MATIUS 13

Pakkalebarang passala rise're palamung

13:1-23

(Mark. 4:1-20; Luk. 8:4-15)

1Ri allo injo asulukangi Isa battu ri sapo injo na attolongi ribiring tamparang la'ba. 2#Luk. 5:1-3Maeng injo riekimu tau lohe injo a'rurung-rurung na a'domung ri Ia, sa'genna Ia nai' ri lopi na attolongi ri injo, na tau lohe injo ammenteng ngase'i ri biring bone. 3Ia lohe lapau passala lalang ripakkalebarang mange ri iyai. PauNa, ”Rie'mo se're palamung ansulu' lamange a'lamung. 4Rihattunna ia a'lamung, sidahuang lamunganna a'dappe' ri biring lalang, maeng injo rie'mo jangang-jangang lakanre sa'genna la'busu. 5Sidahuang a'dappe' ri tana demmapara, nugele lohe tanana, jari attimbomu lamungang injo, saba' so'di' assi tanana. 6Mingka sungka'i bambang allo, lajumu lamungang injo na a'jari kalotoro saba' tide' aka'na. 7Sidahuang pole a'dappe' ri tangngana rompo' bunga jabe, jari pela' bakka' bunga jabe injo na labohongi sa'genna mate. 8Sidahuang a'dappe' ri tana so'mo' jari baji' pambuana: rie' nua'lappi sibilangang, rie' nua'lappi annampulo, rie' nua'lappi tallumpulo.

9Inai rie' tolinna, sibaji'na ia appilangngeri!”

10Maeng injo riekimu suro-suroNa na akkuta'nangi mange ri Ia, ”Ngura Ditte appau mange ri iyai lalang ripakkalebarang?” 11Appihali Isa, ”Mange ri kaui risare barakka' langisse' harasia Pakkaraengang Suruga, mingka gele mange ri iyai. 12#Mat. 25:29; Mark. 4:25; Luk. 8:18, 19:26Saba' inai rie' anunna, mange ri ia larisare sa'genna kala'bi-la'biang; mingka inai tide' anunna, apa jua rie' ri ia larialle ngase'i ri ia. 13Iamo injo saba'na Nakke appau lalang ripakkalebarang mange ri iyai; saba' manna rie' matanna, iyai injo gelejuai anjanjang, manna rie' tolinna, iyai injo gelejuai allangngere na gele laisse'. 14#Yes. 6:9-10Jari, mange ri iyai a'rupamu panjanjanna Yesaya nulakua injo:

Kau laallangngere na laallangngere, mingka gele muisse',

kau laanjanjang na laanjanjang, mingka gelei lamupahang.

15Saba' babbalamu atina bangsa inni,

na tolinna bera'mu laallangngere,

na matanna attutu' rapa'mu;

solanna iyai injo andai anjanjang matanna

na allangngere tolinna

na appahang atina,

jari gilingi sa'genna Nakke appakabaji' ri iyai.

16 # Luk. 10:23-24 Mingka sunggulalo matammu saba' anjanjangi na tolimmu saba' allangngere. 17Saba' sitoje'na Nakke appau mange ri kaui: Lohe nabbi na tau naba a'ra' anjanjang apa numujanjang injo, mingka gele lajanjangi, na a'ra'i allangngere apa rinumulangngeri injo, mingka gelei lalangngeri.

18Injomo saba'na, pilangngeri battuanna pakkalebarang palamung injo. 19Mange risikuanna tau allangngere pau ripassala Pakkaraengang Suruga, mingka gele lapahang, rie'mu tudaa injo sipa'na na laalle nuripatahuru injo lalang ri atina tau injo; iamo injo lamungang nuripatahuru injo ri biring lalang. 20Lamungang nuripatahuru injo ri tana demmapara iamo intu tau allangngere injo pau na lassiri latarima lalang karannuang. 21Mingka ia tide' aka'na na sinampe' juai attahang. Ampa rie' pama'ri-ma'risi iyareka passissa kanara ripau injo, tau injo lassirimu attinrang boko. 22Nuripatahuru injo ri rompo' bunga jabe iamo intu tau allangngere pau, maeng injo kabata-bataang lino inni na pappalingu kakalumannyangang labohong pau injo sa'genna tide' buana. 23Nuripatahuru injo ri tana so'mo' iamo intu tau allangngere pau na lapahangi, na injomo saba'na lohe buana, rie' nua'lappi sibilangang, rie' nua'lappi annampulo, rie' nua'lappi tallumpulo.”

Pakkalebarang passala rea ripassa'lakanna bae gandong

13:24-30

24Isa appabattu pole se're pakkalebarang maraeng mange ri iyai, pauNa, ”Passala Pakkaraengang Suruga injo assimpole tau appatahuru lamungang bae gandong ri kokonna. 25Mingka rihattu tinro ngase'na sikuanna tau, rie'mu balinna appatahuru lamungang rea ripassa'lakanna bae gandong injo, ampai a'lampa. 26Rihattunna bae gandong injo attimbo na pakaramula a'bullere, kajanjangang todo'mu rea injo. 27Jari riekimu atanna opuna koko injo mange ri ia na lakua: Karaeng, gelejua lamungang bae gandong ngase', nuripatahuru injo ri kokonta karaeng? Jari, battu riapai mae rea injo? 28Pappihalinna karaeng injo: Rie' se're tau bali lageokangi. Jari appaumu ata injo: Jari, a'ra'ki Karaeng solanna kambe a'lampa tabu'bu' rea injo? 29Mingka ia appau: Ako, saba' ma'ringi bae gandong injo minahang ta'bu'bu' rihattu mubu'bu'na rea injo. 30Lappasammu ruaiya assipattimboang sa'genna larapi' hattu panduru. Rihattu injomo nakke laapaua mange risikonjo paduru: Parappunglalo riolo rea intu na ka'ba' tassitetengangi laritunu; maeng injo parappungi bae gandong injo lalang ri palampangku.”

Pakkalebarang passala lisere sinahu na bibi

13:31-35

(Mark. 4:30-34; Luk. 13:18-21)

31Appabattui pole Isa se're pakkalebarang maraeng mange ri iyai, pauNa, ”Passala Pakkaraengang Suruga assimpole lisere sinahu, nurialle na latahurui tau ri kokonna. 32Toje'i lisere injo kaminang ki'di' risikonjo lamungang, mingka ampa bakka'mu, sinahu injo kaminang bakka' battu risikonjo gangang-gangang maraeng, la'bipa pole a'jari poong kaju, sa'genna jangang-jangang injo riekii a'bua' poo ri pangka-pangkana.”

33Ia lalagara todo'i pakkalebarang inni mange ri iyai, ”Passala Pakkaraengang Suruga injo assimpole bibi nulaalle tau bahine na lakaleo'i lalang ri labu' tarigu patampulo litere lohena sa'genna assoho ngase'.”

34Iangase'na injo lapabattui Isa mange ri tau lohe lalang ripakkalebarang, na ampa tide' pakkalebarang manna se're gele rie' lapabattu Isa mange ri iyai, 35#Mzm. 78:2solanna ripa'rupa pau nulapabattu injo nabbi,

”Nakke a'ra'i kubungkara babaKu laappabattu pakkalebarang,

Nakke a'ra' laapau passala nutassa'bu pakaramula ripaa'jarina lino inni.”

Panyinari ripakkalebarang rea ripassa'lakang bae gandong

13:36-43

36Rimaenna injo Isa a'lampai labokoi tau lohe injo, ampai muliang. Ana'-ana' gurunNa minahangi na akkuta'nangi ri Ia, ”Sinarisai mae ri kambe pakkalebarang passala rea ripassa'lakang bae gandong rie' injo ri koko.” 37Ia appihali, ”Tau Appatahuru injo lamungang bae gandong iamo intu Ana' Rupatau; 38koko iamo intu lino inni. Lamungang bae gandong injo iamo intu ana'-ana' Pakkaraengang na rea injo iamo intu ana'-ana' ri tudaa sipa'na. 39Bali appatahuru injo lamungang rea iamo intu Ibilisi. Hattu panduru iamo intu jammang kala'busang na paduru injo iamo intu malaeka'. 40Jari, assimpole rea injo riparappung na ritunu lalang ri api, appakonjo todo'i rihattu jammang kala'busang. 41Ana' Rupatau lassuro risikonjo malaeka'Na na iyai lalaparappungi battu lalang ripakkaraenganNa sikonjo nulapassabaki tau inni doraka na sikuanna tau anggeokang sipa' daa. 42Iangase'na injo laripamballung antama' ri pappalluang gele injo mate apinna; ri injomo larie' parau na gigi a'rekuki. 43Rihattu injomo sikuanna tau naba laassau assimpole matanna allo lalang ri Pakkaraengang Ammannai. Inai rie' tolinna, sibaji'na ia appilangngeri.”

Pakkalebarang passala pa'barang-barangang ta'loangang na muttiara lohe anggaranna

13:44-46

44”Passala Pakkaraengang Suruga assimpole pa'barang-barangang ta'loangang ri koko, nulauppa tau, maeng injo laloangangi muliang. Passabakang rannuna ia a'lampai labalukang ngase' anunna ampai lahalli koko injo.

45Appakonjo todo'i passala Pakkaraengang Suruga assimpole se're padanggang nua'boja injo mutiara ballo. 46Sungka'i larumpa' muttiara lohe injo anggaranna, ia a'lampai labalukang ngase' anunna ampai lahalli muttiara injo.”

Pakkalebarang passala lanra' lambere

13:47-52

47”Appakonjo todo'i passala Pakkaraengang Suruga injo assimpole lanra' lambere ritantang ri tamparang, jari ngallemu lohe rupanna juku'. 48Sungka'i rassi, lanra' injo larenremmu tau anrai' ribonto, jari attolong ngase'mu na laparappung juku' baji' injo lalang ri talle na nugele injo baji' lapelaki. 49Appakonjo todo'i rijammang kala'busang: Sikonjo malaeka' larie' appassisa'la' tau daa na tau baji' sipa'na, 50maeng injo lapamballung tau daa injo sipa'na antama' ri pappalluang gele injo mate apinna; ri injomo larie' parau na gigi a'rekuki.

51Mupahangi jua iangase'na injo?” Appihali ngase'mu, ”Io', kambe tapahammu.” 52Jari appaui Isa mange ri iyai, ”Injomo saba'na, sikonjo guru Tora' narima injo pappilajarang passala Pakkaraengang Suruga injo assimpole opu sapo appasulu' pa'barang-barangang bau na nutoa battu ri panaroanna.”

Isa ritolla' ri Nazaret

13:53-58

(Mark. 6:1-6; Luk. 4:16-30)

53Sungka'na Isa maemmo labisara sikonjo pakkalebarang injo, Ia a'lampai battu ri injo. 54Sungka'i ambattu ri tampa' assala'Na, Isa ngajarai lohe tau ri injo lalang ri sapo passambajangannai. Jari takkajanna' ngasekimu na lakua, ”Battu ri antee mae Ia nguppa pangisse' na kahasa langgeokang sikonjo kajariang nugele samara? 55Gelejua Ia inni ana' tukang kaju? Gelejua idonNa arenna Maria na uranNa siana': Yakobus, Yusuf, Simon na Yudas? 56Na gelejua urang siana' bahineNa rie' ngase'i assurangang ri ditte? Jari, battu ri antee mae Ia nguppa iangase'na injo?” 57#Mark. 6:4; Luk. 4:24; Yah. 4:44Jari iyai injo latolla'i Isa. Maeng injo Isa appau mange ri iyai, ”Se're nabbi rikangalikangi ri antee-tee mae, passangadinna ri tampa' assala'na to'jua na ri saponna.” 58Saba' iyai injo gele tappa', jari gele lohe kajariang nugele samara lapaa'jari Isa ri injo.

Currently Selected:

MATIUS 13: LAI_SLY

Highlight

Copy