ลูกา 15
15
กาเมก ซืออีโกยํ นู ลือแงะ ดัฮ
(มัดทัย 18.12-14)
1อาดา ซืออารี_ โกะ ซือมียา มูงอจ อาเซน ฌางัน ลูมอฮ ซือมียา บือดูซา_ กูญา ซือมูฮา มาโซะ มาแรฮ ดาปิก_ บีดา นะ มือนีงัย เยซู มือเลา. 2โซะ ลูมอฮ ฟาริซี ฌางัน โกะ ซือมียา อาฌัยํ ลาฆู ปือมือซัด นะ ตูฮัด_ กูญา บือซูงุจ จะ_ “ซือมียา อีนี_ ญา ซาโมจ โกะ ซือมียา บือดูซา_ ดูโดะ มากัด ฌางัน กูญา โปด.”
3กะฆีเตอ_ เยซู ญา มือเลา จรือตา_ อาฌัยํ กูญา กะฆีนี จะ_ 4“เดะ ลูมอฮ กาเญา_ ซือมียา ดีฮา_ อาดา กาเมก ซือราตุซ อีโกยํ_ นู ซืออีโกยํ ซือซัจ ลือแงะ ปี ดัฮ_ ญา นะ บูวัจ กะฮามี? ญา นะ ตีงัน กาเมก นู ซือมีลัด ปูโลฮ ซือมีลัด อีโกยํ อีตู_ เดะ ตืองัฮ ปาดัก. กะฆีเตอ ญา นะ ปี ตูโรจ นู ซืออีโกยํ_ นู ลือแงะ ซีงี_ ตือดะ ดาปัจ_ บูกัด เฆอ? 5ตานา ดาปัจ ดัฮ_ ญา อาเกะ บอฮ เดะ บาฮู_ ตาโงก มาแรฮ_ ซูกา ฮาตี เลอ. 6รอจ กะ รูมัฮ ดัฮ_ ญา บลาโลก โกะ ฆูๆ นะ ญา_ ฌางัน โกะ นะบรานะ_ มาแรฮ มารือมา_ มือเลา ฌางัน กูญา จะ_ ‘กือนา ซูกา ฮาตี ฌางัน กู_ ซาเบะ จะ_ กู บือเลฮ ดาปัจ กาเมก นะ กู_ นู ลือแงะ ดัฮ เลอ.’ 7กู มือญาเระ กะ กาเญา จะ_ ซือรูปา กะฆีเตอ_ นู ซือมียา บือดูซา ซืออูรัก โปด_ นู บราเลฮ ฮาตี ปาเระ เตอ_ บูวัจ บรี อาดา ลาฆู ซูกา ฮาตี บาญะ โซะ ลาแงะ_ ลือเบฮ เดะ ลาฆู ซูกา ฮาตี_ กรานา ซือมียา บาฌิ ตือปัจ_ ซือมีลัด ปูโลฮ ซือมีลัด อูรัก_ นู เตด ฆาโดฮ นะ บราเลฮ ฮาตี เลอ.”
ดูเวะ ซา รีเงะ นู ลือแงะ ดัฮ
8เยซู มือเลา ปูลัก จะ_ “นีบีนี ดีฮา นู อาดา_ ดูเวะ ซือปูโลฮ รีเงะ ปีระ_ ดัฮ ดูเวะ นะ ญา ลือแงะ_ ซา รีเงะ_ ญา นะ บูวัจ กะฮามี เลอ? นะ จูโจฮ ปลีตา_ กีกัย รูมัฮ_ มียา ราตาๆ_ ฌู ดาปัจ เลอ. 9ดาปัจ ดัฮ_ ญา บลาโลก โกะ ฆูๆ_ ฌางัน โกะ นะบรานะ มาแรฮ มารือมา_ มือเลา ฌางัน กูญา จะ_ ‘กือนา ซูกา ฮาตี ฌางัน กู เลอ_ ซาเบะ จะ_ กู บือเลฮ ดาปัจ ดูเวะ ซา รีเงะ อีตู_ นู ลือแงะ ดัฮ.’ 10กู มือญาเระ กะ กาเญา จะ_ ซือรูปา กะฆีเตอ ฌูฆา_ โกะ ฮูลู บาลัก นะ ตูฮัด เดะ อาตัซ_ กูญา ซูกา ฮาตี ซูโงฮ เลอ_ กรานา ซือมียา บือดูซา ซืออูรัก_ นู บราเลฮ ฮาตี ปาเระ ดัฮ.”
เยซู จรือตา ปาซัน นานะ นู ซือซัจ ฌาลัด
11เยซู มือเลา ปูลัก จะ_ “อาดา ซือมียา ซืออูรัก_ ญา อาดา นานะ กีลากี_ ดูวา บราดี. 12นู อาดี มือเลา ฌางัน ปะ เดะ ญา จะ_ ‘ปะ เออ_ มีตา ปาฮาฆิ โกะ บือนา บารัก_ บรี กะ กู นะ อาดา บาฮาเฆด นะ กู เลอ.’ กะฆีเตอ_ ปะ เดะ ญา_ ญา ปาฮาฆิ โกะ ซือบารัก ซือมูฮา_ บรี กะ นานะ นะ ญา_ ดูวา บราดี. 13ฮอย เตด บาญะ อารี_ นู อาดี_ ญา ฌูวัน บาฮาเฆด นะ ญา ซือมูฮา_ อาเมด ดูเวะ_ บือฌาลัด ปี กะ นังฆรี ฌาโวฮ. ปัจ อีตู_ ญา บูวัจ ลาฆู ซูมอก_ ซูโรฮ ตัง ฌู ฮาบิฮ. 14ตานา ตัง นะ ญา ฮาบิฮ ดัฮ_ ฌาดี วะตู ฮอย ซือบารัก นะ มากัด_ เดะ นังฆรี อีตู ซือมูฮา. นานะ นู อาดี อีตู ซีงี_ ญา ซูซัฮ ฮาฌะ โตระ เลอ. 15กะฆีเตอ_ ญา ปี ดูโดะ_ ฌางัน ซือมียา เดะ นังฆรี อีตู_ ซืออูรัก. ซือมียา อีตู ซูโรฮ ญา ปี กะ ปาดัก นะ ญา_ ปือบือลา โกะ บาบี ปัจ อีตู. 16ญา เตอ_ บือคานะ นะ มากัด โกะ ตาโระ กาจัก_ นู บาบี มากัด อีตู_ บรี กือญัง. ตาปี ฮอย ซาปา ฮาฆิ ซือบารัก นามา_ บรี กะ ญา มากัด เลอ. 17บารู ญา ซือดัยํ ดัฮ_ มือเลา จะ_ ‘โกะ อานะ กูลี นะ ปะ เดะ กู_ ราตา อูรัก_ กูญา อาดา ซือบารัก มากัด บาญะ. กูญา มากัด กือญัง_ ฌู ลือเบฮ. ตาปี กู นี เลอ_ บือตาฮัด นาซี_ มาจับ นะ มาตี ดัฮ. 18กู กือนา บีกัซ ปี ซารี ปะ เดะ กู_ มือเลา กะ ญา จะ_ “ปะ เออ_ กู บูวัจ ซาลัฮ ฌางัน ตูฮัด เดะ อาตัซ_ ซาลัฮ ฌางัน ปะ ซามา ดัฮ. 19กู เตด บือฆูนา_ นะ ฌาดี นานะ นะ ปะ ลาฆี. กู มีตา เดะ ปะ_ บรี กู ฌาดี บือกะ อานะ กูลี นะ ปะ_ ซืออูรัก เลอ.” ’
20“กะฆีเตอ ญา บีกัซ_ ปี ซารี ปะ เดะ ญา. ตาปี_ กาลา ญา อาดา ฌาโวฮ ลาฆี_ ปะ เดะ ญา ลีฮัจ บือฆารี_ ตือจีฮัด กะ ญา_ บลารี ปี ลาบัด เดะ ลีเฮ_ จีโยบ ญา บาญะ กาลี. 21กะฆีเตอ_ นานะ อีตู มือเลา ฌางัน ปะ เดะ ญา จะ_ ‘ปะ เออ_ กู บูวัจ ซาลัฮ ฌางัน ตูฮัด เดะ อาตัซ_ ซาลัฮ ฌางัน ปะ ซามา ดัฮ. กู เตด บือฆูนา_ นะ ฌาดี นานะ นะ ปะ ลาฆี.’ 22ตาปี_ ปะ เดะ ญา_ ปือซัด โกะ ปราโซฮ นะ ญา จะ_ ‘ปี เลอ จือปัจๆ_ อาเมด บาฌู ปาญัก นู บาฌิ ซูโงฮ_ มาแรฮ ปากัย บรี กะ ญา. อาเมด จีเจด มาแรฮ_ บอฮ เดะ ฌารี นะ ญา. อาเมด ปะตาปะ มาแรฮ_ บอฮ บรี ซามา. 23ปี อาเมด อานะ ลือมู นู ลือมะ_ มาแรฮ บูนอฮ เลอ. กีตา นะ บรามัย ซูกา ฮาตี_ มากัด บือซามา. 24ซาเบะ จะ_ นานะ นะ กู นี_ ญา มาตี_ ตาปี ญา ฮีโดะ ปาเระ ดัฮ. ญา ลือแงะ ปี_ ตาปี มาแรฮ ดาปัจ ปูลัก เลอ.’ กะฆีเตอ_ กูญา ซือมูฮา บรามัย ซูกา ฮาตี.
25“ตาปี นานะ ซูโลก เตอ_ ญา อาดา เดะ บือนัก. ตานา บาลิ มาแรฮ ดาปิก กะ รูมัฮ_ ญา ดืองัยํ กูญา ปาคัจ มือญาญี_ มือนารี ซามา. 26กะฆีเตอ_ ญา บลาโลก ซือมียา บือกรือฌา ซืออูรัก_ ตาญา จะ_ ‘กูญา ตืองัฮ บูวัจ นามา เลอ?’ 27ซือมียา อีตู ตีกัฮ จะ_ ‘อาดี เดะ เกา_ ญา บาลิ มาแรฮ ดัฮ. กะฆีเตอ_ ปะ เดะ เกา_ บรี บูนอฮ อานะ ลือมู นู ลือมะ_ บรี บรามัย มากัด บือซามา_ กรานา จะ_ ญา บือเลฮ ซาโมจ นานะ บาลิ มาแรฮ ซือนัง บาฌิ ดัฮ.’
28“ตาปี นานะ ซูโลก_ ญา มูซัยํ โตระ_ ตีเมา มาโซะ กะ รูมัฮ. กะฆีเตอ ปะ เดะ ญา_ ตรือเบะ ปี_ ปูโฌะ ญา บรี มาโซะ กะ รูมัฮ. 29ตาปี นานะ อีตู_ ญา ตีกัฮ ปาเระ กะ ปะ เดะ ญา จะ_ ‘ลีฮัจ เลอ_ กู บือเลฮ บือกรือฌา_ ซือรูปา ฌาดี ปราโซฮ นะ ปะ_ บราปา ตาโฮด มาแรฮ ดัฮ? กู เตด ดือละ ปูตุซ ปือมือซัด นะ ปะ_ ซือกาลี เตอ. ตาปี ปะ เตด ดือละ ฮาฆิ กู_ อานะ แบะ ซืออีโกยํ โปด_ บีดา กู นะ มากัด บรามัย_ ฌางัน โกะ ฆูๆ นะ กู. 30ตาปี นานะ นะ เกา นู อีนี เลอ_ ญา ปี บือซามา ฌางัน นีบีนี ฌาลัก_ ตือดะ บลาญา นะ ปะ_ ฮาบิฮ ซือมูฮา ดัฮ. ตานา ญา บาลิ มาแรฮ_ ปะ ปี อาเมด อานะ ลือมู นู ลือมะ มาแรฮ_ บรี กะ กูญา มากัด บรามัย เลอ.’ ญา จะ.
31“ปะ ตีกัฮ กะ ญา จะ_ ‘นานะ เออ_ เกา อาดา ดูโดะ ฌางัน กู_ ซือลาลู. โกะ ซือบารัก นะ กู ซือมูฮา_ ฌาดี ซือบารัก นะ เกา เลอ. 32ตาปี ปาโตจ เลอ_ นู กีตา บือเลฮ บรามัย ซูกา ฮาตี_ ซาเบะ อาดี เดะ เกา อีนี_ ซือรูปา ญา มาตี ดัฮ_ ตาปี ฮีโดะ ปาเระ เลอ. ญา ลือแงะ ปี_ ตาปี มาแรฮ ดาปัจ ปูลัก ดัฮ เลอ.’ ญา จะ.”
Currently Selected:
ลูกา 15: ULBIBLE
Highlight
Share
Copy
Want to have your highlights saved across all your devices? Sign up or sign in
Free Reading Plans and Devotionals related to ลูกา 15
Laughter and Lament: The Radical Freedom of Joy and Sorrow
Read To Hear : The Gospel Of Luke
We Don't Care Where You've Been, We Care Where You're Going
