Lūk 13
13
Ansīrna mo ole Anpeina
1 #
Mt 27:2
Hava huna āom senkhatin, a dāli dar u ngāi bila Pilat-in Galili mi ngāi thisen ei manpol ruia chu Isuo kōma a ril u na. 2#Zn 9:2-3Isuo'n a masang a, a kōm u na, “Hivan tin anga āntak a lei tiar u sika, hiva Galili mi ngāi hi Galili atei ngāi dōra nēka asiat sabak ranga mo nei mandon u? 3Tenchu kei na ril a ni u zei, ni u mak. Tenchu nā'n sīr u nōk ten, havan tin dēn han anpei kiar u na ti. 4#Zn 9:7, 11Siloam-a insāng a chiam a, ei that sōmleiariat ngāi ha Zerusalem-a om mītei ngāi dōra nēka asiat sabak ranga mo nei mandon u? 5#Mt 3:2; Kui 2:38Tenchu kei na ril a ni u zei, ni u mak. Tenchu nā'n sīr u nōk ten, havan tin dēn han anpei kiar u na ti,” a tī na.
Marā Bui Theichang Kung le han Ankhīna
6 #
Isa 5:2; Zer 8:13; Mt 21:19 Amā'n hiva ankhīna-chong um a ril a, “Mī khatin theirapom rahuona theichang kung anling khat a dōn a. Hava han a marā anrok ranga a hong a, ītē man mak a. 7#Mt 3:10Hatuk theirapom rahuon ārungpū kōma, ‘Entā, hiva theichang kunga a marā ānrok ranga kum anthum kei hong a ni zei, tenchu ītē man mak ung a. Phūr ta ro. Hong sik mo phil duoi ei masiat rang?’ a tī na. 8Tenchu amā'n a kōma, ‘Ka pū, hiva kum rong om sā rase ba, a ravēl chuia, sarāt ēk vūr ka ting. 9Anrā ten āsa len a ni zei. Tenchu anrā nōk ten, na phūr thei,’ ” a tī na.
Sabat Nikhuona Ānā Āndam
10 #
Mt 4:23
Sabat nikhuo han Sinagog khata a manchū na. 11Entā, hava han nupang khat kum sōmleiariat chuoina rathā'n ei sūr a om a. Ama chu ānkul, anzīk theilui a ni. 12Isuo'n ama chu a mū na, a kōma a kui a, “Nupang, na rikhuo nātā nā zōk zei,” a tī na. 13#Mk 5:23A chunga a kut a bāng a, ama chu anzīk len a, hatuka Pathian a manpāk a. 14#Ant 20:9; Mt 12:2; Mk 5:22Sabat nikhuona Isuo'n ei mandam sika, Sinagog-a ruoipū'n taksi chunga mipui ngāi kōma, “Miring sinthōna rang nī ruk a om a. Hasikhan, hava nikhuo ngāi han hong u tānla, hong dam u ro, tenchu Sabat nikhuona ni mak,” a tī na. 15Pumā'n ama chu a masang a, a kōma, “Phuozekām ngāi! Sabat nikhuona na sarāttang u ngāi mo ole na sakuorpar u ngāi mo ranvāi-in ātā mazōk a, tī avā'n nēk ranga ruoi u mak chē mo? 16#Mt 4:10Hanle hiva nupang, Abraham a nāinupang hi kum sōmleiariat pei Setan-in a lei khit hi, ei ānkhitna nātā Sabat nikhuona ei ānzōk ni mak mo?” a tī na. 17#Isa 66:5Amā'n hiva ngāi ei tīna hin, a rāldui ngāi dōrā chu māimōk ansak u na. Amā'n sin alianpā ngāi ei thō dōra sika mipui ngāi dōrā chu a rāi asān u na.
Hoiro Rū Ankhīna
Mt 13:31-33; Mk 4:30-32
18 #
Mt 3:2; 13:24 Hatuka Isuo'n, “Pathian rēngram chu hong ang mo ei ni? Hong le mo kei mankhī rang? 19#Mt 13:32Hiva hi hoiro rū, mī khatin ei chōi a, a rahuona ei va tū ang a ni. A hong ānsōn a, thingkung alianpā a chang a. Chunga va ngāi a hong u na, a bāk ngāia rabū a khuor u na,” a tī na.
Chol le Ankhīna
Mt 13:33-35
20Amā'n, “Pathian rēngram chu hong le mo kei mankhī rang? 21#1Ko 5:6Hiva hi chol ang a ni. Nupang khatin chol a lāk a, vāipōldī kok#13:21 kok: Grika “saton,” kg 7.3 a ni. anthum le han a manpol a, aloma athui māseng ei sūn rapa ei siak ang a ni,” a ti rēt a.
Makot Anchīpa Ālūt
Mt 7:13-14, 21-23
22Ama chu khopui ngāi lē khuo ngāi a rō chunga a manchū tir a, Zerusalem khopui chu a pan a. 23Hatuka mī khatin a kōma, “Puma, mī alaktē mo sandama a om?” a tī na. Isuo'n amāni kōma, 24#Mt 7:13“Suokkhār anchīpa alūtna pūt zām u ro. Asik chu kei na ril a ni u zei, mi tampā'n ālūt ranga pūt u'n ti, tenchu lūt thei u nō ni. 25#Mt 7:23In puma chu anthui a, suokkhār ā kal a, nangni chu tuolpanga andinga suokkhār antōk chunga, ‘Puma, Puma, suokkhār na malongpē ro ba,’ na ti u tika, amā'n, ‘Hova nātā hong mo nā ni u, na riat u mak ung,’ tīna na masang u'n ti. 26Hatuka nangnī'n, ‘Na makunga nēk sāk na thō chachak do. Nangin koini na lamlian ngāia na manchū chachak do,’ la ti u'n na ti. 27#Mt 7:23Tenchu amā'n, ‘Kei na tī a ni u zei, hova nātā hong mo nā ni u, na riat u mak ung. Nangni āsiat āthōpū ngāi dōra, ka kōm ātā ankhāi u ro,’ la tī'n ti. 28#Mt 8:12Abraham, Isak, Zakob lē deari ngāi dōra chu Pathian rēngrama a om a lē nangni ngāi chu apanga anpeia nei om chu na mū u tika, hava han chapna lē rakam anriala om in ti. 29#Mt 8:11Suolam, tāklam, sim lē mār ātā mī hong u'n tia, Pathian rēngrama hong ānsut u'n ti. 30#Mt 19:30Entā, nūk anta senkhat chu mān antā u'n ti, mān antā senkhat chu nūk anta u'n ti,” a tī na.
Isuo Zerusalem ranga ei Chapna
Mt 23:37-39; Lk 19:41-44
31 #
Mt 14:1
Hava nikhuo taka han Farisāi senkhat a hong u na, Isuo kōma, “Suok tānla, hiva nātā sē ro, asik chu Herod-in anā that rang a zōt,” a ti u na. 32#Heb 2:10Amā'n a kōm u na, “Sē u tānla, hava sial kōma va ril u ro. Entā, avian lē nangtūk hin raluoi ngāi razūl ka tia, āna ngāi mandam ka ting, nīnthum nikhuona ka sin zui ka ting. 33#Mt 21:11Hanum ni sela, avian, nangtūk lē nangthiam hin anzin ngēt kei nāng a ni. Asik chu Zerusalem panga deari thi ngāi mak. 34#Mt 23:37O Zerusalem! Zerusalem! Deari āthat ngāi lē na kōm una a hong āntīr ngāi lung adēnga āthat ngāi! Ārpuiin ate ngāi a mantha thuoia ei op anga, na nāi u ngāi hi voi ituk mo āop ranga kei mankhōm zōt a ni. Tenchu zōt u mak chē na. 35#Zer 12:17Entā, na in u chu aram bianga anmāka om zei. Ataktaka kei na ril a ni u zei, ‘Zehova raminga āhongpū chu anpāka om rase,’ (Sām 118:26)
nei ti una hun a hong āsuok māseng chu na mu u lāi nō ta ni,” a tī na.
Currently Selected:
Lūk 13: RNL
Highlight
Share
Copy
Want to have your highlights saved across all your devices? Sign up or sign in
Bible in Ranglong, © Bibles International, the Bible society of Baptist Mid-Missions, 2024.
