Maatoosa 14

Xammaqiza Waannisa Yhayiqo

(Mar. 6:14-29; Luq. 9:7-9)

1Ye wode Galila aqisiz Heroodissa#14:1 Heroodissa: Yhayi kaata Herodoosa Antiphaasa. E Yihudara Peera Kiristtoosa yelinttodaypp tiini 4-39 Maala hellodayis mooddeeza. E Kaati Heroodosas na7a. Yesuusa waara si7eeza. 2Fa ayllitayiko, «Yhay xammaqiza Waannisa; E yhayiqopp dendeeza. Yey gishos yha ubba malatita E oothiza» yeegeeza.

3E yeya geezay Heroodissa fa isha Filphoosa machat Heroodiyada gishos Waannisa achch keetha gelsseez gishosi. 4Waannisa Heroodissa, «Ne izo ekkodayis woga baaya» yeegeeza.#Luq. 3:19-20; Lewii. 18:16; 20:21 5Heroodissa Waannisa wodhodayis koyeeza, zin woyay Waannisa nabe udii bi7iz gishos yashitteeza.

6Heroodissa fa yelintteez gallasa bonchchiza wode Heroodiyada na7at as tiina yethar doonggii eza ufaysseeza. 7Yeezin, E, «Iza koyiz baz ubba iis immada gi» caaqqeeza. 8Na7ata fa indat zore si7ii Heroodisako, «xamaaqiza Waannisa qoodhaypp gachchii omma fil7o gancce gaddii taasi inggoba» yeegeeza. 9Iza yeegin kaatay qiiradheeza, zin fa caaqay gishonnee paar yez imathitay gishos gi I oyichay polinttod garkk azazeeza. 10Kaatay as kiittii Waannisa achch keetha yezin e qoodha gachiseeza. 11E omma fil7o gancce aathii ki7ii na7atis inggeeza; na7atakka ekkii fa indatis kanggeeza. 12Waannisa tamaaritay yi7ii e aha kanggii moogeeza. Ezayppe guye haneezibaz ubba yhanigii Yesuusas odeeza.

Yesuusa ichchin mukule asita muzeeza

(Mar. 6:30-44; Luq. 9:10-17; Wan. 6:1-14)

13Yesuusa haneezibazana si7ii wogolo gancce gelii ye besayppe pettii geemmiza aqo fa aaddas yhanigeeza. Asay yeya si7ii katamitaypp dendii toker eza kaalleeza. 14Yesuusa wogolopp wodhdhii gaame asa bi7ii unttisi qadhintteeza. U gancce yez hargintteez asita patheeza.

15Sa7ay omathittar yhanigin Yesuusa tamaaritay eziko shiiqii, «Yha aqay liizho, sa7aykka qammeeza. Yey gishos, heera yhanigii paasi wonggii maad garkk woya dakkoba» yeegeeza.

16Zin Yesuusa unttiko, «Woyay meekkazar yhammadayis koshshooya; u maadbaz yi inggoytta» yeegeeza.

17U mahii, «Nuus yhannee ichchin soollorannee nam77ii molopp hara baaya» yeegeeza.

18Ezikka, «An izo yhana ko7oytta» yeegeeza. 19Ma maaqqikka, woyay maatal bettoday garkk odeeza. Ichchin soollora nam77ii molita ekkii, salo bi7ii galatii maaqqii, soolla duuthii fa tamaaritayis inggeeza; unttii ma woyayis inggeeza. 20Ubbay mi mizheeza. Yesuusa tamaaritay maadar atteezana taphpho nam77ii leemate dentheeza. 21Katha meez asay maachchinnee na7a attin ichchin mukule maaqqiza.

Yesuusa abbal yedhdheeza

(Mar. 6:45-52; Wan. 6:15-21)

22Yesuusa fa tamaaritay wogolo gancce gelii paapp tiinattii abbaypp seko finthi piinggoday garkk kiittii faasi woya moyizodayis guye atteeza. 23Woya moyizii maaqqii fa aaddas woossodayis pettii derell afa kezeeza. Sa7a qamminkka E fa aaddas ezayid gam7eeza. 24Ye wode wogolay abbal afar yhammadar tiina baggar carkko dendin gotay wogolana ciphphicheeza.

25Wontimaathela Yesuusa abbal afa yedhdhittar fa tamaaritayiko ye7eeza. 26E tamaaritay, E abbal afa yedhdhittar unttiko yi7izana bi7ii yashitteeza. Unttikka, «yhayi meeshshe» gi yashittii uukkeeza.

27Zin Yesuusa ellissii, «Akko baaya! Yashittippatte! yhay tana» yeegeeza.

28Phixiroosa eziko, «Godayyo, nena maaqqiko, ta haathayis afar yedhdhii neeko yhanigod garkk tana azazoba» yeegeeza.

29Yesuusa Phixiroosako, «Yhana ye7oba» yeegeeza.

Phixiroosa wogolopp wodhdhii haathal afa yedhdhittar Yesuusako yhamo aykkeeza. 30Zin woliqama carkko bi7ii yashitteeza. Haathay eza mitto aykkin «Godayyo, tana ashshooyee» yeegii uukkeeza.

31Yesuusa ellis fa kushayid dakkii eza aykkii, «Naat, ammano pacceezayyo abis sidhe» yeegeeza.

32Yesuusarannee Phixiroosara wogolo gancce gelin carkkay cicirkkii geeza. 33Wogolo gancce yez e tamaaritay, «Neenii tumakka Xooss Na7a» gi goynneeza.

34U abba piinggii Gensareexe biitta helleeza. 35Ya biittayil yez asay Yesuusana erii fa shooro heera yez ubbayis kiita dakkeeza. Asay hargintteez asita ubba eziko ke7eeza. 36Hargintteez asitay e afila manchcha aadda bochchodayis eza woosseeza. Bochcheez ubbitaykka paxeeza.

Currently Selected:

Maatoosa 14: MeloNTL

Highlight

Copy