Lukë 6

Wiili Jesu 'paa' juifëa ‑fʋflʋpasrɩa ‑gʋ

Matiö 12.1-8; Marëkë 2.23-28

1Jrüü 'doo 'lɩ nɩ, 'i bä kä 'klɩsa ‑seplea 'mlɩa juifëa ‑fʋflʋpasrɩa 'sɔɔ jrüü#6.1 'klɩsa ‑seplea 'mlɩa juifëa ‑fʋflʋpasrɩa 'sɔɔ jrüü: ‑Taa waklüülü 'nyɩ grɛɛkë ‑kätɩpɔɔkɩ ‑mɩdooa 'mlɩ ‑a bä. Levitiikë 23.5-14; Deteronɔɔmë 23.26.. 'A 'ia 'taɩn 'lɩ Jesu ‑srörö ‑bleeeputu 'lɩ#6.1 ‑bleeeputu: Juifëa 'brea jijri; 'i ‑beere ‑kɔpʋ.. ‑Bɛ 'ɔa 'wʋnyɛrɛnyüü 'saa ‑bleee, 'ü kɔsrɔ 'ɛɛn kälɩ ‑bɛ 'ü ta. 2Farisinyüü 'doorodoo nya 'bete 'üün: «Dɛplɛɛ kä ‑gʋ 'a nö wiili 'nyɩ nröröa' ‑fʋflʋpasrɩ 'lɩ le#6.2 Ɛgësɔɔdë 34.21.?» 3'Iibäa' Jesu nɩ: «‑Gbëka 'bla käa' Daviidë nyra 'ɔa 'wʋnyɛrɛnyüü nɩ, wiili 'ü nʋa' 'anyɩ 'iin ‑täsä ‑a ‑täsä#6.3 1 Samiɛɛlë 21.6.? 4'Ɔ paa' Nyɔsʋaanyuku ‑wälɩ, ‑bɛ 'ɔ 'baalɩ 'flɔɔlʋ 'ü 'saraa' Nyɔsʋaa 'nyrɩklɩ, u nyɔɔ ‑molo 'nyɩ jia' ima 'nyɩ ‑gbɔsapɛrɩnyüüa 'doo ‑a bä, 'ɔ ji 'uun. 'Ɔnya ‑nyɩ 'nɩmɩ 'ɔa 'wʋnyɛrɛnyüü#6.4 Levitiikë 24.9..» 5Jesu nya ‑gbala 'üün: «Nyɔɔa 'Jʋ ‑si 'nɩmɩ ‑fʋflʋpasrɩ 'wʋ.»

Nyɔɔlɔ kä klʋgba jäa'

6‑Fʋflʋpasrɩ ‑mɩdoo jräa' 'lɩ nɩ, Jesu nya pa juifëa 'sraaplanyuku ‑wälɩ 'ɔnya 'kpɩa 'üün. Nyɔɔ 'doo bä ɩ nyukulua ‑wälɩ 'ɔa 'dupa klʋgba jä. 7‑Dɔkpɩanyüü nyra Farisinyüü prɛrɛ Jesu 'nyü dɛrɩ, ɔma nya nyɔɔ 'pʋɔ ‑fʋflʋpasrɩ 'lɩ. 'Sɩrɩ 'ümäa' nʋ ‑bɛ 'ümäa' 'ɔɔn wii 'kplara, 'ii 'ü 'bata. 8‑Maa Jesu jrea' ‑gʋ 'üa bobowli nɩ, 'ɔnya ‑gbala nyɔɔlɔ kä klʋgba jäa': «Sɔwʋ 'kä ‑prɛɛrɛ nyüüa ‑tɔrʋpɩɔ!» Nyɔɔlɔ nya sɔwʋ 'ɔnya 'nyüglö. 9Jesu nya ‑gbala 'üün: «Wii 'doo 'mä 'amɩ 'lɩ 'betre: 'Cɩcagbi nyra bʋbɔgbi 'sɔ, ‑mɩplɛɛ nyɔɔ 'mrɛɛ ɔ nʋ ‑fʋflʋpasrɩ 'lɩ le? Nyɔɔ 'mrɛɛ ɔ 'pʋɔ nyɔɔ, ‑maa ɔ 'cɛrɛ 'ɔɔn ‑wälɩ ɔ jä?» 10'Ɔ tɛa' nyüülü kä 'fɩɔ traraa' 'ɔɔn 'klɩ 'klɩ nɩ, 'ɔnya ‑gbala nyɔɔlɔ: «To ‑na klʋgba!» 'Ɔnya to 'ään, 'ɔa klʋgba nya 'pʋ#6.10 Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'ɔa klʋgba nya 'pʋ 'änya ‑beere klʋgba ‑mälä.». 11‑Maa 'crɛ 'blaa 'üün; 'ünya dɛtrɛ 'üa 'kpɔa ‑tɔrʋpɩɔ 'sɩrɩ 'ümäa' Jesu nʋ.

Nyüüpʋnyüüsɔɔlü Jesu 'baa' 'lɩ

Matiö 10.1-4; Marëkë 3.13-19

12'A 'ia 'taɩn 'lɩ Jesu 'jra 'dʋgba 'wli 'ɔmä Nyɔsʋa bibie. ‑Gbialä kä 'fɩɔ kaa' Nyɔsʋa 'ɔ bibie. 13‑Srɩ paa' nɩ, 'ɔnya we 'ɔa 'wʋnyɛrɛnyüü, 'ɔnya tɛ 'üa ‑tɔrʋpɩɔ 'ɔnya 'balɩ nyüüpʋnyüüsɔɔ. 'Ɔnya 'dara 'üün Apotrë: 14Simɔɔlɔ 'ɔ 'daraa' bɩa Piɛɛrë#6.14 Piɛɛrë: Piɛɛrëa ‑gbaa bä «'täkä». Matiö 16.16-18; Jaan 1.42. nyra 'ɔa ‑wlajʋ Andree, Jaakë nyra Jaan, Filipë, Batëlemii, 15Matiö, Tomaa, Alëfeea 'jʋ Jaakë, Simɔɔ 'ɔɔ 'ü 'daraa' Selɔtë#6.15 Selɔtë: 'Ia ‑gbaa bä: nyɔɔlɔ ‑waa' 'ɔa ‑glügbö juifë ‑gböösa, ɔ fumöa' Moisëa ‑dɔa ‑gʋ bɩa. 'Ɔnyɩ 'nyie Rɔmënyüü ‑a., 16Jaakëa 'jʋ Judaa, nyra Judaa Isëkario, 'ɔ ‑tutroa' Jesua ‑gbaa ‑gälɩ 'ɔmäa' 'ɔɔn 'sa.

17Jesu nyra 'üün 'sɔ nya 'cie 'dʋgba 'wli, 'ünya ji ‑plɩɩ blaa' 'kä i 'ɔa 'wʋnyɛrɛnyüü 'kɔkɔmlɛ ‑mölöö bäa'. Nyüülü jia' ‑mää 'üa ‑srɩ 'nyɩ ‑pɛ. 'Ü sɔ Jerusalɛɛmë nyra Judeea ‑tʋtʋ ‑gälɩ. ‑Mölöö nya sɔ bɩa Tiirë nyra Sidɔɔn, 'taniea ‑gba. 'Ü jö 'ɔɔn 'nyaklipo, ‑bɛ ‑mölöö ji bɩa 'üa ‑wusua ‑futokʋa ‑gʋ. 18‑Mülü ‑frepasisi ‑siea' ‑sʋɩ, 'ü 'pʋ bɩa. 19Nyüüa 'fɩɔ 'bata 'ümä 'ɔɔn ‑gbafɛ, 'be 'klü 'cie 'ɔɔn 'lɩ 'kä 'ɔ 'pʋɔ 'üa 'fɩɔ.

'Pʋpʋä nyra busukʋ

20Jesu tɛa' 'ɔa 'wʋnyɛrɛnyüü 'klɩ 'ɔ ‑nëma:

«Abɩa dɔrʋ 'bla 'amɩ, 'amɔ 'pʋa 'blaaa',

'amɔ kä Nyɔsʋaa 'kamaplä!

21Abɩa dɔrʋ 'bla 'amɩ, 'amɔ ‑gbëka 'blaaa' 'köklesaplɩɩ,

'anya ‑srɩɩ döa!

Abɩa dɔrʋ 'bla 'amɩ, 'amɔ 'wuöa' 'köklesaplɩɩ,

'anya ‑srɩɩ ‑sia!

22«Abɩa dɔrʋ 'bla 'amɩ nyüü ma jrara 'amɩ 'nyüa 'mlɩ, üma 'pala 'amɩ ‑wälɩ, üma ‑jejre 'amɩ, üma bʋblɔ 'ana 'nyrɩ Nyɔɔa 'Jʋa ‑gʋ. 23'Ia ‑srɩlɩa 'mlɩ nɩ, abɩa dɔrʋ 'bla 'amɩ, 'kä 'a yɛ, 'be 'ana 'pɛɛ nya 'bʋaa cɛlɩ! 'Asɩ 'üa tʋɩɩ ma nö nyɔsʋaamlɩpalanyüü#6.23 2 Kroniikë 36.16; Akëtë 7.52..

24‑Maa busukʋ jrä 'amɩ ‑gälɩ, 'amɔ 'bɩɔjinyüü 'amɩ,

'anya 'a kä 'ana nu ‑jɔrʋ 'jä!

25Busukʋ jrä 'amɩ ‑gälɩ, 'amɔ döa' 'köklesaplɩɩ,

‑gbëka nya ‑srɩɩ 'amɩ 'blaa!

Busukʋ jrä 'amɩ ‑gälɩ, 'amɔ 'siea' 'köklesaplɩɩ,

'anya ‑srɩɩ 'kpɔa, 'kä 'anya 'wu!

26«Busukʋ jrä 'amɩ ‑gälɩ, nyüüa 'fɩɔ ma 'pa 'ana 'cɩca 'nyrɩ. 'Asɩ 'üa tʋɩɩ ma nö ‑gbagblɛ nyɔsʋaamlɩpalanyüü!»

'Nyüamlɩjraranyüüa ‑wawakʋ

Matiö 5.38-48; 7.12a

27«‑Maa 'amɔ poa' 'mɩ 'nyakli, 'ba ‑wa nyüülü bäa' 'ana 'kpɛɛ 'lɩ, ‑bɛ 'ba nʋ 'ana 'nyüamlɩjraranyüü 'cɩcagbi ‑gba. 28'Ba 'pa nyüülü busua' 'amɩ 'nɩ, 'kä 'a bibie nyüülü nöa' 'amɩ ‑gbi ‑gba, 'üa 'wli 'lɩ. 29Nyɔɔ ma 'pa ‑na ‑glagbʋ ‑gba 'kpa nɩ, to 'ɔɔn 'sɔɔa nu 'klɩ bɩa. Nyɔɔ ma 'ba ‑mɩ ‑na ‑gälɩpakotu kälɩ nɩ, ‑nyɩ 'blara 'ɔɔn ‑na 'lɩpakotu 'klɩ bɩa. 30Nyɔɔ o nyɔɔ ‑sɛɛa' ‑mɩ, ‑nyɩ 'ɔɔn; ‑bɛ nyɔɔlɔ 'baa' ‑mɩ ‑na dɛɛ kälɩ nɩ, ‑nyɩ 'daa 'kpɔɔ ɔ ‑nyɩ ‑mɩ 'ɛɛn 'klüsa. 31Wiili 'a 'bataa' nyüü 'mäa' 'amɩ ‑gba nʋ nɩ, 'ba nʋ bɩa 'saa 'üün.»

32«'Ama ‑wa nyüülü ‑waa' 'amɩ nɩ, 'kä Nyɔsʋa nya 'amɩ 'kɔlɔ? ‑Balʋnyüüa 'mʋgbɛ ‑waaa nyüülü ‑waa' 'üün! 33'Ama nʋ 'cɩcagbi nyüülü nöa' 'amɩ 'cɩcagbi ‑gba nɩ, 'kä Nyɔsʋa nya 'amɩ 'kɔlɔ? ‑Balʋnyüü nö 'iin bɩa o! 34'Ama ‑nyɩ 'kpa nyüülü 'mrɛɛa' 'ümäa' 'amɩ dɛɛ ‑nyɩ nɩ, 'kä Nyɔsʋa nya 'amɩ 'kɔlɔ? ‑Balʋnyüüa 'mʋgbɛ ‑nyɛɛɛ ‑balʋnyüü 'kpa; 'ü jresaa 'ünya dɛɛ 'jäa! 35‑Maa 'amɔlɔ nɩ, 'ba ‑wa nyüülü bäa' 'ana 'kpɛɛ 'lɩ, 'kä 'a nö 'üün 'cɩcagbi ‑gba. 'Ba ‑nyɩ 'üün, 'kä 'anyɩ bobo 'ümä 'amɩ dɛɛ ‑nyɩ. 'Ama nʋ 'saa nɩ, 'anya 'pɛɛ kpaki 'jäa, 'kä 'anya 'Wʋsi Nyɔsʋaa 'jü bä. 'Be 'ɔɔlɔ nɩ, nyüülü 'nyɩ jrea' nyüüa 'cɩcagbi, nyra plɛbʋbɔnyüü, 'ɔ nö 'cɩcagbi ‑gba. 36Abɩa ‑gbinanakʋ 'si 'amɩ 'lɩ, 'sɩrɩ 'ana Tʋa ‑gbinanakʋ bäa' 'wʋ.»

37«'Anyɩ 'bölö 'ana ‑mölöö ‑gä ‑gälɩ, ‑gä ‑pɩ 'amɩ ‑gälɩ 'bölö. 'Anyɩ kala 'ana ‑mölöö dɛrɩ 'plɔʋ, 'a ‑pɩ 'plɔʋ dɛrɩkala; 'ba cere ‑mëa ‑balʋ Nyɔsʋa 'mä 'ana ‑balʋ cere. 38'Ba ‑nyɩ ‑mölöö, ‑bɛ Nyɔsʋa 'mä 'amɩ ‑nyɩ; 'ɔnya 'ana dɔʋa 'mlɩ dii 'siea. 'Ɔnya 'iin koa, 'kä 'inya 'kä ‑gbäträ. Dɛɛlɛ 'a nöa' ‑bɛ 'a nyakaa' 'ana ‑mölöö, 'ɛɛ Nyɔsʋa 'mä nʋ 'ɔmä bɩa 'amɩ nyaka.»

39Jesu nya 'paplawiiklɩ 'ɔ ‑gbala 'üün ‑maa: «'Nɔnɔnyɔɔ 'mrɛɛ 'ɔ 'tiere 'nɔnɔnyɔɔ? 'Üa 'sɔɔ nya 'bütügba 'lɩ blöa. 40‑Sukujʋ 'nyɩ 'kpɩkpɩanyɔɔ 'wʋ ‑a ‑si; ‑maa ‑sukujʋlɔ 'kpɩaa' 'cɩcasa nɩ, 'ɔnya ‑beere 'ɔa 'kpɩkpɩanyɔɔ. 41Dɛplɛɛ kä ‑gʋ ‑jäää ‑napusragbʋlʋ bäa' ‑na ‑wlajʋa 'nyüa 'mlɩ, ‑bɛ ‑nyɩ ‑tʋ tuu klöö kpakölä bäa' ‑na 'mʋgbɛa 'nyiöa 'mlɩ 'nyügba le? 42'Aiɛ, dɛplɛɛ kä ‑gʋ ‑nö ‑maa: ‹'Na ‑wlajʋ, ji ‑a 'balɩ ‑napusragbʋlʋ bäa' ‑na 'nyiöa 'mlɩ› le? ‑Mɔ 'nɩ 'jäa' ‑na näa 'mlɩa tuu klöö kpakö 'wʋ! ‑Glagälɩsrörönyɔɔ! 'Balɩ tuu klöö kpakölä bäa' ‑kätɩ ‑na 'nyiöa 'mlɩ 'fɩɔwʋ, ‑bɛ ‑mä 'käjä ‑mä 'lɩ ‑napusragbʋlʋ bäa' ‑na ‑wlajʋa 'nyiöa 'mlɩ 'ba.»

43«'Cɩca tuu 'nyɩ tʋ bʋbɔ 'bü ‑a, 'aiɛ 'sɔɔwʋ, ‑mää tuulu bʋbɔa', ‑mää 'uu 'nyɩ tʋ 'cɩca 'bü. 44'Be tuua 'bü 'ü nö ‑bɛ 'ü jre 'umɩ. ‑Mää tiili käa' 'bütü, ‑mää 'ia 'wli 'ü 'nɩ 'sara figiebö#6.44 figiebö: 'Üa 'brea tuulu 'ü 'daraa' figietuu, 'ua 'bü bäsaa.. ‑Bɛ nyɔɔ 'nɩ 'sara 'sɔɔwʋ rɛsɛɛn 'bü#6.44 rɛsɛɛn 'bü: Tuujɔ bäsaa, 'uu tʋä rɛsɛɛn. 'A rɛsɛɛn 'ü nö ‑bɛ 'ü pie ‑duvɛɛn. bütütii sʋsʋ 'wli ‑a. 45'Cɩcanyɔɔlɔ nɩ, 'ɔa plɛ 'si 'cɩcadii 'klɩ; 'ii 'ɔ tɛ ‑bɛ 'ɔ 'paa 'cɩcawii. Plɛbʋbɔnyɔɔlɔ nɩ, 'ɔa plɛlɛ 'sia' bʋbɔgbi 'klɩ nɩ, 'ii 'ɔ tɛ ‑bɛ 'ɔ 'paa plɛbʋbɔwii. 'Be wiili 'sia' plɛklɩ nɩ, 'ii ja mlɩ.»

46«Dɛplɛɛ kä ‑gʋ 'a nö ‑maa: 'Pläkänyɔɔ, 'Pläkänyɔɔ, ‑bɛ 'anyɩ nʋ wiili 'n ‑gbalaa' 'amɩ le? 47Nyɔɔ o nyɔɔ prɛa' 'mɩ dɛrɩ, ɔma po 'na 'papawii 'nyakli ‑bɛ ɔ ‑träärälɩ 'imɩ nɩ, 'sɩrɩ 'ɔ bäa' 'ii nëmä 'amɩ srara. 48'Ɔ ‑beere 'sɩrɩ nyɔɔ 'paaa' nyuku ‑bɛ 'ɔ ‑goooa' ‑gböösa, ‑bɛ 'ɔ 'sreea' 'ua ‑toko 'täkä ‑gälɩ 'kä. 'Nʋŋlʋ kpaku da da, 'nʋŋlʋpati kpakü jrä 'uun, ‑maa 'inyɩ 'uun 'kä ‑a 'kpa, 'be 'täkä ‑gälɩ 'u 'pala#6.48 'be 'täkä ‑gälɩ 'u 'pala: Grɛɛkë ‑kätɩpɔɔkɩ ‑mɩdooa 'mlɩ 'i ‑jɩjra: «'be 'u 'pala 'mʋfasa».. 49‑Maa ‑mɔlɔ 'nööa' 'na 'papawii 'wli, ‑bɛ 'ɔnyɩ ‑träärä 'lɩ 'imɩ nɩ, 'ɔ ‑beere 'sɩrɩ nyɔɔ 'paa' nyuku, u kä ‑toko 'nyɩa' 'käsri. 'Nie ‑sia', 'ɛ jräa' 'uun ‑gälɩ nɩ, blö 'u blö dotro. ‑Srɩ 'nyɩ pa ‑a pa 'ua 'fɩɔ nya ‑gblooo 'unya bʋblɔ ‑gböösa.»

Currently Selected:

Lukë 6: Bakwé

Highlight

Copy