Lukë 9

Nyüüpʋnyüüsɔɔlü Jesu blɔa' 'jrʋpa 'lɩ

Matiö 10.1-9,11-14; Marëkë 6.7-13

1Jesu nya we 'ɔa nyüüpʋnyüüsɔɔlü, 'ɔnya ‑nyɛ ‑nyɛ 'üün 'klü nyra ‑gälɩkamladɛɛ 'ümä domüüa 'fɩɔ prɛ, ‑bɛ 'ümä ‑wusu ‑futo. 2'Ɔnya blɔ 'üün, ü mi ü 'pa Nyɔsʋaa 'kamaplä ‑gä, 'kä 'ü ‑futo ‑wusublanyüü. 3'Ɔnya ‑gbala 'üün: «Ama mi nɩ, 'anyɩ fa sɩsɛ, 'anyɩ fa sakɔsʋ, 'anyɩ fa jijrɛ nyra mölii; 'anyɩ fa bɩa 'koti 'sɔɔ. 4‑Plɩɩlɩ 'a nëmäa' kʋ nɩ, 'a 'nɩ ‑jra 'lɩ; 'ii 'ba kʋ kʋ 'kä 'a 'cie bätäläa 'mlɩ. 5‑Bɛ nyüü ma 'nyɩ 'amɩ 'lɩ ‑a 'kʋɛɛ nɩ, 'ba sɔ 'ia bätäläa 'mlɩ, 'kä 'a ‑gbɔplɔ 'lɩ 'ana bökli ‑wälɩa ‑tʋtʋ#9.5 ‑gbɔplɔ 'lɩ 'ana bökli ‑wälɩa ‑tʋtʋ: 'Ia ‑gbaa bä 'anya 'wlara, 'a nyra 'ia bätäläa nyüü ‑kanyɩ nʋnʋdɛɛ ‑pɩɔ 'doo 'wʋ ‑a kälä; ü blara 'papawiili 'paaa' Jesua ‑gä 'klɩ. 'Ii känyrɩ ‑nëmä 'ia dɛɛ jɔ 'doo ‑a fa, 'ia 'pisiatua 'mʋgbɛ ‑nëmä 'ɔa ‑gba ‑a tɩɔ. Akëtë 13.51; 18.6.: 'ii 'mä 'üün ‑gbala 'sɩrɩ 'üa nʋnʋgbi 'nyɩa' 'na.» 6Nyüüpʋnyüüsɔɔlü nya mi. 'Ü sɔ bätä ‑mölööa 'mlɩ, 'ü mö ‑mölööa 'mlɩ. 'Ü ‑gbala nyüü Nyɔsʋaa 'Mʋfagogo, ‑bɛ 'ü ‑futo ‑wusublanyüü ‑pɩɔa 'fɩɔ.

Erɔɔdëa plɛ taraa' 'lɩ

Matiö 14.1-12; Marëkë 6.14-29

7'Kɩɩlɔ 'ü 'daraa' Erɔɔdë#9.7 Erɔɔdë: Erɔɔdë Antipaasë bäsaa; 'ɔ 'kama bɩa Galilee., 'ɔ 'nua' wiili kä 'fɩɔ Jesu nöa' 'wli nɩ, 'i 'cakla 'ɔɔn 'lɩ, 'be ‑mölöö nɩnɩa: «Jaan Batiisë bäsaa, 'kuaabre 'ɔ sɔ.» 8‑Mölöö nö: «Elii bäsaa, 'ɔɔ 'blöö ɔ ji»; ‑bɛ ‑mölöö nö: «Nyɔsʋaamlɩpalanyüülü ‑kätɩ jä käa', 'a 'üa ‑tɔrʋpɩɔa 'doo 'sɔ 'kuaabre 'ɔɔ ji.» 9Erɔɔdëa plɛklɩ 'ɔ ‑nëmä: «'N 'bölɩ Jaan a 'wli; nyɔɔ ‑mɔ 'plɛɛ kä ‑gä 'n 'nöö 'sɔɔwʋ 'wli le?» 'Ia ‑gʋ 'ɔ 'bata Jesua 'jäjäkʋ.

Jesu 'fini nyüüa ‑diipʋ ‑diisɔɔ ‑glʋɩpʋ (5 000) 'klɩ

Matiö 14.13-21; Marëkë 6.30-44; Jaan 6.1-15

10 Apotrëlü jia' nɩ, 'ünya 'saralɩ Jesu wiili kä 'fɩɔ 'ü nʋa'. 'Ɔnya dɔrʋ 'üün 'wʋ 'ɔ nyra 'üün nya bereklɩ, 'ünya mi bätälä 'ü 'daraa' Bɛtësaidaa 'äa 'pɛlɩ. 11‑Maa nyüü 'kɔkɔmlɛ 'nua' 'iin 'wli nɩ, 'ünya ‑mɛ 'ɔɔn ‑gälɩ. Jesu nya 'kʋɛɛ 'lɩ 'üün, ‑bɛ 'ɔ 'saralɩ 'üün Nyɔsʋaa 'kamapläa 'kpɩkpɩakʋ, 'ɔnya 'pʋɔ nyüülü ‑wusu 'blaaa'. 12‑Bɛ ‑gbiajrʋ mia' nɩ, 'ɔa nyüüpʋnyüüsɔɔlü nya jijrö 'ɔɔn ‑gba, 'ünya ‑gbala 'ɔɔn: «‑Plɩɩlɩ a bäa', ‑aaga 'lɩ a bä. 'Cɛrɛ nyüülü ‑wälɩ 'ümä 'kpafë nyra bätëlë bäa' ‑pɩklɩa 'mlɩ mi, 'ümä 'pifa 'bata ‑bɛ 'ümä dɛɛji.» 13'Ɔnya ‑gbala 'üün: «'Amɔ, 'ba ‑nyɩ 'üün jijri!» 'Ü ‑nëma: «'Flɔɔbü ‑gböö 'lee nyra ‑srü 'sɔɔ a 'klaa. ‑Ale jijri a nëmä ‑sukalɩ mi amä nyüülü kä 'fɩɔ kʋa' ‑nyɩ?» 14Nyɩberi bä käa' ‑plɩɩ 'ü 'mrɛɛ ü jrä nyüüa ‑diipʋ ‑diisɔɔ ‑glʋɩpʋ (5 000)#9.14 Matiö 14.21.. Jesu nya ‑gbala 'ɔa 'wʋnyɛrɛnyüü: «'Ba ‑gbala nyüülü ü kɔkɔwälɩ nyüüa ‑glʋɩsɔɔ ‑bɛ ‑pʋ 'üa ‑glügbü ‑glügbü.» 15'Ünya nʋ wiili 'ɔ 'daaa', 'ünya ‑gbala nyüüa 'fɩɔ ü kɔkɔwälɩ. 16Jesu nya dɔrɔ 'flɔɔbü ‑gböö nyra ‑srü 'sɔɔlü 'wʋ, 'ɔnya 'jrara cɛ 'nyü 'kä, 'ɔnya 'trɛɛ Nyɔsʋa. 'Ɔ bɩaa' Nyɔsʋaa 'tɛtrɛɛkʋ nɩ, 'ɔnya 'böblö 'flɔɔ nyra ‑srülü ‑tɩa, 'ɔnya ‑nyɩ 'iin 'ɔa 'wʋnyɛrɛnyüü 'ümä 'iin nyüülü 'lɩ ‑päälä. 17'Üa 'fɩɔ nya jidɛɛ 'ünya dö. 'Ü ‑nyɩglaa' jijrili tɩɔa' 'lɩ 'kä nɩ, 'i 'sie dɔgbɩ ‑pʋ ‑bɛ 'sɔɔ.

'Sɩrɩ Jesua 'wʋnyɛrɛnyüü käa' 'ümäa' bä

Matiö 16.13-28; Marëkë 8.27-38; Jaan 6.67-71

18Jrüü 'doo 'lɩ nɩ, Jesu bere ɩ 'klɩ ‑bɛ 'ɔ bibie Nyɔsʋa; 'ɔa 'wʋnyɛrɛnyüü bä ‑plɩɩ. 'Ɔnya 'bete 'üün: «‑Asɩ nyüü ‑gbaaa 'na ‑gʋ le?» 19'Iibäa' 'ɔa 'wʋnyɛrɛnyüü nɩ: «'Ü nɩnɩa ‑mɔ bä Jaan Batiisë; ‑mölöö nɩnɩa Elii ‑bä, ‑bɛ ‑më nö nyɔsʋaamlɩpalanyüülü ‑kätɩ jia' ‑bɛ ü jäa' nɩ, 'üa nyɔɔ 'doo ‑bä.» 20'Ɔnya 'bete 'üün: «‑Bɛ 'amɔ le? ‑Asɩ 'a ‑gbaaa 'na ‑gʋ le?» Piɛɛrë ‑nëma nɩ: «‑Mɔ bä Nyɔsʋaa 'Kriisë#9.20 'Kriisë: Grɛɛkëwii bäsaa; 'ia ‑gbaa bä: 'Kɩɩlɔ nyüüa 'fɩɔ ‑glaaa'. Ebrööwiili nɩ, 'ü nö Mesii: Nyɔɔlɔ kä ‑gä nyɔsʋaamlɩpalanyüü nyra Jaan Batiisë ma 'paaa', ɔ kä 'nyʋfɔ 'ü ji käa' 'känyɩgla..» 21Jesu nya ‑flɔɔrɔ 'nyüa 'mlɩ 'ɔnya ‑gbala 'üün 'ünyɩ ‑gbala 'iin nyɔɔ. 22'Ɔnya ‑gbala 'üün ‑maa: «Nyɔɔa 'Jʋ kä 'ɔmä ‑sʋɩ 'jä ‑gböösa; juifëa tagbü, ‑gbɔsapɛrɩnyüü kpakü, nyra ‑dɔkpɩanyüü nya 'ɔɔn 'nyüamlɩjraraa. 'Ünya 'ɔɔn 'blaa, jrüü tääa ‑srɩ 'lɩ nɩ, 'kä 'ɔnya 'kuaabre sɔ.»

23'Ɔnya ‑gbala nyüüa 'fɩɔ: «Nyɔɔ o nyɔɔ 'bataa' 'nyraa 'ɔɔn 'mä 'wʋnyɛrɛ nɩ, ɔ ‑trɔ 'ɔa nyufaa ‑gä, ɔ 'pie 'ɔa krʋa ‑plɩ ‑gälɩ#9.23 Krʋa ‑plɩ ‑gälɩa 'piepiekʋa ‑gbaa bä: ‑nyiie ‑mä ‑sʋɩ 'jä, ‑mä 'nɩmɩ jä Jesua ‑gʋ. ‑srɩ ‑o ‑srɩ 'kä 'ɔ jö ‑bɛ 'nyraa 'ɔɔn 'mä 'nyɛ. 24‑A ‑gbala 'amɩ, nyɔɔ o nyɔɔ 'bataa' 'ɔa 'kläa ‑wälɩtʋtʋkʋ nɩ, 'ɔnya 'ään 'mɔlɔa. ‑Maa nyɔɔ o nyɔɔ 'mɔlɔa' 'ɔa 'klä 'na ‑gʋ nɩ, 'ia nyɔɔlɔa 'klä nya ‑wälɩträäräa. 25Nyɔɔ ma ji 'plä 'wʋa 'bɩɔa 'fɩɔ, ‑bɛ 'ɔa 'klä ma 'wʋ 'ɔɔn kälɩ nɩ, ‑gbaa 'plɛɛ 'u ‑ka kä le? 26'Ia ‑gʋ nyɔɔ o nyɔɔ 'mɔɔ ‑bɛ 'na mlɩa wii 'mäa' 'nyüsü 'wʋ kä nɩ, 'taɩn 'lɩ Nyɔɔa 'Jʋ 'mäa' ‑srɩ 'ɔa tʋa 'wliklɩ 'bʋabʋakʋ nyra 'nyüna 'aanjëa 'wliklɩ 'bʋabʋakʋ ja ‑bɛ 'ɔmä ji, 'ɔnya 'ɔa 'nyüsü käa bɩa. 27'Cɩcasa 'n ‑gbala 'amɩ, ‑mölöö bä ‑pɩ 'ana ‑tɔrʋpɩɔ, 'ünya Nyɔsʋaa 'kamaplä 'jäa 'fɩɔwʋ 'kä 'ünya jä.»

Jesu 'cicria' 'ɔa 'wʋnyɛrɛnyüü ‑tääa 'klɩ

Matiö 17.1-8; Marëkë 9.2-8

28Jesu nʋa' 'saa 'ɔ bɩaa' wii 'papakʋ nɩ, jrüü ‑uundoo 'mä ‑si nɩ, 'ɔnya dɔrɔ Piɛɛrë, Jaan nyra Jaakë 'wʋ, 'ɔ nyra 'üün nya mi 'dʋgba 'döö 'wli 'ümä Nyɔsʋa bibie. 29'A Nyɔsʋa 'ɔ bibie, 'ɔa 'klʋɩ nya 'cici, 'ɔa 'koti nya 'pɔlɔ; 'ia 'pɔlɔkʋa ‑gʋ ‑nya 'daa ‑mamɛɛa 'bɩbɩ#9.29 2 Piɛɛrë 1.16-18.. 30‑Bɛ nyüü 'sɔɔ nyra 'ɔɔn dɛtɛ: Moisë nyra Elii. 31Nyɔsʋaa 'wliklɩbʋabʋakʋ nya trara 'üün 'klɩ, ‑bɛ 'ü nyra 'ɔɔn 'paa 'sɩrɩ 'ɔmäa' Jerusalɛɛmë järä 'ia ‑gä. 32'Mʋmʋ ‑sie Piɛɛrë nyra 'ɔa ‑më 'sɔɔlü 'wli. ‑Maa 'mʋmʋ bɩaa' 'üa 'nyü ‑gälɩ nɩ, 'ü 'jä Jesua 'wliklɩbʋabʋakʋ nyra nyüü 'sɔɔlü nyra 'ɔɔn 'sɔ 'nyüglöa'. 33'Taɩn 'lɩ nyüü 'sɔɔlü nëmäa' mi nɩ, Piɛɛrë nya ‑gbala Jesu: «'Kamanyɔɔ, ‑tɛ a jia' 'i 'na; amä ‑tetu tää 'pa, ‑na nɛ 'dee, Moisëa nɛ 'dee, nyra Eliia nɛ.» Wiili 'ɔ 'paaa' 'ɔnyɩ jre ‑a jre. 34'Ɔ ‑ka 'paa wii ‑bɛ ‑gbru ji 'u ‑gblɔɔ 'üün ‑gälɩ 'kä. 'Ü 'jäa' ‑gbru ‑bɛ 'u ‑gblɔɔa' 'üün ‑gälɩ 'kä nɩ, ŋalɛ 'bla 'üün. 35Mlɩa wii nya ja cɛlɩ, 'i ‑nëma: «'Na plɛ ‑gälɩa 'Jʋ#9.35 plɛ ‑gälɩa 'Jʋ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'Na 'Jʋlɔ 'n 'baa' 'lɩ». kʋ ‑pɩ: 'ba po 'ɔɔn 'nyakli!» 36Wiili 'bölöa' nɩ, 'ɔa 'wʋnyɛrɛnyüü tʋ 'iin 'nyü ‑gba 'sɩrɩ Jesu bäa' 'doo. 'Ia 'taɩn 'lɩ nɩ, wiili 'ü 'jäa' 'ünyɩ 'iin nyɔɔ 'doo ‑a ‑gbala.

'Jʋlɔ Jesu 'baa' ‑balʋsusu ‑gälɩ

Matiö 17.14-21; Marëkë 9.14-27

37'Ia ‑srɩ ‑gbaa' 'kä, ‑bɛ 'ü 'ciea' 'dʋgba 'wli nɩ, nyüü 'kɔkɔmlɛ ji Jesu 'klɩ 'jrara. 38Nyɔɔ 'doo bä ɩ nyüülüa ‑tɔrʋpɩɔ 'ɔnya 'kpölɩkä: «'Kpɩkpɩanyɔɔ, ji ‑a ‑jää 'na 'jʋ. 'Ɔa 'doo bä 'na 'jʋ 'doo 'doo! 39‑Susu 'doo nya 'cere 'ɔɔn ‑gälɩ, 'a ‑plɩɩ 'ɔ kʋ dotro 'unya 'kpölö 'ɔɔn, ‑bɛ 'ɔ tɩtrɛ ‑gböösa, ‑bɛ ‑tatrii 'cie 'ɔa mlɩ. 'U nö 'ɔɔn ‑gbi ‑gba. 'U ma nëmäa' 'ɔɔn ‑gälɩ sɔ 'i klalɩ. 40'Nyaa bibie ‑na 'wʋnyɛrɛnyüü ü 'ba 'ɔmɩ 'uun ‑gälɩ, ‑maa 'ünyɩ 'lɩ ‑a bɩa.» 41'Iibäa' Jesu nɩ: «'Amɔ nyüü ‑glügbölä kʋa' ‑pɩ, ünyɩ toroa' Nyɔsʋa plɛ, ü nöa' ‑balʋ! 'Taɩn 'plɛɛ 'a ‑ka 'batra 'saa 'mɩ 'ana ‑tɔrʋpɩɔ le? 'Taɩn 'plɛɛ 'a ‑ka 'bata 'saa ‑a ‑gbötö 'amɩ le? Ja 'mɩ ‑na 'jʋ.» 42'Jʋlɔ ‑ka jijrö 'lɩ dotro domoo nya 'kpa 'ɔɔn 'kä 'unya trara 'ɔɔn. ‑Maa Jesu nyrara ‑frepasusulu 'wli 'ɔnya 'pʋɔ 'jʋlɔ, 'ɔnya ‑nyɩ 'ɔɔn 'ɔa tʋ. 43'I kala 'üa 'fɩɔ plɛklɩ, 'ünya 'jä 'sɩrɩ Nyɔsʋa 'klü ‑sɔɔrɔa' 'wʋ.

Wiili kä 'fɩɔ 'ɔ nöa' kala nyüüa 'fɩɔ plɛklɩ, ‑bɛ 'ɔ ‑gbala 'ɔa 'wʋnyɛrɛnyüü: 44«'Ba po wiili 'nëmäa' 'amɩ ‑gbala 'nyakli 'cɩcasa: 'Ünya Nyɔɔa 'Jʋ nyüü kälɩ 'saraa.» 45‑Maa wiili 'ɔ 'paaa' nɩ, 'ünyɩ 'ɔɔn 'wli ‑a 'nu. 'Be Nyɔsʋa ‑sisriö 'ümɩ 'ia ‑gba 'ü ‑pɩ 'iin jre ‑bɛ ŋalɛ 'blaa 'üün 'ümä 'ɔɔn 'bete.

Nyɔɔlɔ bäa' kpaköa nɔ

46‑Topokʋ nya blö 'üa ‑tɔrʋpɩɔ: ‑mɔlɔ bäa' 'üa ‑tɔrʋpɩɔa 'wliklɩa nɔ. 47Jesu, 'jäa' wiili bäa' 'üa plɛklɩ nɩ, 'ɔnya dɔrɔ 'jʋjɔ 'wʋ, 'ɔnya ‑tʋ 'ɔɔn 'ɔa ‑gba. 48'Ɔnya ‑gbala 'üün: «Nyɔɔ ‑o nyɔɔ 'kʋɛɛa' 'lɩ 'samaa 'jʋjɔlɔ kʋa' ‑pɩ, 'na 'nyrɩklɩa ‑gʋ nɩ, 'mɔɔ 'ɔ 'kʋɛɛlɩ bɩa. Nyɔɔ o nyɔɔ 'kʋɛɛa' 'lɩ 'mɩ nɩ, nyɔɔlɔ blɔa' 'mɩ 'ɔɔ 'ɔ 'kʋɛɛ 'lɩ. ‑Mɔlɔ bäa' 'ana 'fɩɔa dɛrɩ 'täpaa nɔ, 'ɔɔ nëmä#9.48 nëmä: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: bä 'lɩklɩa nʋ. 'wliklɩa nɔ bä.»

49Jaan nya ‑gbala Jesu, ‑maa: «'Kpɩkpɩanyɔɔ, a 'jä nyɔɔ 'doo, ‑na 'nyrɩklɩ 'ɔ prɛrɛ domüü; ‑bɛ 'ɔnyɩa' ana ‑tɔrʋpɩɔa nyɔɔ bä nɩ, anya ‑gbala 'ɔɔn ɔ fio 'ia ‑gʋ.» 50Jesu nya ‑gbala 'ɔɔn: «'A 'nɩ 'nyüglö 'ɔɔn. Nyɔɔlɔ 'nyɩ jraraa' amɩ#9.50 amɩ: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'amɩ. 'nyüa 'mlɩ nɩ, 'ɔɔ bä ana#9.50 ana: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: 'ana. nyɔɔ.»

JESU SƆ GALILEE 'ƆNYA MI JERUSALƐƐMË

9.51–19.27

Jesu 'mä Jerusalɛɛmë mi

51'Taɩn 'lɩ Jesua ‑tʋtʋgälɩbataɩn 'cicrea' ‑wälɩ nɩ, 'ɔnya ‑sɔɔrɔ plɛ 'wʋ 'ɔmä Jerusalɛɛmë mi. 52'Ɔnya blɔ nyüü ü ‑ta 'nyʋfɔ ü mi bätälä 'ü 'daraa' Samarii, 'ümä 'ɔa kʋfa 'känyɩgla. 53‑Maa bätäa nyüü 'nyɩ 'ɔɔn 'lɩ ‑a 'kʋɛɛ, 'be Jerusalɛɛmë 'ɔ mö#9.53 Juifë nyra Samariia nyüü 'nyɩ 'nönrö 'wli ‑a; 'bala 'üa tʋɩɩa 'taɩn 'lɩ. 'A 'ia ‑gʋ Samariinyüü 'nyɩ 'nyienyie ‑a juifëlë sɔa' Galilee 'mä 'üa bätä ‑srörö 'ümä Jerusalɛɛmë mi.. 54'Ɔa 'wʋnyɛrɛnyüü Jaakë nyra Jaan 'jäa' 'iin nɩ, 'ü ‑nëma: «'Pläkänyɔɔ, ‑ama ‑wa amä kapu we, 'umä cɛlɩ sɔ ‑bɛ 'umä 'üün 'pütö#9.54 Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «‑bɛ 'umä 'üün 'pütö 'sɩrɩ Elii ma nʋa'.» 2 'Kɩɩ 1.10-12..» 55Jesu nya ‑sie 'üa 'pɛlɩ kälɩ 'ɔnya ‑flɔɔɔrɔnyüamlɩ 'ɔnya ‑gbala 'üün: «‑Susulu 'tutoa' 'amɩ 'anyɩ 'uun jre ‑a jre#9.55 'ɔnya ‑gbala 'üün: ‑Susulu 'tutoa' 'amɩ, 'anyɩ 'uun jre ‑a jre: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.. 56Nyɔɔa 'Jʋ 'nyɩ nyüü bʋblɔkalɩ ‑a ji, ‑maa 'ɔmä 'üün 'lɩmlɩba#9.56 Nyɔɔa 'Jʋ 'nyɩ nyüü bʋblɔkalɩ ‑a ji, ‑maa 'ɔmä 'üün 'lɩmlɩba: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä..» 'Ünya mi bätë ‑mölööa 'mlɩ.

57'Nyʋfɔ 'ü 'nyɛɛ ɩ, nyɔɔ 'doo nya ‑gbala Jesu: «'Pläkänyɔɔ#9.57 'Pläkänyɔɔ: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä., ‑plɩɩ 'lɩ kä 'fɩɔ ‑nëmäa' mi 'nyraa ‑mɔ 'sɔɔ mö.» 58'Ɔnya ‑gbala 'ɔɔn: «'Klʋɛɛa ‑fä#9.58 'klʋɛɛa ‑fä: Mrɛɛlɛ kä ‑gä grɛɛkënyüü 'paaa' ‑tɛ nɩ, 'ɛ ‑beere ‑fɛ. 'Ɛɛ ‑gögbii 'dara «renard». 'Ɛ kä yrʋ ‑gböösa. kä 'pifa, 'nyisie kä 'dëdrëë, ‑maa Nyɔɔa 'Jʋ 'nyɩ 'wlipiefa ‑a kä.» 59'Ɔnya ‑gbala nyɔɔ ‑moloo: «‑Mɛ 'mɩ ‑gälɩ!» ‑Maa nyɔɔlɔ ‑nëma: «'Pläkänyɔɔ, 'mɔɔ jö, ‑a mi ‑a ‑tʋ ‑kätɩ 'na tʋ.» 60Jesu nya ‑gbala 'ɔɔn: «'Cɛrɛ jäjänyüü ‑wälɩ 'ümä 'üa jäjänyüü ‑tʋ. ‑Mɔlɔ nɩ, mi ‑a ‑paa' Nyɔsʋaa 'kamaplä ‑gä.» 61Nyɔɔ ‑moloo nya ‑gbala 'ɔɔn: «'Pläkänyɔɔ, 'nyaa ‑mɩ dɛrɩprɛa, ‑maa 'mɔɔ jö, ‑a mi ‑a cɛrɛ ‑kätɩ 'na ‑gböölia nyüü.» 62'Iibäa' Jesu nɩ: «Nyɔɔ ma 'tiere masiilɛ ‑gogloa' ‑tʋtʋ 'lɩ 'kä, ‑bɛ 'ɔma tɛ dɛrɩ nɩ, 'ɔnyɩ nʋnʋdɛɛ Nyɔsʋaa 'kamaplä 'lɩ ‑a kälä.»

Currently Selected:

Lukë 9: Bakwé

Highlight

Copy