MATIUS 22

Pakkalebarang ripassala panganre ripa'bontingang

22:1-14

(Luk. 14:15-24)

1Jari a'bisarai pole Isa lalang pakkalebarang mange ri iyai, 2”Passala Pakkaraengang Suruga ripakkalebarangi se're karaeng laappakanre ripa'bontingang ana'na. 3Ia lasuro sikonjo atanna mange laboja tau maeng injo lakeo' langanre ripa'bontingang injo, mingka sikuanna tau maeng injo rikeo' gele a'ra' battu. 4Ia lasuro pole sikonjo ata maraenna, pappasanna: Paui mange risikuanna tau maeng injo rikeo': Sitoje'na, maemmu kupakasadia ngase', sapi na binantang piaraang maraengku maemmu kusumbele; tassadia ngase'mu, mae ngase'moko mae langanre ripa'bontingang inni. 5Mingka tau maeng injo riboja gelei lapaduli; rie' tua'lampa ri kokonna, rie' tua'lampa mange lajama jama-jamaanna, 6na tau maraeng injo lajakkalai sikonjo ata injo, lasissai ampai lahunoi. 7Sarro kuku'na karaeng injo, jari lasuro ngase'mu tubaranina mange konjo lalahuno todo'i pahuno-huno injo na lasussulu kota pammariannai. 8Maeng injo ia appaui mange risikonjo atanna: Panganreang pa'bontingang maeng tassajimu, mingka tau maeng rikeo' injo sumpae' gelei siratang ri injo. 9Injomo saba'na, a'lampaimoko mange risikonjo pappengkaang lalang na keo'i mae konni sikuanna tau murumpa' ri injo lamange ripanganreang pa'bontingang inni. 10Jari a'lampaimu ata injo na laurang ngase'mu sikuanna tau larumpa' injo ri lalang, tau daa injo geo'na na tau baji' injo geo'na, jari rassimu tampa' panganreang injo ri toana. 11Rihattunna karaeng injo antama' lassijanjang sikonjo toananna, ia anjanjangi se're tau gele makeang pa'buaki. 12Jari appau karaeng injo mange ri ia: Oe urang siana', ngura antama'ko mae konni na geleko makeang pa'buaki? Mingka gele appihali tau injo. 13#Mat. 8:12, 25:30; Luk. 13:28Jari appaumu karaeng injo mange risikonjo atanna: Sokke'i bangkenna surang limanna na pabuangi tau intu antama' rikalammang akkapu' injo, ri injomo larie' kalangngerang parau na gigi a'rekuki.

14Saba' lohe turikeo', mingka so'di' turipile.”

Passala a'bajara bea mange ri Pamarenta

22:15-22

(Mark. 12:13-17; Luk. 20:20-26)

15Maeng injo a'lampaimu tau Farisi na a'rundingi anteekamua na akkulle lasikko' Isa rise're pakkuta'nang. 16Lasuroimu ana'-ana' gurunna assurang-surang tau Herodian lakkuta'nang mange ri Ia, ”Guru, baji' taisse'na, Ditte se're tau lambusu na lambusui ripangajara a'ra'na Allataala na Ditte tide' tau rikamallaki, saba' Ditte gele a'ra' riare'. 17Paulaloi mae ri kambe panguppaTa: Apa ripakkulleangi a'bajara bea mange ri pamarenta Roma iyareka gele?” 18Mingka Isa latarrusui ati daanai injo jari appaui, ”Oe tau munape', ngura Nakke musso'ri? 19Erangi mae ri Nakke doe' seeng pa'bajara bea intu.” Ngerangimu mange ri Ia se're doe' seeng. 20Jari akkuta'nangi Isa mange ri iyai, ”Gambara na arenna inai inni?” 21Pappihalinnai, ”Gambara na arenna Kaisar.” Jari appaui Isa mange ri iyai, ”Sareangi Kaisar apa nusiratang mupassareang ri Kaisar na mange ri Allataala apa nusiratang mupassareang ri Allataala.” 22Lalangngere'na injo kaliruimu na labokoi Isa ampai a'lampa.

Passala attallasa muliang rikamateang

22:23-33

(Mark. 12:18-27; Luk. 20:27-40)

23 # Suro-suro 23:8 Ri allo injo lohemo tau Saduki mange ri Isa, nupanguppana ma'nassana gele rie' tau attallasa muliang rikamateang. Akkuta'nang ngase'i mange ri Ia: 24#Ul. 25:5”Guru, Musa lapaui ma'nassana ampa rie' se're tau mate na tide'pa ana'na, urannamo siana' parallu labontingi bahinenna injo laassare pinangka' ri uranna siana'. 25Mingka ri kambe rie' tau tuju assiana'. A'bontingi tulihua injo, mingka maenna injo matemu. Saba' tide'pa ana'na, ia labokoi bahinenna injo mange ri uranna siana'. 26Appakonjo todo'i tumakarua injo na tumakatallu sa'genna tumakatuju. 27Kamaenganna, sungka'i mate ngase', mate tommo bahine injo. 28Inaimo ri tau tuju injo laa'jari bura'nenna bahine injo rihattu attallasa injo muliang rikamateang? Saba' maeng ngase'i labontingi.” 29Appihali Isa mange ri iyai, ”Linguiko, saba' gele mupahang Kitta' Tangkasa iyareka kahasana Allataala! 30Saba' rihattu attallasa injo muliang rikamateang, iyai injo gelemu labonting na gele tommo laripa'bontingang mingka laattallasai assimpole malaeka' ri suruga. 31Mingka passala attallasa'na muliang rikamateang sikuanna tau mate geleka maeng muaji nulapau injo Allataala, rihattunna Ia appau: 32#Kel. 3:6Nakkemo Allataalana Abraham, Allataalana Ishak na Allataalana Yakub? Ia gelei Allataala ri tau mate, mingka Allataala ri tau attallasa.” 33Tau allangngere injo lannasa ngase'mu mange ripangajaranNa.

Poong parenta

22:34-40

(Mark. 12:28-34; Luk. 10:25-28)

34Rihattunna lalangngere tau Farisi injo ma'nassana Isa maemmu lapakagele akulle appau tau Saduki injo, asse're ngase'mu 35na rie' se're tau ri iyai, se'rei guru Tora', akkuta'nang lasso'ri ri Ia, 36”Guru, anteeang poong parenta lalang ri hukkung Tora'?” 37#Ul. 6:5Pappihalinna Isa mange ri ia, ”Passukku'i pangamaseammu mange ri Karaeng Allataalamu, risiganna'na atimu surang nyahamu na harasiamu. 38Iamo injo poong parenta na makase're. 39#Im. 19:18Parenta makarua, nuassimpole injo, iamo intu: Kamaseangi parammu rupatau assimpole mukamaseanna kalemmu. 40Ri ruaiya inni parenta rie' ngase'mu sikonjo hukkung Tora' surang kitta'na sikonjo nabbi.”

Passala Almase na Daud

22:41-46

(Mark. 12:35-37; Luk. 20:41-44)

41Rihattunna asse'rei tau Farisi injo, akkuta'nangi Isa mange ri iyai, 42”Anteekamua panguppamu ripassala Almase? Ia inai Ana'?” Appauimu mange ri Ia, ”Ana'na Daud.” 43PauNa mange ri iyai, ”Ampa appakonjo, anteekamua Daud ripangajara'na Nyaha Tangkasa akkulle laare' Ia injo Karaenna, rihattunna ia appau:

44 # Mzm. 110:1 Karaeng Allataala maengi appau mange ri tungataingku:

attolommoko risa'ri kanangKu,

sa'genna sikonjo balimMu Kutaro rahanganna bangkemMu.

45Jari, ampa Daud laare'i Ia injo Karaeng, anteekamua lama'ring Ia ana'na todo'?” 46Gele rie' manna se're tau akkulle appihali ripakkuta'nanNa, na pakaramula rihattu injo gelemo rie' manna se're tau barani akkuta'nang mange ri Ia.

Currently Selected:

MATIUS 22: LAI_SLY

Highlight

Copy