Mattayo 26

1Yaliji pe wamasile aga malowe gose, Isa wasalile wa kwajiganya wao, 2mkumanyilila yati pa nyuma pa mowa gawili tiwe Pasaka, nombe wao Mwana wa Adam akutolelwa asulibiwe.

3Ni pelepo waungene wakohani wakulungwa ni wa kulemba ni achekulu wa wandu mnyumba mwa Mkohani wakulungwa wawilasilwe Kayafa, 4wapanganisye kulangana wakamule Isa kwa ulamba waulaje. 5Wasalile, ngati mliua mwakulungwa, ikawa ufitina mwandu.

6Nombe nao Isa pe waliji Mbetania mnyumba mwa Siman asiene ukoma, 7wawandichile wakongwe ni libweta lia alabastro lisiene marhamu ya ndalama sia ijinji, wasimimine mmtwe mwao achiwaga ateme pasi. 8Ni wa kwajiganya achilolaga watumbile, asasile, kwa chichi wasasi weleu? 9Ligongo marhamu yeila ingakusisywe kwa ndalama sia ijinji ni wangapewile wakulaga. 10Isa achimanyililaga, wasasile, mbona mkwasausya wakongwe? Wakumbanganichisye litendo liambone. 11Ligongo mowe gose mde nago kulaga, uneji nganimba uneji mowa gose. 12Achinitililaga marhamu yelei, kwa kuzikwa kwangu aipanganisye. 13Amin ngwasalila pa kwenesywa pose anjili yelei mchilambo chose, yelei iwapanganisye wakongwe awa, tasalwe kwa kumbuchila kwao.

14Jumo juao likumi kwisa wawili, lina liao Yuda Iskariota, wajawile kwa wakohani wakulungwa, wasalile, 15chitimsache kumba chichi, none tinatole kwenu? Wasiowekene nao kwa ipande makumi gatatu ga ndalama; 16ni kutanda liua lielelio wasasile lipese watole.

17Liua lia ndanda lia mikate jangachesuka, wa kwajiganya wajisilile Isa wasalile, mkusaka, twapakulile kulia pasaka kwapi? 18Wasasile, jendani ku musi kwa anyono mwasalile, mjiganyi akusala, makati gangu gawandichile; timbanganye Pasaka kumangwenu ni wakwajiganya wangu. 19Wa kwajiganya wapanganisye pi walajisye Isa, wapakulile Pasaka.

20Pe yaliji ligulo ateme pasi ni likumi kwisa wawili. 21Pe waliji achiliaga, asasile, amin ngwasalila, yati jumo juenu, ni welewo watandole. 22Wajinjilwe ni kulila kukujinji, watandile wandu wose kwasalila, ambuje, noneji? 23Wajanjile, wasasile, welewo watasile mkono pamope none mbale, ni welewo watandole. 24Mwana wa Adam kwaula, mpela iwalembilwe, nambo ole wakwe mundu juejula tiwatole Mwana wa Adam, angaliji heri mundu jula pangawelekwa. 25Yuda watosile wajanjile, wasalile, Rabbi, ni uneji? Wasalile, mwasisile.

26Ni pe waliji achiliaga, Isa watosile mkate, wanjinichile, wautemenye, wapele wa kwajiganya, wasasile, mtole, liani, auu ni chiilu chanju. 27Atosile chikombe, washukuru, wapele, wasasile, 28ng’wani kwa achichi mwe ose, ligongo achichi ni miasi jangu ja kulangana kwa kuwisi, jijajitiche kwa wajinji wa kutiosywa kwa thambi. 29Ngwasalila yati ngang’wa soni kusogola akuku kwa mzabibu, mpika liua alila pe tisachekulingwa pamope nomwe ja mbisi muchimwene mwa Atati wangu.

30Ni pe wamasile kuimba zaburi watiosile ajawiile litumbi lia Zeituni. 31Isa wasalile, timchimywe wose kwa ligongo liangu chilo chi, ligongo ilembilwe, tinapute wa kuchinga ni ngondolo sia mpingo tisijasanjiche. 32None pa tinyuchepo tinalongolele mpika Galilaya. 33Petro wajanjile, wasalile naga wosepe tachimywe wose kwa ligongo lienu, none nganjimwa. 34Isa wasalile, amin ngwasalila, chilo achichi pa ujo pa kuimba tambala, timganila katema katatu. 35Petro wasalile, naga timbajile kuua nomwe, nganamkanila. Wa kwajiganya wose wasasile ila ila.

36Isa waiche nao pandu pakuwilangwa Gethsemane, wasalile wa kwajiganya, mtame apa, mendaga nyuje kwekula. 37Watosile Petro ni waana wawili wa Zebedayo, watandite kuwa ni kulila ni kuisya mtima mnope. 38Wasalile, mtima wangu ingwete kulila ku kujinji mpika kuua; mtame apa mlolechesye none. 39Wajawile ku ujo inandi pe wajineme wajusile, wasasile Atati wangu, naga ikukomboleka, chindeche chicombe achichi; nambo ngati mpela ngusaka uneji, nambo mpela mwe. 40Wawandichile wa kwajiganya, wawene agonile. Wasalile Petro, nganimkombola kulolechesya none mpika saa jimo. 41Mlolechesya mkajuje, kajimjinjila mkulimba. Mtima ni welewo ukasaka nambo chiilu cha kulipuka.

42Ajawile soni katema ka wili ajusile, wasasile, Atati wangu, naga ikukomboleka chindeche chikombe achi pangang’wa, limkusakalio lipanganeche. 43Aiche wawene agonile soni; ligongo meso gao ga kusitopa. 44Walesile, ajesile ajusile soni katema ka tatu, achisalaga malowe galagala. 45Aiche soni kwa wa kwajiganya wao, wasalile, mgone sambano mpika mbesi, mpumulile.

Saa jiwandikile, ni Mwana wa Adam akutolwa mmakono mwa asiene thambi. 46Mtiokani, tujaule Mlolani, welewo aiche wa kundola.

47Pa kusalapo ni Yuda jumope jua likumi kwisa wawili waiche, ni wakwakagula wajinji nao asiene upanga ni ikongo, watiosile wakohani wakulungwa ni achekulu wa wandu. 48Welewo watosile wapele ishara, achisalaga, jua tisache kumusya, ni welewo welewa; mkamule. 49Chitema wawandichile Isa wasalile, Salaamu Rabbi, wamusisye. 50Isa wasalile, mjangu, mjisile kwa chichi? Nombe nao waiche watasile Isa makono wakamwile. 51Ni jumo juao walijiko ni Isa, wagoluesye makono wautile upanga wao, waputile kapolo jua wakohani wakulungwa, wakatile liwiwi. 52Isa wasalile, mbuje nao upanga wenu pandu pakwe, wosepe wa kutola upanga tauwe kwa upanga. 53Mkuti uneji ngapakombola sambano kwajuga Atati wangu, nombe nao tambelechele kupunda lejioni likumi kwisa jiwili ja masoka? 54Nambo tikumalile uli kulemba, yati iwajile kuwa yeleyo.

55Saa jelejo Isa wasalile wandu wajinji, mtiosile mpela pe nani pa wakusombola ni panga ni kongo mdole? Natema pasi liua kwa liua nomwe mhekalu ninyiginyiga, na muno nganimgamula. Nambo malowe aga pe galiji, kulemba kwa nabii kumalile.

56Wa kwajiganya wose walesile wautwiche.

57Ni wewala wakamwile Isa wapeleche kwa Kayafa Mkohani wakulungwa, kuwasimene wakulemba ni achekulu. 58Nombe nao Petro wakagwile kwa kutalika, mpika mnyumba mwa mkohani wakulungwa; wajinjile mkati ateme ni wakwatumichila, auone mbesi.

59Wakohani wakulungwa ni achekulu ni baraza siose wasosile wa kuitichisya wa unami pe nani pa Isa, waulaje, akakupata; 60ligongo wa kuitichisya wajinji wa unami wajisile, nganakupata. Pa mbesi wa kuitichisya wa unami wawili waiche, wasasile, 61welewa wasasile, ngupakombola kulisakasya hekalu la Mulungu, ni kulitawa kwa mowa gatatu. 62Atiosile Mkohani wakulungwa, wasalile ngajanga lilowe? Malowe gachi awa akugajitichisya? 63Isa wamialele Mkohani wakulungwa wajanjile wasalile, ngumlumbilisya kwa Mulungu waliji wajumi, mtusalile, mpela nimwe Masiya, Mwana wa Mulungu. 64Isa wasalile, msasile; nambo ngwasalila, ka nyuma kakwe timwaone Mwana wa Adam achitamaga mkono wa mlio wa machili, achisaga pe nani pa maunde ga kwiunde.

65Nombe nao Mkohani wakulungwa waunukwile itakulo yao, wasasile unajisi, tukusaka uli soni kujitichisya? Mlolechesya, mpilikene sambano unajisi wao; mkuona uli? 66Wajanjile wasasile, yawajile kuua. 67Nombe nao wasumile mata pa usio pao, waputile, wane waputile liwandama, wasasile, 68mtutagulile, ewe Masiya ni wani wamputile?

69Petro ateme pasa mukumbi, aiche mwesichana jumope wasasile, nomwe mwaliji pamope ni Isa wa Galilaya. 70Akamile pa ujo pa wandu wose, achisalaga, ngalinalimanya mkusalalio. 71Pe watiosile mpika pa mlango, wane wawene, wasalile wandu wali kweleko, ni awa waliji pamope ni Isa Mnazarayo. 72Akanile soni kwa chisango, nganinammanya mundu jula. 73Ka nyuma kakwe inandipe, wandu wali kweleko achimaga wawandichile, wasalile Petro yambone yenu mweji jumo juao, lulimi luenu luakumbonesya. 74Atandite kuluesya ni kulumbila, nganinammanya. 75Chitema wajimbile tambala. Petro akumbuchile malowe ga Isa, pe wasalile, pa ujo pa kuimba tambala, timganile katema katatu. Atiosile, walisile mnope.

Currently Selected:

Mattayo 26: YAO1880

Highlight

Copy