ปือบูวัจ 13

ตูฮัด ปีเลฮ บานาบัด ฌางัน เซาโล ดัฮ

1เดะ ลูมอฮ นะ ตูฮัด เดะ นังฆรี อันตีโยก_ อาดา ซือมียา ตูโดฮ ลาฆู นะ ตูฮัด_ ฌางัน ซือมียา อาฌัยํ ลาฆู ปือมือเลา นะ ตูฮัด ซือตืองัฮ. อาดา บานาบัด_ อาดา ซีเมโอน_ นู ปือนามา จะ ฮีตับ. อาดา ลูกีโย_ ซือมียา นังฆรี ซัยรีน. อาดา มานาเอน_ นู ฌาดี นานะ ปือบือลา บือซามา ฌางัน ราฌา เฮโรด. อาดา เซาโล ฌูฆา. 2กาลา กูญา ตืองัฮ มือญือมัฮ กะ ตูฮัด_ บูวัจ ลาฆู บือตาฮัด ซือบารัก มากัด เตอ_ ซือมืองัจ นะ ตูฮัด มือเลา ฌางัน กูญา_ จะ_ “กู บือเลฮ ปีเลฮ บานาบัด ฌางัน เซาโล ดัฮ_ บรี บูวัจ ลาฆู บือกรือฌา นะ กู. กาเญา กือนา ตืองะ กูญา_ บรี บือกรือฌา ลาฆู อีตู_ บีดา กู.”

3กะฆีเตอ กาลา_ กูญา บูวัจ ลาฆู บือตาฮัด ซือบารัก มากัด_ ซาแมน บือซาโวจ ดัฮ_ กูญา ตืองะ ตางัน เดะ ญาวา กูญา ดูวา อูรัก#13.3 ฌาดี จะ_ กูญา ตืองะ ดูวา อูรัก อีตู_ บรี มาโซะ บือกรือฌา ลาฆู นะ ตูฮัด. บรี กูญา ลือปัซ ปี.

กูญา ดูวา อูรัก ปี กะ ปูเลา ซัยปรัด

4กะฆีเตอ_ ซือมืองัจ นะ ตูฮัด ซูโรฮ บานาบัด ฌางัน เซาโล ปี. กูญา ปี กะ ตือเปด เซลูเกีย_ ญาแญะ กาปัน_ ปี กะ ปูเลา ซัยปรัด. 5ตานา รอจ กะ นังฆรี ซะลามิด ดัฮ_ กูญา ดูวา อูรัก ปี มือญาเระ ปือมือเลา นะ ตูฮัด_ เดะ โกะ รูมัฮ บือมุน นะ บักซา ยิว. อาดา โยฮัน#13.5 ฌาดี จะ_ โยฮัน นู ปือนามา อาซิก จะ_ มาระโก. ลีฮัจ ปบ. 12.12 ปี ซามา_ บรี ตูโลก กูญา. 6กูญา บือฌาลัด ตูโรจ ปี บลากัก ปูเลา_ รอจ กะ นังฆรี ปาโฟ. ปัจ อีตู_ กูญา ดาปัจ ซือมียา บักซา ยิว ซืออูรัก_ ปือนามา จะ บาระเยซู. ญา ฌาดี ซือมียา บือฆูรู อาเย ลือมู_ ฌาดี ซือมียา ตูโดฮ มืออูปัย. 7ญา อาดา ฌางัน ซือจียัด เปาโล_ นู ฌาดี ฮูลู บาลัก นะ ลูวัก_ เดะ ปูเลา อีตู. ฮูลู บาลัก อีตู ญา ฌาดี ซือมียา ปานัย_ ญา บลาโลก บานาบัด ฌางัน เซาโล มาแรฮ. ญา ซูกา นะ ดืองัยํ ลาฆู ปือมือเลา นะ ตูฮัด. 8ตาปี ซือมียา บือฆูรู อาเย ลือมู อีตู_ (นู อาดา ปือนามา จะ_ เอลีมา_ ฌาดี จะ_ ซือมียา บือฆูรู)_ ญา เตอ_ บือลาวัด ฌางัน กูญา ดูวา อูรัก_ ตีเมา บรี ฮูลู บาลัก ปือจายา.

9เซาโล (นู อาดา ปือนามา อาซิก จะ เปาโล)_ ญา ปือนอฮ ฌางัน ซือมืองัจ นะ ตูฮัด ตีญุง รือมัก กะ เอลีมา_ มือเลา จะ_ 10“เกา เลอ_ ฌาดี นานะ นะ ฮาตู ซีตัด_ ฌาดี ซือตรู นะ ลาฆู บาฌิ ราตา. เกา เลอ_ ปือนอฮ ฌางัน ลาฆู มืออูปัย_ ลาฆู ฮอย เตด บือฆูนา ซือมูฮา. เกา เตด บราดู_ กือวาซา บรี ลาฆู บาฌิ นะ ตูฮัด_ ปี ซาลัฮ ฌาลัด. 11กะฆีเตอ_ ตางัน นะ ตูฮัด บือซัยํ นะ ฮูโกบ เกา_ บูวัจ บรี เกา มาตา บูตา_ นะ ลีฮัจ เตด บือฆารี ซายา มาตาอารี_ ซา วะตู.”

ดัดดัด_ มาตา นะ เอลีมา บือดาบู ดัฮ. ญา มือราบา ปี มาแรฮ_ ซารี ซือมียา ซืออูรัก นู นะ ตูโตด ญา. 12กาลา ฮูลู บาลัก ลีฮัจ ลาฆู อีนี_ บารู ญา ปือจายา. ญา เตอ ปือและ ฮาตี_ เดะ ปือมือเลา นะ ตูฮัด.

เปาโล ฌางัน บานาบัด ปี กะ อันตีโยก เดะ นังฆรี ปิซีเดีย

13เปาโล ฌางัน ลูมอฮ นะ ญา_ ญาแญะ กาปัน เดะ ปาโฟ_ ปี กะ ตือเปด ปรือกา_ เดะ นังฆรี ปัมฟีเลีย. ปัจ อีตู_ โยฮัน ตีงัน กูญา_ บาลิ ปี กะ นังฆรี เยรูซาเลม. 14กูญา ตรือเบะ เดะ ปรือกา_ ฌาลัด ปี กะ อันตีโยก เดะ นังฆรี ปิซีเดีย. เดะ อารี บราดู กรือฌา กูญา มาโซะ ปี ดูโดะ_ เดะ รูมัฮ บือมุน นะ บักซา ยิว.

15ตานา บาจา ซูรัจ ปือมือเลา ฮูโกบ นะ มูซา_ ฌางัน ซูรัจ นะ ลูมอฮ ซือมียา ตูโดฮ ลาฆู นะ ตูฮัด ดัฮ_ กือปาลา รูมัฮ บือมุน เตอ_ ญา ซูโรฮ ซือมียา ปี_ มือเลา ฌางัน กูญา จะ_ “อาดี บราดี เออ_ ดัฮ กาเญา อาดา ปือมือเลา ปรีงัจ กะ ลูมอฮ ซือมียา_ มาแรฮ มือเลา ปือมือเลา อีตู เลอ.”

16กะฆีเตอ เปาโล บือดีรี_ ลามัย ตางัน_ มือเลา จะ_ “ลูมอฮ บักซา อิซราเอน_ ฌางัน ลูมอฮ อาซิก นู ตูเฮะ กะ ตูฮัด เตอ_ มือนีงัย เลอ. 17ตูฮัด เดะ อาตัซ นะ ลูมอฮ บักซา อิซราเอน อีนี เตอ_ ญา ปีเลฮ โกะ บีลาแก นะ กีตา ดัฮ. ตานา กูญา ดูโดะ ฌาดี ซือมียา นังฆรี อาซิก_ เดะ นังฆรี อียิบ_ ตูฮัด บูวัจ บรี กูญา บือตามัฮ บาญะ. ญา บาวา กูญา ตรือเบะ เดะ นังฆรี อียิบ_ ฌางัน ตางัน นู มือฆัฮ นะ ญา. 18กือมูฮา ปัจ ปูโลฮ ตาโฮด_ ตูฮัด ตาฮัด ปือบูวัจ เตด บาฌิ นะ กูญา_ เดะ ปาดัก ตานัฮ ตูโฮยํ นู ลือฆา. 19ญา บูวัจ บรี ตูโฌฮ บักซา เดะ นังฆรี คานาอัน_ บือนาซา ฮาบิฮ_ บรี ตือปัจ ตานัฮ นะ บักซา อีตู_ ฌาดี ปือซากา นะ บักซา นะ ญา. 20ลาฆู อีนี ซือมูฮา ฌาดี ดัฮ_ กือมูฮา ปัจ ราตุซ ลีมา ปูโลฮ ตาโฮด.

“เดะ บลากัก_ ตูฮัด บูวัจ บรี อาดา ลูมอฮ ซือมียา กรัจ ฮูโกบ กูญา_ ตือดะ รอจ วะตู นะ ซามูเอน_ ซือมียา ตูโดฮ ลาฆู นะ ตูฮัด. 21ตานา ลูมอฮ กูญา ซูกา อาดา ราฌา ซืออูรัก_ ตูฮัด ญา ตืองะ เซาโล_ บรี ฌาดี ราฌา นะ กูญา. ญา เตอ_ นานะ นะ คีซะ_ เดะ โกะ ลูมอฮ บือแนฮ เบนยามิน. ญา ฌาดี ราฌา ปัจ ปูโลฮ ตาโฮด ดัฮ. 22ตานา ตีงัน เซาโล ดัฮ_ ตูฮัด ตืองะ ดาวิด บรี ฌาดี ราฌา นะ กูญา. ตูฮัด บรี ซะซรี ปาซัน ดาวิด จะ ‘กู ดาปัจ ดาวิด_ นานะ นะ เจซี ดัฮ. ญา เตอ_ ฌาดี ซือมียา นู กือนา เดะ ฮาตี นะ กู. ญา นะ บูวัจ ตูโรจ บือกะ ฮาตี นะ กู_ ราตา มาจับ#1ซม 13.14; มปต 89.20.’ ตูฮัด ญา จะ.

23“เดะ อานะ กือมอน นะ ดาวิด อีตู_ ตูฮัด ตืองะ เยซู_ บรี ฌาดี ซือมียา ตูโลก ลูมอฮ บักซา อิซราเอน บรี ลือปัซ. ลาฆู อีนี ฌาดี ดัฮ_ รือมัก ฌางัน ปือมือเลา บือฌาญี นะ ตูฮัด. 24ดูลู เดะ เยซู มาแรฮ ดัฮ_ โยฮัน มาแรฮ มือญาเระ_ กะ ลูมอฮ บักซา อิซราเอน ซือมูฮา_ บรี กูญา บราเลฮ ฮาตี#มก. 1.4-7_ ซาโมจ ลาฆู ซือลับ เดะ อาเย. 25วะตู กรือฌา นะ โยฮัน ซรือปะ นะ ฮาบิฮ ดัฮ_ ญา ตาญา จะ ‘กาเญา อีงัจ จะ_ กู ฌาดี ซาปา#ยน. 1.20,27; มท. 3.11? กู บูกัด ซือมียา อีตู. นี เลอ_ อาดา ซือมียา ซืออูรัก นะ มาแรฮ_ โซะ บลากัก กู. กู นี_ เตด ปาโตจ นะ อูฆัย ปะตาปะ เดะ กากี นะ ญา.’ โยฮัน ญา จะ.”

26เปาโล มือเลา ปูลัก จะ_ “อาดี บราดี เออ_ อานะ กือมอน นะ อับราฮัม เออ_ ลูมอฮ ซือมียา นู ตูเฮะ กะ ตูฮัด เออ_ มือนีงัย เลอ. ปือมือเลา นู จะ_ ตูฮัด นะ ตูโลก บรี ฮีโดะ ลือปัซ บาฌิ เตอ_ ตูฮัด ญา ซูโรฮ บรี ปือมือเลา อีตู มาแรฮ รอจ กะ กีตา นี เลอ. 27ตาปี โกะ ซือมียา นู ดูโดะ เดะ นังฆรี เยรูซาเลม_ ฌางัน โกะ กือปาลา นะ กูญา_ เตด กราลา เยซู ดัฮ. ปือมือเลา นะ ลูมอฮ ซือมียา ตูโดฮ ลาฆู นะ ตูฮัด_ กูญา บาจา เดะ อารี บราดู กรือฌา บีลัก มีงู_ ตาปี ปือมือเลา อีตู_ เตด บือเลฮ มาโซะ เดะ ฮาตี นะ กูญา. กะฆีเตอ กูญา กรัจ ฮูโกบ เยซู_ กูญา บูวัจ บรี รือมัก_ ฌางัน ปือมือเลา นะ ลูมอฮ ซือมียา ตูโดฮ อีตู. 28มีเซ จะ_ กูญา ฮอย ปาซัน นามา_ นู นะ กรัจ ฮูโกบ เยซู บรี มาตี_ ตาปี กูญา มีตา เดะ ปีลาด_ บรี ญา นะ ฮูโกบ เยซู บรี มาตี.

29“กาลา กูญา บือเลฮ บูวัจ ลาฆู ซือมูฮา_ นู อาดา ฆาแรฮ ดูลู ดัฮ ปาซัน เยซู_ เดะ ซูรัจ ปือมือเลา นะ ตูฮัด เตอ_ กูญา อาเมด บาดัด นะ ญา_ ปือตูโรด เดะ กายู ปลีตัก_ บือปี ตานัม เดะ ฆูฮา. 30ตาปี ตูฮัด เดะ อาตัซ บูวัจ บรี ญา ฮีโดะ ปาเระ เดะ มาตี ดัฮ. 31บาญะ อารี เตอ_ เยซู ญา ปลีฮัจ กะ ลูมอฮ ซือมียา อีตู_ นู บือเลฮ ตูโรจ กะ ญา_ ดาตัก เดะ นังฆรี ฆาลิลี_ มาแรฮ รอจ กะ นังฆรี เยรูซาเลม. วะตู อีนี เลอ_ ลูมอฮ ซือมียา อีตู_ มือญาเระ ฌาดี ซะซรี_ ปาซัน ลาฆู นะ ญา_ กะ ลูมอฮ ซือมียา. 32กะฆีเตอ_ กามี มือญาเระ บรีตา นู บาฌิ อีนี_ บรี กะ กาเญา ตาฮู. นู ตูฮัด บือเลฮ บือฌาญี ฌางัน โกะ บีลาแก นะ กีตา_ นะ บูวัจ กะฮามี เตอ_ 33วะตู อีนี_ ญา บูวัจ กะฆีเตอ ดัฮ_ บีดา กีตา_ นู ฌาดี อานะ กือมอน นะ กูญา. ฌาดี จะ_ ญา บูวัจ บรี เยซู ฮีโดะ ปาเระ เดะ มาตี ดัฮ. บือกะ อาดา ฆาแรฮ ดัฮ_ เดะ ซูรัจ มือญาญี ปูฌี ตูฮัด_ ปาซัน นู ดูวา_ นู จะ

“ ‘เกา เลอ_ ฌาดี นานะ นะ กู.

อารี อีนี เลอ_ กู ฌาดี อาโปก นะ เกา ดัฮ # มปต 2.7 .’ ” ญา จะ.

34เปาโล มือเลา ลาฆี จะ_ “นู ตูฮัด เดะ อาตัซ บรี เยซู ฮีโดะ ปาเระ เดะ มาตี_ เตด ดือละ นะ บูโระ บูโซะ ลาฆี_ ตูฮัด บือเลฮ มือเลา กะฆีนี จะ

“ ‘ปือมือเลา บือฌาญี นู บาฌิ โตระ_ นู ตือตู_ นู กู บือฌาญี ฌางัน ราฌา ดาวิด ดัฮ.

ปือมือเลา อีตู เลอ_ กู นะ บรี ฌาดี ลาฆู รือมัก ฌางัน กาเญา # อซย 55.3 .’ ตูฮัด ญา จะ.

35ซาเบะ เดะ ซูรัจ อาซิก อาดา นู จะ

‘ตูฮัด เออ_ เกา ตีเมา นะ บรี ซือมียา นู จรัฮ บาฌิ นะ เกา_ นะ กือนา บูโระ บูโซะ ดัฮ#มปต 16.10.’ ตูฮัด ญา จะ.

36“กรานา จะ ตือกาลา ราฌา ดาวิด เตอ_ ดาวิด ญา บูวัจ ตูโรจ บือกะ ฮาตี นะ ตูฮัด_ บารู ญา มาตี ดัฮ_ ญา กือนา ตานัม ฌางัน ลูมอฮ ญังมูญัง นะ ญา ดัฮ. ญา โปด_ กือนา บูโระ บูโซะ ดัฮ. 37ตาปี ซือมียา อีตู_ นู ตูฮัด บูวัจ บรี ฮีโดะ ปาเระ เดะ มาตี ดัฮ_ ญา เลอ_ เตด กือนา เดะ นู นะ บูโระ บูโซะ เลอ.

38-39“กะฆีเตอ_ ดีบราดี เออ_ กือนา มาโซะ เดะ ฮาตี กะฆีนี เลอ. กรานา เยซู นี เลอ_ กามี มือญาเระ กะ กาเญา จะ_ ตูฮัด นะ อาเกะ ดูซา นะ กาเญา. ปือมือเลา ฮูโกบ นะ มูซา_ เตด บือเลฮ ตูโลก กาเญา_ บรี ลือปัซ เดะ ดูซา มานามา เตอ_ ตาปี ราตา ซือมียา นู ปือจายา กะ เยซู อีนี_ นะ ฌาดี ซือมียา บาฌิ ลือปัซ ดัฮ_ เดะ ลาฆู ดูซา ราตาๆ เลอ. 40กะฆีเตอ กาเญา กือนา ฌาฆา บรี บาฌิ_ ตีเมา บรี ลาฆู นะ บือฌาดี ฌางัน กาเญา_ บือกะ ปือมือเลา นะ โกะ ซือมียา ตูโดฮ ลาฆู นะ ตูฮัด_ นู จะ#13.40 ฮบก. 1.5

41 “ ‘ลีฮัจ เลอ_ กาเญา นู อาฆัฮ ฆือละ.

กาเญา นะ ปือและ ฮาตี_ นะ ฌาฮานัม.

กรานา กู นี เลอ_ นะ บูวัจ ลาฆู เดะ ฮาดัจ นะ กาเญา_

มีเซ จะ อาดา ซือมียา มือญาเระ ลาฆู อีตู กะ กาเญา_

ตาปี กาเญา นะ เตด ปือจายา # ฮบก 1.5 .’ ตูฮัด ญา จะ.”

42ตานา เปาโล ฌางัน บานาบัด ตืองัฮ ตรือเบะ เดะ รูมัฮ บือมุน_ ลูมอฮ ซือมียา ปูโฌะ กูญา_ บรี มือเลา ลาฆู อีนี ปูลัก_ เดะ อารี บราดู_ มีงู ฮือลด. 43กาลา โกะ ซือมียา ตีงัน รูมัฮ บือมุน_ ปี ฮาบิฮ ดัฮ_ อาดา ลูมอฮ ยิว บาญะ_ ฌางัน ลูมอฮ บักซา อาซิก_ ฮาตี บาฌิ_ นู มาโซะ ลาฆู ยิว_ บาญะ ฌูฆา_ กูญา ตูโรจ เปาโล ฌางัน บานาบัด ดัฮ. ดูวา อูรัก อีตู_ ปูโจะ ฮาตี กูญา_ บรี กูญา นะ ฮาระ กือมัซๆ_ กะ ลาฆู นู ตูฮัด ญา ฮาลัย บรี ซือลามัจ.

ลูมอฮ บักซา ยิว บือลาวัด ฌางัน กูญา

44เดะ อารี บราดู_ มีงู ฮือลด_ อาดา ซือมียา มาแรฮ บือมุน_ ซรือปะ นะ ฮาบิฮ ซือนังฆรี_ บีดา นะ ดืองัยํ ปือมือเลา นะ ตูฮัด. 45กาลา โกะ บักซา ยิว ลีฮัจ ซือมียา บาญะ อีตู_ กูญา ดือกี โตระ_ มือเลา ตะอารัฮ_ บือลาวัด ฌางัน ปือมือเลา นะ เปาโล.

46กะฆีเตอ เปาโล ฌางัน บานาบัด ฮาตี บรานี_ มือเลา จะ_ “กามี ฆาโดฮ มาแรฮ มือญาเระ ปือมือเลา นะ ตูฮัด กะ กาเญา ดูลู. ตาปี กาเญา กีปัซ ปือมือเลา อีตู ดัฮ. กาเญา บราซา จะ_ กาเญา เตด ปาโตจ_ นะ บือเลฮ ฮีโดะ ซูโงฮ ซือลาลู. บอฮ_ กามี นะ อาเลฮ ปี ซารี ลูมอฮ บักซา อาซิก. 47กรานา ตูฮัด บือซัยํ เดะ อาตัซ บือเลฮ ปือซัด กะ กามี จะ

“ ‘กู ตืองะ เกา ดัฮ_ บรี ซูโลฮ จรัฮ กะ ลูมอฮ บักซา อาซิก.

กะฆีเตอ เกา นะ ตูโลก_ บรี โกะ ซือมียา ราตา เดะ ดือนียา_ นะ ฮีโดะ ลือปัซ บาฌิ # อซย 49.6 .’ ญา จะ.”

48ตานา ลูมอฮ บักซา อาซิก ดืองัยํ กะฆีเตอ_ กูญา ซูกา ฮาตี_ มือโอจ กะ ปือมือเลา นะ ตูฮัด. ซือมียา ซือมูฮา นู ตูฮัด ปีเลฮ ดัฮ_ บรี กูญา อาดา ฮีโดะ ซูโงฮ ซือลาลู เตอ_ กูญา ปือจายา ดัฮ. 49ลาฆู ปือมือเลา นะ ตูฮัด งรือลา ปี ราตา_ โซะ ซือบือลัฮ นังฆรี อีตู.

50ตาปี โกะ บักซา ยิว เตอ_ กูญา อาโจบ ลูมอฮ นีบีนี ซัยํบือซัยํ_ นู ตูเฮะ กะ ตูฮัด_ ฌางัน ลูมอฮ กีลากี ซัยํบือซัยํ เดะ นังฆรี. กูญา อาโจบ บรี ปรือกัด_ บือลาวัด เปาโล ฌางัน บานาบัด_ โปรฮ กูญา ดูวา อูรัก_ บรี ตรือเบะ เดะ นังฆรี อีตู ราตา. 51กะฆีเตอ_ กูญา ดูวา อูรัก กีปัซ ฮาบู ตานัฮ เดะ กากี นะ กูญา_ ฌาดี ลาฆู กีปัซ ลูมอฮ ซือมียา อีตู.#มท. 10.14 กูญา บือฌาลัด ปี กะ นังฆรี อิโกนียุม. 52ตาปี ลูมอฮ มูเระ_ กูญา ซูกา ฮาตี ซูโงฮ_ ปือนอฮ ฌางัน ซือมืองัจ นะ ตูฮัด.

Currently Selected:

ปือบูวัจ 13: ULBIBLE

Highlight

Copy