MATIUS 7

Passala appassala

7:1-5

(Luk. 6:37-38, 41-42)

1”Ako appassala, solanna geleko ripassala. 2#Mark. 4:24Saba' lalang riappassala mupake injo lappassala, kau laripassala na passuka' mupake injo lanyuka', laripisukakiang mange ri kaui. 3Ngura kau anjanjang baru'bu' kaju ri matanna urang siana'mu, na balo' ri matammu gele muisse'? 4Anteeko kamua akkulle appau mange ri urang siana'mu: Kupasulukangko baru'bu' kaju rie' intu ri matammu, na rie' balo' lalang ri matammu? 5Oe tau munape', pasulu'i riolo balo' rie' injo ri matammu, jari sinara panjanjammu lappasulu' buru'bu' kaju rie' injo ri matanna urang siana'mu.”

Passala nutangkasa na nurie' anggaranna

7:6

6”Ako assare pa'barang-barangang tangkasa mange ri asu na ako pabuangi muttiaramu mange ri bahi, solanna andai lalisa'-lisakang ri bangkenna, ampai a'giling ri kau lalokokiko.”

Passala ripangera doawaang

7:7-11

(Luk. 11:9-13)

7”Erai, jari ripassareangi mange ri kaui; bojai, languppako; katto'i, jari ripambungkarangiko. 8Saba' sikuanna tau ngera, lanarima na sikuanna tau a'boja languppa na sikonjo tau akkatto', laripambungkarang. 9Rie'ka battu ri kaui intu assare batu mange ri ana'na, ampa ia ngera kanre, 10iyareka assare saa, ampa ngerai juku'? 11Jari, ampa kau tudaa intu sipa'na ngisse' assare nubaji' mange ri ana'-ana'mu, la'bipa pole Ammammu ri suruga! Ia lassare nubaji' mange ri iyai tungera injo mange ri Ia.”

Pa'lalangang naba

7:12-14

12 # Luk. 6:31 ”Sikuanna numukaa'raki solanna lageokang tau mange ri kau, geokang appakonjo todo'i mange ri iyai. Iamo injo assinna sikuanna hukkung Tora' na kitta'na sikonjo nabbi.

13 # Luk. 13:24 Antama'ko ri babaang seppang, saba' la'ba'i babaang na luara lalang lamange rikamateang, na lohe tau antama' a'molong ri injo; 14saba' seppanna babaang na seke'i pa'lalangang lamange rikatallasang, na siso'di' tau lakulle.”

Passala pangajara lingu

7:15-23

15”Tutulaloko mange ri nabbi palusu rie' injo mange ri kau surangang assimpole jimbala, mingka sitoje'na iyai injo asu borong. 16Battu rihassele'na iyai lamuisse'. Akkulleka tau inni anduru anggoro battu ri poong katinting iyareka bua kaju ara battu ri poong lansoga? 17Appakonjomu sikonjo poong kaju baji' appabattu hassele bua baji', na poong kaju gele injo baji' appabattu bua nugele baji'. 18Gele ma'ring poong kaju baji' appabattu nugele baji', iyareka poong kaju nugele baji' appabattu nubaji'. 19#Mat. 3:10; Luk. 3:9Sikonjo poong kaju nugele injo appabattu hassele nubaji', tantu larita'banna na laripabuangi antama' ri api. 20#Mat. 12:33Jari, battu rihassele'namo iyai lamuisse'.

21Gele sikuanna tau a'keo' ri Nakke: Karaeng, Karaeng! Lantama' ri Pakkaraengang Suruga, mingka tau anggeokang injo jua a'ra'na AmmangKu ri suruga. 22Ri allo kala'busang lohe tau la'nga'ngara mae ri Nakke: Karaeng, Karaeng, gelejua kambe inni maeng assare panjanjang passabakang aremMu, na angga'garakang setang lalang aremMu, na a'bua' lohe kajariang nugele samara passabakang riaremMu todo'? 23#Mzm. 6:9Rihattu injomo Nakke lalambusu mange ri iyai na appau: Nakke geleko minang kuisse'! A'lampako battu ri a'rakangKu, kau ngase' tau anggeokang intu sipa' daa!”

Rua rupanna pallangga

7:24-27

(Luk. 6:47-49)

24”Jari, sikuanna tau allangngere pauKu na lageokangi, ia assimpole tau sara'de', nulapaenteng injo saponna ribaho batu. 25Maeng injo turummu bosi na rie'mo a'ba bakka', jari ngiri'mu anging ka'bu lataba sapo injo, mingka sapo injo gele anra'ba saba' ripaentengi rate ri batu. 26Mingka sikuanna tau allangngere injo pauKu inni na gele lageokang, ia assimpole tau ba'ga, nulapaenteng injo saponna ribaho bone. 27Maeng injo turummu bosi na rie'mo a'ba bakka', jari ngiri'mu anging ka'bu lataba sapo injo, jari anra'bamu sapo injo na sanna' panra'na.”

Panguppa ri tuallangngere'na

7:28-29

28 # Mark. 1:22; Luk. 4:32 Sungka'na Isa latongko' pau inni, takkajanna' tau lohe injo lalangngere'na pangajaranNa, 29saba' Ia ngajara ri iyai assimpole tau kahasa, gele assimpole guru Tora' ri iyai.

Currently Selected:

MATIUS 7: LAI_SLY

Highlight

Copy