Mak 5

Jisas tevamwesa aji ah loah tedi lelen

1Ram mapma almaun sileng ah Galili, li vinini ah Gerasa. 2Jisas baut dini aga. Tevaut ba aji muhural mapma ben niah tevaut dini ut ah ratipmi mete ni iginan. Aji nong ba loah tedi lelen, 3bi tedok nante masen tankin meteni. Aji tei tebulong ah batmuililngi go bat woji bata i jen. 4Tei vahalkawu lengleng nagoah ratok newoji bata wokon bi ngan, ba modok mwesan rotrotvi jen, bi mwelel bwerawera telamet niah tewuh bata wokon. Rowon tei tetkol tokol, gonong bi aji tei tebulong ah batmu leli batti ronga. 5Tei bung bi uteren nagoah tehural dobo masen tankin meteni bi mapma li rep. Modok mwedeng bi mwedasi nokon makjin i vet.

6Tedi nge nawut ba mwigita Jisas, morop mapma ben, bi mwidingdu nokon Jisas. 7-8Bi mwenga ah bwerakte bep nuhu, “Jisas niah kobi Nujun God kawu lengleng. Komapma nuhu komaleli apma mini nana?” Jisas bep nuhu, “Kik loah, kovaut dini aji ahe.” Ba aji nong modoptop bep nuhu, “Lehan God, nam uhleli i kik nuhu kon ba leltean nuhu bwaren nokok modokte.” 9Jisas muhleli ini nuhu, “Ani ham ah itan?” Balu ini bep nuhu, “Hak ah wudelu, gonani gema halkawu.” 10Muhleli rada ini i Jisas nuhu man ba sote loahan dini vini nanong.

11Boni ratti almaun rep nong niah rat vangi ni. 12Loahni nong ram bep i Jisas nuhu, “Kosro gema ban le boni.” 13Rat vep tapmak bi Jisas masro ni ban. Loahni nong rabaut dini aji nong bi raban le boni. Boni nong ba tei ni tevata vakaru. Ram rop mwisip li rep bi rabutwut gabkabarak vale sileng, bi rammuu.

14Goah rat kit li boni nong ram rop selal, bi raban nembep rorop ini ban mini tarutni mapmapma li vinini. Bi mini goah rat wutdihini mapma li hal, bi mapma leko. 15Rat gamupma ben Jisas ba ram gita aji ah loah tedi lelen, tesadok gololote le non vihnian tekabis, bi le bwelakte. Ni sera rat temtaji ini entorah rat kita. 16Goah rat kita, rabep mapma mini tarutni, naleut ah tekap vanokon aji, ah loah tedi lelen bi vanokon boni. 17Rat kita tapmak nong bi rabawo nembep mini Jisas nuhu nemalngi vinina.

18Jisas mamlu bi mwisip li aga, entorah tesip, ba aji ah loah tedi lelen mapma muhleli ini nuhu, “Koleli ba nama suwet jukum.” 19Tehu ba Jisas tebamko tenga, nuhu aji nong nema vante jukun. Jisas bep mini nuhu, “Komul li vininam ben dajim bi temam, bi kobep bwera apma ah Subu teleli mini kik. Bi kobep goah twarem tedok nokon.”

20Tehu ba aji nong mamlu, bi ban salga li Vini Tesangwul, bi bep rorop i apma ah Jisas teleli mini, bi goah rat rongo ba rat wewelip i metajian.

Jisas tevamwesa nujun Jaeras ah dalat, bi aji havin go

21Jisas ban mwetak rotvi teh va almaun. Entorah tevan ba tarutmumu ram mapma nesasabisi dalji, mwatwen teh. 22Aji han ah Jaeras tedi bee, tei ni aji kawunan valin tangroan. Entorah tekita Jisas, bi maiah vatavan le wokon Jisas 23bi muhleli ini tetkol nuhu, “Nujuk ah dalat ba mweras tokol. Kopma bi nelngi ngam lin, metan goah rongnan nokon man gabis bi man mas.” 24Bi Jisas ben jukun. Bwera tarutmumu ram mamlu bi ramruru ban jukun.

25Aji havin tedok, niah daa terop nokon tei sika tesangwul vepnan karu, ah teba mut tenga. 26Rongnan nokon tei tekapma tokol ini. Tevan ben ajinan rasanni halkawu lengleng, bi tenok i non mane, ba non rasan tebasip tenga, tegamdok negawu mwemwetak. 27Terongo vepnan Jisas, bi mapma le masen tarutni, aljukun Jisas. 28Vihninan tesak lelen nuhu, “Tigoah nan dibwiri bwelan nge ba nok rasan man nok dini nana.”

29Mwidibwiri bwelan Jisas, tei vilbwaleh limalen goah tedibwiri ba daa ah terop nokon monok. Bi maililngi nuhu non rasan tenok dini. 30Temui vilbwaleh nge limalen ba Jisas morongo nuhu rowok tegol tevan dini. Bi mwegarabukak bi muhleli i ni nuhu, “Ani itan ah tedibwiri bwelak?” 31Non tarutni rabep mini nuhu, “U apma ba kom uhleli tapmak? Kot ba kita bwera tarutmumu nga i ram dahkuru kik ah.” 32Tehu ba Jisas mwigit rada vali ni, tedongvi aji ah tedibwiri. 33Aji havin bihni apma ah tekap vanokon, bavairu bi mapma le metajian, bi maiah vale wokon Jisas bi bep mwetaknga nuhu tei ni niah tedibwiri. Bi mwatwo leut ah tekap vanokon. 34Jisas bep mini nuhu, “Hojik, nom vihni mwetakngaan teleli ba kot mas. Kovan leut terororong, bi kon bamwesaan dini nom illan.”

35Entongama ah Jisas tevep vehuran nong, ba atnan kasosoni ram mapma dini ut leiman Jaeras. Ram mapma nembep mini nuhu, “Nujum temat, u apma ba kom leli illan mini Sesesrakan ahe?” 36Jisas teba rongte apma nga ah rat vep bi bep mini Jaeras nuhu, “Kon bamtaji tean, ba kon bihni mwetaknga nante.” 37Jisas tebam leli nga nuhu tarutni ramamu van jukun. Tegamut kae Pita nge bi Jemes nuru kisan ah Jon. 38Rat wupngak leiman aji kawunan valin tangroan nong, ba Jisas mwigita goah ratti nedeng. 39Mwesak le val bi bep mini ni nuhu, “U apma ba kamdi nedeng tapmak ah? Aji havak ahe ba teba mat tenga, ba mamju nge.” 40Ramgamdi nemamaplel i non vehuran. Masro tarutni ban wop bi mwatkae teman aji havak nong bi dajin, bi non tarutni ah ni kajil, mwesak ut ah aji havak tetpo iginan. 41Mali aji havak nong vadumre nokon ngan bi bep mini nuhu, “Talita kumi,” meramnan nuhu, “Aji dalat, nambep mini kik nuhu kodumre.” 42Tei vilbwaleh bi mudumre bi bawo muhural. Sikain aji dalat nong tei tesangwul vepnan karu. Entorah apma nong tekap ba rat tetkotkoh tokol ini. 43Tehu ba Jisas maskani dalekte mini ni nuhu ran ba vepte apmaan nong mini aji watwatnende ni. Bi bep mini ni nuhu, “Karuskakte apma mini ba nema kani.”

Currently Selected:

Mak 5: APMA

Highlight

Copy