OODEZHECHEGAWINEWAH 16
16
1Me dush ketuhgwishing ewede Derbeïng kuhya Lystraïng: benuh dush, pazhik kekenooähmahgun ewede keähyah, Timotheus azhenekahzood, oogwissun Jewequa, kahdabwayandung; oosun dush ke‐Greek‐enene-wewun:
2Kahminwahjemegood dush enewh wejekewaëmaun kahahyahnejin emuh Lystraïng kuhya Iconiuming.
3Me dush oonoo kahnundahwanemahjin owh Paul cheühneweejewegood; oegeöodahpenaun dush kuhya oogekekenoowahje‐keeshkishwaun oonje enewh Jewyun ewede uhkeeng kahahyahnejin: kuhkenuh muh oogekekanemahwaun oosene Greek ahwenid.
4Magwah dush uhnebemoosahduhmoowaud enewh keche‐oodanahwun, oogepuggedenahmahwahwaun enewh enahkoonegawinun cheguhnuhwanduhmenid, kahenahkoonegawaud egewh apostleüg kuhya katezejig emuh Jerusaleming kahahyahjig.
5Me dush kahezhesoongekahbahweïndwah emuh dabwayanduhmoowining egewh dabandahgoozejig emuh ahnuhmeähwining, kuhya ashkum kemeshenoowug anduhsoo‐kezheguk.
6Uhpe dush kahuhnebemoosahduhmoowaud mezewakummig Phrygia kuhya Galatia, kekenahahmahgoowaud enewh Keche‐Oojechaugwun chedebahdooduhmoowaud ewh ekedoowin emuh Asiaïng,
7Kahtuhgwishenoowaud emuh Mysiaïng, keënanduhmoog cheëzhahwaud emuh Bithyniaïng; kah dush oogepuggedenahmahgoosewaun enewh Keche‐Oojechaugwun.
8Uhnekuhbekummoowaud Misia kepeëzhahwug emuh Troasing.
9Paul dush oogewahbundaun wazhebahbunduhmoowin nebahtebik; Kenebahwewun Macedoniaïng duhzhe enenewun kepahgoosanemegood, oo‐oo keëgood, Macedoniaïng peëzhahkun, cheweedookahweyaung.
10Kahwahbundung ewh enahbunduhmoowin, kazhetena ningewekoojetoomin cheëzhahyaung ewede Macedoniaïng, quuhyukwanduhmaung ewh nundoomeyummingid owh Tabaningad chekuhgeekemungidwah egewh ewede anduhnuhkeejig.
11Uhpe dush kahoonjemahjeyahsheyaung emuh Troäsing, quuhyuk ningeënahshemin emuh Samothraciaïng, wuhyahbung dush emuh Neapolising;
12Me dush ewede kahoonjetuhgwishenaung emuh Philippiïng, me ewh kache‐oodanuhwung ewede anuhkakummig Macedonia kuhya keketuhbewenewun: ningeähyahmin ewede keche‐oodanaung goomah menik dussoogoon.
13Aunwabe‐kezheguk dush ningeöonjesahgahuhmoomin emuh oodanaung, chegeseebe dush ningeëzhahmin, kahduhzheähnuhmeäung; ningenuhmuhduhbemin dush, kuhya ningeguhnoonahnahnig egewh equawug ewede kahpeëzhahjig.
14Pazhik dush equa Lydia azkenekahzood, atahwaungad ewh misquagin, ewede Thyatira aduhming keche‐oodanaung, anuhmeätuhwaud Kesha‐Muhnedoon, ningenoondahgoonaun: ooda dush oogepahkahkoonahmahgoon enewh Tabaninganejin, cheöonjebezindung oonoo uhyeëen kahekedoojin owh Paul.
15Uhpe dush ween kahbaptizooïnd, kuhya kuhkenuh emuh oowegewauming ahyahjig, ningepahgoosanemegoonaun, oo‐oo keëkedoo, Kishpin enanemeyag cheäungwahmebuhmeetahwug owh Tabaningad, peendegag emuh newegewauming, ewede dush dahyook. Ningekeche‐weekoojeë-goonahnin dush.
16Kepuhgummeähyahmahgud, uhpe aneëzhahyaung anduhzhe‐ahnuhmeäung, ningenuhquashkahgoonaun pazhik ooshkenegequa kakishkahwaud chesuhkee‐muhnedoon, kah-oonjekeche‐oondezenid enewh tabanemegoojin ewh kecheesuhkeed.
17Mesuh owh kahnoopenuhnaud enewh Paulun kuhya nenuhwind, kepepahgid dush oo‐oo keëkedood, Oogoo enenewug oobuhmetahwahwaun enewh mahyahmahwe ishpandahgoozenejin Muhnedoon; wahyahbundahenungwah dush ewh bemahjeëwawine meekun.
18Nebewah dussoogoon dush oo‐oo keëzhechega. Paul dush, kewuhsittahwandung, kequakekahbahwe oo‐oo dush keënaud enewh muhnedoon, Kekuhgaunzoomin emuh oodezhenekahzoowining owh Jesus Christ chesahgechenahwashkahwud. Oogesahgejenahwashkahwaun ewh uhpe tebahegun.
19Uhpe dush egewh tabanemahjig wuhyahbunduhmoowaud kemahjahmahgudenig ewh kahahpanemoowaud cheöondezewaud, oogetuhkoonahwaun enewh Paulun kuhya Silasun, kuhya oogeëzheweenahwaun emuh ahtaundewining kahduhzhe‐ahyahnid enewh nahgahnezenejin,
20Oogeëzheweenahwaun dush emuh anahsuhmuhbenid enewh tebahkoonega‐wenenewun, oo‐oo keëkedoowaud, Oogoo enenewug, Jewwewaud, ookeche‐megooshkahjetoonahwah kedoodanahwenaun,
21Kekenooähmahgawug dush enewh enahdezewinun anandahgwussenoogin cheöodahpenuhmung, kah kuhya cheguhnuhwanduhmung kenuhwind Romaneweyung.
22Egewh dush kahooqueenoojig kepuhsegwewug chequaushkoonoodahwahwaud: egewh tebahkoonega‐wenenewug oogekishkebetoonahwaun enewh oodahgwewinene, keëkedoowug dush chepuhzhunzhaöomind.
23Uhpe dush nebewah kahpuhzhunzhawahwaud, oogepeenjewabenahwaun emuh kebahquahoode‐weguhmigoong, oogekuhgaunzoomahwaun enewh ganuhwanduhmenejin kebahquahoode‐weguhmig cheäungwahme‐guhnuhwanemahnid:
24Ween dush oo‐oo kahezheäungwahmemind, oogepeenje‐wabenaun emuh ahpeche peendig atag kebahquahoode‐weguhmig, kuhya oogeminjemahpetoowaun oosittahne.
25Ahyahbetah‐tebekuk dush Paul kuhya Silas keähnuhmeähwaud oogenuhguhmootahwahwaun enewh Kesha‐Muhnedoon: oogenoondahgoowaun dush enewh kabahquahegahzoonejin.
26Chasekah dush kekeche‐cheengwakummegah, kuhya kenuhningishkahmahgud ewh kahoonjeminjemoosing kebahquahoode‐weguhmig; bahbega kepahkahkoonegahdawun kuhkenuh ishquaundamun, kuhya kuhkenuh egewh kahtuhkoobenindjig keähbahahmahwahwug ootuhkoobejegunewaun.
27Owh dush ganuhwandung kebahquahoode‐weguhmig kekooshkoose magwah nebaud, wuhyahbundung dush enewh kebahquahoode‐weguhmigoong duhzhe ishquaundamun pahkahkoosenenig, oogejegoobetoon oodahzhahwashkoom, keënandum dush chenesedezood, keöozhemoodooganug egewh kahkebahquahegahzoojig, keënandum.
28Paul dush kekeche‐kezhewa, keguhnoonaud, oo‐oo keëkedood, Kagoo ningood mujjedoodunkan keyow: kuhkenuh muh oomah nindahyahmin,
29Kahnundoodung dush wahsuhkoonanjegunun, kepeendega‐buttoo dush neningishkaud kuhya kepungeshin anahsuhmenid Paulun kuhya Silasun,
30Oogesahgejeweenaun dush, oo‐oo keëkedood, Enenewedoog, ahneen kadezhechegayaun cheöonjebemahjeëgooyaun?
31Oo‐oo dush oogeënahwaun, Dabwayanim owh Tabaningad Jesus Christ, kegahbemahjeëgoo dush keen, kuhya egewh emuh andahyun andahjig.
32Oogewahweenduhmoowahwaun dush oodekedoowin owh Tabaningad, kuhya kuhkenuh emuh andahnid ayahnejin.
33Me ewh tebahegunadenig nebahtebik keöodahpenaud, kesebegenuhmoowaud dush kahenugguhnahmemind: waweeb dush kebaptizooäh ween kuhya kuhkenuh anduhshid.
34Uhpe dush kahpeendigahnaud emuh oowegewauming, oogeähtoon meejim anahsuhmuhbenid, kemoojegeze dush, kedabwayanemaud enewh Kesha‐Muhnedoon kuhya kuhkenuh menik anduhshid.
35Uhpe dush kahkezheguk, egewh tebahkoonega‐wenenewug oogeëzhenahzhahwahwaun enewh tuhkoonewa‐wenenewun, oo‐oo cheëkedoonid, Puhgedin oogoo enenewug.
36Kuhya dush owh ganuhwandung kebahquahoode‐weguhmig oogeweenduhmoowaun enewh Paulun oo‐oo ekedoowin, Kepeähnookeewug egewh tebahkoonega‐wenenewug chepuhgedenegooyag: umba dush sahguhuhmoog, kuhya emuh pezaunezewining ezhemahjahyook.
37Paul dush oo‐oo oogeënaun, Mezheshuh ningepuhzhunzhaöogoonahnig pwahnahneboomegooyaung, Romaneneneweyaung, kuhya ningepeendega‐wabenegoonahnig emuh kebahquahoode‐weguhmigoong; noongoom dush nuh keemooj newesahgeje‐wabenegoonahnig? Kahween tahezhewabussenoon; wenuhwah tebenuhwa tahpeëzhahwug chepesahgejewezheyungidwah.
38Egewh dush tuhkoonewa‐wenenewug ooweenduh-moowahwaun oonoo ekedoowinun enewh tebahkoonega‐wenenewun: kesagezewug dush, uhpe kahnoonduhmoowaud che‐Roman‐enenewenid.
39Kepeëzhahwug dush kepahgoosanemahwaud, oogesahgeche‐weenahwaun dush, kuhya oogeënahwaun emuh keche‐oodanaung cheöonjemahjahnid.
40Keöonjesahguhuhmoog dush emuh kebahquahoode‐weguhmigoong, kepeendegawug dush emuh oowegewauming owh Lydia: uhpe dush kahwahbuhmahwaud enewh wejekewaëmaun oogemenoo‐daäähwaun, kemahjahwug dush.
Currently Selected:
OODEZHECHEGAWINEWAH 16: OTW
Highlight
Share
Copy
Want to have your highlights saved across all your devices? Sign up or sign in
Psalms published by the Canadian Bible Society 1856. New Testament and Pentateuch published by the Society for Promoting Christian Knowledge (SPCK) 1861-1874.
