LUKAS 3

Yahya Pario

3:1-20

(Mat. 3:1-12; Mark. 1:1-8; Yah. 1:19-28)

1Ri taung makasampulona lima pamarentaanna Kaisar Tiberius, rihattunna Pontius Pilatus a'jari gubernur ri tana Yudea, na Herodes a'jari karaeng ri tana Galilea, Filipus, uranna siana', a'jari karaeng ri tana Iturea na ri Trakonitis, na Lisanis karaeng ri tana Abilene, 2rihattu injo Hanas na Kayafas a'jari Imang Bakka', rie'mo pau Allataala mange ri Yahya, ana'na Zakharia ri parang luara. 3Jari a'lampamu Yahya mange lapila'bangi risibatu tampa' ri Yordan na lapa'nga'ngarangi ma'nassana tau inni parallui jarra ampai ririo languppai pangampungang kadorakaang ri Allataala, 4#Yes. 40:3-5assimpole rie' ta'ukiri lalang ri kitta' panjanjanna Nabbi Yesaya:

”Rie' sa'ra a'nga'ngara ri parang luara:

Pakasadiaangi pa'lalangang ri Karaeng Allataala,

lambusiangi pa'lalanganNa.

5Sikuanna ja'bo' laritambungi

na sikuanna bonto surang buttu laa'jari lappara,

nualekko-lekko injo larilambusi,

nuakka'lo'-ka'lo injo larilappari,

6na sikuanna tau lanjanjangi kasalamakang battu injo ri Karaeng Allataala.”

7 # Mat. 12:34, 23:33 Maeng injo ia appaui mange ri tau lohe rie' injo laririo ri ia, ”Oe kau sossorang saa moso intu! Inaimo lappiu'rangi mange ri kau solanna a'lili battu rihukkunganna Allataala nularie' injo mae sallo'? 8#Yah. 8:33Jari, pappijanjangangi panggeokang baji'mu assituru' pajarramu. Akolalo pikkiri lalang ri atimu: Abraham iamo ammanna puwa-puwaba! Saba' nakke appau mange ri kau: Allataala akkulle lapaa'jari ana'-ana'na Abraham battu ri batu-batu inni! 9#Mat. 7:19Sadiamu pangkulu ri aka' poong kaju na sikonjo poong kaju gele injo baji' buana larita'bangi ampai ripabuang antama' ri api.”

10Akkuta'nangi tau lohe injo mange ri ia, ”Ampa appakonjo, apamo parallu latageokang?” 11Lakuamo mange ri iyai, ”Inai jua rie' bajunna ruallahara, parallui lapassareang silahara mange ri tau tide' injo bajunna, na inai rie' kanrena, parallui lageokang appakonjo todo'.” 12#Luk. 7:29Palele sima injo rieki todo'i a'ra' ririo ri ia na akkuta'nang ngase'i mange ri ia, ”Guru, apamo parallu latageokang?” 13Pappihalinna, ”Ako assingara la'bi loheang battu rinulatantuang injoko.” 14Sikonjo sorodadu rieki injo akkuta'nangi todo'i mange ri ia, ”Ri kambe, apamo parallu latageokang?” Lakuamo Yahya mange ri iyai, ”Ako anrapusu surang ako massa-massai na pakaganna'i ri kalemmu battu ri gajimu.”

15Mingka saba' lohena tau attajang na a'minasa, na akkuta'nang ngase'i lalang ri atinai passala'na Yahya, inaimo laisse'i ia inni Almase, 16appihali Yahya na appaui mange ri tau lohe injo: ”Nakke ere jua kupario ri kaui, mingka Ia Tula'bi kahasaang injo battu ri nakke larie'i mae na manna pallekkesi tulu' sandalaNa gelea siratang. Ia lalarioko ri Nyaha Tangkasa surangang api. 17Sadiamu pattapi ri limanNa lanangkasi tampa' pallesoranNa na lalapasse'rei bae gandongNa antama' ri palampanna, mingka poonna bae gandong injo laritunui ri api gele minang mate bola'na.”

18Lalang rilohe pappasang maraeng Yahya lapappiissekangi Injili mange ri tau lohe injo. 19#Mat. 14:3-4; Mark. 6:17-18Mingka, sungka'i karaeng Herodes rito'ro ri Yahya kanara kajariang ripassala'na Herodias, bahinenna uranna siana', na rikanara sikonjo panggeokang daa maraeng nulageokang injo, 20karaeng injo pela' daamu panggeokanna na lapantama'i Yahya ri pattarungkuang.

Isa, Ana' Allataala, ririo

3:21-22

(Mat. 3:13-17; Mark. 1:9-11; Yah. 1:32-34)

21Sungka'i maeng ngase'mo ririo tau lohe injo na rihattunna todo' ririo Isa surang riattangngana ngera dowaang, ta'bungkaramu langi' 22#Kej. 22:2; Mzm. 2:7; Yes. 42:1; Mat. 3:17; Mark. 1:11; Luk. 9:35na naungi Nyaha Tangkasa attanja' bangkeng bodo rateang ulunNa. Na kalangngerammu sa'ra battu ri langi', ”Kaumo Ana' Kukamaseang, Kaumo Kungai.”

Pinangka'na Isa

3:23-38

(Mat. 1:1-17)

23Rihattunna Isa lapakaramula jamaanNa, ummuru'Na tallumpulomu taung na assituru' pa'ngare'na rupatau inni, Ia ana'na Yusuf, ana' Eli, 24ana' Matat, ana' Lewi, ana' Malkhi, ana' Yanai, ana' Yusuf 25ana' Matica, ana' Amos, ana' Nahum na Nahum ana'nai Hesli na Hesli ana'na Nagai 26na Nagai ana' Maat, ana' Matica, ana' Semei, ana' Yosekh, ana' Yoda 27ana' Yohanan, ana' Resa, ana' Zerubabel, ana' Sealtiel, ana' Neri, 28ana' Malkhi, ana' Adi, ana' Kosam, ana' Elmadam, ana' Er, 29ana' Yesua, ana' Eliezer, ana' Yorim, ana' Matat, ana' Lewi, 30ana' Simeon, ana' Yehuda, ana' Yusuf, ana' Yonam, ana' Elyakim, 31ana' Melea, ana' Mina, ana' Matata, ana' Natan, ana' Daud, 32ana' Isai, ana' Obed, ana' Boas, ana' Salmon, ana' Nahasom 33ana' Aminadab, ana' Admin, ana' Arni, ana' Hezron, ana' Peres, ana' Yehuda, 34ana' Yakub, ana' Ishak, ana' Abraham, ana' Terah, ana' Nahor, 35ana' Serug, ana' Rehu, ana' Peleg, ana' Eber, ana' Salmon, 36ana' Kenan, ana' Arpakhsad, ana' Sem, ana' Nuhung, ana' Lamekh, 37ana' Metusalah, ana' Henokh, ana' Yared, ana' Mahalaleel, ana' Kenan, 38ana' Enos, ana' Set, ana' Adam, ana' ri Allataala.

Currently Selected:

LUKAS 3: LAI_SLY

Highlight

Copy