MARKUS 16

Isa attallasa muliang

16:1-8

(Mat. 28:1-10; Luk. 24:1-12; Yah. 20:1-10)

1Sungka'i allalomo allo hattu passambajangang injo, Maria Magdalena na maria idonna Yakobus surang Salome mange ammalli rampa-rampa lalaerangi mange ri kuburu na lalaminnyakii Isa. 2Ngesalakale juapai ri allo makase'rena ri sijumaa injo, ri ampana ambassi' matanna allo, a'lampaimu mange ri kuburu. 3Allagarimu, lakua, ”Inaimo laladoluangki batu bakka' panongko' babaanna kuburu injo?” 4Mingka rihattu seppakinnamo ri kuburu injo, kajanjangammu ma'nassana batu injo maemmu ta'dolu ri babaanna kuburu injo. Batu injo sanna' bakka'na. 5Jari antamakimu ri kuburu injo na lajanjangi rie' se're tau taruna make baju bakka' pute attolong ri sa'ri kanang. Jari sanna' ta'bangkainna, 6mingka appaui taruna injo mange ri iyai, ”Akomo mallaki! Kau mubojai Isa tau nazaret injo, Turisalli' injo. Ia attallasai muliang. Ia tide'mu ri inni. Janjangi! Iamo inni tampa'na lapaonrangi Isa. 7#Mat. 26:32; Mark. 14:28Mingka konni-konnina a'lampaimoko, na jarrungiangi mange risikonjo ana'-ana' gurunNa na mange ri Petrus. Ia riolomu mange ri Galilea; konjopai mange mujanjangi Isa, assimpole numaeng injo lapau Isa mange ri kaui.” 8Jari ansulukangimu na lari labokoi kuburu injo, saba' benterinna na lakahasainna rikajariang injo. Jari gelemu lapau-pau manna mange ri se're tau saba' sanna' mallakinna.

[Bodo juai pappasang injo lajarrungiang mange ri Petrus na urang-uranna. Maeng injo Isamo lalang ripassabakang suro-suroNa lapala'bangi battu raja sa'genna kalau' kareba Tangkasa inni na gele akkulle ripakamate passala kasalamakang mannannungang injo.]

Pinsikurangi Isa lapappijanjangang kalenNa na lasuroi ana'-ana' gurunNa Nai'mu Isa ri Suruga

16:9-20

[9Sungka'i attallasamo muliang Isa ringesalakalena juapa ri allo makase'rena ri sijumaa injo, Ia pakaramulamu lapappijanjangang kalenNa mange ri Magdalena. Isa maengi angga'gara setang battu ri ia. 10Jari bahine injo tulusu a'lampai lapappiissekang mange ri iyai tuminahang injo ri Isa riolo na rihattu injo attangngai pa'risi kamateang na apparaui. 11Mingka rihattu lalangngerinna ma'nassana attallasai Isa muliang na maemmu kajanjangang ri ia, gelemu tappa'.

12Rimaennamo injo Ia lapappijanjangi kalenNa lalang tappa maraeng mange ri rua ana' gurunNa, rihattunna attangnga lalangi ansulukang kota. 13Jari muliangimu na lapanjarrungangi mange ri ana' gurung maraeng injo, mingka manna iyai pole gele tappa' mange ri tau rua injo.

14Rikala'busanna Ia lapappijanjangangi kalenNa mange ri sampuloiya se're suro-suroNa rihattu attangngana nganrei, na Ia lasalla ngase'i pagelena tappa' na paterasa'na atina, rikanara gelena tappa' mange risikuanna tau maeng injo anjanjang ri Ia rihattu attallasa'Namo muliang battu rikamateang. 15#Suro-suro 1:8Jari appaui Isa mange ri iyai, ”A'lampamoko mange risibatu lino, pala'bangi Injili mange risikonjo mahallo'. 16Inai tappa' na ririo languppai kasalamakang, mingka inai gele tappa' larihukkungi. 17Tanra-tanra inni lalapinahangi sikuanna tau tappa': Akkulle angga'gara setang passabakang arengKu, iyai la'bisara lalang rita'ra pa'bisara bau, 18laneteng saa, na manna nginungi rasung appakamate, gelejuai languppa kasilakaang; lambarakkaki sikuanna tau garring, na tau injo akkulle gassing.”

19 # Suro-suro 1:9-11 Rimaenna Karaeng Isa a'bisara appakonjo ri iyai, tarangka'mu nai' ri Suruga, ampai attolong risa'ri kananNa Allataala. 20Na iyai a'lampaimu appala'bang Injili mange risibatu lino, na Karaeng minahangi anjama na lapakasa'ga'i pauNa injo lalang ritanra-tanra lapinahangi injo.]

Currently Selected:

MARKUS 16: LAI_SLY

Highlight

Copy