MATIUS 16

Tau Farisi na tau Saduki ngera tanra.

16:1-4

(Mark. 8:11-13)

1 # Mat. 12:38; Mark. 8:11; Luk. 11:16 Maeng injo rie'mo lohe tau Farisi na tau Saduki injo a'ra' laso'ri Isa. Laerai solanna Ia appappijanjangangi se're tanra battu ri Suruga mange ri iyai. 2#Luk. 12:54-56Mingka appihali Isa, ”Ri karahie'na saba' ejai langi', mukua: Labaji' hattu, 3na ringesala'na, saba' ejai langi' na sammangi, mukua: Ladaa hattu. Tanja'na langi' muisse'i mupassisa'lakang mingka sikonjo tanra jammang gelei muisse'. 4#Mat. 12:39; Mark. 8:12; Luk. 11:29Tau daa sipa'na na tau gele inni mallang a'bojai se're tanra. Mingka mange ri iyai gelei larisare tanra rimaraenganna tanra ri Nabbi Yunus.” Maeng injo Isa labokoi ngase'i na a'lampai.

Passala bibi tau Farisi na Saduki.

16:5-12

(Mark. 8:14-21)

5Rihattu ambatunamo ana'-ana' gurunna Isa ha'leang tamparang la'ba, lakaluppai ngerangi roti. 6#Mark. 8:15; Luk. 12:1Appaui Isa mange ri iyai, ”A'jaga-jaga na tutulaloko mange ri bibina tau Farisi na Saduki.” 7Jari appikki'-pikkiri ngase'mu na allagarai, ”Lapaui injo Isa kanara geleta ngerang roti.” 8Rihattu laisse'na Isa apa lalagari, ”Ia appaui, Ngura mulagara passala tide'na roti? Oe tau pa'bata-bataang! 9#Mat. 14:17-21Gele juapai pole mupahang? Geleimuka muu'rangi roti limambatu lappakanre limansa'bu tau na sikura baku' la'binna rimuparappunginna sungka'i maengimo nganre? 10#Mat. 15:34-38Iyareka ri roti tujumbatu lappakanre patansa'bu tau na sikura baku' la'binna rimuparappunginna sungka'i maengimo nganre 11Anteepai kamua lama'ring gelepa mupahangi ma'nassana Nakke appau mange ri kaui gele passala roti? Tutulaloko mange ri bibina tau Farisi surang Saduki.” 12Rihattu injo ampamu lapahangi ma'nassana nulakuangang injo Isa gele solanna tutu mange ri bibi roti, mingka mange riajaranna tau Farisi surang Saduki.

Pangakuanna Petrus

16:13-20

(Mark. 8:27-30; Luk. 9:18-21)

13Sungka'i ambattu Isa ri tana Kaisarea Filipi, Ia akkuta'nangi mange ri ana'-ana' gurunNa, ”Lakua tauiya, inai injo Ana' Rupatau?” 14#Mat. 14:1-2; Mark. 6:14-15; Luk. 9:7-8Pappihalinnai, ”Rie' tau appau: Yahya pario, tumaraeng appau: Elia na rie' pole tumaraeng appau: Yeremia iyareka sala se're risikonjo nabbi.” 15Jari akkuta'nangi Isa mange ri iyai, ”Mingka apa paumu, inaika Nakke inni?” 16#Yah. 6:68-69Appihali Simon Petrus, ”Kaumo Almase, Ana' Allataala!” 17Appaui Isa mange ri ia, ”Sunggulaloko Simon ana'na Yunus saba' gele rupatau appau mange ri kau, mingka AmmangKu ri Suruga. 18Na manna nakke appau mange ri kaui: Kaumo Petrus na ribahonna batu rijang inni Nakke lappaenteng jamaahKu na gele lakanre mate. 19#Mat. 18:18; Yah. 20:23Mange ri kau Kupassareang konsing Pakkaraengang Suruga. Apa muka'ba' ri lino inni lata'ka'ba'i ri Suruga na apa mula'biang ri lino inni lata'la'biangi todo'i ri Suruga.” 20Maeng injo appaui Isa mange ri suro-suroNa solanna gele lapau manna mange rise're jua tau ma'nassana Iamo Almase.

Pakaramulana lapappiissekang passala Kasissaanna Isa na sara'na minahang ri Ia

16:21-28

(Mark. 8:31–9:1; Luk. 9:22-27)

21Pakaramula rihattu injo Isa lapappiissekangi mange ri ana'-ana' gurunNa ma'nassana Ia parallui laa'lampa mange ri Yerusalem na lananggongi lohe kasissaang battu ri tutoa-toa, risikonjo imang ponggaha na risikonjo guru Tora', ampai rihuno na attallasai muliang ri allo makatalluna. 22Mingka Petrus labeso'i Isa mange risa'ri na pakaramulamu appisangka mange ri Ia lalang risa'ra bakka', ”Karaeng, bisannabali lapakadere Allataala passala injo! Passala injo geleKo lalataba.” 23Jari gilingi Isa na appaui mange ri Petrus, ”A'lampako Ibilisi. Kau a'jari se're batu pangampang ri Nakke, saba' gele mupikkiri nulapikkiri injo Allataala, passangadinna nulapikkiri injo jua rupatau.”

24 # Mat. 10:38; Luk. 14:27 Maeng injo appaui Isa mange ri ana'-ana' gurunNa, ”Ampa rie' se're tau a'ra' minahang ri Nakke, parallui lasangkali kalenna, lasompo salli'na na minahangi ri Nakke. 25#Mat. 10:39; Luk. 17:33; Yah. 12:25Saba' inai a'ra' lapakasalama' nyahana, ia parallui tappela' nyahana; mingka inai tappela' nyahana passabakang Nakke, ia lalauppai muliang. 26Apa matu-matunna se're inni tau lauppa ngase'i sibatu lino mingka tappela'i nyahana? Apamo akkulle risareangi a'jari passambe nyahana? 27#Mzm. 62:13; Mat. 25:31; Rom. 2:6Saba' Ana' Rupatau larie'i lalang kala'birang AmmanNa larurung sikonjo malaeka'Na; rihattu injo Ia lalabalasai sikuanna tau assituru' panggeokanna. 28Sitoje'na Nakke appau mange ri kaui: Risikuanna tau ri inni rie' tugele lamate rigelenapa maeng anjanjang Ana' Rupatau battu a'jari Karaeng lalang ri PakkaraenganNa.”

Currently Selected:

MATIUS 16: LAI_SLY

Highlight

Copy