โยฮัน 7
7
เยซู ฌางัน โกะ นะบรานะ นะ ญา
1ลือปัซ อีตู ปูลัก_ เยซู ญา บือฌาลัด ปี ราตา ตือปัจ เดะ นังฆรี ฆาลิลี. ญา ตีเมา นะ ปี กะ นังฆรี ยูเดีย_ ซาเบะ จะ_ โกะ กือปาลา ลูมอฮ ยิว_ กูญา มียา ตาดัฮ นะ บูนอฮ ญา. 2กาลา อีตู_ ซรือปะ นะ รอจ กะ ลาฆู บรามัย ดูโดะ เดะ รูมัฮ ซาเราะ กาฌัก นะ ลูมอฮ ยิว. 3กะฆีเตอ_ โกะ ลูมอฮ อาดี นะ เยซู_ กูญา มือเลา ฌางัน ญา จะ_ “เกา กือนา ตรือเบะ เดะ ตือปัจ อีนี เลอ_ ปี กะ นังฆรี ยูเดีย_ บีดา โกะ มูเระ นะ เกา_ นะ บือเลฮ ลีฮัจ โกะ ลาฆู ปือบูวัจ นะ เกา_ นู เกา ตืองัฮ บูวัจ เตอ. 4กรานา จะ_ ดัฮ ซือมียา ดีฮา_ ซูกา นะ บรี โกะ ซือมียา ราตาๆ_ กราลา ญาวา นะ ญา_ ซือมียา อีตู นะ ฮอย เตด บูนี บูวัจ โกะ ซือบารัก นามา งะซืองะ เลอ. ดัฮ เกา นะ บูวัจ ลาฆู กะฆีนี_ กือนา บูวัจ บรี ดือนียา ซือมูฮา_ นะ ลีฮัจ บือฆารี ญาวา นะ เกา เลอ.” กูญา จะ. 5โกะ ลูมอฮ อาดี นะ เยซู กูญา มือเลา กะฆีเตอ_ ซาเบะ จะ_ กูญา เตด ปือจายา กะ ญา.
6กะฆีเตอ_ เยซู มือเลา ฌางัน กูญา จะ_ “ฮอย เตด รอจ กะ วะตู นู บาฌิ นะ กู ลาฆี. ตาปี วะตู นะ กาเญา_ อาดา ซือรูโลยํ เลอ. 7ดือนียา นะ บือชี กะ ลูมอฮ กาเญา เตด บือเลฮ เลอ_ ตาปี ดือนียา นะ บือชี กะ กู ดัฮ_ กรานา จะ กู นี เลอ_ ฌาดี ซะซรี จะ_ ลาฆู บือกรือฌา นะ ดือนียา เตอ_ ญา ฌาฮัจ เลอ. 8ลูมอฮ กาเญา เลอ_ กือนา ญาแญะ ปี กะ ลาฆู บรามัย. ตาปี โซะ กู_ กู เตด ปี กะ ลาฆู บรามัย อีตู_ ซาเบะ จะ_ วะตู นะ กู เตอ_ ญา ฮอย เตด รอจ ลาฆี เลอ.” 9ตานา เยซู มือเลา กะฆีเตอ ดัฮ_ อีซี ญา เตอ_ อาดา ดูโดะ เดะ นังฆรี ฆาลิลี ลาฆี.
เยซู ปี กะ ลาฆู บรามัย ดูโดะ เดะ รูมัฮ ซาเราะ
10ตาปี ตานา โกะ อาดี นะ เยซู_ กูญา ญาแญะ ปี กะ ลาฆู บรามัย ดัฮ_ เยซู โปด_ ตูโรจ ญาแญะ ปี ฌูฆา. ตาปี ญา ปี งะซืองะ_ เตด บรี ซาปา ตาฮู เลอ. 11โกะ กือปาลา ลูมอฮ ยิว_ กูญา มียา เยซู เดะ บรามัย อีตู_ เตด ดาปัจ. กูญา บือตาญา-ตาญา จะ_ “ซือมียา อีตู ดูโดะ ตือปัจ ดีฮา เลอ?”
12โกะ ลูมอฮ ซือมียา บาญะ_ กูญา ปาคัจ บือบีซิ ซามา กูญา_ ปาซัน ลาฆู นะ เยซู. ซือตืองัฮ มือเลา จะ_ “ญา ฌาดี ซือมียา บาฌิ เลอ.” ซือตืองัฮ จะ_ “บูกัด โบะ_ ญา บูวัจ บรี โกะ ซือมียา ซือซัจ ฌาลัด ดัฮ.” 13ตาปี ฮอย ซือมียา ดีฮา_ บรานี มือเลา บรี ดืองัยํ_ กรานา จะ_ ตาโกจ เดะ โกะ กือปาลา ลูมอฮ ยิว เลอ.
14ตานา รอจ กะ อารี เดะ ตืองัฮ ลาฆู บรามัย อีตู ดัฮ_ เยซู ญา มาโซะ ปี กะ รูมัฮ มือญือมัฮ ตูฮัด ฮึนตะ นะ อาฌัยํ โกะ ลูมอฮ ซือมียา. 15โกะ กือปาลา ลูมอฮ ยิว_ กูญา ปาคัจ ปือและ ฮาตี_ มือเลา จะ_ “ซือมียา อีนี ญา ตาฮู โกะ ซูรัจ บือเลฮ กะฮามี? โบะ ญา เตด บือเลฮ บลาฌัยํ ซูรัจ เลอ.”
16กะฆีเตอ เยซู ญา ตีกัฮ กะ กูญา จะ_ “ปือมือเลา อาฌัยํ นะ กู_ บูกัด นะ กู ตะอาซิก เลอ_ ตาปี ฌาดี นะ ตูฮัด นู ซูโรฮ กู มาแรฮ. 17ซือมียา ดีฮา นู ตือตู ฮาตี นะ บูวัจ ตูโรจ กะ ลาฆู นู ตูฮัด บือคานะ เตอ_ ซือมียา อีตู นะ ตาฮู จะ_ ปือมือเลา อาฌัยํ อีตู_ ดาตัก เดะ ตูฮัด เดะ อาตัซ เฆอ? เฆอ จะ_ กู มือเลา ตูโรจ กะ ฮาตี นะ กู ตะอาซิก เลอ. 18ซือมียา ดีฮา นู มือเลา_ ตูโรจ กะ ฮาตี นะ ตะอาซิก เตอ_ ซือมียา อีตู ญา ซูกา นะ บรี โกะ ซือมียา มือโอจ_ กะ อีซี ญาวา นะ ญา. ตาปี ซือมียา ดีฮา_ นู นะ บรี โกะ ซือมียา มือโอจ_ กะ ตูฮัด นู ซูโรฮ ญา มาแรฮ เตอ_ ซือมียา อีตู เลอ_ ญา ฌาดี ซือมียา รือมัก_ ฮอย ลาฆู มืออูปัย ลาลู เลอ. 19มูซา ญา บือเลฮ อาเมด ปือมือเลา ฮูโกบ นะ ตูฮัด บรี กะ กาเญา_ บูกัด เฆอ? ตาปี เดะ ลูมอฮ กาเญา_ ฮอย ซาปา บูวัจ ตูโรจ กะ ปือมือซัด อีตู. จะ_ กาเญา มียา จือลัฮ นะ บูนอฮ กู บูวัจ นามา เลอ?”
20โกะ ซือมียา บาญะ อีตู_ กูญา ตีกัฮ จะ_ “เดะ ญาวา นะ เกา อาดา ฮาตู มาโซะ. ซาปา เลอ_ นะ มียา จือลัฮ นะ บูนอฮ เกา?”
21กะฆีเตอ เยซู ญา ตีกัฮ กะ กูญา จะ_ “กู บือเลฮ บือกรือฌา ลาฆู มือฆัฮ ซือมาตา_ บารู กาเญา ปาคัจ ปือและ ฮาตี เดะ ลาฆู อีตู เลอ. 22มูซา ญา บือเลฮ ปือซัด_ บรี กาเญา บูวัจ ลาฆู กรัจ. (โงฮซูโงฮ บูกัด จะ_ มาแรฮ ดาตัก เดะ มูซา_ ตาปี มาแรฮ ดาตัก เดะ โกะ บีลาแก เลอ.) มีเซ เดะ อารี บราดู กรือฌา โปด_ กาเญา บรี กะ ซือมียา นะ ซาโมจ ลาฆู กรัจ. 23ดัฮ เดะ อารี บราดู_ ซือมียา นะ บือเลฮ ซาโมจ ลาฆู กรัจ_ บีดา ตีเมา บรี ซาลัฮ เดะ ฮาดัจ ฮูโกบ นะ มูซา ดัฮ_ บูวัจ นามา ปะ_ กาเญา มูซัยํ กะ กู_ กรานา จะ_ กู บือเลฮ บูวัจ บรี ซือมียา ซืออูรัก_ ซือนัง บาฌิ ซือมูฮา ดัฮ_ เดะ อารี บราดู เลอ? 24ฌางัน นะ กรัจ ฮูโกบ ซือมียา_ ตูโรจ บือกะ ลาฆู นู กาเญา ลีฮัจ โซะ ลูวัยํ. ตาปี กือนา กรัจ ฮูโกบ บรี รือมัก บาฌิ เลอ.”
เยซู ฌาดี ราฌา นู บรี ซือลามัจ เฆอ?
25กะฆีเตอ_ ลูมอฮ ซือมียา นังฆรี เยรูซาเลม มือเลา จะ_ “ซือมียา อีนี_ บูกัด เฆอ_ นู กูญา มียา จือลัฮ นะ บูนอฮ ญา บูวัก เตอ? 26นี เลอ_ ญา ตืองัฮ มือเลา บรี ดืองัยํ. โกะ ซือมียา โปด_ กูญา ฮอย เตด มือเลา นามา กะ ญา ลาลู เลอ. โกะ ลูมอฮ กือปาลา ตาฮู ซูโงฮ ดัฮ เฆอ_ จะ_ ซือมียา อีนี ฌาดี ราฌา นู บรี ซือลามัจ? 27ตาปี กีตา ตาฮู ดัฮ จะ_ ซือมียา อีนี ญา ดาตัก เดะ ตือปัจ ดีฮา. ตานา ราฌา นู บรี ซือลามัจ นะ มาแรฮ เตอ_ ฮอย ซาปา นะ บือเลฮ ตาฮู ดัฮ_ จะ_ ญา มาแรฮ ดาตัก ปัจ ดีฮา เลอ.”
28กะฆีเตอ_ ตานา เยซู ตืองัฮ อาฌัยํ เดะ รูมัฮ มือญือมัฮ ตูฮัด_ ญา บือเลฮ มือญาเระ_ ซือวารา บือซัยํ_ จะ_ “กาเญา กราลา กู ซูโงฮ ดัฮ เฆอ? กาเญา ตาฮู จะ_ กู นี มาแรฮ ดาตัก ปัจ ดีฮา? ตาปี บูกัด จะ_ ฮาฌา กู มาแรฮ ตะอาซิก เลอ_ ตาปี ตูฮัด นู บือเลฮ ซูโรฮ กู มาแรฮ เตอ_ ญา รือมัก ซูโงฮ. ญา เตอ_ นู กาเญา ฮอย เตด กราลา เลอ. 29กู กราลา ตูฮัด_ ซาเบะ กู มาแรฮ ดาตัก เดะ ตูฮัด. ตูฮัด เลอ_ นู บือเลฮ ซูโรฮ กู มาแรฮ เตอ.”
30กรานา กะฆีเตอ_ กูญา ปาคัจ มียา จือลัฮ นะ รีฆะ เยซู. ตาปี เตด รอจ กะ วะตู นะ ญา ลาฆี. กะฆีเตอ_ ฮอย ซือมียา ดีฮา_ อาเงา ตางัน รีฆะ ญา บือเลฮ. 31ตาปี อาดา บาญะ ซือมียา_ เดะ ลูมอฮ โกะ ซือมียา อีตู_ นู ปือจายา กะ เยซู ดัฮ. กูญา มือเลา จะ_ “ดัฮ ราฌา นู บรี ซือลามัจ นะ มาแรฮ เตอ_ ญา นะ บูวัจ ลาฆู ปือมือฆัฮ_ บาญะ ลือเบฮ เดะ ซือมียา อีนี_ นู ญา บือเลฮ บูวัจ เฆอ?”
กูญา ซูโรฮ โกะ ตามาตา ปี รีฆะ เยซู
32ตานา ลูมอฮ ฟาริซี ดืองัยํ โกะ ซือมียา บือบีซิ ปาซัน ลาฆู นะ เยซู กะฆีเตอ_ ลูมอฮ โกะ ฟาริซี ฌางัน ลูมอฮ ซามี ซัยํบือซัยํ_ ซูโรฮ โกะ ตามาตา ปี รีฆะ เยซู. 33กะฆีเตอ_ เยซู มือเลา จะ_ “กู นะ ดูโดะ ฌางัน กาเญา กิดีกิ ลาฆี_ บารู กู นะ บาลิ ปี มียา ตูฮัด_ นู ญา ซูโรฮ กู มาแรฮ เลอ. 34กาเญา นะ มียา กู_ ตาปี เตด ดาปัจ. ซาเบะ ตือปัจ กู ดูโดะ เตอ_ กาเญา นะ มาโซะ ปี เตด บือเลฮ เลอ.”
35กะฆีเตอ_ โกะ กือปาลา ลูมอฮ ยิว ปาคัจ มือเลา ซามา กูญา จะ_ “ซือมียา อีนี นะ ปี กะ ดีฮา_ นู กีตา นะ มียา ญา_ เตด ดาปัจ? ญา นะ ปี มียา โกะ ซือมียา ลูมอฮ กีตา นู ปือจัฮ บือลัฮ_ ปี ดูโดะ เดะ ตืองัฮ ลูมอฮ ซือมียา บักซา อาซิก เฆอ? นะ อาฌัยํ โกะ ซือมียา บักซา อาซิก อีตู เฆอ? 36นู ญา มือเลา เตอ_ ฌาดี กะฮามี เลอ_ นู จะ_ ‘กาเญา นะ มียา กู_ ตาปี เตด ดาปัจ. ตือปัจ นู กู ดูโดะ เตอ_ กาเญา นะ มาโซะ ปี เตด บือเลฮ เลอ.’ ” กูญา จะ.
ซูงัย อาเย นู บรี ฮีโดะ
37เดะ ลาฆู บรามัย อารี ปือญูดัฮ_ ฌาดี อารี บือซัยํ เตอ_ เยซู ญา บือดีรี มือญาเระ_ ซือวารา บือซัยํ จะ_ “ดัฮ ซือมียา ดีฮา ดาฆา อาเย_ บรี กะ ซือมียา อีตู มาแรฮ มียา กู_ บีดา นะ โอะ อาเย. 38ซือมียา นู ปือจายา กะ กู เตอ_ บือกะ อาดา ฆาแรฮ ดัฮ_ เดะ ซูรัจ ปือมือเลา นะ ตูฮัด จะ ‘ซูงัย อาดา อาเย นู บรี ฮีโดะ เตอ_ นะ มือนีแลฮ ตรือเบะ เดะ ดาลับ ฮาตี นะ ซือมียา อีตู เลอ#อซค 47.1; ซคร 14.8.’ ” เยซู ญา จะ. 39นู เยซู มือเลา เตอ_ ญา ตูโญะ กะ ซือมืองัจ นะ ตูฮัด เลอ_ นู โกะ ซือมียา ปือจายา กะ ญา_ นะ บือเลฮ ซาโมจ ดัฮ. กรานา จะ_ ตูฮัด เตด บือเลฮ บรี ซือมืองัจ นะ ญา ลาฆี_ ซาเบะ เยซู เตด กือนา อาเกะ_ บรี บือซรี บือซายา ลาฆี เลอ.
โกะ ซือมียา ปือจัฮ บือลัฮ
40ตานา โกะ ซือมียา บาญะ บือเลฮ ดืองัยํ ลาฆู กะฆีเตอ ดัฮ_ ซือมียา ซือตืองัฮ มือเลา จะ_ “โงฮซูโงฮ เตอ_ ซือมียา อีนี ฌาดี ซือมียา ตูโดฮ ปือมือเลา นะ ตูฮัด นู อีตู#ยน. 1.21 เลอ.”
41ซือมียา นู ซิกอาซิก โปด_ มือเลา จะ_ “ซือมียา อีนี ฌาดี ราฌา นู บรี ซือลามัจ เลอ.”
ตาปี ซือมียา ซือตืองัฮ มือเลา จะ_ “ราฌา นู บรี ซือลามัจ นะ มาแรฮ ดาตัก เดะ นังฆรี ฆาลิลี เฆอ? เตด โบะ. 42เดะ ซูรัจ ปือมือเลา นะ ตูฮัด_ มือเลา จะ_ ราฌา นู บรี ซือลามัจ นะ มาแรฮ ดาตัก เดะ บือแนฮ นะ ราฌา ดาวิด_ นะ มาแรฮ เดะ ตูโปะ เบดเลเฮม#2ซม 7.12; มคา 5.2 เลอ_ ฌาดี ตูโปะ นู ดาวิด ญา ดือละ ดูโดะ เตอ.” 43ซาเบะ กะฆีเตอ_ โกะ ซือมียา กูญา ปาคัจ จัฮบือลัฮ ปาซัน ลาฆู นะ เยซู. 44ซือตืองัฮ นะ รีฆะ เยซู_ ตาปี ฮอย ซือมียา ดีฮา นะ อาเงา ตางัน รีฆะ ญา เลอ.
โกะ กือปาลา ลูมอฮ ยิว เตด ปือจายา
45กะฆีเตอ_ ตานา โกะ ตามาตา_ กูญา บาลิ ปี มียา ลูมอฮ ซามี ซัยํบือซัยํ ฌางัน ลูมอฮ ฟาริซี เตอ_ โกะ ลูมอฮ อีตู_ กูญา มือเลา ฌางัน ตามาตา จะ_ “บูวัจ นามา กาเญา ตีเมา รีฆะ ญา_ บาวา มาแรฮ กะ กียัด เลอ?”
46โกะ ตามาตา ตีกัฮ จะ_ “ฮอย ซือมียา ดีฮา ลาลู_ นู บือเลฮ มือเลา ซือรูปา กะ ซือมียา อีตู เลอ.”
47ลูมอฮ ฟาริซี ตีกัฮ กะ กูญา จะ_ “ลูมอฮ กาเญา กือนา ตูโตด ปี ซือซัจ ฌาลัด ฌูฆา ดัฮ เฆอ? 48เดะ ลูมอฮ กือปาลา_ เดะ ลูมอฮ ฟาริซี โปด_ อาดา ซือมียา ดีฮา ปือจายา กะ ซือมียา อีตู ซือตืองัฮ เฆอ? 49ตาปี โกะ ซือมียา นู บาญะ อีนี_ นู เตด ตาฮู โกะ ปือมือซัด ฮูโกบ โปด_ กูญา กือนา อาโบยํ ดัฮ เลอ.”
50นีโกเดมัด_ ซือมียา นู ดือละ มาแรฮ มียา เยซู วะตู ดูลู เตอ_ ญา ฌาดี ซือมียา ซืออูรัก เดะ ลูมอฮ ฟาริซี อีตู. ญา มือเลา ฌางัน กูญา จะ_ 51“โซะ โกะ ฮาดัจ ฮูโกบ นะ กีตา_ ดัฮ นะ กรัจ ฮูโกบ ซือมียา ดีฮา เตอ_ กือนา ดืองัยํ กะ ญา ดูลู_ นะ บือเลฮ ตาฮู จะ_ ญา บือเลฮ บูวัจ นามา ซือตืองัฮ_ บูกัด เฆอ?”
52กูญา ซือมูฮา ตีกัฮ กะ นีโกเดมัด จะ_ “เกา มาแรฮ ดาตัก เดะ นังฆรี ฆาลิลี ฌูฆา เฆอ? กือนา มือโซะ มียา ลีฮัจ เดะ ซูรัจ ปือมือเลา นะ ตูฮัด เลอ. เกา นะ บือเลฮ ตาฮู จะ_ ฮอย ซือมียา ตูโดฮ ปือมือเลา นะ ตูฮัด นู ดีฮา_ บือฌาดี ดาตัก มาแรฮ เดะ นังฆรี ฆาลิลี.”
นีบีนี นู กือนา รีฆะ_ ตืองัฮ ญา บูวัจ บือกาเซฮ
[ 53กะฆีเตอ_ กูญา ซิกมาซิก บาลิ กะ รูมัฮ นะ กูญา ดัฮ เลอ.
Currently Selected:
โยฮัน 7: ULBIBLE
Highlight
Share
Copy
Want to have your highlights saved across all your devices? Sign up or sign in
