Lukë 12

1‑Bɛ 'ia 'taɩn 'lɩ, nyüülü trara ‑mää 'üa ‑srɩ 'nyɩ ‑pɛ, 'ü wawla ‑mölöö 'kä. Jesu nya ‑gbala 'ɔa 'wʋnyɛrɛnyüü ‑kätɩ: «'Ba ‑tre 'ana nyüfë Farisinyüüa levurëa ‑gʋ. ‑Gbagblɛgbi bäsaa! 2Diili kä 'fɩɔ ‑sisiea' nya 'wʋcrɛrɛa, ‑bɛ wiili 'nyɩa' 'lɩsara nya jrerea. 3'A 'ia ‑gʋ wiili kä 'fɩɔ 'amäa' 'jöjrüükpü 'lɩ 'pala, nya ‑srɩ 'klɩ 'tɔrɔa; wiili 'amäa' nyɔɔ ‑ŋuŋlo 'crʋgbalä blöröa', 'äa 'mlɩ nɩ, 'inya ‑fälɩ ‑gbaalaa.»

4'Na ‑gbötü 'amɩ, 'amɔ 'n ‑gbala: «'Anyɩ pɩ nyüülü 'blaaa' 'jajɛ ‑bɛ üma 'wlaraa' 'ü ‑kanyɩa' 'lɩbɩa 'ümäa' dɛɛ ‑mɩdee nʋ. 5‑A ‑gbala 'amɩ nyɔɔlɔ 'a nëmäa' pɩ. 'Ba pɩ nyɔɔlɔ ɔma 'blaa' ‑bɛ 'ɔ 'mrɛɛa' 'ɔmäa' 'amɩ kapulu 'nyɩ 'nyrɔlɔa' 'plɔʋ, 'ua 'mlɩ be. 'Amɔ 'n ‑gbala: ‑Jää nyɔɔlɔ 'a nëmäa' pɩ! 6Nyɔɔ 'nyɩ 'pa 'fɩfɩɛ ‑jie ‑gböö 'perua ‑flaaeji 'sɔɔa ‑gʋ ‑a? ‑Maa 'asɩɛ Nyɔsʋa 'nyɩ 'ia ‑tɔrʋpɩɔa 'doo ‑a ‑trɔ. 7'Ŋueili bäa' 'nɩmɩ 'ana 'wli, ‑srülü 'i bäa' 'ɔ jre 'ia 'fɩɔ. 'Anyɩ pɩ ŋalɛ, 'a ‑si 'fɩfɩɛ ‑jie 'kɔkɔmlɛ 'wʋ. 8'Amɔ 'n ‑gbala, nyɔɔlɔ 'mäa' 'mɩ ‑gbötö nyüüa 'klɩ nɩ, Nyɔɔa 'Jʋ nya bɩa 'ɔɔn ‑gbötöa Nyɔsʋaa 'aanjëa 'klɩ. 9‑Maa nyɔɔlɔ 'mäa' 'daa 'ɔnyɩ 'mɩ ‑a jre nyüüa 'klɩ nɩ, Nyɔɔa 'Jʋ ‑nëmä bɩa 'ɔmɩ ‑a jre Nyɔsʋaa 'aanjëɩɩa 'klɩ. 10Nyɔɔ o nyɔɔ 'mäa' Nyɔɔa 'Jʋa ‑gʋ bʋbɔwii 'pa nɩ, 'ɔa ‑balʋ bä ceresa. ‑Maa nyɔɔ o nyɔɔ nëmäa' 'Nyüna ‑Susu nɔpɔ nɩ, 'ia nu ‑balʋlʋ ‑nëmä 'ɔmɩ ‑a cere. 11'Üma fa 'amɩ juifëa 'sraaplanyuku ‑wälɩ, 'aiɛ 'üma 'sara 'amɩ 'cifu nyra ‑gʋmlanyüü kälɩ nɩ, 'ana plɛ 'nyɩ ‑taaralɩ wiili 'a nëmäa' 'pa, 'ia ‑gʋ. 12'Ia ‑srɩlɩa 'mlɩ nɩ, 'Nyüna ‑Susu nya 'amɩ wiili 'amäa' 'lɩsa ‑gbalaa.»

Nyɔɔlɔ käläa' ‑tʋtʋ ‑gälɩ dii ‑bɛ ɔnyɩa' Nyɔsʋaa ‑nyɛɛ dɛɛ kälä

13Nyɔɔ 'doo bä ɩ ‑jria 'lɩ, 'ɔnya 'bete Jesu: «'Kpɩkpɩanyɔɔ, ‑gbala 'na ‑wlajʋ, 'nyraa 'ɔɔn 'mä ‑jaaa ‑pä.» 14Jesu nya ‑gbala 'ɔɔn: «'Na nyɔɔ, nyɔɔ 'plɛɛ ‑tʋ 'mɩ 'ana ‑tɔrʋpɩɔ 'mä 'ana ‑jaaa ‑gä ‑tʋ le?» 15'Ɔnya ‑gbala 'üün: «'Ba ‑tre 'ana nyüfë! 'A 'nɩ kä dɛɛnyü! ‑Bakää nyɔɔ 'nyɩ ji 'bɩɔ, ‑mää 'ɔa käkädii 'nyɩ 'ɔa 'klä ‑gba kälä.»

16'Ɔnya 'pala 'üün tapönänä 'klɩ: «'Bɩɔjinyɔɔ 'dooa kä kä putu 'doo, 'unya tʋ 'mʋfasa. 17‑Bɛ 'ɔa plɛklɩ 'ɔ 'paa wii ɔ: ‹‑Asɩ 'nyaa nʋ le? ‑Plɩɩlɩ 'nëmäa' 'na putu 'lɩa papladiili 'nëmäa' 'sa ‑wälɩträärä, 'inyɩ 'lɩ ‑a bä.› 18'Ɔ ‑nëmä: ‹‑Jäsɩ 'nëmäa' nʋ: 'na ‑tagbü 'mä ‑gblooo, ‑bɛ 'mä kpakü 'pa, ‑bɛ 'mä 'lɩ 'na papladiia nyra 'na käkädiia 'fɩɔ pla.› 19'Kä 'nyaa 'na nyufa ‑gbala ɔ: ‹'Na nyɔɔ, ‑na käkädii ‑sümlö, 'i 'mrɛɛ i ‑si ‑sɩ 'kɔkɔmlɛ. 'Pa ‑fʋflʋ, jidɛɛ, 'mla, 'blajaapɛ!› 20‑Maa 'kä Nyɔsʋa ‑gbala 'ɔɔn: ‹Mlüünyɔɔ! ‑Nya 'saarɩa ‑gbiara jäa, ‑bɛ diili kä 'fɩɔ ‑paaplaa' ‑gba ‑käa' nɩ, nyɔɔ 'plɛɛ 'mä 'iin fa le?› » 21Jesu nya ‑gbala 'üün: «Nyɔɔlɔ kä 'mʋgbɛ 'paplaa' käkädii ‑gba ‑bɛ ɔnyɩa' Nyɔsʋaa ‑nyɛɛ dɛɛ kälä nɩ, ‑jää wiili jräa' 'ɔɔn ‑gälɩ.»

22'Ɔnya ‑gbala 'ɔa 'wʋnyɛrɛnyüü: «'A 'ia ‑gʋ 'n ‑gbala 'amɩ, 'ana plɛ 'nyɩ ‑taaralɩ 'ana 'kläa ‑gʋ: 'kä dɛɛlɛ 'amäa' ji, 'ana fugba, nyra diili 'amäa' 'srooa ‑gʋ. 23'Klä ‑si jijri 'wʋ; fugba nya ‑si 'sosroodii 'wʋ. 24'Ba 'jä ‑kɔkëpanë: ‑mää pla 'ünyɩ pla, ‑mää 'üa papladii 'ünyɩ 'sa; ‑mää nyikli 'lɩ 'aiɛ ‑pɩɔ ‑mɩdoo 'ünyɩ ‑tʋ 'iin, ‑maa Nyɔsʋa 'fini 'üün 'klɩ! ‑Bɛ 'a ‑si nyisie 'wʋ ‑gböösa 'e! 25Nyɔɔ 'plɛɛ bä ‑pɩ 'ana ‑tɔrʋpɩɔ ɔ 'mrɛɛ 'kä plɛlɩtaarakʋa ‑gʋ ɔ 'pa 'ɔa jrüüa ‑gälɩ ‑gliiibɔʋ#12.25 ‑gliiibɔʋ: Grɛɛkë nö: «kudee 'dee». 'Üa ‑nyɛɛa kudee 'dee ‑beere sɔ 'dasemrekete 'klɩ ‑a ‑tɔɔ wlua 'mri 'klɩ. le? 26'Ama 'nyɩ 'lɩ ‑a bɩa 'amä 'ia dɩjɔ 'doo nʋ nɩ, dɛplɛɛ kä ‑gʋ 'ana plɛ ‑ka ‑taaralɩ ‑mɩlɩ kä 'fɩɔ tɩɔa' 'lɩa ‑gʋ le?

27«'Ba ‑pʋpɔ 'sɩrɩ pöplösipi ‑gaaa': 'inyɩ ‑fɛ 'jrʋpa ‑a, ‑mää 'koti 'inyɩ 'kpla. ‑Maa 'amɔ 'n ‑gbala, 'kɩɩ Salomɔɔ kä 'mʋgbɛ jia' 'bɩɔ ‑gböösa, 'ɔ ‑kaapɩɔ 'mʋfadii 'sroo ‑beere pöplödiili kʋa' ‑pɩ. 28‑Bɛ Nyɔsʋa ma nʋ 'saa ɔma 'sroo 'klʋɛɛa 'sipili nëmäa' ‑pɩ doro 'ümäa' 'pütö nɩ, ‑asɩ 'Ɔ ‑nëmä 'amɩ 'sroo le, 'amɔ kä nyɔsʋaplɛ 'nyɩa' 'bʋa? 29'Ii känyrɩ 'anyɩ mala 'saa dɛɛlɛ 'amäa' ji, 'ɛa 'batakʋ 'wʋ, nyra dɛɛlɛ 'amäa' bɩa 'mla 'wʋ; 'ana plɛɛ 'nɩ ‑taaralɩ. 30'Ia ‑taa diilia 'fɩɔlʋ nɩ, nyüülü 'nyɩa' Nyɔsʋa jre ‑bɛ 'ü bäa' 'plälä kʋa' ‑pɩa 'mlɩ, 'ü 'bata 'iin ‑gböösa. ‑Maa 'amɔlɔ nɩ, 'ana Tʋ jre diili 'makɩa' 'amɩ. 31'Ba 'bata Nyɔsʋaa 'kamaplä, ‑bɛ ‑taa diilia 'fɩɔ 'a 'bataa', 'ɔmä 'amɩ 'iin 'wlibɩa.

32«Ŋalɛ 'nyɩ 'bla 'amɩ, 'amɔ ‑beerea' ‑bablëëkpa jɔ, 'be 'tʋ 'i kä Tʋ, 'ɔnya ‑nyɩ 'amɩ 'kamaplälä. 33'Ba 'pa 'ana käkädii 'peru, 'kä 'a ‑nyɛɛ 'pʋablanyüü. 'Ba nʋ pɔtëmɔnɛɛlɛ 'nyɩ bʋblɔa', ɛ kä mlɩa 'bɩɔ 'nɩ 'bölöa' 'klɩ. 'Ba ‑tʋ 'uun cɛlɩ 'jejienyüü ‑nëmä 'ɛɛn ‑gälɩ ‑a jrä, ‑bɛ 'nya 'nyɩ 'lɩ ‑a bä 'imä 'uun bʋblɔ. 34'Be ‑plɩɩlɩ 'ana 'bɩɔ bäa', 'ii 'ana plɛ 'pi.

35«'Ba ‑ëlere, 'kä 'ana 'napu ‑gölö bɩa! 36'Kä 'a ‑beere 'sɩrɩ nyüü ‑glaaa 'üa 'kamanyɔɔ, ɔ mia' 'titiöa ‑glɩsɩglɩsɩ 'lɩ, 'kä 'ümäa' dotro 'ɔɔn tatu 'klɩsa 'ɔma bɔtɔ 'umɩ. 37'Kamanyɔɔlɔ ma ji ‑bɛ üma 'nyɩ 'mʋmɔ ‑a 'mʋmɔ, ‑bɛ ɔma jrä ‑plɩɩ 'üün dɔrʋlʋ nëmäa' 'üün 'bla ‑mää 'ua ‑srɩ ‑nëmä ‑pɛ. 'Tasɩrɩa 'cɩcasa 'n ‑gbala 'amɩ: 'jrʋpafɛkoti 'ɔ nëmä 'lɩpa, 'kä 'ɔnya 'üün ‑wälɩkʋfa ‑nyɩ, 'kä 'ɔnya 'lɩ 'üün jijri ‑päälä. 38‑Bɛ ɔma ji ‑gbiara, 'aiɛ ‑srɩlɩtʋŋlʋwlaa#12.38 ‑gbiara, 'aiɛ ‑srɩlɩtʋŋlʋwlaa: Grɛɛkëwii nö: «‑Bɛ ama ji ‑gälɩglaaranyɔɔa 'taɩn 'sɔɔ, 'aiɛ ‑gälɩglaaranyɔɔa 'taɩn tää». Grɛɛkëa ‑nyɛɛ 'ü 'böblö 'taɩn ‑tɩa. Sɔ ‑gbiaraa ‑gliiibei ‑uundoo ‑gälɩ, ‑a mi ‑gbiaraa ‑gliiibei ‑uunmlɔɔ ‑gälɩ, 'iibä ‑gbiaraa ‑gälɩglaaranyɔɔa 'taɩn 'doo. ‑Tɛklɩ nɩ, a kä amä 'saa jre: ‑gbia ma 'tɔ 'äa ‑tɔrʋpɩɔ 'ii 'ü 'daa. Tɛ Marëkë 13.35., ‑bɛ ɔma jrä ‑plɩɩ 'üün üma ‑kaaŋlʋ 'mʋmɔ nɩ, dɔrʋ nya 'üün 'blaa! 39‑Maa 'ba jresaa: nyukukänyɔɔ ma jre 'taɩn 'lɩ kä 'mlɩ ‑jejienyɔɔ 'mäa' 'ɔɔn ‑gbapa nɩ, 'ɔ ‑nëmä 'mʋmɔ ‑a 'mʋmɔ 'jejienyɔɔ ‑pɩ 'ɔa nyuku ‑wälɩ pa. 40'Ana 'mʋgbɛ 'ba ‑ëlere! Nyɔɔa 'Jʋ nya jia 'taɩnlɩ 'kä 'mlɩ 'anyɩa' 'ɔɔn boblo.»

41Piɛɛrë nya 'bete 'ɔɔn: «'Pläkänyɔɔ, tapönänälä nɩ, ana 'kpɔ ‑gbala 'ään, ‑maa nyüüa 'fɩɔ?» 42'Pläkänyɔɔ ‑nëma: «'Jrʋpafɛnyɔɔ 'plɛɛ ‑gäklɩ ‑bɛ ɔ ‑glalɩ, ɔ nyukukänyɔɔ 'mä 'ɔa 'jrʋpafɛnyüüa 'fɩɔ ‑gba tɩ, 'ɔnya 'üün jijri ‑nyɩ 'taɩn ma jräwli le? 43Nyukukänyɔɔ ma ji ɔma jrä 'jrʋpafɛnyɔɔlɔ 'jrʋpalä 'ɔ tɩa' 'ɔɔn ‑gba ‑gälɩ nɩ, abɩa dɔrʋ 'bla 'ia 'jrʋpafɛnyɔɔlɔ. 44'Cɩcasa 'n ‑gbala 'amɩ: nyukukänyɔɔ nya 'ɔɔn 'ɔa käkädiia 'fɩɔ ‑gba tɩa. 45‑Maa 'jrʋpafɛnyɔɔlɔ ma 'daa 'ɔa 'kamanyɔɔ 'a 'lɩwlɛ, 'ia ‑gʋ 'ɔma bɔtɔ 'jrʋpafɛnyüü nyra 'jrʋpafɛŋlëgëlë bäa' 'lɩ, ‑bɛ 'ɔma ji jijrili nyra 'nʋlʋ bäa' 'lɩ ‑bɛ uma 'bla 'ɔɔn nɩ, 46‑srɩlɩ kä 'mlɩ 'ia 'jrʋpafɛnyɔɔlɔ 'nyɩa' boblo, 'a 'ia 'mlɩ nyukukänyɔɔ 'mä jrörö, ‑gliiilɛ 'ɔa plɛ 'nyɩa' ‑gba bä, 'ɛa 'mlɩ. 'Kä 'ɔnya 'ɔmɩ 'pɔnɩ ‑gböösa, ‑bɛ wiili 'ü nöa' nyüülü 'nyɩa' nyɔsʋaplɛ kä ‑gba nɩ, 'kä 'ɔnya 'ɔmɩ 'iin ‑gba nʋ. 47'Ia 'jrʋpafɛnyɔɔlɔ jrea' wiili nyukukänyɔɔ 'bataa' nɩ, ‑bɛ 'ɔnyɩa' ‑ëlere, 'ɔnyɩa' wiili nyukukänyɔɔ 'bataa' nʋ nɩ, 'ɔnya 'ɔɔn dii 'kaklaa ‑gböösa. 48‑Maa 'jrʋpafɛnyɔɔlɔ 'nyɩa' wiili nyukukänyɔɔ 'bataa' jre nɩ, ‑bɛ 'ɔ nʋa' wiili bäa' 'pɔnɩsa nɩ, 'ɔ ‑nëmä 'saa 'ɔɔn dii ‑a 'kakla. 'Be nyɔɔ o nyɔɔ 'ɔ ‑nyɩa' 'kɔkɔmlɛ nɩ, 'ɔnya 'ɔɔn 'kɔkɔmlɛ 'lɩbetrea bɩa; ‑mɔlɔ 'ɔ tɩa' 'kɔkɔmlɛ ‑gba nɩ, 'ɔnya 'ɔɔn 'kɔkɔmlɛ 'lɩbetrea ‑gböösa.

Wiili kä ‑gʋ Jesu jia'

49«‑Tʋtʋ ‑gälɩ 'n ji kapu 'pa, ‑bɛ 'n 'bata u ‑gölö dotro! 50'Nɩlɩ 'nëmäa' 'wlipa, 'na plɛ nya 'lɩtaarataraa 'kä 'nya 'iin 'wlipa#12.50 'Nɩwlipapakʋlʋ 'ɔ 'daa nɩ, 'ɔa jäjäkʋa ‑gä 'ɔ 'paa.! 51'Ana plɛ nɩnɩa 'wlinönrökʋ 'n ja ‑tʋtʋ ‑gälɩ? ‑Mää 'imɩ ‑a! ‑Tɩaböblökʋ 'n ja. 52'Bala 'saarɩ ‑gälɩ ‑gbööö 'döö 'lɩa nyüü ‑gböö nya ‑tɩabölöa: nyüü tää nya nyüü 'sɔɔ 'nyüamlɩjraraa, 'kä 'sɔɔ nya tää 'nyüamlɩjrara. 53‑Gbööö ‑mölööa 'mlɩ, tʋ nyra 'ɔa nyɩbɛjʋ ‑nëmä 'wli ‑a 'nönrö, 'kä 'jʋ ‑bɛ tʋ ‑nëmä 'wlinönrö, 'yio nyra 'ɔa 'ŋlëkayria ‑nëmä 'wli ‑a 'nönrö, kä 'ŋlëkayria nyra 'yio ‑nëmä 'wlinönrö; Ŋʋtayio nyra 'ɔa 'jʋa 'ŋlʋʋ ‑nëmä 'wli ‑a 'nönrö, 'kä 'jʋa 'ŋlʋʋ nyra ŋʋtayio ‑nëmä 'wlinönrö#12.53 Misee 7.6; Ajee 2.22; Sakarii 13.3..»

54'Ɔnya ‑gbala 'sɔɔwʋ ‑jria: «'Ama 'jä ‑gbru uma 'kpörö ‑bɛ uma ja 'pɛlɛ kä ‑gälɩ 'jrʋ 'piea' nɩ, 'a ‑plɩɩ 'a kʋä dotro 'kä 'a nö 'nʋŋlʋ nëmä da, 'kä 'ii nrörö 'kasa. 55'Ama 'jä ‑fʋflʋ uma ji ‑bɛ uma fumö nɩ, 'kä 'a nö: 'jrʋ nya 'pʋa, ‑bɛ 'ii nrörö 'kasa. 56‑Glagälɩsrörönyüü! 'A tɛ cɛ nyra ‑tʋtʋ 'klɩ 'kä 'a jre wiili nëmäa' nrörö. ‑Bɛ ‑asɩ 'i nʋ ‑bɛ 'anyɩ 'mrɛɛ 'amä 'taɩnlɩ kä 'mlɩ 'a bäa' jre le? 57Dɛplɛɛ kä ‑gʋ 'ana 'mʋgbɛ 'anyɩ 'mrɛɛ 'amä dɛɛlɛ 'naa' jre le? 58Nyɔɔ ma fa ‑mɩ tropina 'lɩ nɩ, 'palɩklü 'sɩrɩ 'a ‑ka bäa' 'nyʋfɔ 'wʋ nɩ, nyra 'ɔɔn 'mä 'wlinönrö, 'a ‑pɩ ‑gätʋnyɔɔa 'klɩ 'tɔ. ‑Gätʋnyɔɔ ‑pɩ ‑mɩ 'sʋgɩa kälɩ ‑nyɩ, ‑bɛ 'sʋgɩa ‑pɩ ‑mɩ ‑jie 'lɩpa. 59'Amɔ 'n ‑gbala: ‑ama 'nyɩ 'kpaa 'fɩɔ ‑a 'sa, ‑nëmä ‑srɩɩ 'lɩ ‑a 'cie.»

Currently Selected:

Lukë 12: Bakwé

Highlight

Copy