Ubwandilo 2
2
1Po u Chala akamalizya pakupela kumwanya ni chisu ichapasi, sona na vyosi vivyo vikwikalamo. 2Pisiku lyaseveni u Chala akamalizya imbombo zyache zyosi zizyo akabombagha, akatuzya pisiku lyaseveni. 3Akalisaya isiku lyaseveni nukulipaghula pakuba lisayiwa, pakuti pisiku linili u Chala akatuzya pakubomba imbombo yache iyakupela ivintu vyosi. 4Ili lyo lipangwi ilyakulingannya namumo kumwanya ni chisu ichapasi vikapeleliwa.
Nizya mughunda uwa Edeni
Bo u Mwene u Chala apela kumwanya ni chisu ichapasi, 5pachisu ichapasi patakabapo nachimo ichibyalwa. Imbeyu zikaba zichili zitamelite, pakuti u Mwene u Chala akaba achili atatumite nayimo ivula, sona patakabapo nayumo umuntu uwakuti angalima ichisu chilachila. 6Loli amizi ghakabwibwituka pasi pachisu nukusembelela itope. 7#1 Kol. 15.45Po u Mwene u Chala akasenda itope nukumata umuntu. Akamufutila umuyi uwakupa ubumi mumpuno zyache, po umuntu yula akaba nubumi.
8U Mwene u Chala akalima umughunda uwa makwi mu Edeni kubufumilo bwizuba, po umuntu yuyo akamata nukumubika mulamula. 9#Ubv. 2.7, 22.2, 14U Mwene u Chala akamezya amakwi amiza aghakulekanalekana nukupa ivikomwa ivyiza. Pakasikasi pa mughunda ghulaghula pakaba ikwi ilyakupa ubumi, sona nikwi ilyakumanyila ubwiza nu bubibi.
10Ulusoko lulo lukendagha mu Edeni lo lulo lukasembelela umughunda ghula. Loli lukagabinkana pakuba isoko folo. 11Ulusoko lwakwanda we Pishoni, lukwenda umwakuchizyungulila ichisu icha Havila, 12kuko kukwaghiwako ugolide umwenecho, na mafuta aghakununkila, sona na mabwe aghamutengo. 13Ulusoko ulwabubili we Gihoni, lukwenda umwakuchizyungulila ichisu icha Kushi. 14Ulusoko ulwabutatu we Tigilisi, lukwenda kubufumilo bwizuba ubwa chisu icha Asiliya, po ulusoko ulwafolo we Yufuleti.
15Po u Mwene u Chala akamubika umuntu yula mumughunda uwa Edeni ukuti alimaye nukughusungilila. 16U Mwene u Chala akamubuzya umuntu yula akati, “Ungalya ivikomwa ivya mumakwi ghosi agha mumughunda ughu. 17Loli utakalyanje ivikomwa ivya mwikwi ilyakumanyila ubwiza nu bubibi. Pakuti nanti walyamo bulo, naloli ukwiza pakufwa.”
18Po u Mwene u Chala akati, “Te chiza ukuti umuntu ikalaye mwene. Nkwiza pakumupangila umwavwilizi.”
19U Mwene u Chala akasenda itope nukumata ivinyamana ivyakulekanalekana, sona ni viyuni vyosi. Po akiza navyo kwa Adamu#2.19 Adamu: Mu Chihebeli kokuti, umuntu. ukuti avyite amatabwa. Umu momumo akavyitila amatabwa ghabo. 20Po umuntu yula akavyita amatabwa iviyuni vyosi, sona ni vinyamana vyosi.
Loli pope bulo chitakabapo nachimo chicho chikaba chakumubaghila pakumwavwa umuntu yula. 21U Mwene u Chala akamughoneka u Adamu utulo utwakufwa nato. Bo aghonite, akasendapo ulubazu lumo ulwa muntu yula nukumatapo ni nyama. 22U Mwene u Chala akamata umukolo nu lubazu lulalula nukwiza nawe kwa Adamu yula. 23Po u Adamu akati,
“Uyu naloli we lifupa ilya mafupa ghane,
sona we nyama iya nyama yane.
Akwiza pakwitiziwanga ukuti, ‘Mukolo,’
pachifukwa ichakuti afuma ku mwanavuli.”
24 #
Mat. 19.5; Mlko. 10.7-8; 1 Kol. 6.16; Efe. 5.31 Pachifukwa chinichi, umwanavuli akwiza pakumuleka uwise nu nyina nukumamatilana nu muchi wache, sona abantu babili aba bakwiza pakuba mubili ghoka.
25U Adamu nu muchi wache bosi poka bakaba nkule, loli batakaba ni soni.
Currently Selected:
Ubwandilo 2: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
