YouVersion Logo
Search Icon

Lukë 7

7
Rɔmënyüüa 'sʋgɩanyɔɔa ‑geeilɛ Jesu 'pʋɔa'
Matiö 8.5-13
1Jesu bɩaa' nyüülü poa' 'ɔɔn 'nyakli wii ‑gbapalakʋ nɩ, 'ɔnya 'blöö Kapɛrënaumëbätä dɛrɩ. 2Rɔmëyüüa 'sʋgɩanyɔɔ kpakö kä kä 'ɔa ‑geei 'doo 'ɔ ‑waa' ‑gböösa. 'Ɔɔ ‑wusu 'bla, diijie tɩɔ 'lɩ 'ɔmä jä. 3'Sʋgɩanyɔɔlɔ 'nua' Jesua 'nyrɩ 'wli nɩ, 'ɔnya blɔ juifënyüüa ‑tɔrʋpɩɔa tagbü ‑mölöö Jesu dɛrɩ, 'ümä 'ɔɔn bibie, 'ɔmä 'ɔa ‑geei 'pʋɔkalɩ ji. 4'Ü 'tɔa' Jesua ‑gba nɩ, 'ünya bibie 'ɔɔn bibie, 'ü ‑nëma: «Nyɔɔlɔ bä ‑gbajisa ‑bakää ‑a 'nyie. 5'Ɔ ‑wa ana 'bre, 'ɔɔ 'pa ana 'sraaplanyuku».
6Jesu nyra 'üün mö ɩ 'ɔ 'a nyuku ‑gba 'tɔ, ‑bɛ 'sʋgɩanyɔɔlɔ blɔ 'ɔa ‑mölöö, ü ji ü ‑gbala Jesu: «'Pläkänyɔɔ, ‑nyɩ sɩa, 'nyɩ 'na ‑a 'na ‑mä 'na nyukua ‑wälɩ pa#7.6 'Sʋgɩanyɔɔlɔ jre 'iin 'sɩrɩ juifë 'nyɩ paa' nyüülü 'nyɩa' juifë bä, 'ɔa nyuku ‑wälɩ.. 7'A 'ia ‑gʋ, 'na 'mʋgbɛ 'nyɩ bɩa ‑mɩ 'jäkalɩ ji. ‑Maa 'pa waklüü 'döö, ‑bɛ 'na 'jrʋpafɛnyɔɔ 'mä 'pʋ. 8'Be 'na 'mʋgbɛ, 'n kä 'kamanyüü ‑bɛ 'n kä 'sʋgɩa, ü 'n 'kamaa'. Ama ‑gbala 'doo: ‹Mi ‑tɛ›, 'ii 'ɔ mö; ama ‑gbala ‑moloo: ‹Ji›, jö 'ɔ jö. ‑Bɛ ama ‑gbala 'na 'jrʋpafɛnyɔɔ: ‹Nʋ 'saa›, 'ii 'ɔ nö.» 9Jesu 'nua' wiili nyɔɔlɔ 'paa 'wli nɩ, 'i kala 'ɔɔn plɛklɩ. 'Ɔnya ‑sie nyüülü prɛa' 'ɔɔn dɛrɩ, 'üa 'pɛlɩ kälɩ, 'ɔnya ‑gbala 'üün: «'Amɔ 'n ‑gbala, 'nyɩ 'samaa plɛtoronyɔɔ Israɛɛlënyüüa 'mʋgbɛa ‑tɔrʋpɩɔ ‑a 'järä.» 10'Taɩn 'lɩ nyüülü 'sʋgɩanyɔɔlɔ blɔa' 'blööa' ‑gbööli dɛrɩ nɩ, 'ü jrä ‑plɩɩ ‑geeilɛ ‑wusu 'blaa ɩa'#7.10 ‑wusu 'blaa ɩa': ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä., 'ɔ 'a 'pʋpʋa nɔ.
'Kusroŋlʋʋlɔ kä 'jʋ jäa' ‑bɛ Jesu tɛrɛa' 'kä
11‑Srɩ ‑gbaa' 'kä nɩ, Jesu nya mi bätälä 'ü 'daraa' Naɛɛ. 'Ɔa 'wʋnyɛrɛnyüü#7.11 'wʋnyɛrɛnyüü: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'wʋnyɛrɛnyüü 'kɔkɔmlɛ nyra nyüü 'kɔkɔmlɛ nyra 'ɔɔn mi. 12'Ɔ 'tɔ bätäa palafa 'wʋ, ‑bɛ nyüü fa ‑sëgbanyʋklɔ 'dooa ‑gbagbɛ 'dasi 'lɩ. 'Jʋlɔ nɩ, 'ɔa 'doo bä 'ɔa 'kusroŋlʋʋa 'jʋ. Bätäa nyüü 'kɔkɔmlɛ bä kä 'ŋlʋʋlɔa ‑gba. 13'Pläkänyɔɔ 'jäa' 'ŋlʋʋlɔ nɩ, 'ɔa nyatɛrɩ nya 'bla 'ɔɔn; 'ɔnya ‑gbala 'ɔɔn: «‑Nyɩ 'wu!» 14'Ɔnya jijrö 'lɩ ‑gba, 'ɔnya ‑fɛ ‑gbagbɛlɛ ‑gba. Nyüülü ‑gbötöa' 'ɛɛn nya 'nyüglö. 'Ɔ ‑nëma: «‑Sëgbanyʋklɔ, ‑mɔ 'n ‑gbala: tɛkä!» 15Jäjänyɔɔlɔ nya sɔwʋ, 'ɔnya kʋwälɩ, 'ɔnya 'pawii. Jesu nya ‑nyɩ 'ɔɔn 'ɔa 'yio. 16'I prɛ 'üa ‑gälɩa 'ku, 'ia ‑gʋ 'ü 'bʋala Nyɔsʋaa 'nyrɩ ‑bɛ 'ü nö: «Nyɔsʋaamlɩpalanyɔɔ kpakö 'a ana ‑tɔrʋpɩɔ 'tɔrɔ! Nyɔsʋa nya ji 'ɔa ‑glügbö ‑gbaji!» 17Wiili Jesu nʋa' nɩ, 'ɔa 'nyrɩ mi Judeea ‑tʋtʋ ‑gälɩa 'fɩɔ nyra bätë ‑mülü kä 'fɩɔ bäa' 'lɩ ‑gbaa 'mlɩ.
Wiili Jaan Batiisë 'betea' Jesua ‑gʋ
Matiö 11.2-6
18Jaan a 'wʋnyɛrɛnyüü nya 'saralɩ 'ɔɔn 'ia 'fɩɔ. 19'Ɔnya 'ba 'üa ‑tɔrʋpɩɔ nyüü 'sɔɔ 'ɔnya blɔ 'üün Jesu dɛrɩ ü 'bete 'ɔɔn ɔma bä nyɔɔlɔ nëmä ɩa' ji#7.19 'Iibä: 'Lɩmlɩbanyɔɔlɔ kä ‑gä nyɔsʋaamlɩpalanyüü 'paa'., ‑ale 'ia nɔ ma ‑ka bä dɛrɩ. 20'Ü 'tɔa' 'ɔɔn ‑gba nɩ, 'ü ‑nëma: «Jaan Batiisë blɔ amɩ a 'bete ‑mɩ: ima 'daa: ‹‑Mɔ bä nyɔɔlɔ nëmäa' ji, ‑ale 'ia nɔ ma ‑ka bä dɛrɩ?› » 21'A 'ia 'taɩn 'doo 'lɩa mlɩ, Jesu ‑futo ‑wusublanyüü 'kɔkɔmlɛ nyra nyüü ‑mülü bäa' ‑sʋɩ 'lɩ. 'Ɔnya prɛ ‑balʋsisili bä ɩa' nyüü ‑mölöö 'lɩ. 'Ɔnya ‑jie 'nɔnɔnyüü 'kɔkɔmlɛa 'nyü 'ünya 'jäkä. 22'Ɔnya 'sa 'üün ‑gälɩ, 'ɔ ‑nëma: «'Ama mi nɩ, 'ba ‑gbala Jaan wiili 'a 'jäa' ‑bɛ 'a 'nua' 'wli: ‹'Nɔnɔnyüü 'jääkä, kpakpanyüü 'nyɛɛ, 'jrʋklanyüü 'pʋɔ, 'susunyüü 'nöö, jäjänyüü tɛtɛkä, ‑bɛ 'ü 'sara 'lɩ 'pʋablanyüü 'Mʋfagogo#7.22 Esaii 25.5-6; 61.1.. 23Abɩa dɔrʋ 'bla nyɔɔlɔ 'nyɩ blöa' ‑balʋ 'lɩ 'na 'nyrɩa ‑gʋ!› »
24Nyüülü Jaan blɔa' mia' nɩ, Jesu nya ‑gbala nyüülü bäa' ‑plɩɩ Jaan a ‑gä: «Dɛplɛɛ 'a mi ‑aaga 'lɩ 'järä le, 'kugbasugö ‑fʋflʋ 'dögöa' 'kä? 25‑Bɛ dɛplɛɛ 'a mi 'jä le? Nyɔɔ 'sroo 'mʋfakoti, 'ɔɔ 'a mi 'jä? ‑Bɛ nyüülü 'srooa' 'kotili kä 'peru 'bʋaa' nɩ, ‑bɛ 'ü käa' dii nɩ, ‑mää 'kɩɩɩa nyüköli 'ünyɩ kɔkɔ? 26Nyɔɔ 'plɛɛ ‑gbaa 'iin 'a mi 'jä le? Nyɔsʋaamlɩpalanyɔɔ? ‑Yɛɛ, 'amɔ 'n ‑gbala, 'ɔ ‑si 'nɩmɩ nyɔsʋaamlɩpalanyɔɔ 'wʋ. 27'A 'ɔɔlɔ kä ‑gä ‑jɩjraa' nyɔsʋapɔɔkʋ 'lɩ:
‑Jää 'n ‑taara 'na bɔblɔnyɔɔ 'nyʋfɔ 'ɔmä ‑mɩ 'nyʋfɔ 'klɔɔtrʋ ‑ta,
'ɔmä ‑na 'nyʋfɔ 'känyɩgla # 7.27 Malasii 3.1; Matiö 11.10..
28'Amɔ 'n ‑gbala, nyüülü kä 'fɩɔ 'ŋlëgë ‑gua' nɩ, nyɔɔ 'nyɩ Jaan Batiisë 'wʋ ‑a ‑si#7.28 Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: nyɔɔ 'nyɩ nyɔsʋaamlɩpalanyɔɔ ‑a bä 'ɔnyɩ Jaan Batiisë 'wʋ ‑a ‑si.. ‑Maa Nyɔsʋaa 'kamapläa 'mlɩa blaaadɩɔ 'bʋa 'ɔnya ‑si 'ɔɔn 'wʋ.»
29Nyüülü kä 'fɩɔ poa' 'iin 'nyakli, ‑kä dapookälɩpɛrɛnyüü, 'üa 'fɩɔ jresaa Nyɔsʋa 'saalɩ 'cɩcasa, 'be 'ü 'nyie Jaan 'mä 'üün 'nɩwlipa. 30‑Maa Farisinyüü nyra ‑dɔkpɩanyüü 'nyɩ wiili Nyɔsʋa 'bataa' 'üa ‑gʋ 'klɩ ‑a 'nyiere, 'ia ‑gʋ 'ünyɩ 'nyie 'ɔmä 'üün 'nɩwlipa. 31'A 'ia ‑gʋ 'Pläkänyɔɔ ‑gbala 'üün#7.31 'A 'ia ‑gʋ 'Pläkänyɔɔ ‑gbala 'üün: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä.: «Nyɔɔ 'plɛɛ 'nëmä ‑taa nyüüglügbölä kʋa' ‑pɩ 'klɩpapla le? Nyɔɔ 'plɛɛ 'ü ja le? 32'Ü ‑beere 'sɩrɩ 'jü kʋa' ‑saplɛ 'klɩ ‑bɛ ‑mölöö ‑gbala ‑mölöö ‑maa:
‹'Ana ‑gʋ a bö ‑gbaprʋkɔ,
'anyɩ yɛ ‑a yɛ!
Anya brɩ 'dügbödʋ,
'anyɩ 'wu ‑a 'wu!›
33'N ‑gbala 'amɩ, Jaan Batiisë jia', 'ɔnyɩ ji kä dɛɛ ‑a, 'ɔ ma 'nyɩ 'mla 'nʋ ‑a, 'a nɩnɩa: ‹Domoo bä 'ɔɔn 'lɩ.› 34Nyɔɔa 'Jʋ nya ji, 'ɔ jödɛɛ, 'ɔ 'mlaa 'nʋ, 'kä 'a nö: ‹‑Jää nyɔɔ jöa' jijri, 'nʋmlanyɔɔ ‑susugbee, dapookälɩpɛrɛnyüü nyra ‑balʋnyüüa ‑bei!› 35'Lɩgaglakʋa 'jü 'üü srara 'sɩrɩ 'lɩgaglakʋ ‑gäa' 'klɩ.»
'Ŋlʋʋlɔ ‑gblɔɔa' Jesua bei ‑gälɩ ‑daŋlʋɩnɩ 'kä
Matiö 26.6-13; Marëkë 14.3-9; Jaan 12.1-8
36Farisinyɔɔ 'doo nya were Jesu 'ɔa ‑gbööli dɛɛjikalɩ. 'Ɔnya pa nyɔɔlɔa nyuku ‑wälɩ 'ɔmä dɛɛji. 37'Tutuŋlʋʋ 'doo bä kä bätäläa 'mlɩ. 'Ɔ 'nua' ‑maa Jesu bä Farisinyɔɔlɔa nyuku ‑wälɩ dɛɛ 'ɔ jö nɩ, 'ɔnya ja alebatrëa#7.37 alebatrë: Ejiipëtë bätäa 'täkä ‑glügbö ‑mölöö bäsaa. 'Ü 'klaa 'pɔlɔnyü nyra 'katʋnyü. 'Üa 'peru 'bʋa. 'kpala jɔ 'sia' ‑daŋlʋɩnɩ 'klɩ. 38'Ŋlʋʋlɔ nya 'prɛrɛ 'ɔa dɛrɩ, 'ɔa beia 'pɛlɩ#7.38 'Üa ‑dɔa 'mlɩ nɩ, dii 'ü 'pie 'wʋ 'kä 'ü pitakä, 'üa ‑srüpö ‑bɛ bei to dɛrɩ., 'ɔnya 'wu ‑bɛ 'ɔa 'mɩɔ totro Jesua bei 'wʋ. 'Ɔnya nʋ 'ɔa 'ŋuei 'ɔnya wɔpɔ 'uun, 'ɔnya 'kplara 'ɔa bei ‑tɔklʋ 'klɩ#7.38 Juifëa ‑nyɛɛ nɩ, nyɔɔ ma ji ‑na ‑nyɛɛ, 'kʋɛɛ 'lɩ 'ɔɔn 'cɩcasa, 'kä ‑srara 'ɔɔn 'sɩrɩ ‑trääräa' 'lɩ 'ɔɔn nɩ. 'Iibä 'ɔa beia ‑tɔklʋgberekʋ., 'ɔnya ‑gblɔɔ 'iin ‑daŋlʋɩnɩ 'wʋ 'kä. 39Farisinyɔɔlɔ wea' Jesu 'jäa' 'iin nɩ, 'ɔa plɛklɩ 'ɔ ‑nëma: «Nyɔɔlɔ kʋa' ‑pɩ ma bä ɩ nyɔsʋaamlɩpalanyɔɔ nɩ, 'ɔnya ɩ 'iin jrea 'sɩrɩ 'ŋlʋʋlɔ ‑fɛɛɛa' 'ɔɔn ‑gba bäbläa' 'lɩ, 'sɩrɩ 'ɔ bäa' ‑balʋŋlʋʋ.» 40Jesu nya ‑gbala Farisinyɔɔlɔ ‑maa: «Simɔɔ, 'n 'bata 'mä ‑mɩ wiijie ‑gbala.» 'Iibäa' Simɔɔ nɩ: «'Pawii, 'Kpɩkpɩanyɔɔ.» 41Jesu ‑nëma: «Nyüü 'sɔɔ bä kä 'lɩ, 'ü 'klaa 'kpanyɩnyɔɔ 'dooa 'kpa. 'Doo 'klaa kä deniea#7.41 denie: Mölii sʋsʋ 'ü 'dara 'saa; denie 'dee bä jrüü 'dooa 'jrʋpaa 'pɛpɛɛkʋ. Matiö 20.2. ‑glʋɩgböö; ‑moloo nya 'klaa kä ‑glʋɩsɔɔ ‑bɛ ‑pʋ. 42‑Maa 'ünyɩa' dɛɛ kä 'ümäa' 'üa 'kpa 'sa nɩ, 'ɔnya cere 'ümɩ 'ään. ‑Gbala 'mɩ; 'üa ‑tɔrʋpɩɔ nyɔɔ 'plɛɛ nëmä 'ɔɔn ‑wa ‑gböösa le?» 43Simɔɔ nya ‑gbala 'ɔɔn: «'N jresaa ‑mɔlɔ 'ɔ cerea' 'ɔa 'kpa kpakö.» 'Ɔnya ‑gbala 'ɔɔn: «'Asɩ 'i bäa', 'asɩ ‑paa 'iin.» 44'Ɔnya ‑sie 'ŋlʋʋlɔa ‑nyɛɛa 'pɛlɩ kälɩ 'ɔnya ‑gbala Simɔɔ: «‑Jää 'ŋlʋʋlɔ kʋa' ‑pɩ 'wʋ? 'N paa' ‑na nyukua ‑wälɩ nɩ, ‑nyɩ 'mɩ 'nɩ ‑a ‑nyɩ 'mä 'na bei ‑gba su#7.44 'Asɩ juifënyüü ma 'jrara nyɔtugbanyüü 'klɩ. 'Ü ma ‑nyɛɛ 'üün 'nɩ 'ümä bei ‑gba su, 'kä 'ü ‑gbere 'iin ‑tɔklʋ, 'kä 'ü ma 'cere 'üa 'wli 'kpɩ. Jenɛɛsë 18.4; 19.2.. ‑Maa 'ɔɔlɔ nɩ, 'ɔa 'mɩɔ 'ɔ nʋ 'ɔnya papla 'na bei 'nɩ, 'ɔnya nʋ 'ɔa 'wlia 'ŋuei 'ɔnya wɔpɔ 'uun. 45‑Nyɩ 'mɩ ‑a ‑gbere. ‑Maa 'ɔɔlɔ nɩ, 'mä ɩa' ‑na nyuku ‑wälɩ pa nɩ, 'na bei 'ɔ ‑ka ‑gbere ‑mla. 46‑Nyɩ 'na 'wli 'kpɩ ‑a 'cere. ‑Maa 'ɔɔlɔ nɩ, 'ɔ ‑gblɔɔ 'na bei ‑daŋlʋɩnɩ 'wʋ 'kä. 47'A 'ia ‑gʋ 'n ‑gbala ‑mɩ ‑maa 'ɔa ‑balʋ 'kɔkɔmlɛ 'a 'ɔmɩ cere. 'A 'ia ‑gʋ 'ɔ ‑wa 'mɩ ‑gböösa. ‑Maa nyɔɔlɔ 'ü cerea' ‑balʋ jie nɩ, 'ɔɔ ‑waaa jie.» 48'Ɔnya ‑gbala 'ŋlʋʋlɔ ‑maa: «‑Na ‑balʋ 'a ‑mɩ cere.» 49Nyüülü nyra 'ɔɔn kɔsɔ ta ɩa' ‑nëma 'üa 'mlɩ 'leee: «Nyɔɔ 'plɛɛ kʋ ‑pɩ, ɔ cere bɩaa' ‑balʋ le?» 50'Ɔnya ‑gbala 'ŋlʋʋlɔ: «‑Na nyɔsʋaplɛ 'a ‑mɩ 'lɩmlɩba; mi, abɩa ‑na fugbaa 'mlɩ flɛrɛ.»

Currently Selected:

Lukë 7: Bakwé

Highlight

Share

Copy

None

Want to have your highlights saved across all your devices? Sign up or sign in