Marako 15

1Kandi omu nkyakya obutuku bwakere, eryoneryo banyakatagara abakulu hawuma nabakulu nabahandiki, nabomu rukurato abosye mubahanura, mubaboha Yesu, mubamutwala hali Pirato. 2Pirato mwamubulya atya Niwe Mukama wa Bayudaya? Mwasubamu mwamubwera atya Neryo obwere. 3Banyakatagara abakulu mubamulega binene. 4Kandi Pirato mwasubamu erimubulya atya Sulisubamu ekinywa? Langera ebinywa okubiri ebinene ebibakakulega. 5Baitu Yesu mwatasubamu ekinywa ekindi; Pirato mwasweka.

6Kandi ha bugenyi mwabalukira omunyankomo omuwuma, owobamusaba. 7Kandi habyaho omuwuma oyokabirikirawa Baraba, enyanebohirwe hawuma nabo abaimukirire, ababya abitire abantu omu imukirira eri. 8Kandi endeko muyahetuka muyatanga erimusaba akole nkokuyabakola. 9Pirato mwabasubiramu mwababwera atya Mukanza mbalekere Omukama wa Bayudaya? 10Baitu mwamenya ambu habwobuha nikyo banyakatagara abakulu bamuherayo. 11Baitu banyakatagara abakulu mubabwerera endeko ambu hakire abalekere Baranaba. 12Kandi Pirato mwasubula eribabwera atya Nikyihi ekyangandikola oyu oyomukabirikira Omukama wa Bayudaya? 13Mubasubula eritoka ambu Omuhanike ha musalaba. 14Pirato mwababwera atya Ekibi kiri hayi ekyakolire? Baitu mubatoka kutsebu ambu Muhanike ha musalaba. 15Kandi Pirato obwabya akanza eriwanya endeko, mwabalekera Baraba, mwahayo Yesu, enyaberemuswirya, erihanikwa ha musalaba.

16Kandi baserikale mubamutwala omu nyumba, neyo Peraitolio; mubasonkanya hawuma ekihanda ekyosye. 17Kandi mubamwambalya oruwoye orukagatsuka, mubaluka ekondo eyamahwa, mubamuirayoko; 18mubatanga erimuramukya ambu Obusinge Mukama wa Bayudaya. 19Mubamuswirya enkoro ha mutwe, mubamutwira ebitandi, mubakukama amaru, mubamuramya. 20Kandi obubabuga erimuterera syenaku, mubamulusyaho oruwoye orukagatsuka, mubamwambalya ebyambalo biwe. Kandi mubamuhulukya erimuhanika ha musalaba.

21Kandi mubahambiritsya omuwuma abya amalabaho, Simoni owa Kulene, alwire omu miyi, ise Alegezanda na Rufo, erigenda nabo, aheke omusalaba wiwe. 22Mubamuleta omu mwanya Gorogosa, mukyamanyiswa ambu Omwanya woruhanga. 23Mubamuletera obwabu ebunejwanganemu na muro, baitu eyo mwatakirirya. 24Mubamuhanika ha musalaba, mubagabana ebyambalo biwe, ebanemubetoma, omuntu owosye ekyakanditwala. 25Kandi esaha syabya esiri esatu, mubamuhanika ha musalaba. 26Nebaruha eyomusango wewe muyihandikirwa ha lubula ambwa omukama wa bayudaya. 27Kandi hawuma nayo mubahanikira ha misalaba abanyeyi babiri; omuwuma ha kuboko kwewe okwokuli, nowondi ha kwokulembi. [28Kandi ekyahandikawa mukyahikirira ekyakabuga ambu Kandi mwaganzwa hawuma nababihya.] 29Nabo ababya bakalabaho mubamuterera esyenaku, ebanemutenganya emitwe yabo, mubabuga ambu Aha, iwe oyokasambula yekaru, kandi oyokahimbayo ebero bisatu, 30oyetsune oyowene, olwe ha musalaba. 31Nabanyakatagara neryo batera batya esyenaku, ebanemubwerana hawuma nabahandiki ambu Mwatsuna abandi; salitoka eryetsuna eyowene. 32Kristo, Mukama wa Isareri, alwe ha musalaba hatya, itwe tulangere, tukiriraye. Kandi abahanikirwe hawuma nayo nabo mubamutsuma.

33Kandi esaha eyandatu ebere emahika, muhabyaho omuirima ahesi eyosye, erihika ha saha eyomwenda. 34Kandi omu saha eyomwenda Yesu mwalaka omulenge omunene atya Eroi, Eroi, rama sabakasani? mukyamanyisibwa ambu Nyamuhanga wage, Nyamuhanga wage, nikihi ekikaleka owandeka? 35Kandi abawuma hali ababya banemene eyi, obubakyowa mubabuga ambu Langera, akabirikira Eriya. 36Kandi omuwuma mwatebeta, mwaibika ekijumankuba omu bwabu obwakalihire, mwakiyira ha mulonke, mwamuha erinywa, akabuga atya Leka; tulangere Eriya obwakandyasa erimuhanula. 37Yesu mwalaka omulenge omunene, mwahayo obukali. 38Enyigamu eyomu yekaru muyasatukamu kabiri, erilwa ha lubula nerihika ahesi. 39Kandi omunyakihanda abya enyanemumaneko hakuhi, obuyabana ahereyo atya obukali, mwabuga atya Mazimakwo omuntu ono abere Mwana wa Nyamuhanga. 40Kandi habyaho abakali ebakalankera hali: omuli abo Malyamu Magadalene na Malyamu nyinya Yakobo omulere, na Yose, na Salome; 41obwabya ali omu Galaraya nibo bamukwamiraga, ebanemuhererya; nabakali abandi abanene abahatuka nabo ha Yerusalemi.

42Kandi, obutuku obubwabya buirire, eribya ekero ekye Litekanitsa, nekyo ekero ekiritanga Sabiti, 43muhasa Yusufu owa Alimasaya, omuhanula owerisawa, kandi nayo mwalenkekanya obukama bwa Nyamuhanga; mwingeramu hali Pirato esyalisaga, mwasaba ekinda kya Yesu. 44Pirato mwasweka okwakwire luba: mwabirikira ahali omunyakihanda, mwamubulya okwakwire kera. 45Kandi obuyakyowa hali omunyakihanda, mwaha Yusufu ekinda. 46Kandi mwawula oruwome orwa bafuta, mwamuhanula, mwamukumesya oruwoye orwa bafuta, mwamuyira omu sinda eyatakulawa omu mwandara; mwakumbagalya eribwe ha buno bwesinda. 47Kandi Malyamu Magadalene na Malyamu nyinya Yose mubalankera ahayirawa.

Currently Selected:

Marako 15: KOO1914

Highlight

Copy