလော့ အပိတ်ကိုး" သိမ်အစက်ပိ 3ကိုယ်တော်လော့ "နောင်နိယာ ကေ့အုဝေတ်ကစက်သိုင်" 4"ရေနှစ်မင်္ဂလာဆရာကြီး ယောဟန်နာ ရေနှစ်မင်္ဂလာပိတ်ကိုင်းအခွင့်အာဏာဝဟော့နီလော့ အပိတ်ကိုး။ ဘုရားရှင်လော့ ခွင့်ပြုချက်အပိတ်ကြောင်းငိုမိုး။ သိမ်ပဆိတ်ငှားလော့ဟော ချောင်ပေန်းနောတ်လော့ အပိတ်ကြောင်းငိုမိုး" သိမ်ပြန်လော့ မေးခွန်းအထွက်ဘော်။ 5ယနိယလော့ "ဘုရားလော့ 'ယောဟန်' နာ နီအခွင့်အရေး အပိတ်နပါ ပိုင်သိမ်ယောဟန် ရွန်အွမ်နသိရိုးသိမ် 'ယေရှု' လော့အစက်သိုင်။ 6ချောင်ပေန်းနောတ်လော့ အပိတ်နပါနီ ပရိသတ်သဲ့လော့ မနိလုံးသောက်ကို အဝုအလော့ မနိဒူးလာ့ဝိုင်။ ပိုင်ကြောင်းငိုဝေါနပါ ယနိလော့ ယောဟန်နာ ပရောဖတ်ပါးဝေတ်သိမ် ယနိရွန်အွမ်နောက်ကြောင်းငိုနော" သိမ် ပေန်းနောတ်လော့ပေန်းနောတ် ဟောက်အောက်အလော့ ယနိတိုင်ပင်အင်တို့။ 7နီကြောင်းငိုချောင်စာန်းငဲ့လော့ "နီလော့ ယောဟန်နာ ရေနစ်မင်္ဂလာ အပိတ်သိမ် ကနိလော့မှတ်တအို့" သိမ်အဖြေ။ 8အနီပိဇ ကိုယ်တော်လော့ "နီလော့ ကေ့ယာနီအခွင့်အရေးအပိတ်သိမ်ကေ့လော့ဟော ဟောက်ခုဝဟူ" သိမ်ပြန်လော့အဟောက်ဘော်။ 9ကိုယ်တော်လော့ ချောင်ငဲ့ဘာ နီပုံအထုံးပိတ်။ "စပျစ်ခြံအမို့လော့ ယခြံ ယပွေးယာအငှားပိဇ 10စပျစ်ထိုက်အပေါန်ချိန်ငါ အစေခံပေန်းနောတ်လော့ လှို့လော့သဲ့ အမို့ဝေစု အလောက်ရှောက်။ အနီချောင်ငဟော့ ခြံငှားဟော့ချောင်ငဲ့လော့ ပွတ်အလော့ ဘောင်းဟောပိတ်တအုံ ယနိလှို့။ 11ခြံမို့လော့ဟော အရာအစေခ့ပေန်းနောတ်အလှို့တော်။ ဆိတ်လော့ဟောခြံငှားဟောချောင်ငဲ့လော့ အနီချောင် ဒဏ်ရာအမှာငဲ့ယျောန်အရှက်တကွဲဖြစ်ရှောက်အလော့ ဘောင်းဟော ပိတ်တအုံ အမောင်းထုတ်။ 12အရာနောက်ထပ် ပါတ်တောက် ခြံမို့လော့ တတိယအစေခ့စေပေန်းနောတ် အလှို့ပိလော့ဟော အရာန်း ငါဟော့ချောင်ငဲ့လှောက်ဟွေ့ အလိုသဲ့ပြန်လော့ ယနိလှို့။ 13အမို့လော ''ကေ့ဘောင်းကစိုင်းလာ ဝိုင်ရိုင်းသိမ်ကမှတ်ဟီကေ့ ကနှိုး အိုနောက်ဟိုက်ဆုံးက စိုးပေန်းနောတ်ကလှို့ဝိုင်။ ယဝဟော့ကေ့စိုးနှို့ပါ ယနေလေးစားဝိုင်”သိမ် ယလုန်တာ ပေန်းနောတ်လိုက် ဟောက်လော့ ယစိုးအလှို့။ 14ခြံငှားဟောချောင်ငဲ့လော့ ''နီချောင်ငဟော့နောတ်တော့တာ အ်မို့ဝါ အလုတ်အုူပ်လူးဝိုင်။ မနိနီခြံ အခြံပိုင်လာအအုံ ယမသုတ်ကိုင်”သိမ်ခြံအကြောင်ငါတိက်အိပ်အလို့ သဲ့ယနိသုတ်။ 15နီအခြေအနေရာ ခြံဖိုဝါ နီလော့ဆက်လော့ အလုပ်အုပ်ကိုင်းရိုး ''သိမ်ကိုယ်တော်လော့ ပရိတ်သတ်တာ အစက်။ အနီအဖြေယဟော့ ကိုယ်တော်လော့ နီလှောက်ကာအဟောက်။ 16“အမို့လော့ လူးညော့သဲ့ အနီခြံဖို့ဝဲ့အသုတ်ကိုင်း ပေါန်ပိလော့ အနီခြံနဟော့အရာ ပေန်းနောတ်တာ အပိတ်ကိုင်” သိမ်အဟောက်ပိတ်။ချောင်ငဲ့လော့ ယနိရောက်ပိတ် ''နီကိစ္စဝဟော့ ပသာဟော့ဖြစ်ငှားဆီဘွေ”သိမ်ယနိဟောက်။ 17ဆိတ်လောဟော့ ကိုယ်တော်လော့ ယနိစိစိသိုင်လော့ ''ကျမ်းစိုဝါ တိုက်ဆောက်ဟော့ ချောင်ငဲ့လော့ ယနိဖိုင်းယဟော့လုံးသောက်ကဟော့ အရေးကြီးဟိုက်ဆုံး ထောင်ချုပ်ကော့ဝဟော့အဖြစ်လူး။ 18နီလုံးသောက်ကို အထိဘန်ဟော့ချောင်ငဲ့ အဘောင်းဘောင် အဒိုက်ဟက်လာဝိုင်”သိမ်အဟောက်။ 19ဟင်ဟော့ဘာသာရေး ခေါင်းဆောင်ငဲ့ မောရှေကျမ်းဟယ်ဟော့ချောင်ငဲ့လော့ ကိုယ်တော်လော့ ယနိ အကြောင်းငဟော့ နီပုံပြင်နိ အဖော်ပြသိမ် အနိမှတ်အပ်သို့။ ယနိလော့ ကိုယ်တော်ချက်ချင်း ယနိမမ်းဒူ။ ဆိတ်လော့ဟောချောင်ငဲ့ဘနိကေ့ လာကြောင်းငိုနော အဖြစ်။ 20ကိုယ်တော်ဝဟော့ ကွက်ဒိကာ မမ်းအလော့ ယနိအွပ်ဒူကြောင်းငို ရန်သူတဲ့လော့ အနီကပ်စုံအလော့ ယနိသိုင်း။နီအတောက်တာ ချောင်တချို့ဝါအမှား စုန်းငိုင် ကိုယ်တော်စိမ်းငါ သူတော်ကောင်းလှောက်ကာ ဟန်ဆောင်အောင်ရှောက်လော့ သူ လျှိုဝါ လှို့လော့အသောက်။ 21သူလျှိုဝဲ့လော့ ကိုယ်တော်ဝါ “အရှင်နဟော့ ချောင်ငဲ့ယာ ဘုရားရှင်လော့ အလိုအိုဝဟော့ ချောင်ဖြစ်သိုင်တောက် မလိုက်နာလာ့ ဝိုင်ရဲ့ အမှန်အတိုင်းဟောပြောဟော့ ချောင်ဖြစ်လော့ သဲ့နီပဆိတ်ကာဆိတ် တန်းတူသောက်သလော့ ဆံဆက်အဟောချောင် အဖြစ်”သိမ်လျှောက် အလော့သဲ့။ 22ကေ့လော့”အင်ပါယာ အရှင်နာ အခန်ကဆက်သင်မိုး ဆက်သက်သသင့်နဟူမိုး သိမ်ကေ့ယာ အဆင်းပြပိတ်ကေ့”သိမ် ယနိလျှောက်တင်။ 23ကိုယ်တော်လော့ ဘနိ ပရိယာယ်ဝဟော့ မှတ် အလော့သဲ့။ကိုယ်တော်လော့ 24အနီချောင်ငါ”ဟင်းစ အပြငဲ့”သိမ်အဟောက်”ဟင်းစပုဝါ နီပုံလော့နီ ဘွဲနာမည်ရေးအေလော့ အသောက်ကို”သိမ်အစက်”ထော်ချောင်လော့”အင်ပါယာအစရှင်နာမိန်လော့ အရုတ်ပုံ”သိမ်ယနိဖြေ။ 25အနီပိတ် ကိုယ်တော်လော့ “အင်ပါယာဝိုအဆိုင်အိုင်ငဟော့ အရာဝဟော့ အင်ပါယာအဆင်နာပြန်လော့ပိတ်ဘွေတို့”ဘုရားဝိုအသက်ဆိုင်အိုင်ငဟော့ အရာဝဟော့ ဘုရားရှင်နာပြန်လော့ ပိတ်ဘွေတို့”သိမ်အဟောက်။ 26နီချောင်ငဲ့လော့ ချောပရိသတ်သဲ့ရှေ့ယာ အမှားရွှီလော့လာ ဝကြောင်းငို ကိုယ်တော်မမ်း အလော့ လဝအို့။ယနိလော့ ကိုယ်တော်လော့ အဖြေယဟော့ ယနိရောက်လာ့ပိတ်လော့ အံ့ဩအလော့ မှောင် အလော့ ယနိဒက်လှိုင်။ 27ဇဒ္ဒကဲငဲ့လော့ ချောင်ငဲ့ အဒူးပေါန်ပိတ် ပြန်လော့ရှင်သန် အထမြောက်ကဟော့ အယုံ အကြည်မွက်ရအို။နီကြောင်းငိုဇဒ္ဒုကဲ တစ်ချို့လော့ ကိုယ်တော်ငှာ 28ကပ်အပ်အလို့သဲ့”အရှင် မောရှေပညတ်ကျမ်းနာ အပေးယှာမွက်ဟော့ ချောင်ပေန်းနောတ်လော့ အစိုးမွက်တအုံ အဒူးကနိူကျန်ဟော့ မုဆိုးမလော့ ဟနောအောင် အလောက်အောက်လ။ယနိ ပထမဆုံးမွက်ဟော့ အဒူးဝဟော့ သာအာစိုးသိမ်အသတ်မှတ်လာ။ 29လကိုးဝါ သာနောင်ပေန်းရှေ မွက်လော့ အလင်ဟိုက်ဆုံး အင်းထုံကျောက်လော့ဟော့ အစိုးနောင်မွက်တအုံ အဒူးသို့။ 30ဒုတိယ အကြီးဆုံးလော့ အနီနှတိုးနူး အလောက်အောက် ပိတ်လော့ဟော့ အစိုးမွက်တအုံ အဒူးသဘော်။ 31တတိယ ချောင်ဟော့ အဲလှောက်ကာ အဖြစ်။အလှောက်ကာ ပေန်းရှေတဒေါန် မုဆိုးမဝိုအင်းထုံကြောက် အလော့ ယနိဒူးမာက်။ 32နောက်ဆုံးငါနှတိုး နူးဟော့ အဒူး။ 33အနီနှတိုးဝဟော့ သာနောင်ပေန်းရှေတဒေါန်နိ အင်းထုံအကြောက်ကြောင်းငို ဘုရားရှင်လော့ ယနိယာ အဒူးဝါဟော့ အထမြောက်ဘော်ပိ နီနှတိုးနူးတဟော့ နီ အပေးယှာ အဖြစ်သိုင်ရိုး”သိမ်ဇဒ္ဒုကဲ့ငဲ့လော့ ယနိစက်။ 34ကိုယ်တော်လော့ “နီဘဝဝါ ချောင်ငဲ့ ယနိနောက်အောက်ကဲ့ ယနိမွက်။ 35ဆိတ်လော့ဟော့ အနာဂတ်ဘဝဝါ ဒူလော့ ပြန်လော့ ရှင်သန် အထမြောက်လူးဝိုင်းထိုက်တန်ဟော့ ချောင်ငဟော့ ယနိနောက်အောက်ကနိူ အဒူးသိမ်ဟော့ မွက်သေးရ။ 36ယနိငဲ့ယဟော့ ဘုရားရှင်ဟော့ နေတ်စေတမာန်လှောက်ကာ ဘုရားရှင် အစိုးနောင်ဝါ ယနိလုတ်အုပ်ကိုင်း။ပိုင်ကြောင်းငိုဝိုးနပါ ယနိယဟော့ အဒူးဒွန်းနဟော့ ပြန်လော့အထမြောက်ကြောင်းငို အဖြစ်။ 37မီးလျှံဆုဟော့ ပိုင်ဘိန်းဝီး ဇာတ်လမ်းနာ မောရှေလော”ဘုရားရှင်နဟော့ အာဗြဟံ၊ဣဇက်၊ယာကုတ်ကဲ့ ဘုရားအဖြစ်။သိမ်ရှင်းရှင်းလင်းလင်း အဟောက်။နီကြောင်းငိုဒူဟော့ ချောင်ငဲ့ ပြန်လော့ အထမြောက်ရှောက်ကဟော့ အဟောက်နော အဖြစ်။ 38နီအဟောက်လှောက်နပါ ဘုရားရှင်နဟော့ ဒူဟော့ ချောင်ငဲ့ ဘုရားရှင်ဆိတ်က၊ အရှောက်ဟိုင်ဟော့ချောင်ငဲ့ဟော့ ဘုရားနော အဖြစ်။အဟောက်လွန်းနဟောနပါ ချောင်တကားဝဟော့ ဘုရားရှင်လော့ အလိုအိုလှောက်နော ယနိဟိုင်”သိမ်အဟောက်။ 39တချို့မောရှေကိမ်းဟယ်ဟော့ ဆရာတဲ့လော့ “အရှင်အဖြေယဟော့ သင့်တော်လော့သဲ့ အပွယ်”သိမ် ယနိဟောက်။ 40အနီအချိန်ငါဟော့ စလော့နီလော့ဟော ကိုယ်တော်ဝါ မေးခွန်းစက်ဝံသေးရအို့။ 41ကိုယ်တော်လော့ “ချောင်ငဲ့ယာ”မေရှိယဝဟော့ ဒါဝိတ်ရှန်ပလာန်း အစိုး အဖြစ်သိုင် သိမ်ပိုင်ယနိဟောင်ဝိုး”သိမ်အစက်။ 42ဆာလံကျမ်းနာ ဒါဝိဒ် ရှန်ပလာန်း ကိုယ်တိုင်လော့ 43ဘုရားရှင်လော့ ကေ့ အရှင် မေရှိယဝါ အဟောက်ဝဟော့နပါ နောင်ရန်သူဝဲ့ နောင်ခူးရိုဝါ ဖိုးအုံအထိကေ ကွက်လောက်ပွန် ပေါတ်တိုစံမြန်းတွေ့’သိမ် အဟောက်ဝတ်။ 44ဘုရား ဒါဝိဒ်ကဟော့ ဗေရှိယ အရှင်နာကေ့ အရှင် အဟောကြောင်းငို မေရှိယ အရှင်နဟော့ ဒါဝိဒ် ရှန်ပလာန် စိုးဘောင်းခါ အဖြစ်ခုဝိုင်ရိုး “သိမ်ကိုယ်တော်လော့ အရှင်းပြ 45ကိုယ်တော်လော့ ချောင်ပရိတ်သတ်သဲ့လော့ အဟင်း တွန်းနာ တပည့်တော်ဝဲ့ယာ မောရှေကျမ်းဟယ်ဟော့ချောင်ငဲ့ သတ်မနဲ့တောက်အောက်သလို့ ရှောင်အောင်ဘွေတို့ 46ယနိယဟော့ လွန်းနာယနိရူကနို အောင်းကျီဝတ်ရုံငဲ့ ရိုအို အလို့ ယန်ကြာဟယ်။စွေးဒိက်ကာ ယနိဖိုးကနိုချောင်ငဲ့လော့ အလေးသောက် အလို့ ယနိကြိုဆိုဝဟော့ ယနိလိုအို။ဓမ္မရုံဝဲ့ဝါ ရှေဆုံးငါနေရာ ယနိလောက်အောက်။အခမ်းအနားပွေးယာဟော့ အပွယ်ဟိုက်ဆုံး ခုံငါယနိငုံး။ 47မုဆိုးမဝံအင်းနာနဲ့ အတင်းအဓမ္မသိမ်း အလို့သဲ့ ယနိဆုတောင်းအောင်ကနိဟော အရှောင်လဂန်းနာဟန်ဆောင်အောင် အလို့ ယနိဝဆုတောင်းအောင်ဟယ်။နီချောင်ငဲ့ယဟော့ အပြင်းထန်ဟော့ အပြစ် အပိတ်အခွန်းအွမ်လာဝိုင်ဟော့ ခေါင်ငဲ့ အဖြစ်သိမ် ကိုယ်တော်လော့ သတ် အပိတ်လော့ အဆိမ်း။
Currently Selected:
Luke 20: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Ekai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
