Maliko 11
11
U Yesu akwinjila mu Yelusalemu nu bupoti
(Mat. 21.1-11; Luk. 19.28-40; Yoh. 12.12-19)
1Bo u Yesu na bamanyili bache bapalamila ku Yelusalemu, papipi nutwaya utwa Betifage nu Betaniya, bakafika Pighamba ilya Misyunguti. U Yesu akabatuma abamanyili bache babili. 2Akababuzya akati, “Bukagha mukaya kako kali kuntazi kwinyu. Bo mwinjila bulo, mukwiza pakumwagha umwana uwa mpunda bamupinyiliye, yuyo batakwelitepo nalumo. Mumusatule nukwiza nawe kuno. 3Nanti umuntu yumo akubalalusya ukuti, ‘Nkimba choni chicho mukubomba bunubu?’ Mumubuzye ukuti, ‘U Mwene#11.3 u Mwene: Pamo umwenecho. akumulonda, loli akwiza pakumunyosya lunulu.’ ”
4Po bakabuka nukwagha umwana uwa mpunda yula bamupinyiliye pamulyango uwa nyumba papipi nu musebo. Bo bali pakumusatula, 5abantu bamo babo bakimilila palapala bakabalalusya bakati, “Nkimba choni chicho muli pakumusatula umwana uwa mpunda?”
6Bakamula ukuyana namumo u Yesu akababuzizya, po abantu bala bakabitikizya ukuti babukaye nawe. 7Bo abamanyili bala biza nawe kwa Yesu, bakatenga amenda ghabo panyuma iya mpunda yila, po u Yesu akakwelapo. 8Abantu abinji bakatenga amenda ghabo mumusebo, sona abanji bakatenga isamba zizyo bakadumula mumaghunda. 9#Mas. 118.25-26Abantu babo bakaba kuntazi na kwisinda ukwa Yesu bakanda pakukolomoka ukuti, “U Chala apaliwanje! U Chala amusaye yuyo akwiza mwitabwa ilya Mwene! 10Busayiwa Ubumwene ubwa tata witu u Mwene u Devedi, bubo bukwiza! U Chala uwakumwanya apaliwanje!”
11Bo u Yesu afika bulo mu Yelusalemu, akinjila mu Nyumba iya Chala nukutalankannya vyosi vivyo vikaba mulamula. Loli pachifukwa ichakuti kukaba ukuti kwila kale, akabuka mu Betaniya na bamanyili bache 12 bala.
U Yesu akuchighuna ichikuyu
(Mat. 21.18-19)
12Ilyandabi, bo bakufuma mu Betaniya, u Yesu izala yikamulema. 13Akachennya pabutalipo ichikuyu chivwinkite na mani, po akabuka ukuti ennye nanti angavyaghamo ivikomwa ivya makuyu. Bo afika pachikuyu chila, atakavyaghamo ivikomwa ivya makuyu, loli amani ghene, pakuti katakaba akabalilo kache akakwelela. 14U Yesu akachibuzya ichikuyu chila akati, “Wee chikuyu, nayumo umuntu yuyo akwiza pakulyamo nalumolumo ivikomwa ivya makuyu mumwako!”
Abamanyili bache bakamwivwa akunena zinizi.
U Yesu mu Nyumba iya Chala
(Mat. 21.12-17; Luk. 19.45-48; Yoh. 2.13-22)
15Bo bafika mu Yelusalemu, u Yesu akinjila mu Nyumba iya Chala nukwanda pakubachimbizyamo abantu bosi babo bakaghulagha nukughulizya. Akaghalabulannya ututalati utwa baghulizannya indalama ni vitengo ivya bantu babo bakaghulizyanga inkunda. 16Atakitikizyanga yumo ukudumusannya palubinjilo ulwa Nyumba iya Chala bo anyamuye ichintu chimo. 17#Yes. 56.7; Yel. 7.11Po akanda pakubamanyisya abantu ukuti, “Amasimbo ghakuti, ‘Inyumba yane yikwiza pakwitiziwanga nyumba iyakwiputilamo abantu aba inko zyosi.’ Loli amwe mwayipela pakuba nyumba iyakuvwamilamo amavyondongo!”
18Abaputi abasongo na bamanyisi aba Ndaghilo bakivwa zinizi, po bakanda pakulonda izila iyakumughoghela u Yesu. Bakamunyilagha pakuti ichilundilo chosi chikaswigha nkani nu bumanyisi bwache.
19Bo kwanda pakwila, u Yesu na bamanyili bache bakepamo mukaya kala.
Ichimanyisyo icha chikuyu
(Mat. 21.20-22)
20Pisiku ilinji pandabindabi, bo bakwenda mumusebo, bakachennya ichikuyu. Chikuma ukwandila ku mani mupaka na magululuzi. 21U Pitala akakumbuka chicho chikabombiwa nukumubuzya u Yesu ukuti, “Wee Mumanyisi, ennya, ichikuyu chicho ukachighuna chumiye!”
22U Yesu akabamula akati, “Mubanje nu lwitiko mwa Chala. 23#Mat. 17.20; 1 Kol. 13.2Naloli nkubabuzya ukuti umuntu wesi yuyo akulibuzya lighamba ili ukuti, ‘Nyamuka nukwisumbila munyanja,’ nukusita ukwilamwa mumoyo wache, loli akusubila chicho anena ukuti chikwiza pakubombiwa, naloli chikwiza pakubombiwa. 24Pachifukwa ichi nkubabuzya ukuti bo mukwiputa nukulaba chimo kwa Chala, subila ukuti mwachipokela, po mukwiza pakupokela chosi chicho mwalaba. 25#Mat. 6.14-15Bo mukulonda pakwiputa, mubahobokelaye tasi abantu bosi babo babanangiye. Po Ughuso wepe yuyo ali kumwanya akwiza pakubahobokela imbibi zyinyu.”#11.25: Amasimbo ghamo aghakale ghonjelezya: 26 Nanti mutakubahobokela abamwinyu, Utata winyu kumwanya atakwiza pakubahobokela imbibi zyinyu. (Ennya mwa Mat. 6.15.)
Ilalusyo nizya bulaghili ubwa Yesu
(Mat. 21.23-27; Luk. 20.1-8)
27Bakiza sona mu Yelusalemu. Bo u Yesu akwenda bulo mu Nyumba iya Chala, abaputi abasongo, na bamanyisi aba Ndaghilo na balongozi aba Chiyuda bakiza kukwache 28nukumulalusya ukuti, “Nkimba bulaghili boni bubo uli nabo pakubomba zinizi? Nkimba wewenu akakupa ubulaghili bunubu?”
29U Yesu akabamula akati, “Leka imbalalusye ilalusyo lyoka bulo, po nanti mwanyamula, nkwiza pakubabuzya ubulaghili bubo indi nabo pakubomba zinizi. 30Mumbuzye, nkimba ubulaghili bubo u Yohani akozezyanga nabo bukafuma kwiyi: Kwa Chala pamo ku bantu?”
31Bakanda pakudalinkana benebene ukuti, “Nkimba tunganena ichoni? Nanti tukuti bukafuma kwa Chala, akwiza pakunena ukuti, ‘Choni chicho mutakamusubilagha u Yohani?’ 32Loli nanti tukuti, ‘Bukafuma ku bantu’ ” (Bakanyilagha abantu pakuti umuntu wesi akazimanya ukuti u Yohani akaba mulaghuzi wanaloli.) 33Po bakamwamula u Yesu bakati, “Awe, tutazimenye.” Po u Yesu akababuzya akati, “Nane bulo ntakwiza pakubabuzya ubulaghili bubo indi nabo ubwakubombela zinizi.”
Currently Selected:
Maliko 11: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
