Maatoosa 13

Zerithi zeriz athay aaziso

(Mar. 4:1-9; Luq. 8:4-8)

1Ye gallas Yesuusa karapp kezii abba kantta betteeza. 2Gaame woya e lanqqe shiiqin asa abba gaxa ashshii wogolo gancce gelii betteeza.#Luq. 5:1 3Asayis gaame baz aazisor yeegii odeeza:

«Pettii biitta oothiz athay zerithi zerodayis kezeeza. 4E zerodar pettii pettii zerithay oge gaxa wodhdheeza; unttanakka kafitay yi7ii maxxii meeza. 5Pettii pettii zerthitay oommo sisilqqo yez biittal afa wodhdheeza. Gaame biitta baa gishos ellis doleeza. 6Zin awa kezin shulleeza; xapho baazay gishos meleeza. 7Pettii pettii zerithay angguthi gancce wodhdheeza; angguthay diccii ye dola cuulleeza. 8Yhankkitay ma irkko biittal afa wodhdheeza; dolii aafe aafeeza. Pettay xeeti, pettay usuppuntam, pettay ma hasttam aafeeza. 9Si7iz hayer yez athay si7o» yeegeeza.

10Yesuusa tamaaritay eziko shiiqii, «Abis neenii woyayis aazisor odee?» yeegii oyiceeza.

11E mahii, «Yinttis salo kaattetithi xuura ingintteeza, zin unttisi ingginttekkaya. 12Yeza ubbayis guzhinttoda, ezisi gaanggoda, zin baazaypp hara attozin ezis yezanakka ekinttoda.#Mat. 25:29; Mar. 4:25; Luq. 8:18; 19:26 13Yey gishos, taanii unttii, bi7ittar dengaamay garkk, si7ittar si7aam garkk woy akaakam garkk unttisi aazisor odiza.

14«Isayaasa fa maxaafay giddo odeezay unttal afa polintteeza. E odittar,

« ‹Yi sis si7iza, zin akaakooya;

yi bi7ith bi7iza, zin dengooya.

15Abis giiko, yha asay wozinay oriddeeza;

fa haya erittar tulliseeza,

fa aafa goozeeza.

Yey baazako u fa aafatir bi7ii,

fa hayer si7ii,

fa wozinar akaakii,

taako maaqqoda,

taakka unttan pathodazin› yeegeeza.

16«Zin yi aafay bi7iza gisho yi hayay si7iz gishos yi anjjintteezita.#Luq. 10:23-24 17Ta yinttis turo odiza; gaame nabitayinnee geeshsh asitay yi be7eezana be7adayisinne yi si7izana si7odayis amotteeza, zin unttis hanekkaya.

18«Yikkee, yha zerithi zeriz athay aazisa si7oytta. 19Oge gaxa wodhdheez zerithi aazisay yhaya: salo kaattetith qaala si7ii akaakowa athay wozinaypp Xalahe yi7ii e wozina gancce yez zertha maxii haaseeza. 20Sissilqqo biittal afa zerntteezay beezizay qaala si7ii ellis ufayssar ekkizita. 21Zin yhattesapp attin xapho dakkekkaya. Qaala gisho meto woy bayi7ithii yi7iza wode ellis dhubinttiza. 22Angguthi gancce zerintteezay yhaya qaala si7eeza, zin yha alame yessis hirggaynnee duretithis qofay qaala cuulliza gishos aafe aafekkazar attiza. 23Zin aradda biittal zerinteez zerithay yhaya akaakar qaala si7eez atha. E aafe aafiza; pettay xeeti, pettay usuppuntam pettay ma hasttam inggiza» yeegeeza.

Leeshshor aaziso

24Yesuusa unttis hara aaziso odeeza, «Xooss kaatetithay fa woota gancce lo77o zerithi zereez atha aaziza. 25Zin as ubbay genttin e morkkay yi7ii gistte gancce leeshsho zerii qiteeza. 26Gisttay diccii ka77iz wode leeshshokka e gancce bentteeza.

27«Gade goday ayllitay godayko yhanigii, ‹Godayyo, ne wootayid ne lo77o zerithi zerekkasa? Yeezin, leeshsho anapp ye7eenee?› yeegeeza.

28«E unttiko, ‹Yeya morkke ootheeza› yeegeeza.

«Ayllitay godayiko, ‹Nu yhanigii leeshsha shoddod garkk ne koyinee?› yeegeeza.

29«Zin E, ‹Atto bochchippate; yi leeshsha shoddiz godar gisttekka shodinttoda. 30Bochchippate; maxo wode hellodayis wolla dicco. Ye wode maxiza asitay leeshsha tiinattii maxii tama gancce xuugodayis mirqqer mirqqer mirqqoytta. Zin gistta shiishii ta shaalayid oloytta› yeegoda» yeegeeza.

Sanaficce aafe aaziso

(Mar. 4:30-32; Luq. 13:18-19)

31Ma hara aaziso yeegii odeeza; «Salo kaatetithay pettii asii fa woota gancce bakkeez sanaficce aafe aaziza. 32Ye mithat aafay hara mithii aafitaypp xiqqa, zin dolii diccii hara mith ubbaypp aadhii dammii dicciza. I shaqitayil afa kafitay keexxii bettod hellodayis damma mith maaqqiza» yeegeeza.

Irshsho aaziso

(Luq. 13:20-21)

33Maaqqikka, Yesuusa hara aaziso odeeza; «Salo kaatetithay pettii maachchi hayidzii gongge dhiilla ekkii munuqii, munuqay dendoday garkk ezayid dakkeez irshsho aaziza» yeegeeza.

34Yesuusa woyayis ye aaziso ubba odeeza. Aaziso baazin pettibazikka odekkaya. 35Nabay fa maxaafay gancce,

«Taanii ta doona, aazisor dooyoda;

salonnee sa7a medhintteezayppe,

geemmezana ta odiza»

yeegii odeezay yeyid polintteeza.#Maz. 78:2

Leeshsho aazisays birshithi

36Yesuusa woyita ashshii kara geleeza. E tamaaritay eziko shiiqii, «wootayid yez leeshshay bilitha nuus odoba» yeegeeza.

37E mahii, «Lo77o zerithi zereezay As Na7a, 38Wootay yha alama. Lo77o zerithay salo kaatetithii na7ita. Leeshshay xalahe na7ita. 39Leeshsho zereezay morkke xalahe, maxo woday wode wurssitha, maxizitay kiitanchchita.

40«Leeshshay maxinttii tama gancce xuuginttizay garkk wode wurssithala yhaygarkk hanoda. 41As Na7ay fa kiitanchchita kiittoda. U nagaras sankke maaqqeezittannee iita oothizi ubbita maxii e kaatetithaypp kessoda. 42Maxii shiishii yeefonnee achch coonchii yez to7oowa tama gancce oloda. 43Ye wode xillitay fa Aday kaatetithayid awa garkk poo7oda. Si7iz haye yezay si7o!

44«Xooss kaatetithay woota gancce moogintteez miishe aaziza. Pettii asii ye miisha denggii mahii moogeeza. Gaame ufayttii yhanigii paas yeza baz ubba bayizii ye gadat wonggeeza.

45«Yey garkk, ma salo kaatetithay inqqo giz al7o shuchchita koyiz zal7e as aaziza. 46Gaame al7o inqqo denggii yhanigii paas yeza baz ubba bayizii e wonggeeza.

Molo aykkiz gite aaziso

47«Ma Xooss kaatetithay abba gancce olintteez duma duma molo kochch aykkizi gite aaziza. 48Molo aykkiz asay molo gitayid kumin abbappi gaxa kesseeza. Ezayid bettii lo77a lo77a qurii daachcho gancce oleeza, zin iita molita alla oleeza. 49Wode wurssithal yey garkk hanoda. Kiitanchchitay yi7ii nagara oothizita xillitaypp quroda. 50Yeefonnee achch coonchii yeza to7oowa tama gancce oloda.

51«Yha ubbitay yinttis geleenee?» yeegii unttan oyceeza.

U mahii, «Ee» yeegeeza.

52Yesuusa, «Yikkee, salo kaatetithii xuura ekkii higge taamarssiza ubbitay, fa minjjeez shalaypp orothinnee cima kessiza shalo goda aaziza» yeegeeza.

Yesuusanana Naazirete helleez ixo

(Mar. 6:1-6; Luq. 4:16-30)

53Yesuusa yha aazisa odii wursseezaypp guye ezaypp denddii qiteeza. 54Fa yelintteez biitta yhanigii Ayihuditay Woosa Kara taamarsso ayikkeeza. U mala bazi gi, «Yha athay yha ecetithannee yha malata oothiza wolqqa anap ekkeenee? 55Yhayi anaaxay na7a baasannee? E indatii sunthay Mayiramo baasanee? E ishitay Yayqqooba, Yooseefa, Simoonarannee Yihuda baasannee? 56E mishunthikka nuur yezunthuna baasanee? Yeezin, yha athay yha ubba anapp ekkeenee?» yeegeeza. 57Yey gishos, E giz baza ekkaam ixxeeza.#Wan. 4:43

Zin Yesuusa, «Nabe fa yelintteez biittayidannee fa kara asay kale bonchchinttooya» yeegeeza. 58U ammanaami ixxeez gishos gaame malata ye aqayid oothekkaya.

Currently Selected:

Maatoosa 13: MeloNTL

Highlight

Copy