Marqqoosa 13
13
Yesuusa Xoozze Keetsita wul7inttodanno tiinii ohida
(Maato. 24:1-2; Luqa. 21:5-6)
1Yesuusa Xoozze keetstsappa kessadera, E tamaaruntsappa fete, «Asttamaarizayo, hyanna lo77o shuchchiton hyanna lo77o shuchchi keetsito be7ine!» yagayda.
2Yesuusa mahi, «Hyanna damma shuchchi keetsito be7ine? Hyanna keetsita shuchchi shuchchalla afa gimbbinttide fana wul7inttikaayzara attoos; fettii shuchchin attikaayzara ubba wul7inttoda» yagayda.
Laatstsii yo7odannippa tiino yellode baytstsin madha
(Maato. 24:3-14; Luqa. 21:7-19)
3Yesuusa Xoozze keetstsappa seko zalara Shamahe Derizella afa bettezin, Phexiroosa, Yayqooba, Wahannisan Inddiriyase eego yi7i, 4«Hyanna ayde yi7adyezako, nuus oho; hyanna ubba folinttodes wodito erisize mallita akko?» yaga7i oocida.
5Yesuusa mahi unttago hyannigaara yaga7i ohida: «Yinttana ooden balitsaame fana naaginttote. 6Gaama asuntsi ta suntsite, ‹Taanii Kiristtoosa› ga7i gaama asuntsana balitstsoda. 7Olan ola wore si7ize wode yirggippete. Yinnii gaarize hyanodes beezane, yezin wurssutsita hyaga. 8Fettii gade asuntsi melle gade asuntsara olinttoda; mahi fettii ka7itumo melle ka7itumora olinttoda; sa7a eni7e ubba bessa hyanoda; naye yessada, yezin yinna ubbanna yelo zooqe fana.
9«Yezin yinttii, yin ommite naaginttote. Akkos gayko, asi yinttana aykkii, firdda keetstsis aatsii inggoda; mahi Ayhude woosa Keetstsiten yinttana alanggara garaafoda; gade ahizuntsii tiinon kaatuntsi tiino ta gisho yin markkidhades eqqoda.#Maato. 10:17-20; Luqa. 12:11-12 10Wurssutsita yellodannippa tiino Wonggele asi ubbas ohinttodes beezane. 11Unttii yinttana firdda keetstsa ki7ize woden aatsii inggize wode waagii ohodyezako tiino yirggippete; yinna saate Xoozii yinttis inggide baz ohote. Yin gidda Geeshi Ayyaana ohinep attin yinttana baaya.
12«Ishe fa isha, aday fa na7aya wodhissada. Na7untsi fana yeliduntsalla denddii, unttana wodhoda. 13Asi ubba yinttana ta suntsiti gisho ixxoda, yezin wurssutsi yellodes miinggide attoda.#Maato. 10:22
Yerusalaame yellode iita madha
(Maato. 24:15-28; Luqa. 21:20-24)
14«Yezin dhabsize tunize eqqodes beezoosse bessa eqqezin yin be7ada.» Yinna akko ga7inttizako nabbabize akaako! «Yihuda sa7a ye wode yezuntsi derego woxxii aachintto.#Mahe 9:27; 11:31; 12:11 15Bale yeze keetstsa gelii keetstsappa fettibaz ekkodes gode, fa keetstsa gelippe.#Luqa. 17:31 16Gade yeze fa ma7ito ekkodes suuba maaqqippe. 17Ye wode wodatsi maachuntsisin dhantsize maachuntsis gaama madha maaqqada. 18Yezin hyanna ubba hyanize wodita seete maaqqaame gaar, Xooz woossote. 19Akkos gayko, Xoozii alamito medhdhide woditippa aykkii, hyayno yellodes hyanikaayze madhan tiinosin hyanoosse kille madha asalla afa ye wode hyanoda.#Mahe 12:1; Qon. 7:14 20Laatstsii yinna qammiti faydito eeritsikaayzako, asi maaqqide ooden attoos. Yezin E fa dooride asunts gisho yinna faydito eeritsane.
21«Ye wode ooden yinttana, ‹Yikke, Kiristtoosa hyanne yene woy Kiristtoosa sekka yene› yagayko, yinno ammanippete. 22Worddo Kiristtoosan worddo nabuntsi denddii faas dandda7inttiko, melle atto yezin Xoozii dooriduntsappa balitstsode wontsis kille bazin gaama qofize baz beessada. 23Yezin yinttii naaginttote, taanii yinttis ubba baz tiinidhii ohida.
Kiristtoosa lam7intsa ye7e
(Maato. 24:29-31; Luqa. 21:25-28)
24«Yezin ye wode yinna madhitippa suuba,
«Awa dhumoda;
agina foo7ito ashshoda;#Isa. 13:10; Er. 2:10
25Xoolinttuntsi saloppa gol7oda;
mahi salo yeze wolqqitan en7oda.#Isa. 34:4; Qon. 6:13; Er. 2:10
26Ye wode As Na7ay, damma wolqqaran bonchchora dhonne giddara ye7odera un be7ada.#Dane. 7:13; Qon. 1:7 27Ye wode E kiitanchchuntsana kiittoda. Oyddii zala sa7a gaxappa salo gaxa yellodes, Xoozze dooride asuntsana shiishoda.
Wode yellidanno erisize belese minxito
(Maato. 24:32-35; Luqa. 21:29-33)
28«Aaziztto belese minxappa tiirote; belesta aacize wode I hyayta cil7e aykkide wode torchche yellidanno yin erane. 29Yinnii gaar, yinttii yinna ubba bazita hyanizanno be7ize wode ukkii furtsa yellidanno erote. 30Taanii yinttis turo ohine; hyanna ubba bazita hyanode wontsis hyanne yeze asuntsi ubba hyayqqoos. 31Salon sa7an aadhoda, yezin ta qaaltta mulon aadhoos.
Laatstsii ye7ode qammiton saatto ooden eroos
(Maato. 24:36-44)
32«Yezin yinna qammiton yinna saatto Aday xalaalap attin melle atto yezin salo yeze kiitanchchuntsana maaqqikon woy Na7aya maaqqikon ooden erize baaya.#Maato. 24:36 33Yinna wodita ayde maaqqizako, yin eroosse gisho naaginttoten minggote. 34Ta ye7ita fa keetsito ashshii, oge qitide atstse gaara. Atstsay fa aruntsis ommar ommar oocha inggi unttana oochitis ade mahida; mahi naagizen mintstsii naagode gaar kiittida.#Luqa. 12:36
35«Yinnii gisho, minggote. Akkos gayko, karttii aday ugure maaqqiko woy qamma bilahe maaqqin woy Lukule oollize wode maaqqin woy wontta gooda maaqqin ayde ye7ode yezako, yin eroos. 36Yin tiirikaayzin E yi7i yinttana gentto yezin denggaame gaar minggote. 37Taanii yinttis ohizanno asi ubbuntsis ohine; minggote» yagayda.
Currently Selected:
Marqqoosa 13: OydaNTL
Highlight
Share
Copy
Want to have your highlights saved across all your devices? Sign up or sign in
The word for the World Ethiopia
