ลามูลา 2
2
1กะฆีเตอ_ ลาแงะ ฌางัน ดือนียา_ ฌางัน บือนา ราตา ซือมูฮา นู อาดา ดูโดะ เดะ ดาลับ อีตู โปด_ กือนา บูวัจ ซุจ ฮาบิฮ ดัฮ. 2กะฆีเตอ_ เดะ อารี ตูโฌฮ_ ตูฮัด เดะ อาตัซ ญา บูวัจ ลาฆู บือกรือฌา ซุจ ดัฮ. อารี ตูโฌฮ อีตู_ ตูฮัด ญา บราดู บือกรือฌา_ เดะ ลาฆู ซือมูฮา นู ญา ซูดัฮ บือฌาดี ดัฮ. 3กะฆีเตอ_ ตูฮัด ญา บรี ซือลามัจ กะ อารี ตูโฌฮ_ ตืองะ ฌาดี อารี นู บาฌิ. กรานา เดะ อารี อีตู เลอ_ ญา บราดู บือกรือฌา นะ ญา_ นู ญา บือเลฮ บือฌาดี บือนา อีนี_ ซือมูฮา ดัฮ.
โกะ ซือมียา เดะ กือโบด เอเดน._
4ฌาดี กะฆีนี เลอ_ ลาฆู ลาแงะ ฌางัน ดือนียา_ ซูดัฮ บือฌาดี ดัฮ.
เดะ อารี นู ตูฮัด_ ฌาดี จะ_ ตูฮัด บือซัยํ เดะ อาตัซ เตอ_ ญา บือฌาดี ดือนียา_ ฌางัน ลาแงะ เตอ_ 5ฮอย โกะ ปูโฮด กายู เดะ ปาดัก บือตูโมฮ ลาฆี เดะ ดือนียา_ ฮอย โกะ ตาโระ เดะ ปาดัก บือตูโมฮ ฌูฆา. ซาเบะ ตูฮัด บือซัยํ เดะ อาตัซ_ เตด บือเลฮ บูวัจ บรี ฮูฌัด ตูโตฮ เดะ ดือนียา ลาฆี. ฮอย ซือมียา นะ บือกรือฌา มือนานัม เดะ ตานัฮ ลาฆี เลอ. 6ตาปี อาดา ฮือโมด ซือบุยํ ตรือเบะ มาแรฮ เดะ ตานัฮ_ บูวัจ บรี ตานัฮ บาซัฮ ซือมูฮา. 7เดะ อารี อีตู_ ตูฮัด บือซัยํ เดะ อาตัซ_ ญา อาเมด ฮาบู ตานัฮ มาแรฮ_ กือปัน บูวัจ ฌาดี ซือมียา#2.7 เดะ บาซา ฮีบรู_ ปือมือเลา จะ “อาดัม” ฌาดี จะ_ ซือมียา_ ตาปี ปือมือเลา จะ “อาดัมมัฮ” ฌาดี จะ_ ตานัฮ. เดะ บลากัก_ ซือมียา ลามูลา อีนี_ นะ กือนา บลาโลก จะ_ “อาดับ” บีดา ตูโญะ กะ ซือบารัก นู ตูฮัด ซูโรฮ_ บือฌาดี อีซี ญาวา ญา_ ฌาดี จะ_ ตานัฮ._ ญา รือฆู เดะ ลูบัก ฮีโดก นะ ซือมียา อีตู_ บรี ญา บือเลฮ บือญาวา_ บือเลฮ ฮีโดะ. กะฆีเตอ_ ซือมียา อีตู ฌาดี บือนา นู ฮีโดะ ดัฮ.
8กะฆีเตอ ตูฮัด บือซัยํ เดะ อาตัซ เตอ_ ญา ตานัม กือโบด เดะ นังฆรี เอเดน_ เดะ โซะ ตีมอยํ_ บรี ซือมียา นู ญา บือฌาดี ดัฮ เตอ_ ดูโดะ เดะ กือโบด อีตู เลอ.
9โกะ ปูโฮด กายู นู ลีฮัจ จะ บือฆาจะ เตอ_ โกะ ปูโฮด กายู นู มากัด บือเลฮ เตอ_ ตูฮัด บือซัยํ เดะ อาตัซ บูวัจ บรี บือตูโมฮ ซือมูฮา_ เดะ ตานัฮ ดัฮ. เดะ ตืองัฮ กือโบด อีตู_ อาดา ปูโฮด กายู_ ซือปูโฮด_ นู บรี ฮีโดะ. อาดา ปูโฮด กายู_ ซือปูโฮด_ นู บรี ตาฮู บาฌิ ตาฮู ฌาฮัจ ฌูฆา.
10อาดา ซูงัย มือนีแลฮ ตรือเบะ เดะ นังฆรี เอเดน อีตู_ บูวัจ บรี อาดา อาเย เดะ กือโบด. ตะเดะ กือโบด อีตู_ ซูงัย ญา บือปือจัฮ_ ฌาดี ปัจ จีปัก. 11ปือนามา จีปัก นู ซา_ ฌาดี ซูงัย ปีโซน. ซูงัย อีตู มือนีแลฮ_ กือลีลิก นังฆรี ฮาวีลา ซือมูฮา. ปัจ อีตู อาดา บีเฌฮ มัซ. 12มัซ เดะ นังฆรี อีตู_ บาฌิ ซูโงฮ. ปัจ อีตู อาดา ฆือตัฮ นู บาวู บาฌิ_ อาดา บาตู อีตัด ซา ฌือแนฮ ฌูฆา. 13ปือนามา ซูงัย จีปัก นู ดูวา_ ฌาดี ซูงัย กีโฮน. ซูงัย อีตู เตอ_ มือนีแลฮ กือลีลิก นังฆรี คูชี ซือมูฮา. 14ปือนามา ซูงัย จีปัก นู ตีฆา_ ฌาดี ซูงัย ทัยกริด_ นู มือนีแลฮ โซะ ตีมอยํ_ เดะ นังฆรี อาซีเรีย. ปือนามา ซูงัย จีปัก นู ปัจ_ ฌาดี ซูงัย ยูเฟรติด.
15กะฆีเตอ ตูฮัด บือซัยํ เดะ อาตัซ เตอ_ ญา บรี กะ ซือมียา อีตู_ ดูโดะ เดะ กือโบด เอเดน_ บีดา นะ บรี ญา บือกรือฌา บือบือลา ฮัจลีฮัจ กือโบด. 16กะฆีเตอ_ ตูฮัด ปือซัด ซือมียา อีตู จะ_ “บูวัฮ เดะ กือโบด ซือมูฮา_ เกา มากัด บือเลฮ ฮาปา. 17ตาปี อาดา ซือปูโฮด_ นู บรี ตาฮู บาฌิ ตาฮู ฌาฮัจ เตอ_ บูวัฮ ปูโฮด อีตู กือนา บลารัก_ ตีเมา บรี เกา มากัด เลอ. ดัฮ อารี ดีฮา_ เกา มากัด บูวัฮ อีตู_ เกา นะ มาตี ซูโงฮ อารี อีตู”_ ญา จะ.
18กะฆีเตอ_ ตูฮัด บือซัยํ เดะ อาตัซ_ มือเลา จะ_ “นู กีลากี อีนี นะ ดูโดะ ซืออูรัก เตอ_ เตด บาฌิ. กู นะ บูวัจ บรี อาดา กาวัด มือนูโลก ฌาดี ฆู นะ ญา”_ ญา จะ.
19กะฆีเตอ_ ตูฮัด บือซัยํ เดะ อาตัซ_ อาเมด ตานัฮ มาแรฮ_ กือปัน บูวัจ บรี บือฌาดี โกะ บือนาตัก ซือมูฮา_ ฌางัน โกะ บูโรก เดะ อาตัซ ลาแงะ_ ซือมูฮา. ญา อาเมด มาแรฮ_ บรี กีลากี อีตู ลีฮัจ จะ_ นะ ตืองะ ปือนามา กะฮามี. ซือมียา อีตู_ ญา บลาโลก บือนาตัก ราตา ซือมูฮา_ นู อาดา ฮีโดะ เตอ_ บือกะ ปือนามา นะ ญา. ปือนามา อีตู เลอ_ ฌาดี ปือนามา นะ ญา. 20กีลากี อีตู ตืองะ ปือนามา_ กะ โกะ บือนาตัก นู บือเลฮ ซูโรฮ_ กะ โกะ บูโรก เดะ ลาแงะ_ ฌางัน โกะ บือนาตัก เดะ ฮูตัด เตอ_ ตาปี กีลากี อีตู_ ฮอย เตด ดาปัจ กาวัด มือนูโลก. ญา ดูโดะ ซา อูรัก ลาฆี เลอ.
21กะฆีเตอ_ ตูฮัด บือซัยํ เดะ อาตัซ เตอ_ ญา บูวัจ บรี กีลากี อีตู ลีนา เตด ซือดัยํ_ ซีตะ ตูลัก รูโซะ มาแรฮ_ ซา บีลัฮ_ บูวัจ บรี ลูลู ลือกัจ ปาเระ_ ฆาตี ตูลัก อีตู. 22ตูลัก รูโซะ นู ตูฮัด อาเมด มาแรฮ_ เดะ กีลากี อีตู ซีงี เตอ_ ตูลัก อีตู เลอ_ ตูฮัด บูวัจ บรี บือฌาดี นีบีนี_ บาวา มาแรฮ_ บรี กะ กีลากี อีตู. 23กะฆีเตอ_ กีลากี อีตู_ มือเลา จะ_
“นี เลอ_ ฌาดี ตูลัก นู มาแรฮ_ ดาตัก เดะ ตูลัก นะ กู.
นี เลอ_ ฌาดี ลูลู นู มาแรฮ_ ดาตัก เดะ ลูลู นะ กู.
กะฆีเตอ เลอ_ นะ ตืองะ บรี ปือนามา จะ_ นีบีนี
กรานา ญา เตอ_ กือนา อาเมด มาแรฮ_ ดาตัก เดะ กีลากี ดัฮ#2.23 เดะ บาซา ฮีบรู_ นู จะ กีลากี_ กูญา มือเลา จะ_ “อีช”_ ตาปี นู จะ นีบีนี_ กูญา มือเลา “อีชา””_ ญา จะ.
24กะฆีเตอ_ โซะ กีลากี นะ ตีงัน เอด อาโปก นะ ญา_ นะ ปี ดูโดะ_ บือซามา บือซูโงฮ-ซูโงฮ_ ฌางัน บีนี นะ ญา. กะฆีเตอ_ กูญา กือดูวา_ นะ ฌาดี ญาวา ซือตือปัจ. 25กะฆีเตอ_ กีลากี อีตู_ ฌางัน บีนี นะ ญา เตอ_ กูญา ดูโดะ ญักตือลาญัก_ ฮอย เตด บือจือและ-จือและ เลอ.
Currently Selected:
ลามูลา 2: ULBIBLE
Highlight
Share
Copy
Want to have your highlights saved across all your devices? Sign up or sign in
