LUKAS 4

Passo'ri ri parang luara

4:1-13

(Mat. 4:1-11; Mark. 1:12-13)

1Isa, Turassi injo Nyaha Tangkasa, muliammu battu ri Balang Yordan, ampai rierang ri Nyaha Tangkasa mange ri parang luara. 2Ri injo patampuloi allo sallona Ia riso'ri ri Ibilisi. Ri injo Ia gele minang nganre manna siso'di' na rimaennamo injo pa'reMu. 3Jari appaui Ibilisi mange ri Ia, ”Saba' Kau Ana' Allataala, suroi batu-batu inni a'jari kanre.” 4#Ul. 8:3Appaui Isa mange ri ia, ”Rie' ta'ukiri: Rupatau inni tallasai gele sangga nubattu rikanre jua.”

5Maeng injo ia laerangi Isa mange rise're tampa' langkasa na lalang risipappikkaang mata ia lapappijanjangangi mange ri Isa sikonjo pakkaraengang ri lino. 6Appaui Ibilisi mange ri Ia, ”Sikonjo kakahasaang injo surang kala'birang lakupassareangi mange ri Kau, saba' iangase'na injo maeng ripassareangi mae ri nakke na lakupassareang todo'i mange ri inai jua a'ra' kusare. 7Injomo saba'na, ampa Kau nyomba ri nakke, iangase'na injo Kaumo opuna.” 8#Ul. 6:13Mingka appaui Isa mange ri ia, ”Rie' ta'ukiri: Paralluko nyomba ri Karaeng Allataalamu, na mange ri Ia jua kau parallu akkasihiang.”

9Maeng injo ia laerangi Isa a'lampa ri Yerusalem na lataro Isa ri pa'buhungang Sapo Allataala, ampai appau mange ri Ia, ”Ampa Kau Ana' Allataala, padappe'i kalemMu battu ri inni, 10#Mzm. 91:11-12saba' rie' ta'ukiri: Passala ri Kau, Ia lalaparentai sikonjo malaeka'Na lalajagaiKo, 11surang latimangKo ripala' limanna, solanna bangkemMu gele tatto'ro ri batu.” 12#Ul. 6:16Lakuamo pappihalinna Isa, ”Rie' pauna Allataala: Ako so'ri Karaeng, Allataalamu!”

13Sungka'i lapa'maemmo Ibilisi iangase'na passo'ri injo, ia labokoimu Isa na attajangi hattu baji'.

Isa muliang mange ri Galilea

4:14-15

(Mat. 4:12-17; Mark. 1:14-15)

14Lalang kahasa Nyaha Tangkasa muliammu Isa mange ri Galilea. Jari alla'bammu kareba ripassala'na Isa risibatu tampa' injo. 15Rihattu injo Ia tulusu ngajarai risikonjo sapo passambajangang rie' ri injo na sikuanna tau allangngere appakala'biri ri Ia.

Isa ritolla' ri Nazaret

4:16-30

(Mat. 13:53-58; Mark. 6:1-6)

16Ia mangei ri Nasaret tampa' pa'bakkakanNa, na assituru' kabiasaanNa ampa allo Passambajangangi Ia antama'i ri sapo passambajangang, ampai ammenteng a'ra' langaji Kitta' Tangkasa. 17Mange ri Ia risareangi kitta'na Nabbi Yesaya na sungka'i maeng lasungke kitta' injo, Ia larumpa'i pau inni, lakua:

18 # Yes. 61:1-2 ”Nyaha Karaeng Allataala rie'i ri Nakke,

saba' Ia maemmu ambarakkaki ri Nakke, lappabattu kareba baji' mange ri tau kaasi-asi injo;

na Iamo assuro ri Nakke

19lappabattu kalappasang mange ri tau ritarungku injo,

na panjanjang mange ri tau buta injo,

laappakalappasa ri tau sissa injo,

laappala'bang taung pangamaseanna Karaeng Allataala rie'mu.”

20Maeng injo Ia labalu' Kitta' injo, lapassareangi muliang mange ri pagahena sapo passambajangang injo, ampai attolong; na matanna tau lohe rie' injo lalang ri sapo passambajangang anjanjang ngase'i mange ri Ia. 21Jari Ia pakaramulamu ngajara ri iyai, lakua pauNa, ”Allo inni a'rupamu pauna Kitta' inni rihattu mulangngerinna.” 22Sikuanna tau rie' ri injo appa'naba ri Ia na lannasa ngase'i ripau-pau baji' nulapau injo Isa, jari appau ngase'mu, ”Gelejua Ia inni ana'na Yusuf?” 23Maeng injo appaui Isa mange ri iyai, ”Tantu lamupauna pakkalebarangang inni mae ri Nakke: Oe sanro, pakagassingi riolo kalemmu. Geokang todo'i ri inni mae, ri tampa' kalaheramMu, sikonjo kajariang nutalangngere injo ri Kapernaum!” 24#Mat. 13:57; Mark. 6:4; Yah. 4:44Lakua pole pauna Isa, ”Sitoje'na Nakke appau ri mange kaui, gele rie' nabbi rianggarangi ri tampa' assala'na. 25#1 Raj. 17:1, 8-16Ampa pole, Nakke appau mange ri kau, na toje'i pauKu inni: Ri jammanna Nabbi Elia lohe bahine balu-balu ri Israele rihattunna tattongko' langi' talluntaung na annambulang sallona surang rihattu sarrona kalarakang risikonjo tampa'. 26Mingka Elia risuroi gele lamange risala se'renna battu ri iyai, mingka mange rise're bahine balu-balu rie' ri Sarfat ri tana Sidon. 27#2 Raj. 5:1-14Ri jammanna Nabbi Elisa lohe tau kattakang ri Israele na gele rie' manna se're tau battu ri iyai turipakamole, rimaraenganna Naaman tau Siria injo.” 28Lalangngere'na injo kuku' sarro ngase'mu tau lohe rie' injo ri sapo passambajangang. 29Ammenteng ngase'i, ampai lasuro Isa ansulukang kota na laerangi mange ri ta'bing, ripattampakanna kota injo, lalapabuangi Isa battu ri ta'bing injo. 30Mingka Ia a'lingka-lingka juai ritangngana tau lohe injo, ampai a'lampa.

Isa lalang ri sapo passambajangang ri Kapernaum

4:31-37

(Mark. 1:21-28)

31Maeng injo Isa a'lampai mange ri Kapernaum, se're kota ri Galilea, jari ngajarai ri injo ampa allo Passambajangang. 32#Mat. 7:28-29; Mark. 1:22Takkajanna' ngase'i rilalangngerinna pangajaranNa, saba' pauNa rassi kahasa. 33Lalang ri sapo passambajangang injo, rie' tau ladongkoki setang na akkariu' bakka'i, 34”Oe Kau, Isa tau Nasaret, apa passilolongamMu mae ri kambe? Apa Kau rie' mae konni lamupanra'kikang? Kuisse' juai Kau inai: Tutangkasa battu ri Allataala.” 35Mingka riga'garai ri Isa, ”Sannangko, ansulu'ko ri ia!” Setang injo lapatappasa tau injo ritangngana tau lohe, ampai ansulu' battu ri ia na gelejuai lapa'ri-pa'risi. 36Jari sikuanna tau rie' ri injo takkajanna' ngase', ampai allagari, lakua, ”Sanna' toje' porena pau inni! Saba' rassi pakkulle surang kahasa Ia assare parenta mange risikonjo setang na ansuluki toje'i.” 37Jari alla'bammu mange-mange kareba passala'Na ri tampa' injo.

Isa lapakagassingi matoang bahinena Simon Petrus surang lohe pole tau maraeng

4:38-41

(Mat. 8:14-17; Mark. 1:29-34)

38Maeng injo Isa labokoimu sapo passambajangang injo na a'lampai mange ri saponna Simon. Rihattu injo matoang bahinena Simon rammungi na laerai mange ri Isa solanna lapakamole rammunna. 39Jari ammentengi Isa ri sa'rinna bahine injo, ampai laga'gara rammung injo, jari a'lampa toje'i rammung injo ri ia. Ambaummu lassiri bahine injo na a'daha-dahai.

40Sungka'i sa'ra' allo, lohemo tau ngerang mange ri Ia tau garring rilohe rupanna kagarringang. Jari Isa lapatompangi limanNa ri baho ulunnai na lapakagassing ngase'i. 41Battu ri tau lohe injo rie' todo' setang ansulu' ampai ngariuki, ”Kaumo Ana' Allataala.” Jari Ia appisangka terasai ri iyai na gele lapa'biangi a'bisara, saba' iyai injo laisse'i ma'nassana Iamo Almase.

Isa ngajarai ri kota-kota maraeng

4:42-44

(Mark. 1:35-39)

42Sungka'i tangnga allo, a'lampai Isa na mangei rise're tampa' tassa'bu-sa'bu. Mingka tau lohe injo a'boja ri Ia, jari lauppaimu Isa na laerai ri Ia solanna andai a'lampa battu ri iyai. 43Mingka appaui Isa mange ri iyai, ”Ri kota-kota maraeng injo parallu todo'i Kupiissekiang Injili Pakkaraengang Allataala, iamo injo saba'na Nakke risuro.” 44Jari Ia appala'bangi Injili lalang risikonjo sapo passambajangang rie' injo ri Yudea.

Currently Selected:

LUKAS 4: LAI_SLY

Highlight

Copy