Lukë 8
8
Nyüülü prɛa' Jesu dɛrɩ
1'I ‑sia' nɩ, Jesu mö bätë jie nyra bätë kpaküa 'mlɩ, ‑bɛ 'ɔ 'saa 'Mʋfagogolä 'paaa' Nyɔsʋaa 'kamapläa ‑gä. 'Ɔa 'wʋnyɛrɛnyüü ‑pʋ ‑bɛ 'sɔɔ bälɩ, 2nyra 'ŋlëgë 'doorodoolü ‑balʋsisi sɔa' ‑gälɩ nyra ‑mülü ‑wusu ‑kanyɩ 'blaa': Mariilɔ 'ü 'daraa' Magëdalayria ɔ domüü ‑uunsɔɔ 'ciea' 'lɩ bälɩ bɩa. 3Susaalɔ ‑gääläa' Erɔɔdëa diia 'fɩɔ 'nyiöli, 'ɔa 'ŋlʋʋ Jaanë bälɩ, nyra nyüü 'kɔkɔmlɛ ‑mölöö nöa' 'üa käkädii ‑bɛ 'ü jöa' 'ɔɔn ‑gba.
Paplanyɔɔa tapönänä
4Nyüü 'kɔkɔmlɛ nya sɔ bätëa 'fɩɔ ‑gälɩ, 'ünya ji Jesu 'klɩtrara. 'Ɔnya 'pala 'üün tapönänä 'klɩ, 'ɔ ‑nëma: 5«Paplanyɔɔ 'doo mi kä 'ɔa putu 'lɩ papladii ‑gbagba. 'Asɩ 'ɔ ‑gbaaa' 'ɔ mö nɩ, ‑bɛ ‑moloo böblö 'nyʋfɔ 'mlɩ. Nyüü wawla 'iin 'kä ‑bɛ nyisie jö 'ia 'fɩɔ. 6'Jaju ‑moloo nya böblö 'täkë ‑tʋtʋ 'lɩ; 'u mia' ‑ga, 'u 'fu, 'be 'ia ‑tʋtʋ 'nyɩ 'nɩ ‑a kä. 7'Jaju ‑moloo böblö nänë 'lɩ; 'u ‑bɛ nänë ‑gaala ‑pɩɔ 'doo 'wʋ, nänë nya kakla 'uun ‑fʋflʋ 'klɩ. 8'Jaju ‑moloo nya blö 'mʋfa ‑tʋtʋ 'lɩ; 'u 'bʋaa' nɩ, 'unya tʋ, 'u tʋ 'jajua ‑glʋɩgböö (100).» 'Ɔ bɩaa' wii 'papakʋ nɩ, 'ɔnya ‑gbolomlɩ 'ɔ ‑nëma: «Nyɔɔlɔ käa' 'nununyakli, ɔ 'nu!»
9'Ɔa 'wʋnyɛrɛnyüü nya 'bete 'ɔɔn: «Tapönänälä ‑paa', 'ia ‑gbaa le?» 10'Ɔ ‑nëma: «Nyɔsʋa ‑nyɩ 'amɩ 'klü 'amä Nyɔsʋaa 'kamapläa 'mlɩa wii jre; ‑maa ‑mülü nɩ, tapönänë 'n 'pala 'üün 'klɩ, 'kä:
Üma ‑pʋpɔ, 'ü ‑pɩ dɛɛ 'wʋjä 'plɔʋ,
'aiɛ üma ponyakli 'ü ‑pɩ 'nu 'plɔʋ # 8.10
Esaii 6.9
..
11«‑Jää tapönänäläa ‑gbaa: ‑Gbagbajajulu nɩ, 'a Nyɔsʋaa mlɩa wii. 12'Nyʋfɔlʋ kä mlɩ 'u böblöa' nɩ, 'a nyüülü poa' 'nyakli ‑bɛ Sataan jöa' 'ɔ 'baaa' 'üa plɛ 'klɩ nyɔsʋaawii 'ü ‑pɩ 'nu, ‑bɛ 'ü ‑pɩ 'lɩmlɩwʋ. 13'Täkëtʋtʋlʋ kä ‑gälɩ 'u böblöa' nɩ, 'a nyüülü üma 'nua' nyɔsʋaawii 'wli ü 'kplaaa' 'iin dɔrʋsa, ‑maa 'ünyɩ tigblii ‑a kä. 'Üa nyɔsʋaplɛ 'nyɩ tʋŋlʋlɩ ‑a, üma tɛlɩ 'üün dotro, 'ü 'cɛrɛ 'ia 'fɩɔ ‑wälɩ. 14Nänëa mlɩa nulu nɩ, 'a ‑mülü üma 'nua' nyɔsʋaawii 'wli, ‑bɛ ü kä nyɔsʋaawii 'nyɩ mia' 'klɔɔtrʋ. Bobokʋ, 'bɩɔ nyra diili kä 'fɩɔ bäa' ‑pɩ ‑tʋtʋ ‑gälɩ fa 'üa plɛ. 'Ia ‑gʋ 'üa tʋtʋdii 'nyɩ ‑jrɛjrɛ ‑a. 15'Mʋfatʋtʋlʋ kä ‑gälɩ 'jaju böblöa' nɩ, 'a ‑mülü nʋa' 'üa plɛ ü 'kplaa' nyɔsʋaawii 'cɩcasa, 'ünyɩ ‑trɔa' 'iin, ‑bɛ 'ü tʋäa' ‑bakää ‑sʋɩ bälɩ.
'Napɛa tapönänä
16«Nyɔɔ 'nɩ ‑gölö 'napɛ ‑a ‑bɛ 'ɔmä 'ɛɛn ‑soru ‑gälɩ 'kägbri, 'aiɛ 'ɔmä 'ɛɛn ‑pɔkɩ ‑wälɩ pla. ‑Maa 'napua tii 'wli 'ü 'sree 'ɛɛn 'kä nyɔɔ o nyɔɔ paa' nyukua ‑wälɩ 'mä 'käjä 'cɩcasa. 17Diili kä 'fɩɔ ‑sisiea' nya 'wʋcrɛrɛa. Nyüü ‑nëmä 'klɩberewii ‑a dɛtɛ 'kä 'i ‑nëmä jrere, 'kä 'imä ‑fälɩ 'tɔrɔ. 18'Ii känyrɩ 'ba ‑tre 'sɩrɩ 'a poa' nyɔsʋaawii 'nyakli; 'be nyɔɔlɔ 'klaaa' diijie, Nyɔsʋa nya 'iin 'wlibɩaa. ‑Maa nyɔɔlɔ 'nyɩa' dɛɛ 'klaa nɩ, 'ɔnya 'ɔɔn 'nɩmɩ wiili 'ɔ boboa' 'ɔ 'klaaa' kälɩ 'baa.»
19Jesua 'yio nyra 'ɔa ‑wlajü nya ji, ‑maa nyüüa ‑sümlökʋa ‑gʋ, 'ünyɩ 'lɩ ‑a bɩa ü jijrö 'ɔɔn ‑gba. 20Nyüü nya ‑gbala 'ɔɔn: «‑Na 'yio nyra ‑na ‑wlajü bä ‑fälɩ; 'ü 'bata 'ümä ‑mɩ 'jä.» 21‑Maa 'ɔnya ‑gbala 'üün: «Nyüülü poa' nyɔsʋaawii 'nyakli ‑bɛ ü ‑trääräa' 'lɩ 'iin nɩ, 'üü bä 'na 'yio nyra 'na ‑wlajü.»
‑Püpölä Jesu kaa' 'klɩ
Matiö 8.18,23-27; Marëkë 4.35-41
22'Taɩn 'doo 'lɩ, Jesu nyra 'ɔa 'wʋnyɛrɛnyüü 'jraa' ‑gɔlʋ 'lɩ, 'ɔnya ‑gbala 'üün: «A ‑srörö 'niea 'pɛ ‑mɩdee ‑gälɩ.» 'Ünya mi. 23'A 'nie 'ü 'pɩɛ ɩ, Jesu nya 'mʋmɔ. ‑Püpö kpakö nya jrä 'lɩ 'üün; ‑bɛ ‑gɔlʋ 'sie 'nɩ 'klɩ, 'i 'pa 'üün järäfa 'wʋ. 24'Ünya jijrö 'ɔɔn ‑gba 'ünya tɛrɛ 'ɔɔn 'kä: «'Kpɩkpɩanyɔɔ, 'Kpɩkpɩanyɔɔ, jä a nëmä jä 'la!» 'Ɔ tɛa' 'kä, 'ɔnya ‑sɔɔrɔ wii 'wʋ 'ɔnya 'pala ‑püpö nyra 'nɩa dakë kpakü wii ‑gba, 'ia 'fɩɔ nya bä ‑pio. 25'Ɔnya ‑gbala 'üün: «‑A 'jää 'ana nyɔsʋaplɛ le?» Ŋalɛ 'blaaa' 'üün, ‑bɛ 'üa plɛklɩ kalaa' nɩ, 'üa ‑tɔrʋpɩɔ 'ü 'pala wii: «Nyɔɔ ‑glügbö 'plɛɛ kʋ ‑pɩ, ɔ 'pala ‑püpö nyra 'nie wii ‑gba, ‑bɛ 'ü 'baa 'ɔa wii wii 'wʋ le?»
Nyɔɔlɔ Jesu 'baa' bʋbɔsisi ‑gälɩ
Matiö 8.28-34; Marëkë 5.1-20
26'Unya 'tɔ kä Gadaranyüüa#8.26 Gadaranyüü: Nyüülü 'nyɩa' juifë bä, 'üa bätä. Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: Gɛraseenyüü. ‑tʋtʋ ‑gälɩ, 'ää ‑bɛ Galilee 'jäjräwʋ. 27Jesu 'ciea' ‑gɔlʋ 'lɩ nɩ, bätäläa 'mlɩa nyɔɔ 'doo nya 'jrara 'ɔɔn 'klɩ, domüü bä 'ɔɔn 'lɩ. 'Ɔ ‑ka 'nɩ paa' 'kotu 'lɩ 'i 'a ‑sɩ ‑si#8.27 'i 'a ‑sɩ ‑si: ‑Pɔɔkɩ ‑mɩdooa mlɩ 'i ‑jɩjra: «‑balʋsisi bä 'ɔɔn 'lɩ 'i 'a ‑sɩ ‑si.». 'Ɔ 'nɩ 'prere nyukua ‑wälɩ ‑a, 'dasi 'lɩ 'ɔ 'prere. 28'Ɔ 'jäa' Jesu nɩ, 'ɔnya blö 'ɔɔn bei 'wʋ; 'ɔnya 'kpölɩkä: «Wii 'plɛɛ bä 'nyraa ‑mɔ 'sɔa ‑tɔrʋpɩɔ le, 'Wʋsi Nyɔsʋaa 'Jʋ Jesu? 'N bibie ‑mɩ, ‑nyɩ nʋ 'mɩ ‑gbi ‑gba!» 29'Be Jesu ‑gbala ‑frepasusulu nyaa' nyɔɔlɔ 'lɩ ‑wlɛ u 'cie 'ɔɔn 'lɩ. 'Unya 'ɔɔn 'lɩwlɛ. 'Cɩ 'ü ma 'paa 'ɔa 'dari 'lɩ, 'kä 'ü 'paa 'ɔa bei 'lɩ detu. ‑Maa 'ɔ ma 'köklö 'ia 'fɩɔ 'kä domoo 'tutro 'ɔɔn ‑aaga 'lɩ. 30Jesu nya 'bete 'ɔɔn: «‑Na 'nyrɩ le?» Domoo ‑nëma: «'Na 'nyrɩ bä 'Kɔkɔmlɛ#8.30 'kɔkɔmlɛ: Grɛɛkëwii 'lɩ 'ü nö: «Lejiɔɔn»; 'ia ‑gbaa bä: Rɔmënyüüa 'sʋgɩanyüüa 'kɔkɔmlɛ, 'üa nyüüa ‑diipʋ ‑diigböö (6 000)..» 'Be domüülü bäa' 'ɔɔn 'lɩ 'ü ‑sümlö. 31‑Bɛ 'ü kʋ Jesu 'klɩ 'ü bibie 'ɔɔn 'ɔ 'nɩ be 'üün 'bütügbalä tʋŋlɔa' 'lɩa mlɩ#8.31 'bütügbalä tʋŋlɔa' 'lɩa mlɩ: ‑Plɩɩ 'lɩ Nyɔsʋa 'pala ‑balʋsisi ‑jie 'lɩ. 'A ‑nyɛɛ 'ü kʋ ‑bɛ 'ü ‑glaaa ‑gätʋtaɩn.. 32'Bösaru 'kɔkɔmlɛ bä ɩ ‑plɩɩa dii 'lɩ, 'u jö ɩ dɛɛ 'dʋgba ‑gälɩ. ‑Balʋsisi nya bibie Jesu 'ɔ ‑nyɩ 'üün 'nyʋfɔ 'ümä 'bösaru 'lɩ 'cere. 'Ɔnya 'nyie. 33Domüülü nya 'cie nyɔɔlɔ 'lɩ, 'ünya pa pa 'bösarulu 'lɩ. 'Bösarulu nya fa fʋfɔlʋ 'unya ‑sɔ 'dʋgba 'wli 'unya ‑fu 'nie ‑wälɩ 'unya böblö 'lɩ, 'unya jä jä.
34'Bösarulua ‑gbaglaaranyüülü 'jäa' wiili kä 'fɩɔ ‑sia' nɩ, 'ünya fa fʋfɔlʋ 'ünya mi 'iin nyüü ‑gbala. 'Inya ‑gbaala bätë nyra 'kpafë 'wʋ 'kä. 35Nyüü nya mi wiili bäa' 'lɩ 'jä. 'Ü tɛa' Jesua ‑gba nɩ, 'ü järä 'lɩ nyɔɔlɔ domüü sɔa' 'lɩ. 'Ɔ pa dɛɛ 'lɩ, 'ɔa diia 'mlɩ 'a 'na. Ŋalɛ nya 'bla 'üün. 36Nyüülü 'jäa' 'sɩrɩ Jesu nʋa' nyɔɔlɔ domüü ma bäa' 'lɩ, 'ɔa ‑futodɛɛ nɩ, 'üü ‑gbala ‑mülü. 37Ŋalɛlɛ 'blaa' Gadaranyüü#8.37 Gadaranyüü: Nyüülü 'nyɩa' juifë bä, 'üa bätä. Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: Gɛraseenyüü. 'ɛ 'bʋa. 'Ünya bibie 'ɔɔn ɔ sɔ 'lɩ. Jesu nya 'jra ‑gɔlʋ 'lɩ 'ɔnya 'blöödɛrɩ. 38Nyɔɔlɔ domüü sɔa' ‑gälɩ 'bete Jesu ma 'mrɛɛ 'ɔ nyra 'ɔɔn 'mä 'nyɛ. ‑Maa Jesu nya ‑gbala 'ɔɔn: 39«'Blöö ‑na ‑nyɛɛ dɛrɩ, 'kä ‑saalɩ wiili kä 'fɩɔ Nyɔsʋa nʋa' ‑mɩ ‑gba.» 'Ɔnya mi 'ɔnya 'salɩ wiili Jesu nʋa' 'ɔɔn ‑gba bätäa 'fɩɔa 'mlɩ.
'Ŋlëkayrialɔ Jesu 'pʋɔa', nyra 'ŋlʋʋlɔ‑wusu 'blaa' ‑sɩ ‑pʋ ‑sɩ 'sɔɔ
Matiö 9.18-26; Marëkë 5.21-43
40Jesu 'blööa' dɛrɩ nɩ, nyüüa 'fɩɔ 'jrara 'ɔɔn 'klɩ, 'be 'ɔɔ 'ü ‑glaaa ɩ. 41Nyɔɔ 'doo nya ji, 'ɔɔ 'ü 'dara Jairusë. 'Ɔ bä juifëa 'sraaplanyukua 'wliklɩanyɔɔ. 'Ɔnya blö Jesu bei 'wʋ, ‑bɛ 'ɔ bibie 'ɔɔn ɔ pa 'ɔa nyuku ‑wälɩ. 42'Ɔa 'ŋlëkayria 'doo 'doo 'ɔ käa', 'ɔɔ nëmä jä, 'ɔ 'mrɛɛ ɔ kä ‑sɩ ‑pʋ.
Jesu mö ɩ 'lɩ ‑bɛ nyüü 'kakla 'ɔɔn 'klɩ 'üa ‑sümlökʋa ‑gʋ. 43‑Bɛ 'ŋlʋʋ 'doo bä ɩ ‑jria 'lɩ, ‑toru 'cie 'ɔɔn 'lɩ 'ia ‑sɩ ‑pʋ ‑sɩ 'sɔɔ. 'Ɔnya 'sa 'ɔa diia 'fɩɔ, 'ɔmä ‑wusu ‑futo ‑dɔtë ‑gba. ‑Maa nyɔɔ 'nyɩ 'lɩ ‑a bɩa ɔ ‑futo 'ɔɔn. 44'Ɔnya ja Jesua dɛrɩ 'ɔnya ‑fɛ 'ɔa 'lɩpadɛɛa 'mäklɩ ‑gba. 'A ‑plɩɩ ‑torulu kʋ dotro, 'unya 'nyüglö. 45Jesu ‑nëma: «Nyɔɔ 'plɛɛ ‑fɛ 'mɩ ‑gba le?» ‑Moloo ma bälɩ: «‑Mää 'mɔɔ ‑a.» Piɛɛrë nyra nyüü ‑mölöö ‑nëma nɩ: «'Kamanyɔɔ, ‑jää nyüü 'ü trara ‑mɩ 'klɩ, ü 'kakla ‑mɩ 'klɩ ‑bɛ ‑beete ‑nö: Nyɔɔ 'plɛɛ ‑fɛ 'mɩ ‑gba le?» 46‑Maa Jesu ‑nëma: «Nyɔɔ ‑fɛ 'mɩ ‑gba, 'be 'klü 'cie 'mɩ 'lɩ.» 47'Ŋlʋʋlɔ jrea' 'saa 'ünya 'a 'ɔɔn dɛrɩ 'järä nɩ, 'ɔa 'fɩɔ tɩtrɛ 'ɔnya ji Jesua bei 'wʋ blö. Nyüüa 'fɩɔa 'klɩ 'ɔnya 'salɩ wiili kä ‑gʋ 'ɔ nʋa' 'imɩ, ‑bɛ 'sɩrɩ 'ɔ 'pʋa'. 48Jesu nya ‑gbala 'ɔɔn: «'Na 'ŋlëkayria, 'palɩ 'klü o#8.48 'palɩ 'klü o: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä., ‑na nyɔsʋaplɛ 'a ‑mɩ 'pʋɔ. Mi ‑pio, abɩa ‑na fugbaa 'mlɩ flɛrɛ!»
49'Ɔ ‑ka 'paa ɩ wii ‑bɛ nyɔɔ 'doo sɔ 'sraaplanyukua 'wliklɩanyɔɔlɔa ‑nyɛɛ 'ɔnya ji. 'Ɔnya ‑gbala 'ɔɔn: «‑Na 'ŋlëkayria 'a jä; ‑kanyɩ 'yagba 'Kpɩkpɩanyɔɔ.» 50‑Maa Jesu 'nua' 'iin 'wli nɩ, 'ɔnya ‑gbala 'sraaplanyukua 'wliklɩanyɔɔlɔ: «‑Na plɛɛ 'nyɩ ‑taaralɩ, abɩa ‑na nyɔsʋaplɛ ‑sɔɔrɔwʋ; ‑na 'jʋ nya 'lɩmlɩwʋa.» 51'Ɔ 'tɔa' ‑gbööli nɩ, 'ɔnyɩ 'nyie ‑a 'nyie nyɔɔ 'mä 'ɔɔn dɛrɩ pala, 'ima 'nyɩ Piɛɛrë, Jaan nyra Jaakëa 'doo ‑a bä, nyra 'jʋlɔa tʋ nyra 'ɔa 'yio. 52Nyüü 'wuö, 'ü ‑sɩsra 'ɔa ‑gʋ. Jesu nya ‑gbala 'üün: «'Dugu 'a 'na! 'Ɔnyɩ jä ‑a jä, ‑maa 'mʋmɔ 'ɔ 'mʋmɔ.» 53‑Bɛ 'ü jrea' 'saa 'ɔ 'a jä nɩ, srörö 'ü srörö 'ɔmɩ. 54‑Maa 'ɔnya 'kpla 'ɔa 'darʋ 'ɔnya ‑gbolomlɩ 'ɔ ‑nëma: «'Jʋ, 'sɔwʋ!» 55'Ɔa ‑susu nya sɔ 'kuaabre, 'ɔnya sɔwʋ dotro. Jesu nya ‑gbala 'üün ü ‑nyɩ 'jʋlɔ jijrɛ. 56'I kala 'ŋlëkayrialɔa tʋɩɩ plɛklɩ. 'Ɔnya ‑gbala 'üün ünyɩ ‑gbala 'iin nyɔɔ.
Currently Selected:
Lukë 8: Bakwé
Highlight
Share
Copy

Want to have your highlights saved across all your devices? Sign up or sign in
© Wycliffe Bible Translators, Inc.